ZSS Lesson 5: ABRAHAM' UPNA

SINNA 5 October 28 - November 3
ABRAHAM’ UPNA

NIPINI (SABBATH) NITAK LAM October 28

SIMDING TE: Gen. 15: 6; 2 Sam. 11, 12; Rom. 3: 20, 31; 4: 1 - 17; Gal. 3: 21 - 23; 1 John 3: 4.

KAMNGAH: “Tua ahih leh hih upna thu i gen ciangin Thukham a phiat ihi hiam? Hilo hi; a kipsak semsem ihi hi.” (Rom. 3: 31).

Lampi a tuamtuam pan in, Rom. 4 sungah, upna bek tawh Gupkhiatna ngah theihna tawh kisai in, Laisiangtho thugui pite kingakna leh, Pawlpi kipuah phatna a piankhiat theihna lungtang hong suak hi. A taktak in zong tuma kum 500 hun, tu kaal sung pawl mahin, Martin Luther tawh a hong kipan khia, a citak protestant te in a upna tungtawn un nungtolh/nunghei sawm dek lo uh hi.

Sianthona leh gamtat hoihna tawh a kidim Abraham nuntakna tungtawn pan in Paul in gentehna tawh, laisim mite a kua mapeuh in, thukham zuihna hang a hi lo, hehpihna bek tawh gupna ngah theihzia a hong gen ciangin, tel lah ding hong om nawn peuhmah lo hi.  Mikhat in ahoih pen gamtatna leh, thukham zuihna te in Pasian mai ah diktanna ngah thei lo a hih leh, bang lametna nei thei nawn ding ihi hiam? Abraham mahmah in zong hehpihna bek mah tawh diktan theihna a ngah a hih leh, Jew te tungah ahi zongin Gentile te tungah zong tua bang mah hi ding hi.

Rom. 4 sungah, Paul in Gupkhiatna ngimna sungah kalsuan zia ding a thupi kal 3 hong pulak hi. (1) Pasian thupha ngah theihna ding kamciamna (Hehpihna kamciam), (2) tua kamciamna tawh kisai in mite in a dawn kikna (Upmuanna tawh dawnkikna) (3) Thu-um mite tungah Pasian in Midik a suahsak zia pulaakna (Diktansak theihna) cih te ahi hi.  Gupkhiatna tawh kisai in Pasian in hih kalsuan 3 te tungtawn in a sep mah bangin eite tungah zong tua bang mahin a hong sem ahi hi.

Paul a dingin Gupkhiatna i cih in, hehpihna hang bekmah hi a, eite in zong bangzah takin i kilawm loh hangin, eite tungah a hong piak mah ahih zia i phawk ding hong deih hi. I ki lawmpih ahih khak leh zong, eite in leiba anei ihi ding hi. Tua bangin leiba anei ihih leh, a khawnkhawnga hong piak hi nawnlo dinga, leibat hong hi lel ding hi. A siacip leh a puuk khin leitungmi eite a dingin Gupkhiatna in a khawnkhawng/letsong ahih kul hi.

Upmuanna bek tawh Gupkhiatna i ngah theihna tawh kizui in, kician takin alah khiat theihna dingin Paul in Piancilna sung dong hong lutpih kik a, Gen. 15: 6, bulphuh in “Abraham in Topa um ahih manin, ama muanna Topa in midik (dikkisaktheihna) in ciamteh hi”ci hi. (NIV). Tua a hih manin, Upmuanna hangin Diktansakna pen, Laisiangtho sungah a masa penpen laimai te ah kihel khin zo hi. 

NIMASANI (SUNDAY) October 29
THUKHAM

Rom. 3: 31 sim in. Paul in a deihna bang hi ding hiam? Hih thu tawh kisai in ei Adventist te adingin bang hangin thupi hiam?

_____________________________________________________

Hih Laisiangtho mun sungah Paull’ a gennop thu in, upmuanna in Pasian’thukham beisak/amawkna suaksak lo ahih zia lim gen mahmah hi. A hi zongin, thukham a zuite leh, Laisiangtho Lui buppi sunga thukham a zui mite khempeuh te in, tua thukham hangin cikmah hun in ah, Gupna ngah lawh ngei lo uh hi. Laisiangtho Lui hun lai a om biakna te in ahi zongin, Laisiangtho thak hun sung ahi zongin, Upmuanna hangin mimawh tungah a hong kipia Pasian hehpihna hang bekbek mah a hi den ahi hi.

