MCS Thupuak Vol 01, Issue 05: Mawhna Pianzia

MCS Thupuak Vol 01, Issue 05: 

Mawhna Pianzia

---

“TOPA hoih hi, ciam unla mu dih un; amah beel mi thupha ngah ahi hi” (Late 34:8)

Thupatna: Pasian in a khaam singgah a nek manin Ad-am in leitung nuntakzia khempeuh hong lumlet hi. Kilemna, lungdamna le kithutuahna a omna munah kitotna, kilaina, le sihna hong lut hi. Thu man lohna koi bang hi-a, bang hong piang cih thu, le Pasian tawh bang hangin kileh bulh, cih thu tu-in i sin ding hi.

1. Bang thu siksan in mihingte' biak ding le thuman ding Pasian in kal hiam? Mangmuhna 4:11

Theih ding: Pasian in mihing a piangsak bek hi lo-in, a nuntakna dingun zong vaak lai hi.

2. Hong bawlpa itna le Ama thu manna in bang hong hihsak hiam? 1 John 5:3

Theih ding: I nuntakna le i neihsa khempeuh Pasian' a ahih lam phawkin na khempeuh ah Ama thu i man ding kilawm hi.

3. Thu man lohna bang kici hiam? 1 John 3:4

Theih ding: Mawhna i cih pen khialh khakna bek hi lo hi. Pasian langdona ahi hi. Pasian tawh mi-mal a i kizopna tawh hong kisai hi. Amah itna in Ama thu manna ahi hi. Amah dona in mawhna ahi hi.

4. Bang in mawhna hong sulzuih hiam? Rome 6:23 Theih ding: Nuntakna khempeuh Pasian' kiang pan hong pai hi. Amah i taisan aleh nuntakna a taisan ihi hi. Amah a langdo mi khat i nuntakna ah Pasian in hih ding nei lo hi.

5. Mi khempeuh in bang suahtakna nei hiam? Rome 6:16

Theih ding: Adam in ama thaman ding a deih bangbang ateel theih mah bangin, numei pasal a kuamah peuh in thu mang ding maw, mang lo ding, deihdeih kiteel thei hi. Thu a mang hamtang dingin Pasian in eite hong zawhthawh bawl loh mah bangin, thu a mang lo hamtang dingin Satan in eite hong zawhthawh bawl ding zong Ama'n phal tuan lo hi. Matthew 6:24.

6. Sihna thukhena in koi ciang huam hiam? Rome 5:12 Theih ding: Mawhna a nei lo mi khat zong om lo a hih manin, Adam le Eve mah bangin mi khempeuh in sihna thu-khenna a thuak ahi hi.

7. Mawhnei mi in ama tha kia tawh bang haksatna nei hiam? Rome 7:17-9; 8:7

Theih ding: Pasian' thu a man loh khit ciangin mihing pen Satan' khut sungah om ta-a, amah le amah ki-uk kha nawn lo hi. Satan' deihna longal ama hih zawh bangmah om nawn lo hi.

8. Mawhnei mi a cihmawh dan Lai Siangtho in bang tawh na genteh hiam? Jeremiah 13:23

Theih ding: Mawhnei mi bang zahta-in a hanciam a, ganno bang zahta tawh a kithoih a, mawhsut in bang zahta-in a kigawt dongin, thu bang zahta ngen a, sumpi bang zahta a pia zongin, mawhna vangik panin a suahtak nading om lo hi.

9. Mawhnei mi a cihmawh banah bang vangik in neng lai hiam? Jeremiah 17:9

Theih ding: Mawhna lam ah Satan in akhem zawh khit ciangin, ama omzia a kitheih loh nadingin Satan in mihing' mit humsak lai hi. Ama cihmawhna, ama ginat lohna nangawn mihing in thei nawn lo hi.

10. Mawhnei mi a uk taktak kua hiam? 1 John 3:8

Theih ding: Mawhnei mi' kam-pauna, gamtatna le ngaihsutna dongin Satan in ukcip thei zel hi.

11. Mawhnei mi' lametna khat bek a om pen bang hiam? Jacob 4:7,8

Theih ding: Satan sangin Pasian hat zaw hi. Ei' deihna tawh kileh bulhin Pasian in na hong sem lo ding hi. Ih To dingin Satan sangin Pasian i teel zawk leh Pasian in Satan hawl khia ding hi.

12. Mawhnei khempeuh' a ding Pasian deihna bang hiam? Ezekiel 33:11

Theih ding: Bang zahta-in a gi kei phial zongin, mi khat peuh asih dingin Pasian lungdam lo hi. Mihing a nungta sak Pasian hi a, mi khempeuh in Ama thu manga a nuntak ding, Ama deihna ahi hi.

