ZSS LESSON 13: LUNGDAMNA THUPUAK LE PAWLPI

LESSON 13 September 16 – 22

LUNGDAMNA THUPUAK LE PAWLPI 

NIPI NI (SABBATH) NITAK LAM September 16

SIMDING TE: Gal. 6: 1 – 10; Mat. 18; 15 – 17; 1 Cor. 10: 12; Rom. 15: 1; John 13: 34; Luke 22: 3.

KAMNGAH: Tua ahih ciangin hunhoih i ngah simin midangte tungah a hoihin i gamta ding a, a diakdiakin thu upna sungah i innkuanpihte khempeuh tungah i hoih gamtatding i phawk ding hi (Gal. 6: 10).

Lokho mi te in lo a hong khawh uh ciangin, gah leh teh te sung pan in a gol tata te siit uh a, a neu zaw

deuh te a khaici tuh dingun hong suan uh hi. Anlaak kuan tak ciangin, lungkiat huai takin, a anlaak uh hong kiam gawp in a khaigah mahmah ung a neu nono bek hong pha hi. Tua bang tuahsiatna hangin Lokho mite  in a thupi mahmah nuntakna dingin a kiam thukhun hong thei khia ta uh hi.

“A mau te in a nuntakna ah a hoih penpen te ngahzo lo uh a hih manin, a cianlai te bek khaici dingin siit uh hi. Tua hi a nuntakna thukhun in, na vawh bangin na aat ding hi cih cih thaman sang uh hi.” “Thudang khat pan-in, Khaici neu tuhna pen mun khempeuh ah kizang mahmah khat hi lai hi. Eite in

aituam nuntakna phattuam na ding bek ngaihsutna tawh a lian ta ta I keem a, a cianlai te bek khaici dingin i zang nuam hi. Tua bangin a haihuai paulap tawh kha lam thukhun sungah lam-etna lianpi I nei kha hi, tua lam-etna in, eimah in angsung khualna tawh I tuh khaici pen angsung a khuallo thaman I thalawh nuam hi.” – International Student Fellowship Newsletter, March 2007.

Hi thu tawh kizawitawn in Paul in, Gal. 6: 1: - 10 sungah hong bulh hi. Pawlpi mite in “gamsa bangin

khatlekhat kiphuai-in kipet” (Gal. 5: 15) liang sangin, Khasiangtho ki makaih sakna tawh, eite kikhual sangin midang te i khual ding hong hanthawn hi. Hehpihna hang bek tawh Gupkhiatna i ngah zia kiphawk in midang te tungah kiniam khiatna, lungduai zawkna, leh lai-natna tawh na I sepsak ding hi zaw ci hi.

NIMASA NI (SUNDAY) September 17
PUUKNA PAN IN KI DOMKIK

Paul in Christian nuntak zia (Gal. 5: 16) sangtakin a lam-etna tawh Galati khua a om thu-um mite thangah takin lawp mahmah na tawh hong hanthawt hi (Gal. 6: 1). A picing mihing ki om lo mah a, a kipia ma hmah Christian te nagawn khialhna tawh ki talawi lo uh hi. Greek kammal in Gal. 5: 16 sung thu ah, nikhat ni tak ciangin tua a lam-etna bang lian in Pawlpi sungah a piang dingin muhkholna aneih na thu na gen hi. Tua a hih manin in Paul in Galati Pawlpi te kiangah, a piang takpi ding vaikhakna tawh tawh bang dinmun a hong tun takpi leh bangci om cih tawh kisai a thuhilh na ahi hi.

Christian khat a dingin, I thu-uppih te khatin mawhna gamtatna te sungah akiat khak leh bang ci bangin kalsuan pih ding cih hong hilh hiam? Gal. 6: 1; Mat. 18: 15 – 17.

_______________________________________________________________________________

Gal. 6: 1 sunga Paul in a hong cianpiak na tawh kizui in, Hih vai tawh kisai in Paul in, athu buai na uh kician takin tel hi cih, i lungsim ah phawk ding hi hangh. Hih Paul kampau na sungah, ama sa lam laigual ah kidawk kammal 2 te sungah, “man” cih a khiatna in “kankhia ding” “ ma-khelh” “lamdangsa”cihna te in ki zang hi. Tua bang tawh a thupai zia a ki bang dektak, a hi zongin tuazah a mawhna a hi khol lo, hih Gal. 6: 1 sunga kammal tungtawn pan in Paul in a lungsim sungah ngaihsutna nam nih ngei kha ngel ding hi. Tua in, thu-um te bek zong ahi khin tuan lo mikhat in, thu-um midang khatin a gamtat khialhna khat a va “pha-awng” (man) khak tak ciangin, tua a mawh pa in, a mawh loh zia a kipheh khak leh (Pau. 5: 22), tua a mu pa in a kihep le l ding hoih hi.

