Zomi Sabbath School Lesson 3: MIHING DINMUN

SINNA 3 October 14 - 20
MIHING DINMUN

NIPI NI (SABBATH) NITAK LAM October 14

SIMDING TE: Rom. 1:16,17; 22 -32; 2:1-10;17- 23; 3: 1, 2, 10-18, 23.

KAMNGAH: “Mi khempeuh a mawh uh a, Pasian maipha a ngah nading uh kisia hi”(Rom. 3: 23 RSV).

Rom Laikhak a gelh tungin Paul in, a thuman mahmah leh, a thuthuk pen Lungdamna thu (Gospel) sunga thu lai-gil a hi; a khasiat huai mahmah mihing te’ dinmun tawh hong pankhia hi. Mawhna hangin Mihingte’ a puuk a kipan in Mihing khempeuh te in mawhna hangin miniin kisuak cih pen, thuman ahi hi. Tua mawhna in akhang akhang in eite tungah hong hencip a, i mit sungah zong a hong luai khin hi mai hi.

Martin Luther in a gelh Rom Hilhcianna bu sungah, ‘Mihing khempeuh in mawhna sungah ki om hi’ cih pen, kha thu tawh et ding hi a, ei leh ei ki-etna leh mite et na hi zaw lo in, Pasian mai ah a dingte ki hi zaw hi. Khat khatte mit muhna ah, mikim khatte in mimawh mahmah in kilang thei a, mikim khat leuleu tungah leh midangte mitmuh ah a midik mahmah in kilang thei zel hi. Mi khatkhat te in midik mahmah dan in kilang khia thei uh hi a mau te in danthuak ding a lau man un leh mite pahtawi ding a ut man-uh hi thei a, a hih kei leh ngiimna khat tawh mite pahtak dingin om uh a, a puatham kihoih sak tawmna tawh hanciam uh hi. A hi zongin amau te in a lungsim tawng’ uh leh lunggulhna tak tawh a kalsuan nuam a hi kei uh hi. Tua ci bangin mihing te in a puatham hoihna mah hanciam uh a, a lungsim sungtawng ah mawhnopna lungsim te leh siatna lunggulhna vive om zaw ahih manin Pasian deih gamtat hoih’ tawh ki gamla hi”. -- --Martin luther, Commentary on Romans, p. 69 

NIMASA NI (SUNDAY) October 15
PASIAN’ VANGLIATNA

“Khris Lungdamna thu hangin ka maizum kei hi. Banghang hiam na cih uh leh, tua thu in a masa in Judah mite, a nung ciangin Greek mite a kipan a um mi khempeuhin Gupna a ngah nading Pasian vangliatna ahi hi. ‘midik in thu-upna (Upmuanna) tawh a nungta ding hi” ci in Lasiangtho sungah a kigelh mah bangin, ‘thuupna dingin thu-upna tawh’ (faith for faith) Pasian dikna a kilang zo hi” Rom. 1: 16, 17 RSV). Hih Laisiangtho mun in nangma tungah bang hong gen hiam? Hih kammal te tungtawn pan in nang mahmah in kamciamna te leh lametna te bang ci bangin mu thei na hi hiam?

_____________________________________________________

1. Gospel: Hih kammal pen Greek laimal pan hi-a akhiatna ah, “a hoih thuthak” cih leh “ahoih thupuak”cihna in kizang hi. Hih kammal bek i zat ciangin thuhoih khempeuh huamkim a, a hi zongin “Khris” tawh a kibulh ciangin, “Messiah tawh kisai in lungdamna thuthak” ki ci hi. ( Khris cih kammal pen Greek lai in Messiah cih tawh kiza kim hi). Tua hi a, ‘Lungdamna thuthak’ i cih ciangin ‘Messiah hong pai dinga, mite in Ama’ sungah upna hangin hotkhiatna ngah ding uh hi’ cihna ahi hi. Tua in Zeisu leh Ama dikna hangin Gupkhiatna kingah thei cihna hi a, Pasian’ thukham te sungah a hi zongin ei leh ei hanciam thu in, aki ngah theih hi lo hi.

