“Sabbath Pelhna”

August 19                                                                                                 India Gam Saklam leh Nisuahnalam

“Sabbath Pelhna”

S

Agen:Amunang Gonmei, 77; Panmeichung Panmei, 75, leh a zi, Makukhonna 75

            India gam saklam leh nisuahnalam a teeng Seventh-day Adventist innkuan 6 te sih ding lauthawng kawmkal leh palikte mat ding patauh kawmkal ah Pasian a upna uh khahsuaah velo uh hi. Tua Pasian tungah a citak Adventist innkuan 6 te hangin tua khuaneu ah a teengte sung panin khuamite 100 lakah 30 Adventist pawlpi sungah hong luut uh hi.

            Tua taangthu pen Sabbath citak takin a zui innkuan 6 te gal leh sa hangin 1966 kum in gaaltaainaa pan kipan hi. A masa kum 4 sung tua khua ah nuntak khuasakna lem hi. Tuaciangin tua khua ah a teeng innkuante sung panin a khangcing tengin Adventist Pawlpi sungah tui kiphuum ding khensat uh hi. A sawt loin, a khuapihte un buaisak uh hi. Adveentist a suak thakte in a upna a nusiat kei uh leh hih khua pan pai khia dingin thatang sawl uh hi.

            Khuamite a tamzaw tham in a dang Khristian biakna zui uh a, Adventistte nawngkaai sa uh hi. Adventistte lauthawngsak in, bii tawh a kilam a biakinn uh suksiat sak uh a, a laizang ah amau ngeina ahi suang lianpi thum phut uh hi. “Hih inn pen biakinn ding hi loin teen nading inn ahi hi,” ci uh hi.

            Khuami tampi takin Adventistte thah sawm uh ahih hangin a upna uh khaahsuah vetlo uh hi. Bangmah a cih zawhloh uh ciangin khuamite in kumpi lam ah Adventistte in a upna uh nusia ding ahih keileh khuasung pan taaikhia ding cih thupiakna lai a bawl nadingun va khia uh hi.

Mat Thuak Uh

            Sabbath kik ciangin biakinn ah kikhop a man ciangin a inn vuah hong ciah uh a, palik tampi takin na pang ngeingai uh hi. Palik bu khat in a makaite uh thum a mat khitna gen hi.

            Nupite lau mahmah uh a, naupangte kap uh hi. A khanghaam papi Pan in, “Nong mat nading un gamtat khialhna ka nei kei uh hi. Biakna vai in nong thah nop uh leh ka nuntakna uh a pia ngam ka hi uh hi,” ci-in hangsan takin palikbupa tungah gen hi.

            “Kong that nuam kei uh hi. Ahi zongin na khuapihte un hong hua uh ahih manin mun dang khat ah hong paipih ding kahi uh hi,” ci-in palikbu khat in haan guapguap hi.

            Palikbupa in Pan leh a lawmpa Amunang a khutngawng ah siikkol bulh in palik mawtaw nung ah tuangsak hi..

            Pan ii zi in a pasal sikkol kibulh in a kipaikhiat pih a muh ciangin a gil nasa hi. Ahi zongin Topa Zeisu hong kamciam Matthew 5:10, “Pasian deihna bangin a gamtat manin bawlsiatna a thuak mite vantung ki-ukna sungahluut ding uh hi” tawh tha la in kihehneem hi.

            Palik mawtaw in Dimapur khuapi aa om, palik zum lam ah paipih vingveng a, nai 2 val khit ciangin tung pan uh hi. Palik zum a tun maa uh lamkaal ah, Panmeichung khutngawng aa kibulh siikkol pen ama’ thu in kitolkhia in a lawmpa tawh kikhih khawm nawn lo uh hi. Amah zong palikbu kiangah a khut lak hi. Palikbu pa in zong, Kuan hong phelsak ahi hiam,” ci-in a dot ciangin, Kuaman hong phelsak kei,” ci-in dawnkik hi. Palikbupa in a khutngawng ah siikkol bul kik in Palik zum lam zuaan suak uh hi.

            Adventist papii thumte thong sungah ni nih sung kikoih hi. Ninih ni (Monday) ciangin palikbupa in, “Khuata dang khat ah na teen nop uh leh na paikhia thei uh hi,” ci-in  nuihsan kawmin gen hi. Hih Adventist papii thumte in zong, “Nong matna uh a haang nong gen loh uh banghang a hi hiam?” ci-in dong uh hi. Palikbupa in dawngkik thei lo in thong pan suaktasak ta hi.

Inn Hong Ciah Uh Ciangin Thuhoih Piang

            Adventist papii thum teng hong ciahkik uh ciangin khuasung thuneite in lungnuam takin khua ah om sak uh hi. Kha thum bang hong sawt khit ciangin khuasung thuneite in  a khua ah Adventistte a teen theih nading thu leh khuapihte in zong a buaisak nawnloh nadingin thu pia ta hi.

            Hih khuata ah Adventist innkuan guk bek hong peem uh ahih hangin tuni-in innkuan 84 phata uh hi. A khua zaang un mimal 1500 lakah seh thum suah seh khat bang Adventist pawlpimi hita uh hi.

            Panmeichung in a khutngawng panin banghangin siikkol kitol khia cih tu dongmah thei nai lo hi. Ahi zongin ama’ phawk thu pen, haksatna thuak ciangin Pasian in hong ompih hi cih belt el mahmah hi. Amah in, “Hih pen Pasian in hong ompihna na lamdang thupiang hi,” ci hi.

            Tu kuata Sabbath School sumpi khenkhat tawh Adventist papii thumte ni nih sung thong a kiatna uh khuapi ah a kihong Adventist sang ah numeite om nading bawdaa kilam ding hi. Nagaland Adventist  saang ah bawdaa kilam khin leh a gamla khuatate panin saangnaupang tampi te zong saang hong kah thei ding uh a, gammi hoihte leh Pasian’ nasemte suak thei ding uh hi.

(Mai Sabbath ciangin a zom ngai ni)

                          @@@@@@@@@@@@@%%%%%%%%%@@@@@@@@@@@@