SINNA 14 - IH LAWM, VANTUNG MITE

Thupatna: Hih ih Lai Siangtho sinna sungah vantung mi cih kammal ih zang zelzel hi. Amaute Pasian tawh a kihote a hihi. Amaute in kamsangte' kiang, Mary Jesu' nu kiang leh Jesu' kiang mahmah ah thu gen uh hi. Amaute kuate hiam? Koi pan piang uha a nasep uh bang hiam? 

1. Pasian' tokhom kimah kamsangpa John in kuate mu hiam? Mangmuhna 5:11. 

Theih ding: Vantung mi tampi oma John in sim khin zo lo hi. Paul in zong, sim zawh loh vantung mi honpi om hi, ci hi. Hebrews 42:22. Vantung in amaute' omna a hihi. 

2. Vantung mite' pianna koi bang hiam? Collosian 1:16. 

Theih ding: Pasian in na dang khempeuh a pian sak mah bangin vantung mite zong a pian sak a hihi. Amaute ih muh theih loh hangin a hong khem ding uh hi lo hi. Mihing' mit in ih muh theih loh khawvak oma, ih bil in a zak theih loh awging om hi. 

3. Vantung mite leh mihing a kibat lohna bang hiam? Late 8:4,5. 

Theih ding: Mihing' sanga a seisang zaw dinmun ah vantung mite kipiang sak hi. Mihing sangin hat zawin pil zaw uha, mihing bangin muh theih bekin om lo uh hi. A hi zongin vantung mite in misite' kha hi lo hi. A kipiang sak ngiat a hihi. 

4. Vantung mite' nasep a thupipen bang hiam? Hebrews 1:14. 

Theih ding: Pasian sawlna peuhpeuh ah vantung mite pai uh hi. Huhna leh panpihna a pia dingin amaute kipai sak hi. Tua in amaute' nasep a hihi. Hotkhiatna a luah ding mihingte a panpih dingin amaute kipai sak hi. 

5. Mihing in hotkhiatna a ngahna dingin, vantung mite in bangzahin lawpna nei uh hiam? Luke 15:10. 

Theih ding: Mihing in mawhna a bawl ciangin vantung mite kap uha, a lungsim Jesu pia-a siatna tungah gualzawhna a ngah ciangin amaute lungdam mahmah uh hi. 

6. Pasian leh mihing a kizopna ah vantung mite in bang sem uh hiam? 

Mangmuhna 1:1. Theih ding: Vantung mite in Pasian' thu gente kamsangte' kiang puak uha, kamsangte in mite' kiang gen sawn uh hi. Kamsangte in vantung mite mu uha, a aw zong za uh hi. Amah biak ding a hih loh lam, John mah banga nasem khat ahih lam vantung mi in John kiangah gen hi. Mangmuhna 19:10. 

7. Vantung mite in Pasian' mite koite huut uh hiam? Late 3:7. 

Theih ding: A hih theih liai nak leh Satan in Pasian' mite bawlsia nuam hi. A hi zongin vantung mite in amaute kem zel uh hi. 8. Pasian' nasemte khat vantung mi khat in a sepna Lai Siangtho in koici gen hiam? Daniel 6:22. Theih ding: Lawki kumpi khati thupiakna nialin a maan Pasian a biak manin humpi khawina sungah Daniel kikhia hi. Palikte in a cinna kulhbing sungah kol kibulhsa-a om Peter zong kikhah khia hi ( Sawltakte 12:1-11). Khat veivei vantung mite mihing bangin hong kihil thei hi (Thukhente 13:9-11). 

9. Vantung mite bangzahin hat hiam? Late 103:20. 

Theih ding: Zan khat thu-in vantung mi khat in, a nungta Pasian a kosia galte 185,000 bang that hi (Kumpi Nihna 19:35). Vantung mite in zong Pasian' kiang panin hatna a ngah uh a hihi. 

10. Vantung mite in naupangte koici kin diak uh hiam? Matthew 18:10. 

Theih ding: Naupangte in amaute a kem ding vantung mi khat ciat nei uh a hih lam Jesu in kilang sak hi. Hih thu a tate un a theihna dingin nute-pate in a hilh ding uh a hihi. Amau' a dingin thangahna lianpi hi ding hi.

11. Pasian' thukhena ah vantung mite in bang sem ding uh hiam? Daniel 7:10.

Theih ding: Thukhena ah thu a kitheihna dinga a kizang ciaptehna laibute vantung mite'n kem uh hi. Gamtatna a sia-a a pha zongin a vekpi-in amaute in ciamteh uh hi.

12. Vanglianpi tawh van panin Jesu hong pai ciangin kua in hong zui ding hiam? Matthew 25:31.

Theih ding: Jesu hong kumkikna pen vantung mite' a dingin masuan tutna hun khat hi ding hi. Bang hang hiam cih leh Khrist' gam sungah mite a lut theihna dingin amaute in mite thu hilhin, kemin, kiging khol sak uh hi.

Thukhupna: Pasian' kamtaite (vanmite) ih lawmte a hihi. Ih neulai pan kipanin amaute in eite hong cing hong kem hi. Siatnate hong hilh hi. Kamsangte' tung tawnin Pasian thute hong puak hi Hot khiatna lampi a tawnsuak dingin eite hong hansuah hi. Mawhzolna ih zawh ciangin amaute lungdam uh hi. Khrist hong pai kik ciangin midikte' han tekah amaute pai-in, Khrist' kiangah paipih ding uha, sihna tawh a kikhen innkuante hong kimu kik sak ding hi.

Sinna 14 - Ih Lawm, Vantung Mite by DavidLian on Scribd