Tua tawh a kibang, khialhna tawh kisai a hong gennop na a dang khatin, tua mawhna te kician taka kankhia ding cihna lam kawk lo hi. “Khialhna” ahih kei leh “mawhna” cih kammal te in Greek lai tawh “paraptoma” hi a, a khial ding maha angaihsun tinten khita mawhna cih lam hi zaw hi zaw lo in, bawlkhialh pakna, pal kha pak, hih khial pak cih lam kawk zaw hi. A nungciangin a laigual in, a hong zop “Khasiangtho sungah kalsuan na cihin a masa laigual ahong theisiam sak hi. A hi zongin mawhna abawl mikhat khialhna maisiang sak ding cihna zong om tuan lo hi, Paul in a hong kuppih nop a thu paizia zaw in, (1 Kor. 5: 1 – 5) sung a thupiang dan buaina a hi kei hi.

Tua bang dinmun hong tun ciangin dantatna ahih zongin, mawhsakna ahi zongin, Pawl sung pan in hawlkhiatna cih bangin gamtang lo zaw in, dipkikna (puahphat sawm na) tawh huh zaw ding hi hangh. Greek lai in “puahpha kik” (Katartizo) cih a khiatna in “khui tuahkik” “a ngeina bangsak kik” cih na ahi ih. Thuciam Bu sungah tua kammal a khiatna in, a ngente uh “khui”(Mat. 4: 21) cihna in kizang hi. Greek kammal sungah, a ki tankhia guh leh tangte zom kik/lem kik cih a khiatna nei hi. Tua bang mahin Zeisu sungah a kituk na hangin a khe a kitan khat, nusia lo in Zeisu sunga pumkhat i hihna tawh kizui in, tua bangin a puukkha mite Pasian gam tun theihna lampi ah, mapan khopna tawh ki huh diamdiam ding cih a deihna ahi hi.

Mat. 18: 15 – 17 sunga a kigen dan hi lo in, bang hangin mikhat tungah na a suuk zaw in, thuk gawp sawm na hi hiam? I hehna so sak semsem in, phuba khawng la kik dingin na geel kha hiam?

NINIH NI (MONDAY) September 18
ZE-ETNA KIDAWM IN (2 Samuel 12: 7)

Tua ciangin Nathan in David kiangah, “Nang pen tua mipa na hi hi” ci hi. (2 Sam. 12: 7). Gal. 6: 1 sungah nasia takin Paul kammal te in-zeetna ah i puk khakloh na dingin kikep siam ding hong hanthawn hi. Thuumna kammal leh deihsakna kammal te zangin a hong gen na te tungtawn pan in, bangzah takin hong awlmawh na leh, a kin huai thu a hih zia hong thei sak hi. Ze-etna sungah kikepna ding thu tawh kisai in, “kidawpna” “awlmawhna” (Rom. 16: 17; Phil. 2: 4) cih bangin Laisiangtho mundang te ah ki khia hi. A deihna bulpi Paul in a gen nop thu in, “Nang leh nang na mit hoih takin kidawm in” upmawh loh pi in mawhna hong lut thei hi a ci nuam ahi hi. “Mikhat peuhpeuh”in a cih kammal leh a atawp na lam a “Un” cih kammal nih te in, Pawlpi sunga om mimal bup tungah, a mimal in ki dop theihna ding (warning) ahong piakna zong ahi hi.

Tua a kidawp huai ze-etna in bang ahi hiam cih bel Paul in, a kician lian in a hong gen loh hangin  Galati mite in a kidal theihna dingun vau na a pia hi. Amah in zong a lungsiam sungah khialhna tawh kisai in bangmah anei kilkel lo bangdan in, mawhna tawh kisai in a kibang mawhna khat mah a gamtat kikkik loh na dingun leh, bangbang mawhna a hi zongin bang dinmun ah a na om uh phial zongin, khat leh khat ki huh in a ki domkang kik ding uh lunggulh hi. Gal. 5: 26 sungah kidawp dingin ahong hilh khatin, “Ki phasat lo ding” cih kammal hi a, Kha lam thu ah mun sang ngah a kisa te in, amau domsang mite kiangah a kiliansak na te hangun vau-na a piakna zong kimu thei hi.