Rom. 4: 1 - 8 sim in. Laisiangtho Lui hun lai in, Gupkhiatna in thukham zuihna hang’ hi lo in, upmuan na hang ahih zia hih mun in hong bang ci lah hiam?

Hih Laisiangtho Lui sunga, a kigen zia tungtawn pan in “Abraham in Pasian um ahih man in, midik in kiciamteh ci hi.” Tua ahih manin, Laisiangtho Lui mahmah in, Upna bek mah tawh dikna ngah theih zia hong hilh hi. Tua hi a, “Upna in thukham beisak/kimanna neisak lo hi” aci nuamte a khial ahi hi. Upna tawh Gupkhiatna ngah theihna pen Laisiangtho Lui mun tampi sungah kihel hi. Laisiangtho Lui bup sungah Hehpihna thu limsin khak mahmah uh hi. Gentehna in: Biakbuk nasepna khempeuhte in, mimawh khat hotkhiatna angah theihna dingin, amau aitang dingin a si ganno hang hi lo in, amau leh amau a kihon khia ding hi leh, bang thu a hong piang zen tam?

Hehpihna a om lo hi leh, Bathsheba tawh a mawh David in bang ci bangin maisakna ngah cih te koi ci bangin telgen thei ding ihi hiam? Amah (David) in thukham a zuihna tawh hotkhiatna a ngah hi lo kha ngel ding hi. Bang hang hiam cih leh amah in mawhna tampi palsat hi ci-in ka kawk thukham’ thugui tampi palsat mawk hi. A zenzen in Thukham zuihna tawh David in hotkhiatna a ngah ding bang hi leh, a palsat na te hangin hotkhiatna ngah zo nawn lo ding hi.

Paul in a gennop thu in, A mawhngei David in Pasian maipha angah kik theihna in ama Upmuanna hang ahih zia hong hong theisak nuam hi. Maisak theihna i cih pen Pasian’ hehpihna in a hong sepsak ahi hi. Hih thu in, Laisiangtho Lui sung pan in Upna tawh dikkisak theihna angah na uh tel theihna dingin a kizang gentehna ahi hi. A taktak in zong, thukham a zuinuam Isreal gamsunga, Jew biakna limlim te in atawn tungin hehpihna mah tawh kizom den hi. Thukham bulphuh luatna hehpihna lampiaksak a hih man in bulphuh huai lo hi. 

David in a mawhbawl khakna leh, a ngeina bangin a om kik theihna te lungngai dih in. (2 Sam. 11, 12; Late 51). A dahhuai tua tangthu tungtawn pan in, bang lam-etna hong nei thei sak hiam? A lampial pawlpi mite tungah Pawlpi in bang ci bangin a khoi thei dingin kisin thei ding ihi hiam? 

NINIHNI (MONDAY) October 30
LEIBA AHIH KEI LEH HEHPIHNA?

Hih lai muna Paul in a buaipih thu te in, theology (Pasian thusutna)cih thu bek hi nawn lo hi. Tua thu in, Pasian tawh i kizopna tungtawn pan in Gupkhiatna thu tawh kisai lungsim tawng tawh kisai thu hong hi ta hi. A zenzen in thu-um mikhat in diktansakna leh mawhmai

sakna a ngah ma in, sianthona tawh kisai in dinmun a hoih ciangkhat a tung khin bangin a kingaihsut khak leh, amah leh amah lungsim tawngah ama sepna tawh kisai a kisit kik huai thu ahi hi. Ngah dingin a kilawm masa te ngah lo pi in gamtat a suang biakna in angsung khual biakna vai lua hi.

Tua thu tawh a kileh bulhin, mikhat in Pasian kiang panin a khawnkhong tawh diktansakna ngah ahih na leh, ama kilawm man ahih loh zia leh piaktak cing a hih loh zia kiphawk in, amah leh amah kibulphuh nawnlo in, Pasian’ itna leh hehpihna ah a ki-aap ciangin, tua ama

lungdamna thu in a olzaw ahihna leh, a piangthei thu ahih zawkna kilang thei zaw hi lo hiam?

A tawpna ah, amah leh amah a kibulphuh mikhat leh, Pasian a bulphuh mikhat in, Pasian’ itna leh Pasian zia leh tong, a bang ci bangin kilang sak thei zaw ding ahi hiam? 