2. Righteousness (Dik kisakna): Hih kammal in Pasian tawh a“kilem”cih dinmun tunna ahi hi. Hih thutawh kisai, Rom laikhak sungah a khiatna kidawk mahmah a, mai lamah i sin tohtoh ding tawh kizui in kitel toto ding hi. Rom. 1: 17 sungah “Pasian aa’ hi” ci ngiat hi. Tua hi a, Dik kisakna pen Pasian kiangpan a hong pai hi a, a dikkim Pasian ngiatin a hong vaihawm sak ahi hi. I theih tohtoh ding thu ah, a kician Dik kisakna tungtawn bek in Nuntak tawntungna kamciam a kingah zo bek ding  ahi hi. 

3. Faith (Upmuanna): Greek kammal sungah “believe”(Upna) cih leh “Faith” (Upmuanna) cih bangin na  om a, sepkhiatna tawh kizui in “pisteuo” (believe=upkhiatna) leh, i hihna ngiat a genna ah “pistis”(Faith or Belief=Upmuanna) ci in nam nih tawh kilet thei hi. (Mangkam uukte a ding in a masa zaw pen “Verb”sepkhiat ding hi a, a nihna pen “Noun” i hihna ngiat genna hi) Tua Upmuanna (Faith) tawh Gupkhiatna a kizop zia Rom Laikhak i sinna tungtawn pan in, i mu toto ding hi.  

Gupna thu ah khamuanna, kitel cianna (assurance) thu tawh kizui in, buaina na nei ngei hiam? Gupna kitel cianna tawh kisai in, nei khin maw nei nai lo cih dotna te na tuak kha ngei hiam? Tua thu te hangin launa leh kimuan mawhna na nei kha hiam? A hong dongte in zong bang thu tawh kisai in bulphuh uh hiam? Na Upna tawh kituak in zong na nuntak tawh a ki lehbulh pi khat na hi hiam? Zeisu sungah kitel cianna leh kamciam nate a kip theihna dingin bang ci bangin na nuntakna sungah teel ding nei na hi hiam?

NINIH NI (MONDAY) October 16
MI KHEMPEUH MAWH KHIN

Rom. 3: 23 sim in. Hih sunga thupuak in, tuhun ei Christian sunga thu-ummi khat adingin bangzah takin zuih ding up dingin baih a hi hiam? Tua mah bangin hih thupuak sung thumaan tawh kisai mite in a hong dot khak leh bang phattuam lawh thei ding uh hiam? 

______________________________________________________

A lamdang thu khat ah, mikim khat te in Mihingte’ mawhna tawh kisai in to’na khat nei thei uh a, amau te in Mihing te pen a bul takin kankhia leng’ hoih kim lel uh hi, ci in seel thei uh hi. Hoihna taktak (true goodness) aki theihtel loh manin hih buaina a hong piang khia zong ahi hi. Mi khatkhat te in midangte tawh a kiteh uh ciangin hoihzaw kisa kha mah ding uh hi. Bang hang hiam cih leh eite in atawn tungin, eite sangin a sia zaw te tawh a ki tehkaak te kihi hi. Tua in hoihnopna hong guan lo hi. A hi zongin a hoih kim Pasian’ sianthona leh dikna te tawh i ki tehkaak tak ciangin ei leh ei i kihhuaina te leh bangmah i hih loh zia kimuh theihna hong nei sak hi.

Rom. 3: 23 sunga “Pasian maipha”(glory) ngah theihna cih kammal in, a khiatna tuamtuam om thei hi. I telbaih pen theihna dingin 1 Cor. 11: 7 sungah “Pasalte pen Pasian’ lim leh a minthan’na a kilangsak” ci hi. Tua a hih manin Greek kammal sung pan in a kila “Glory” cih pen, “lim leh meel sun” (image) a cih nopna zong a hi hi. Pasian lim leh meelsutna khempeuh mawhna in beimang sak, susia gawp hi . Tua ahih manin Leitungah mawhna a hong lutna hangin Pasian melsutna lim leh meel a hih kei leh, a maipha ngah na pan in tuamawhna in hong khen khia ta cih nopna hi pah hi. 