Kha lam kiphatsakna Thu tawh kisai in, Paul in bang hangin Galati mite vau na pia hiam? (1 Cor. 10:  12; Mat. 26: 34; 2 Sam. 12: 1 – 7 ngaihsun kawm in).

__________________________________________________________________________________

Christian nuntakna sunga kalsuan na ah, a lauhuai penpen in, Kha lam kiphatsakna ahi hi. Tua in lampi khat teitei pan in, mawhna khat teitei ah i palsat phial zongin kisuanna nei se lo in, mi suakta bangin hong ki ngaihsun sak hi. Phawk tawntung dingin a kilawm a thuman mahmah khatin, mihing khempeuh in mawhnopna pianzia (sinful nature) i nei tek hi. Tua mawhnopna pianzia in Pasian tawh ki langpan na hong piang sak hi. Tua ahih manin, Pasian’ vangliatna in a hong dal kei leh, bang mawhna nakhat teitei ah kipuk hamtang ding a, i mihing zia tawh kizui in maan mahmah hi ding hi. Tua bangin Zeisu kihel lo in, ei leh kei ki theihsiam na in ei leh ei- dik kitan theihna sungah hong lut pih ding hi. Tua in midang a khialkha te nangawn theihsiam na hangin hong hehpih sak ding hi.

Bangzah vei bang midangte na mawhzon na hangin nang leh nang a ni khatni teitei teh (na lungsim bek ahi phial zongin) a mawhnei na kisakna tawh a khialin na kituat kha ngei hiam?

NITHUM NI (TUESDAY) September 19VANGIK KISUAN (Gal. 6: 2 – 5)

A puuk mikhat phot kik na ah Paul in Galati mite tungah bang thuhilhna tawh kisai in gen hiam? (Gal. 6: 2 – 5; enkawm in: Rom. 15: 1; Matt. 7: 12.

_______________________________________________________________________________

Greek kammal pan in Gal. 6: 5 sunga “vangik” cih pen “baros” ahi hi. Tua kammal a khiatna in, “gamla pi khualzin na ah a kipua a gih mahmah van” cihna a hi hi. A nidang ciangin tua kammal in buaina lunggim na a hih kei leh haksatna cih khiatna hong nei a, sunthapai-in nisa thuakin na a sem a gim atawl te t (Matt. 20: 12) cihna hong genteh hi to hi. Hih kammal in thukhen zum pan a thupiakna dan tawh Paul in, gamtat hoih nusia pianpian, Galati pawlpi tungah “khat leh khat, na vangik te uh na kisuan un” a ci a hi hi. A ma (Paul) ngaihsutna ah tua vangik a cih in a zaipi huam hi. Paul thuhilhna tungtawn pan in Kha lam thu tawh kisai in Thu-um te nuntakna sungah khat leh khat haksat thuakna ki nusiat loh ding a hilh nuam ahi hi.

Vangik tawh kisai in: Timothy George genna ah, “A khatna ah Christian khempeuh te in vangik ki nei tek uh hi. I vangik te in i nuntakzia ding thu i geelkholh na te tawh kizui in a liat azai na, a pianzia limlim kibang lo tek ding hi. Khat khat te a dingin a gamtat khialhkhakna hangin (Gal. 6: 1 ) Ze-etna tawh kisai vangik pi nei ding uh a, A dang khatkhat te in pumpi lam tawh kisai cidam lohna, khuak lam cianlohna, innkuan sung buaina, nasep ding neihloh na, Dawi te bawlsiatna cih bangin atuamtuam tampi om ding hi. Phawk ding thu in, kua Christian , kua kua a hi zongin, vangik tawh a peng kha ki om lo ding hi. –Galatians, p. 413.

“ A nihna ah, Pasian in a kua mapeuh eima vangik khempeuh ei mahmah in a pua khin dingin hong geelsak lo hi. A kamsiat huai thu in, eite in, khat veivei mite huhnopna tawh a haksatna hakkol te uh i  puak pih ding sangin eima liangko tungah amau vangik te va kisuan thei hi hi hangh. (Kawlten sikbel sa lo, a sin sa a cih dan) Tua bangin a gamtatna in angsung akhual-ki hihsakna (Gal. 6a; 3) hi a, eite haksatna I neihna leh thaneemna nei a kici nuam lo te in, mihing kiphatsak te na a hi hi. Paul in tua bang mite mawhsak hi. Tua bang kiphatsak na anei te in, amau leh amau a kikhem te bek tham lo in, midang te nopna a guksak te ahi uh hi. Pasian in a ma nasem dingin a kizang dinga a seh Pasian’ Nasepna a picing theihna dingin tua bang mite in a daltan uh suak hi.