Thukhupna: Mi khempeuh a’ ding Pasian in ahih theih zah hih zo hi. Nuntakna le i kivaak nading an le tui zong hong pia hi. Ama deihna i theihtheih nading lungsim le khuak zong hong guan hi. Thu man lohna hanga nuntakna i taan khak ding Ama'n hong hilh hi. Thu ih man kei teitei-a i sih leh, eima mawhna hi ta hi. Ih nuntak theihna ding eite in i botsat khin hi. Mawhna i neih khit nungsang bangmah i hih zo nawn kei hi. Lametna khat bek om a, tua in Pasian in hong it lai-a, Satan' kol panin hong honkhia nuam hi, cih ahi hi. //

CIDAMNA THU

E xercise (Thatang-sanna): Thatang-sanna in cidam nadingin a thupi mahmah khat, seploh a phamawh khat ahi hi. Banghang hiam cihleh leitung ah Pasi-an in a piansak masa ahi, Pu Adam te nupa zong thatang san nadingin na semsak hi, cih kimu thei hi. Laisiangtho sungah, “Topa Pasian in, mipa la in, Eden huan kho in a kem dingin a koih hi” (Piancil 2:15) na ci hi.

Tua ahih manin mihingte in a ne bek ding hi loin, na asep ngiat ding kisam hi. Na sem loin na omom aleh lungsim zing tektek in na tha zaw tektek dinga, vokpi bangin na thau neinai ding hi.

Thau luatna panin tulai a natna minthang mahmah ahi sikhum, zunkhum, sikhang natnate kingah baih mahmah in thakhat thu tuk in si suak maw, ahih kei leh ihmu suak maw, cihte ki ngah thei hi. Tua ahih manin, i pumpi cidam nadingin thatangsan nasepte sem in, i khua-ulte suak khiat sak ding ahi hi.

Japan gam ah mi pawlkhatte in cidamna thupisak mahmah uh ahih manin, thatangsan thei nangin a inn sungte uh ah, tutphah, sabuai cihte koih nawn lo in, an anek uh ciangin dinsa in ne a, ha a nawt uh ciangin zong a khe langkhat uh khai sa in nawt uh ci hi. Mawtaw tawh zumkah nasemte cycle tawh pai, cycle tawh a paite set-bing tawh pai, setbing tawh a paite khe tawh pai uh, ci hi.

Tuni in eite in zong i cidam nadingin i inn-kim i inn-pamte ah huan bawl ding, paak suan ding khawng thupi sak ni. Nisim in thatangsanna pongman minute 30 bang bawl den ding kisam hi (My Life Today, page 130).

Exercise bawlna iin lamsiauhna le huan bawlnate in lungsim nuamsak, siangtho sakin thazang sak hi. Tuap zong thahatsak in, sisan mal sungah zong O2 tamsak tuam hi. Lungtang zong thahat sak in, lungtang satakte in simal a sukna uh zong thahatsak tuam hi. Lungtang kisai dan zong pongman sak in, sikhang a neite zong kiam sak hi.

Tua ban ah khanghamte zong moisuaksak in athau luate gawng sak, agawng luate thausak in, pumpi gihna zong hoih bek sak a, natna kilawh theite panin zong hong dal zo sak hi. (My Life Today, page 144).

Lungkham, sinkhamnate zong beisak tuam in lungsim siangtho sak in, ngaihsutna ahoih hong nei sak thei ban ah ankam limsak in, ihmut nuamsak hi.  Sianu Aye Cing

TATE KHANSUAH SIAMNA

KHAAMNA: Naupangte khahkhong lo a, ih khamna in asiat theih nading tampi dal hi. Naupangte hunpha ngah te i khaktan sak nop leh ahun ma a, gen masak kul hi. Gtn, amau kimawl nading huang khat na bawlsak dinga, tua huang pan atai khiat uh leh a zingciang kimawlsak nawn lo ding, cih danin khalna kipia thei hi. Ahi zongin tua bang khalnate atawntung hilo in, hun ciangtan khat sung bek hiding hi. TV, nau-milim, nektheihte na laak khiat sak thei a, a hunphate uh na laak beisak ding hilo hi.

THAMAN PIAKNA: Thaman piakna in a gamtat hoih-na uh khangsak hi. Naupangte in na hoih asep uh ciangin a nu apate’ phawkna le pahtawina lak khia hi. Amau tawh kilawm banga thaman piakna in kizopna thahatsak hi. Sangkahna ah mat hoih a ngahna, midangte ahuh theihna, a buppi ah gamtat hoihna cihte thaman piak ding ahi hi.

AWLMAWH LOHNA: Naupangte omzia (nawngkai-sakna) pawlkhat ih awlmawh lohna in amau lungsim puakzia ih theih nad-ingin lampi hoih khat hi gige hi: A heh baih hiam? A kapkap nuam hiam? Hong nawngkaisak nuam hiam? Ahi zong, naupangte amau le amau, midangte (ahk) na khat peuh tawh lauhuaina ah aom loh ciang bekin, awlmawh loh ding hipan bek hi.

Source: Parenting Presentation (Zop Lai Ding)

Volume 01 Issue 05 by DavidLian on Scribd