Rom. 3: 10 - 18 sim in. Tu hun tawh bang teng ki lamdang na sa hiam? Bang mun in nang hong kawk pen sa na hiam? Na nuntakna sungah Khris hong om lo bang hi leh, nang zong bang dinmun hi ding na hi hiam? 

____________________________________________________________________________________

I dinmun bangzah takin a sukkhin a hi phial zongin, lametna a beikhin hi sam lo hi. A masa pen i kalsuan ding ah, ei leh ei kuamah in kihuh tawm thei lo i hih zia kiphawk in, eite mawhna tek ki pulaak in, ei leh ei bangmah i hih loh zia kithei thei phot ding hi hangh. Tua kalsuanna in, Khasiangtho nasepna hi a, ei leh eite khialhnate’ kiphawkna hong nei thei sak hi. Mawhnei mikhat in Kha-siangtho a do (a khaktan) sawm kei nak leh, tua Khasiangtho in ama tungah, a ki diksak tawmna te, a kineih-khemna te, a amah leh a mah a kihuutna te, hong paihkhiat sak dinga, Khris ahi Zeisu ii hehpihna leh itna sungah hong ki phuum ta dinga “Pasian aw, kei mimawh mi khialpa hong hehpih in” (Luke 18: 13) ci khia ta ding hi.

Na gamtat luhekna, na nasep hoihna te leh na ngaihsut siamna te hangin, nang leh nang hoih na kisak, pha na kisak, vaam na kisak na te bang hunte ahi hiam? A lungkham huai mahmah dinmun hi mawk lo hiam? Bang tungtawn bekin lametna hong guan hiam? 

NITHUM NI (TUESDAY) October 17
KHANTOHNA MAW?

Kum zalom 20 sungah a kilut tak ciangin, Mihing i hihna limlim hong khangto mahmah a, Lungsim pianzia ngaisutna te hong sang semsem hi. I neih setvan te leh na a tuamtuam te sinna te-in, i ngiim i geelna, i sunmang khempeuh hong lawhcing sak hi. Mihing limlim te zong hoih kimna (perfection) ki manawh semsem hi. Pilna siamna te’ tung tawn panin leh, gamtat hoih sinna te tungtawn panin mihing te in, khantoh lam manawh uh a, amau aituam leh kim leh paam a dingin kizang thei semsem uh hi. Tua bangin ahon ahon in khantohna in

kum zalom 20 sungah, Leitung kalsuan zia a thak hong kipan sak thei hi.

Atak takin ah kamsiatna tawh, a tunga thute a hong piang khol kei hi. Hi mah lo hia? Kum zalom 20 i cih in thukhualna om lo in hiamgamna leh gamtat hoih leh a kilawm a zang thei nailo mi namhai pawlte om bangin i om zaw mawk hi. Pilna siamna a khantoh mah bangin mi kithah na ding lampi hoih zaw kimu toto zaw a, a beisa hun lai a i ngaihsut khak loh haina gamhtatna vive te in hunthak kimuak to zaw hi.

Bang hang hi mawk ding hiam? Gen mawkmawk dingin thu haksa pi khat hi mawk hi. 

Rom. 1: 22 - 32 sung sim in. Kum zalom khat-lai a kigelh thu te in, kum zalom 20 ading in bang ci bangin a hong kilat khiat dan mu thei i hi hiam?

_____________________________________________________

_____________________________________________________

Christian i hihna tawh kizui in, ei te in Upmuanna tawh i up ding honkhat i nei hi. Tua te sung pan in, a si mite thawhkikna, nihvei kumkikna, vanthak leh leithak cih te ahi hi. A hi zongin upmuan na tawh a up theihna dingun a puuk khin mihing sungah a kuate hi mawk ding hiam? Tu khang hun ah, ei te khempeuh in mawhna hangin puukna’ huzapna sungah a kiteeng kihi mawk hi. 