Atawpna ah, Pasian in midangte vangik apuak pih dingin hong sam hi. Bang hang hiam cih leh tua eima gamtatna hangin Pasian hehnepna ki langh khia thei hi. Banghang in tua bang nasepna Pasian in deih hiam cih leh, Pawlpi i cihin Khris pumpi a hi hi. I theihsiam na dingin Paul in 2 Kor. 7: 6 sungah “Ahi zongin a lungkia mite a hanthawn Pasian in Titus hong tun’na tawh kote hong thakhauhsak hi, ci hi. Paul in haksatna athuak na tungtang ah, noptuam na a ngah theihna dingin, ama thunget te leh Pasian tungah a thumna te hang hi lo zaw in, a kithuah khoppih, a lawmpa tungtawn pan in ama hong puai lungdam na thute tawh Pasian hehnepna ngah hi. Mihing te kilawm tat theihna sungah, Khat leh khat, eima vangik tek ki puakpih theihna pen, a mite tungah Pasian ngimna khat ahi hi.” – John R. W. Stott, The Messenger of Galatians, p. 158.

Bangin nangmah leh nangmah a ki panpih thei ding muanna hong guan a- kiphatna na hong nei sak hiam…zumhuai hi. ei leh ei pha a kisa tawm te a muan huai lo pen te hia a, na muan ding mi khat zon sawm zaw in la na vangik a hong puak pih dingin zawn lo ding na hi hiam?

NILI NI (WEDNESDAY) September 20
KHRIS’ THUKHAM (Gal. 6: 2 -5)

Vangik kipuak pihna in Khris thukham a zui i hih zia Paul in hong peh zom sak hi. Tua a hih leh “Khris thukham in bang hi ding hiam?” Gal. 5: 14; 6: 2; John 13: 34; Matt. 22: 34 – 40.

_______________________________________________________________________________

Paul in “Khris Thukham” cih hong zang hi. Hih kammal Laisiantho sung mundang ah muh dingin a om kei hi. A hi zongin a kinai pih a genna 1 Kor. 9: 21 sungah a om hi. Hih bangin a thu tuamdiak kam mal hangin hilhcianna atuam tuam zong hong om pah hi. Khat khat te in, Tanglai Sinai mual tungna kipia Pasian Thukham pen, tu hun in Zeisu Thukham tawh kilaih khin zo hi ci uh hi. Khat khat te leuleu in, Thukham I cih pen, a khiatna in “kingak theihna thu guipi” (principle) ci uh hi. A khiatna in, Midangte’ vangik puak pihna in Zeisu ettehna tawh a nungzuihna hi ci uh hi. A dang khat te leuleu in, a kammal zatdan tawh kizui in, Gal. 5: 14 sung thu tawh a kammal deihna kibatna nei ci uh hi. “Khris Thukham picin sak theihna” in Itna tawh Pasian Thukham te picin sakna hi ci uh hi. Paul laikhak masa te sungah zong Pasian Thukham in Khris a hong pai na tawh meisak ahih loh zia hong lak khin hi. Tua sang sikin, Pasian Thukham a deihna in a thupi mahmah mun khat pan in Itna  tawh Christian nuntakna sungah ma a pang khat a hi hi. Hih Thukham in Zeisu in Leitungah na a hong sep laitak in a gen tawntung thu leh, a nuntak sung khempeuh leh a sih ciang dong tua Thukham tawh kituak in a gamtang pa a hi hi. Midang te vangik i puakpih na ding sungah zong, Zeisu khekhap a zui te bek hi lo in, Thukham deihna a picing zaw te I hi hi.