Rom. 4:6-8 sim in. A koi ci bangin Paul in Upmuanna tawh diktansakna ngah theih zia hong gen beh hiam? 

______________________________________________________________________________________________________

“A mawh mikhat in Khris kiangah Upmuanna tawh hong zuan dinga, Ama(Khris)hoihna te lenkip in, mawhna a puakhia ding Pa tungah amawhna te aap khit ciang bekin maisakna angah ding ahi hi. Hih thu a piankhiat theihna dingin Leitungah Khris ahong pai ahi hi. Tua ahih manin, a kisik thu-um mawhnei mipa a dingin Khris diktanna hong kibulh dinga, Amah in Siampi nam, Kumpi innkuan sungah a lut hong hi ta ding ahi hi” - Ellen G. White: Selected Messages, book 1, p. 215. 

Tua khit ciangin Paul in, Upmuanna tawh Gupkhiatna ngah theihna pen, Jew mite a ding bek hi lo in Gentile mite a ding zong a hih zia genbeh hi (Rom. 4: 9 - 12). A taktak in zong hih thu i tel theihna dingin Abraham mahmah zong ci leng’ Jew minam sung pan in hi lo a, milim bia innkuan sung pan in ahong khang khia khat ahi hi. (Joshua 24: 2). Ama hun laitak in Gentile minam cih leh Jew minam cihte a kikhen nai kei uh hi. Abraham midik in a kisan laitak in (Gen. 15: 6) amah in Jew mi hihna ahi, vun-aatna zong a nei nai kei hi. Tua ahih manin Abraham in vun-at mite ading in ahi zongin, vun-atlo mite a dingin ahi zongin a PA uh ahi hi. Gupkhiatna in zong mi khempeuh a ding ahih zia Paul in agenteh nop ciangin, Abraham mah bulphuh in na genteh zel hi. Khris hong sihna in, minam leh gam huam tawh kisai lo in, mi khempeuh te a dingin a hong si ahi hi (Heb. 2: 9) 

Singlamteh in mihing khempeuhte a ding ahih zia ahi zongin, Singlamteh in mikim a dingin a manphatna hong lahkhiatna cih ahi zongin ngaihsun kawm in, ci leh nam bulphuhna, ki minam liatsakna, ki-angvan tuamna te bang zah takin lauhuai hiam cih ngahsun dih in? Tua bangin minam feeling neihluatna te kiphawk kawmin, Pasian hehpihna tawh tua bang ngaihsutna te bang ci bangin botkhia thei ding ihi hiam?

NITHUMNI (TUESDAY) October 31
THUCIAMNA

Tuma kum 500 lai tu bang hun pawl in Martin Luther in ama muhkhiat laigual 95 te Germany gama om Wittenberg Biakinnpi kongkhak mai ah hong suang hi. Tuni in i kikup ding thulu mahmah in zong Upmuanna tawh Gupkhiatna ngah theihna thu mah ahih man in, zaknop huai leh lawphuai mahmah ding hi. 

Rom. 4: 13 sungah, “thuciamna” cih leh “thukham” cihte hong tehkaak sak hi. Paul in Laisiangtho Lui bu sung bulphuh in, Upmuanna tawh diktansakna ngahtheih zia tawh kisai in hilhcianna hong nei hi. Jew mite in amaute pupi dingin a ciapteh uh Abraham tungtawn pan in gentehna zangin hong ngaihsun hi. Abraham in diktansakna a hih kei leh santheih dingin a om na pen, a Thukham zuihna hang ahi kei hi. Pasian in Abraham tungah “Leitung a luah dingin” thuciamna a pia hi. Abraham tua thuciamna um ahih manin, tua thutawh kizom thu khempeuh a pom thei dingin kiging hi. Tua tungtawn pan in Pasian’ santheih hong suaka, leitung hotkhiat theihna dingin ama tungah nasem hi. Hih thu in Laisiangtho Lui sung pan in, Hehpihna in bangzah takin sepkhiat theihna nei hiam cih theihtel na dingin a vanglian gentehna khat hong suak a, Paul in zong tua thu mah a hong zang ahi hi.

Rom. 4: 14 - 17 sim in. Upmuanna hangin diktansakna ngahtheihna in, Laisiangtho Bu Lui sunga dingin thu laigil a hih zia, hih a nuai a Laisiangtho mun tungtawn pan in Paul in, hong genbeh hiam? Gal. 3: 7 - 9 sim in.