Rom. 1: 22, 23 sung limtak in ngaihsun dih in. Hih bang thu tawh kisai in, tuhun ah bang ci bangin hong kilang khia in mu na hi uh hiam? Ei khanghun sungah hong piangsak Pasian ki nawlkhin ta a, milim peuh kibia zaw ta hi lo hiam? Tua bang hihna in bang ci bangin a hai mahmah suak sak thei hiam? Kikum khawm un.

NITHUM NI (WEDNESDAY) October 18
JEW TE LEH GENTILE TE’ KIBAT NA

Rom alian khat sungah Paul in Pasian a um lo Gentile te’ mawhna te hong pulaak hi. Amau te in a beisa hun lai in Pasian tawh kigamla uh ahih manin a sia mahmah gamtatna sungah a kia te ahi uh hi. 

Tua mah bangin a mipih Jew minam te zong a dawm tuan kei hi. Amau a dingin phattuam na a kipiak hangin  (Rom. 3: 1, 2), a mau te in mimawh te mah hi uh a, thukham a palsat te, Zeisu sunga om a honkhia thei Hehpihna a kisam mahmah te mah ahi uh hi. Mawhnei mite a hih tuakna uh tawh kizui in, Pasian’ thukham a palsat te leh Pasian kiang panin ahong pai Gupkhiatna a ngah theihna dingun Hehpihna a kisam te mah ahi uh hi. Tua ahih manin Jew te leh Gentile te in a ki lamdan na om tuan lo hi.

Rom. 2: 1 - 3, 17 - 24 sim in. Paul in a langpan bang ahi hiam? Hih vauna pan in, eite khempeuh Jew hi ta leh Gentile te hi ta leh, bang thupuak hong gen nuam ahi hiam?

__________________________________________________________________________ ____________________________

“Pasian a thei kha lo milim bia khempeuh te mawhnei mi te a hih zia uh a suut khit ciangin Paul in, a tuam vilvel in leh, uangtak in Jew mite mawhsak hi. Bang hang hiam cih leh, amau te in apuatham ahi, a kigelh lai tungtawn bek tawh thukham zui uh a, a lungsim takpi (Kha)tawh a zui kei uh hi.” --Martin Luther: Commentary on Romans, p. 61.

Khat veivei ciangin midangte mawhna muhkhiat ding, kawk dingin baih lamdang hi. A hi zongin eite in zong tua bang mawhna mah a bawlbawl ki hi veve thei a, a maute sangin zong kisuuk zaw thei lai hi. A buaihuai thu in, ei leh ei mawhna ki muhmawh bawlin, a hih kei leh, ei te in midangte tawh i ki tehkaak tak ciangin amau te a sia mahmah danin ki mu kha thei hi. 

Paul lungsim tuadan hi lo hi. Gentile te’ khialhna hangin amaute’ tungah mawhsak thu a khen pahpah lo dingin vauna pia hi. Teeltuam a kici Jew te mahmah zong mimawh a hihna uh lak hi. Bangbang hi ta leh, Gentile te sangin Jew te tungah khuavak ki limpiak zaw a hih man in mite a mawhsak nopna lungsim te uh a manlang luatna hangun, tua milim bia te sangin a mawhna uh suuk zaw ahih zia pulaak thei zel hi.

Paul in a genna ah, mi khempeuh in dik kimlo uh a, mi khempeuh in kha lam dinmun ki picing zo lo ban ah, akua mahin a hoihsa in kipiang lo a, kuamah in a siangtho sa in suakkhia lo hi, ci hi. Jew hi ta leh Gentile hi ta leh, hau ta leh zawng ta leh, numei hi ta leh pasal hi ta leh, Pasian a zahtak te hi ta leh, Pasian a nialte hi ta leh, eite khempeuh in mawhsakna a thuak te ihi hi. Lungdamna thu tungtawn panin, Pasian hehpihna hong kilang khia lo bang hi leh, eite khempeuh te a dingin lametna om vet lo hi.