Gal. 6: 2 leh 6: 5 kikaal ah a kituah lohna thu khat om hi ci in a pulaak zong ki om hi. Hih thu tawh  kisai in Paul in Kammal nih te tawh a kibang lo mun nih ah agenna a hi hi. A neu 2 na sunga vangik  a cih in, gamlapi pana kipua a gik mahmah van khat a kawk nuam hi a, a neu 5 na sunga vangik a gen nop thu in, tembaw te vanpuak, galkap te puak van bawm, nugil sunga ki pua naungek cih bang ahi hi. A masa vangik zaw pen kisuan khia thei vante agen na hi a, a nunung zaw pen a a puate tawh akikop den a kul van te(a puakna leh a van khentheih loh) ahi hi. Gentehna in, Agai nupi khat ii puak naungek a mahmah in a puak tetaa den kul a, kuamah in puakpih thei lo ding hi. Van tawh kisai in mite in a hong puakpih theih a om mah bangi a hong kipuak pih thei lo zong om zel hi. Tua a kipuak pih thei lo vangik te in, Mawhnop na lungsim, Ana thukana, Sihna, hih te tungtawn in bel Topa tung bek ah i kingak kul ding hi. (Mat. 11: 28 – 30).

Na vangik honkhat te lawmte in a hong puakpih thei dingin mite kiangah na tut lai tak in, Topa tung bek ah na tut zong om ding hi. Nang mah in na puak zawh loh vangik te Topa kiangah na koihna tungtawn pan in bang thu sin thei na hi hia?

NINGA NI (THURSDAY) September 21
VAWHNA LEH SENG KIKNA

Gal. 6; 7 sunga kammal “thudon lohna”(mocked) cih kammal pen Thuciam Thak bu sing bek ah a om kammal hi a, a hi zongin Greek lai tawh a kigelhThuciam Bu Lui sungah, a khiatna in awlmawh lohna tawh “nehpik”cih na hi a, a kisim mawh Pasian’ kamsang te a genna ah zong kizang hi ( 2  Khang. 36: 16; Jer. 20: 7).

Kiciantaka Pasian a kilang panna mun ah zong kizang hi (Ezek. 8: 17). Paul’ a gennop thu in, mite in Pasian thusim lo in, a Thukham na zong langpan mang uh hi. A hi zongin amau te in Pasian khem zolo uh hi. A mahin thukhen mang pipa hi a, nitawp ni ciangin a gamtat na uh tawh kizui in thamah a sang tek ding uh a hi hi.

Gal. 6: 8 sim in. Paul in bang a gen nuam hi ding hiam? Laisiangtho sunga gentehna te tawh Ci leh Sa tawh a vawh uh hangin Khasiangtho tawh a aat kik sak bang te hiam? (Sawl. 5: 1 – 5; Luke 22: 3; Dan. 1:8; Matt. 4: 1).

_________________________________________________________________________________

Vawh bangin sengna tawh kisai Paul in gentehna thu a nasia lua kei hi. Tua kammal te in tanglai paunak in a kizang te ahi hi. A kulna bang hi mawk ding hiam? A laigelh kipatna lam a, Pumpi deihna thu leh Khasiangtho deihna thu tawh kisai a gen na tungtawn pan in hong phawksak nop a neih man ahi hi. James D. G. Dunn in a genna ah: Tu lai khangthak a dingin tua kammal khiatna in, “eite in ut bangin deih teel theihna nei hi hangh, ahi zongin i deih teelna tungtawn pan in, a nung cianga hong piang ding thu tawh kisai in deihteel na ki nei thei nawn lo hi” ci hi. Galatians, p. 330

 Leitunga i bawlkhak mawhna te hangin a nung cianga a hong piang ding thaman te tungtawn pan in, Paian in a tawntungin hong honkhia den lo dinga, ahi zongin tua i teelkhialhna hangin lungkiat luat ding zong hi tuan lo hi. Pasian in i mawhna te hong maisak in, a ta ding mahin a hong sehna tungtawn pan in i lungdam theih veve ding ahi hi. Tu laitak in a ngahkhak hamphatna te a hi zongin, i thuak khak thute khempeuh tawh kizui in a meet dingin i zatsiam nak leh vantung anlak hun ciangin a pha takin i seng thei ding hi.