______________________________________________________________________________________________________

A tunga i gensa mah bangin, i phawk dingin a thupi mahmah thu in, Paul in kuate tungah ama laikhak a gelh hiam cih thu ahi hi. Amau te in Jew thu-um mite ahih banah, Laisiangtho Lui sunga thukham te tawh a lungsim uh a phumcip mite ahi uh hi. Laisiangtho Lui sunga a kihilh thute ahih loh hangin amau te a tamzaw in, Gupkhiatna a ngah theihna dingun amau te in Thukham tawh kisai bangzah takin a hoihin, a hanciam zuihna uh tungah ki-nga hi cih tungtawn pan in a ki lam-en te ahi uh hi.

Hih ngaihsut khialhna a maanloh zia a puahpha dingin Paul in a hanciam na ah, Sinai mual tung pan in Thukham a kipiak mapek in Abraham in Thukham zuihna hang ahi lo, Upmuanna hang bek tawh thuciamna a ngah zia gen hi. (Tua hun lai takin, Torah a kici  Moses gelh khempeuh thukham te leh zehtan Biakpiakna tawh kisai te a om nai kei hi).

A zenzen in Paul in Sinai mual ma in a om khin thu guipi ahi, Thukham Sawm te a tuam gen ahi phial zongin, a deihna kibang veve kha ding hi. Thukham zuihna tawh Pasian’thuciamna te ngahsawm na in, Upmuanna tawh kisai a hemkhia, kizang thei lo tawh a kibang hong hi ding hi, ci hi. Hih thu in a khauh mahmah abat hangin, Paul deihna bulpi in, Upmuanna a thupitna a huutnop na leh Thukham a bulphuhte a mawhsiat nop man hi zaw hi. Mawhsakna tawh kisai a hong lak Thukham tungtawn a hanciamna tawh Gupna ngahtheih sawmna pen, a mawkna ahih zia a hilh dingin Paul a hanciam ahi hi. Eite khempeuh i hi zongin, Jew mite hi ta leh Gentile mite hi ta leh, thukham a palsat vive i hi a, tua ahih manin eite khempeuh in Abraham mah bangin kitangsapna i nei hi. Tua in Upmuanna tungtawn pan in To Zeisu in eite a dingin a hong piak, ahong honkhia thei dikkisak theihna ahi hi. Tua thuman in, Pawlpi sungah ki puahphatna (Protestant Reformation)a hong piangkhia sak thutak ahi hi.

NILINI (WEDNESDAY) November 1
THUKHAM LEH UPMUANNA

Zanni in i sin khitsa mah bangin, Gupkhiatna i cih in thukham zuihna hang hi lo in, a hong kamciam sa Hehpihna tungtawn pan in a hih zia Abraham tungtawn pan in Pasian in a vaihawmna kimu thei hi. Tua ahih manin, Jew mikhat in Gupna angah nop leh amaute in Gupkhiatna angah na dingun a gamtatna uh a bulphuh/ suang na uh pan in khawlsan phot ding uh a, Abraham tunga kamciamna ahi: a hong pai khin Messiah tungah a kingak dinguh leh a up dinguh ahi hi. Tua mah bangin amau “gamtat hoihte” bulphuhna hangun Pasian tawh a kilemsawm mikhempeuh Jew mite hi ta leh Gentile mite hi ta leh a kibangkim tekin i phawk dingin Paul in ahong deihsak hi.

“Mihingte in amau leh amau bekmah in kihonkhia thei hi cih upna pen, Biakna dangte’ thugui let ahi hi. Tua upna alen mun khempeuha mite in mawh bawl theihna a khaktan a om kei hi”. - Ellen G. White: The Desire of Ages, pp. 35, 36. Hih laigual in bang a cih nopna hi ding hiam? Eima gamtatna tawh eimah leh eimah ki honkhia thei hi cih ngaihsutna in bang hangin eite mawhna bawl theihna dingin a hanthawn hong suak thei hiam?

______________________________________________________________________________________________________

Galati Laikhak sungah Paul in, Thukham leh Upmuanna tawh kisai a kizopna hong bangci gen hiam? Gal. 3: 21 - 23.

_____________________________________________________________________________________________________

A zenzen in nuntakna a pia thei Thukham om kha ahih leh, tua Thukham in Pasian’ Thukham hipah ding hi. A hi zongin bangbang Thukham a om phial zongin, Paul in bel Pasian’ Thukham nangawn in zong nuntakna apiak theihloh zia hong gen hi. Bang hang hiam cih leh mi khempeuhte in tua Thukham na palsat khin uh ahi manin mawhsakna thuak khinta uh hi, ci hi. 