Bang zah vei bang, nang leh nang mawh kisakna tawh kisuang giugiau kawm sa in, na lungsim sungtawng pan in mite na mawhsak kha ngei hiam? Paul kammal te ngaihsun, awlmawh bawl kawm in, bang ci bangin kikheel thei ding nahi hiam? 

NINGA NI (THURSDAY) October 19
LUNGDAMNA THUPUAK LEH KISIK KIKNA

“Pasian migi-in thu a diah hithiatna pen na kisikkik theihna ding uh a deihna ahih lamtak phawkkha loin, a migitna, a lungduaina, a hong thuaknate neu ngaihsutkha na hi uh hiam?” (Rom. 2: 4). Kisik kik theihna tawh kisai dotna tawh kisai in hih Laisiangtho in bang thu hong gen nuam ahi diam?

____________________________________________________________________________________

Eite’ phawk ding thukhat in, Pasian hoihna, migitna in mimawh khat kisikkik theihna ding hong zuan sak hi. Pasian in thagum hatna tawh mite kai lo in,a hih hamtang dingin phuut lo hi. A mah pen, a lungkia ngei lo, a lungduai mahmah khat hi a, a ma itna tawh mite a kaih sawmpa hi zaw hi. Thagum hatna tawh kisik theihna ding in hanciamna in , a kisik nuam lo te a dingin, kisik theihna maan taktak ngimna’ susia hi. Pasian in a thagum hatna tawh kisik theihna a zang bang hi leh, mi khempeuh te in hotkhiatna ngah lo ding uh hi. Bang hang hiam cih khatkhat te pen sawl zo kha thei mah dinga khatkhat te pen sawl zawh ding hi lo thei ding hi. 

Kisik-kikna maan pen, lungsim tawng pan in lunggulhna hi dinga, nuntakna sungah Khasiangtho sawlna tungtawn pan in a hong piang ding thu ahi hi. Atak takin ah, kisik kikna in Pasian letsong’ hi a, a hi zongin, tua letsong a ngah dingin eite in, a teel dinign i kiginna

tungtawn pan bekin a kingah thei ahi hi. 

Pasian’ Itna a langpan’ te, kisik kik theihna a nial te, a thumang nuamlo te tungah bang thu hong piang ding ci hiam? Rom. 2: 5 - 8.

____________________________________________________________________________________

Rom. 2: 5 -10 sung leh, Rom laikhak bu sungte ah, Paul in gamtat hoihna tawh kisai limgen in bulphuh pha mahmah hi. Thukham zuihna hang tawh a hi lo, Upna bek tawh Diktan sakna ki ngah thei hi a cih ciangin, Christian nuntakna sungah gamtatna kisam nawn lo hi cih bangin a khiatna kikhia gai khin thei lo hi. Gentehna in Rom. 2: 7 sungah, Gupkhiatna sung’ kalsuanna tawh kisai in, “lungduaina tawh gamtat hoihna a zong mite” tungah na ci se hi. Mihingte’ hanciam na tawh Gupkhiatna a ki thalawh zawhloh hangin, Gupkhiatna ngah theihna ding kalsuan na bup sungah lam khat pan in a mapang pi khat mah ahi hi. Mikhat in Laisiangtho a simna tungtawn pan-in, sepna leh gamtatna te a thupi na hi kei mawk ei! cih ding abaih na hi lo hi. Kisikna maan i cih in, Lungsim tawng’ pan in lunggulhna takpi tawh ahong phulkhia hi a, kisik ding a kul khempeuh kisik nopna lungsim leh khensatna tungah pan in gualzawhna hong om dinga zong tangtung pih takpi ding uh hi.

Na kisik theihna dingin kisik nopna lungsim bangzah vei bang nei ngei nahi hiam? A kisik nuam takpi mah nahi hiam? A hih kei leh na khialhna, na thaneem na, na mawhna te a sing khia pak nuam bek nahi hiam? Tua bang a hih khak leh zong, bang ci bangin kikheel takpi thei ding nahi hiam? Bang hangin kikheel taktakna kisam ahi hiam?