“Gal. 6: 10 sungah, Christian nuntakna sungah a hoihin gamtat zia ding tawh kisai in thubul nih tawh  na gen hi: a masa in Leitung mibup tawh kisai in, “midangte tungah a hoihin i gamtat ding” leh a dan g khat in amimal vai tawhi “na innkuanpihte khempeuh tungah” thupha bawl ding hong hanthawn hi. A mun khempeuha om Mihing khempeuhte in Pasian bawsa, ama lim leh meel sun in a hong kibawl ahih manin Pasian mitmuh na ah avek pi un manpha mahmah uh hi. Khat veivei ciangin Christian te in hi banga i manphat zia, Laisiangtho sunga Pasian hong lahkhiatna tungtawn pan in a ki mangngilh khak zel man in, a kiphel thei lo mawhna te a hi: minam deidan na, mimal kihuatna, beh leh phung ki thupit sakna, a pawlpawl kikhenna, tua bangin ki deidan dan luatna hangin Adam leh Eve khang pan in tuni kipawl khop theihna om thei nawn lo hi.” – Timothy George, Galatians, pp. 427, 428.

Khaici a tuhtuh na hihna tawh kisai in, a sia a hi a, a pha a hi zongin, nang leh nang ki enpha in. A bang ci dan thaman te a seng ding mah na hi hiam?

KIGIN NI (FRIDAY) September 22

SINBEH DING: Pasian’ Khasiangtho in gitlohna tawh kisai in, theihtheihna (conscience)i kep zawhna tungtawn in, tua sungah koih hi. Khasiangtho huzapna khengval in mikhat in amah leh amah a ki pahtawi luat k hak leh athuman lohna tawh kizui in a vawhna tungtawn pan in a-aat hamtang ding hi. Mikhat mahin Khasia ngtho huzapna a kiamsak tektek leh, a thuman lohna tungtawn hangin a gah a aat ding hi. Kiginna atawm semsem leh vangliatna tawm semsem ding hi. Pasian a kihtak theihna a mansuah semsem leh, ci leh sa tawh kidiah dinga, Siatna manawh ding hi. Ama seng (aat) khiat khaici in ama tuh ngiat khaici mah ahi hi. A mahin Pasian Thukham a zahtak bawl kei leh, ama satak lungtang in suang lungtang suak ding hi. A thumaan langpan na hangin a mawh mah hi cihna ki tang sak ding hi. Tuiciin tun ma in mite lungtang sungah, siatna khaici, thukham langpanna khaici,  angtat gitloh na khaici, hiamgamna khaici na tuh uh ahih manin, siatna atun na uh kimu thei hi.

“Mihing te nuntakna sungah akua in siatna tun hiam cih, ei te in in pilvang takin i theih ding kisam  hi. Palai khat tungtawn pan in mihing te a susia dingin Pasian in kuamah a sawl kei hi. Kha thu ah a mittaw dingin Pasian in a hong bawl kei hi. Pasian in a sia leh apha khentel theihna dingin a kicing mahmah khawvak tawh hong pia hi. A hi zongin thumaan ah a kalsuan dingin zawhthawh thu tawh a sawl kei hi. A sia a hi zongin a pha ahi zongin a khentel thei dingin suakta takin hong teel sak hi. Mikhatin a maan ki makaihna tawh kicing takin a ki lamlah na nung zui lo in a langpan na tawh thusia khat, khat vei a na teel khak leh, olno takin nihvei sep dingin phamawh kisa nawn lo ding hi. A thum vei na sungah lunglut takin Pasian kiang pan in a paikhiat leh Satan lam’a pang dingin a teel ahi ta hi. Tua bang kalsuan na tawh a hih ding teng hong sep khit ciangin mi gilo hang hi ta a, a thuman kepna panin, thu zuaugenna na lunggulh ta ding hi. Tua bangin siatna lam ah a nan tentan tawh a gah hong aat ding hi ta hi. –Ellen G. White Comments, The SDA Bibel Commentary, Vol. 6, p. 1112.

KIKUP DINGTE:

1. Mawhna sungah a puuk thu-um mikhat “a ngei batsak kikna”I cih ciangin bang ci dan in panpih thei ding i hi hiam? Mihing te pianpih mawhna hang limlim tawh bang ci bangin ki puahpha thei kik ding i hi hiam? A puk mikhat in a ngei a bang kik thei mah ding hiam?  

2. Mikim khat te amau vangikmte amau tung mah ah a kisuat lai tak un (Gal. 6: 5) midang ahuh dingin a hanciam khat na muh leh, thu-um mikhat na hihna tawh tua pa/ tua nu tungtang ah bang ci ngaihsut?

3. Gal. 6 sunga tungtawn in Paul in ahong thuhilhna bang tungtawn pan in, na pawlpi dinmun bang ci teh thei na hi hiam? Kilam dan na a om theihna dingin nangma mimal in bang sem thei ding?

oOOOo