A hi zongin, Zeisu Khris hangin, a picing zaw ahong kilangkhia Upmuanna kamciam tungtawn panin, thu-um mi khempeuh tungah thukham’ mawhsakna ahi zongin, tua thukham tawh Gupkhiatna a ngah theihna dingin hanciamna’ vangik ahi, “thukham nuai a omna” pan in suahtak theihna dingin hong pia hi. Upmuanna a hi zongin, Hehpihna ahi zongin a kihel kei leh Thukham in vangik pi a suak hi. Bang hang hiam cih leh Upmuan na a

kihel lo in Hehpihna a kihel loh ciangin Upmuana tungtawn pan in dikkisak theihna kingah thei lo hi. Tua mah bangin Thukham nuai ah om i cih ciangin mawhna hanga vangik te puakna leh mawhna hanga mawhsak thukhenna a thuakna cih nopna ahi hi.

Pasian tawh kalsuan khopna ah, Upmuanna tungtawn pan in dikkisak theihna ngahna in bang zah takin thupi suah hiam? Hih thuman tawh kisai in upna a dangdang ngaisutna atuamtuamte hangin lam i pialkhak loh na dingin koi ci bangin kician takin zang thei ding ihi hiam? Hih Rom laikhak sung thu ahi lo, mundang bang munte ah hi ci bangin kihilhna kimu thei lai ding hiam?

NINGANI (THURSDAY) November 2
THUKHAM LEH MAWHNA

Thuciamna Thak sungah, Thukhamte kiphiatsiang ta hi, ci in a kigenna thu eite in i za thei zel hi. Tua khit ciangin amau te in tua amaute sandante’ a lahkhiat theihna dingun Laisiangtho munte la kawikawi thei uh hi. A hi zongin amaute’ kantelna te in, kician zo tak zo tuan lo a, a thu pai zia leh, theology te tawh kituak thei tuan lo hi.

1 John 2: 3 - 6; 3:4; Rom. 3: 20 te sim in. Hih Laisiangtho munte sungah Thukham leh Mawhna kizop zia hong bang ci gen hiam?

________________________________________________________________________________________________________

Tuma kum zanih khengval hun lai pawl in, laigelhsiam Jonathan Swift (1667 - 1745)a kici pa in, “zudawnna, kikheemna, zuau genna, guk takna cih kammal te pen, Kumpi te’ thukim na leh paliament khensatna tungtawn pan in, manglai sungah Dictionary te sungah guang nawn kei len’g, eite khempeuh in a zingsang i thawhkhiat ciangin a lungduai, a gina, a midik, thuman a itte ahi dingin kitho khia ding hi a cingam kua om ding hiam? ci ngei hi. Hih thu in thudik hi i ci thei diam? - Jonathan Swift: A Modest Proposal and Other Satires, 1995, p. 205.

Tua mah bangin ah, Pasian’ Thukham a kiphiat siang khin bang hi leh, bang hangin, zuau khemna, mi thahna, guk takna te in mawhna suakthei lai mawk hiam? Pasian’ Thukham a kikheel bang hi leh, mawhna tawh kisai in a khiatna zong a kikheel hong kul ding hi. A hi kei leh, Pasian’ Thukham in a beisiang khinta ahih leh, mawhna zong a beisiang kul ding ahi hi.  Hih thu tawh kisai kua in um thei mawk ding hiam? ( 1 John 1 :7 - 10; James 1: 14, 15 sim in).

Thuciam Thak bu sungah Thukham Thu leh Lungdamna Thu anih un kimu thei tuak hi. Thukham in mawhna i cihin bang ahi hiam cih lahkhiatna hi a, Lungdamna thupuak in tua mawhna tawh kisai in damsakna a hi, Zeisu’ shna leh thawhkikna thu ahi hi. A zenzen in Thukham om lo hi leh, mawhna om thei lo dinga, tua bang hi leh bang mun pan in  hotkhiatna kul nawn ding ahi hiam? Thukham a om na hang a bulpi leh a kizat theihna hangin Lungdamna thupuak in a khiatna hong neithei sak tuam hi.