KIGIN NI (FRIDAY) October 20

SINBEH DING: “Tua ahih manin, Laisiangtho sunga kammal zat te tungtawn pan in, mihingte tungah mawhna a hong piankhiatna pen, phawkkhak loh na vat hanga a hong om hi lo a, mihingte in, a gamtat ngiat uh leh, a teelna tungtawn pan in a hong piang ahi hi. Tua banah, mawhna i cih pen hoihna kihello cihna hi pah lo a, Pasian in a lam-etna te a tangtung lo hi, cih ding ahi hi. Mihing te in tua bangin siatna kalsuan na ah, a tawn dingin a sawm ngiat uh ahi hi. Mihingte in mawhna pen a nawllah dingin thaneemna tawh a kidim ki hi sam lo hi. Mihing te ngiat mahin, a sawmngiat na tungtawn pan un, Pasian a langpang ding in, Ama’ thukhamte a palsat dingin leh, Pasian kammalte a kizak mawh bawl dingin a sep ngiat uh ahi hi. Mawhna i cih pen, Pasian in a hong sehsak thu khat tungtawn pan in a khengval in kantan in hanciam sawmna ahi hi. Tom kaih ni! Mawhna i cih in Pasian langpanna ngiat ahi hi”. - The Handbook of SDA Theology (R& H Pulblishing Association, 2000) p. 239.

“Leitung’ dinmun in a lauhuai a hih zia keima tungah a hong kilak hi. Gamtat siatna bekbek in mun khempeuh ah kizeel hi. Nu leh pa lam-ah kidop zawhlohna in tu khang hun a dingin a tuamdiak mawhna ahi hi. Hih zah taka hangsannate, tu khang hun lo in om ngei lo hi. Mihing te’ ngaihsutna te pe-eng lua ta ahih man in, tua bang siatna te in, lungsim leh gamtat hoih deihhuaina te khim khin ta hi. Siatna i cih te in, thu-um lo mite leh mi zahpih theite kiang bekah a om a hi kei hi. Tua te tawh zong i ki lamdanna hi nawn lo hi. Christian hi ing, a kici mi tampi te nangawn mawhna sungah ki om hi. A hong paikik ding a lam-en mitampi tak te in, tua ni a dingin Satan sangin zong kiging zo nawn lo uh hi. A maute in siatna sung panin ki siansuah nuam lo uh hi. Amau te in si leh sa lunggulhna sungah sawt veipi kidiah lua khin uh a hih manun, a ngaihsutnate uh siang thei nawnlo in, a geelna khempeuh uh sia zaangawp ta hi.”- Ellen G. White: Testimonies for the Church, Vol. 2, p. 346.

KIKUP DINGTE:

1. Kiginni sunga kigelh Ellen G. White, kammal te lungngai kik in. Hih zahtak a siatna lak ah, Pasian kamciamte ahi: amasa in a hong maisak theihna leh a nihna ah, a hong siansuah na te tungtawn pan in a lungkiat huai lo a hih zia bang zah takin thupi ahi hiam? Khat veivei ciangin: Ki manna nei nawn keng e; kei suuk lua khin zo ing; honkhiat dingin zong cihtak nawn keng; lungkia khin ta lel ing! a ci te tungah Zeisu in a na gen ngei, “Ken zong kong mawhsak kei hi; Pai in la mawh nawn ken! (John 8: 11)a cih thu mah ngai zaw ding maw? Lungkia zaw ding?

2. Bang hangin Christian te in mihingte mawhna leh siatna te i tel dingin thupi ahi hiam? Tua siatna hangin a lungkiat huai na te i telkhialna hangin bang dinmun kitung thei hiam? Adah huai mahmah dinmun hi thei na pi, a piang thei takpi mah hi mawk lo hiam?

3. Protestant thu-um takpi tampi te in, a upna uh a nusiat uh sangin a sihngam zawkna te uh ngaihsun kik in. Na Upna sungah bangzah takin khauh na hi hiam? A si ngam zah dong dingin na um takpi mah hiam?