Singlamteh in Thukham kalhna khempeuh hemkhia khin ta hi ci in i za thei zel hi. A taktak in ci len’g man dek lo hi. Bang hang hiam cih leh Singlamteh in Thukham a kheel zolo ahih zia/a beisak zolo ahih zia hong lakkhia zaw hi. Singlamteh tungah Zeisu Khris a sih ma in Pasian in Thukham kheel/beisak lo ahih leh, bang hangin tua sihna nungah khel themthum ding hiam? Thukham palsatna hangin mawhna thaman sanna ding pan in suahtak theihna dingin mihingte’ mawhkhit ciangin banghangin Thukham phiat sansan mawk ding ahi hiam? Tua bang hi mawk leh Topa Zeisu ahong sih zong a kul lo ding suak hi. Topa Zeisu in Singlamteh tungah a hong sihna in Thukham kikheel lo/ kiphiatlo ahih na hong kilang sak hi. Banghang hiam cih leh, Thukham kiphiat veve ding bang hi leh, Singlamteh nunglam  sangin ama lam ah kiphiat siang masa ding hi. Tua hi a, Thukham a kikheel theihloh man in, Zeisu ahong sih a kul hi zaw hi. A puuk khin eite’ dinmun tawh kituak in, Thukham a kikheel thei ding bang hi leh, tua in Zeisu hong sihna in mawhna hanga a hong om buaina a venna ding hi thei lo ding hi.

Nu leh pa mawhna tawh kisai in Pasian Thukham sungah a om lo bang hi leh, tu laitak in tua banga gamh tat bawlsiatna a thuak kha te in a thuakna te uh damtuam tuan mawk ding ahi hiam? Tua na dawn na tungtawn pan in, bang ci bangin Pasian Thukham in phattuamna hong pia thei lai ahih zia hong thei sak hiam? Pasian’ Thukham palsatna in a thu nungah bang ci bang ciang bang hong piang thei cih thu tuak kha ngei nahi hiam?

KIGINNI (FRIDAY) November 3

SINBEH DING: “Na a sem mipa a sep thaman kipia hi. Tua a nasepna thaman pen a thalawhsa ahih manin piakkhongin kingaihsutsak lo hi (Rom. 4: 4). Hih Laisiangtho mun in, Gen. 15: 4- 6) tungtawn pan in Paul in, Upmuanna tawh diktansakna a kingah zia, leh gamtatna a kihel loh zia a tawpkhakna dingin hih Laisiangtho mun buhphuh in a hong telgen na ahi hi. “Ama upmuanna hangin midik bangin kisang hi” cih a masa penpen in a gennop thu hipah hi. Hih kammal in mimawhte tungah Pasian in amau gamtat hoihna hangin hi peuhmah lo in, Hehpihna bekmah tawh hong sang thei hi cih a gensiang na ahi hi”. -Martin Luther: Commentary on Romans, p. 82.

“A zenzen in, Satan in mihingte tungah amaute gamtatna hangin leh, a thupha bawlna te hangun dikkisak theihna a ngah dingin a zol zo bang hi leh, Tua Pa tungah amah in a ze-etna te tawh a gualzo pah dingin kithei a hih manin, ama thang sungah a awksa bangin tuat thei ding hi. Tua ahih manin Kalvary mual tunga a kibua Tuuno sisan na kongbiang tungah na taat ding hi. Tua hi leh, na suakta thei bek ding hi.” - Ellen G. White: Advent Review and Sabbath Herald, Sept. 3, 1889. 

KIKUP DINGTE:

1. Gamtatna hang ahi lo Upna bek tawh Gupkhiatna ngah cih pen bang hangin hi zahtak in thupi mawk hiam? Bang ci bang khialhna tungtawn in tua bang kitelcian na in hong dal thei hiam? Hih Laisiangtho hilhna thuman pan in lam apial kha bang hi len’g a lauhuai bangin hong ngak gige hiam?

2. Thukham zuihna leh thumanna tawh a hong ki honkhia thei lo hi cih i tel mahmah kawm mah in, Thukham a tawntung in a ki mantheihna ahang bang ci gen theih ding nahi hiam?

3. A mimawh i hih laitak mahin diktansak theihna ngah i hihna leh, Pasian maipha ngahtak lo in sang i hihna kithei kawm in, midangte tungah bang ci thukhual thei ding ihi hiam? Eite hehpihna leh maipha angah zo lo midang a hong khial kha te tungah bang ci bangin thukkik sawm nahi hiam?