ZSS LESSON 7: UPMUANNA LAMPI

UPMUANNA LAMPI                                                               August 5 – 11

NIPI NI (SABBATH) NITAAK LAM

SIMDING TE: Gal. 3: 21 – 25; Lev. 18: 5; Rom. 3: 9 – 19; 1 Cor. 9: 20; Rom. 3: 1, 2; 8: 1 – 4.

KAMNGAH: “A um mite in Zeisu Khris Upna tawh kipawl kiciamna a ngah na dingun, Laisiangtho in na khempeuh te mawhna sungah a khakcip hi”(Gal. 3: 22).

Inn aciah thei kik dingin a kihilh Vakhu khat in, nikhat sungin tai tampi tak a lenmang hangin a innphual mah hong tung kik lianlian thei hi cih thu I zangei kha ding hi. A hi zongin a siam pen dinga ki ngaihsun Vakhu khatkhat te in, lamkhial ahih manun inn mun thei nawn lo in a gammang suak zong om thei veve hi. England gam ah, supna lianpi khat a om ngei thu in, Vakhu tul sawmnih (Dollar tul zaguk val man) ki khah khia a, a buuk sungah khat zong ahong ciah kik nawn kei hi. 

Ei te zong tua bang mahin, khualzin na khawngah lampi theih nawn loh man lam ki khialh  thei a, ki gammang gawp thei hi. Nop hiau lo thei hi. Launa leh lungkham tawh I lungsim te hong palau sak gawp hi. 

Tua bang mahin I kha lam dinmun ah zong, Zeisu in san khit hangin, lam khialin ki gammang thei mawk hi. Khat khat te bang gammang suak uh ahih manin Topa kiangah zong hong ciah thei nawn lo uh hi.

A hi zongin a lungdamhuai thu in, I biak Pasian in ei kia bek cikmah hun a hong nusia ngei kei hi. Lungdamna Thubu te sungah I muh theih mah bangin, ei adingin lampi a hong koihsak a, Upmuan na tawh I zuih ding leh, a thukham te zuihna tawh kitawn thei hi. Mi tampi tak te in, tua Lungdamna thu leh Thukham thu te, a tuamtuak hi ci in khenkhiat teeltaal sawm uh hi. Hon khatkhat in, tua te geel a ki gaal-neih dan in mu lai dep uh hi. Tua muhna in lamkhialh na pi khat hi a, a tawpna ah a dahhuai dinmun hong tun thei ding hi. Thukham kihel lo in Lungdamna thu (Gospel) cih om thei lo a, Thukham kihel lo in Lungdamna thu kitel taktak zo lo ding hi.

NIMASA NI (SUNDAY) August 6
THUKHAM LEH KAMCIAM NA

Thukham leh Pasian’ thuciamnate a kilehngat ahi uh hiam? Gal. 3: 21. Ama thugen te tung tawn pan in ama langpang te muhna ah, Paul in Thukham khempeuh neuseek hi, cih ahi zongin, Pasian’ kamciamna te a bulphuh luat manin, Moses leh Moses gel Torah Laisiangtho te thupi sim lo, nuaisiah hi ci in, a mawhsak na uh thei ahih man in, amau te ngaihsut ahi, “Thukham leh Pasian’ thuciamnate a kilehngat ahi uh hiam” ci in dotna hong nei hi. Amah mah in kician takin dawng kik a, “Hi het lo hi” ci hi. Pasian pen cikmah hun in amah leh mah ki tukalh ngei lo ahih man in, a piang thei lo, a hi thei het lo mah ahi hi. Pasian in Thukham leh Kamciamna anih tuakin a pia pa zong ahi hi. Cik mah hun in Thukham leh Kamciamna te langneih ngei lo hi. A mau te in, Pasian hong geelsak Gupkhiatna vaihawm na sungah, panmun a tuamtuak in nasep a nei tuak uh ahi hi.

Paul’ alangpang te in, Thukham a kizat na bang ci bangin telkhial uh hiam? Gal. 3:21; Lev. 8: 5; Deut.6: 24 te enkaak in.

______________________________________________________________________________

Hih mite in a kha lam nuntakna uh a picin theihna dingin Thukham zuihna tawh ki thalawh thei hi ci in um uh hi. A maute in Thuciam Lui ahi, Siam. 18: 5 leh Thuhilhk.6: 24 sunga, Pasian kamciamna sunga a kidiah, a nungta nuam mite a dingin zuih ding in a kigen kammal te, a deihna a telkhialh man uh ahi hi. Thukham in bel Pasian kamciam na huang sungah kician takin nuntak theihna dingin a hong keemcing mah ahi hi. A hi zongin amau te in, Pasian tawh aituam kizop, kipawlkhop theihna dingin Thukham in a mungpi ahi hi ci uh hi. Laisiangtho in bel, Pa Pasian leh ama Khasiangtho vangliatna sung nuntak siangtho neih theihna hong nei thei sak hi, ci hi (2 Kum. 5: 7; Neh. 9: 6; John 5: 21; Rom. 4: 17). Thukham in cik mah hun in kha lam ah hong nungta sak thei lo hi. Tua ahi zongin, Thukham in Pasian kamciam tawh kilang neih cihna hi tuan lo hi.

Thukham in nuntakna ahong piak theihloh zia theihsiam theih na dingin Paul in Gal. 3: 22 a  hong gelh na ah, “Laisiangtho in, mawhna khutnuai-ah na khempeuh a om hi,”na ci hi. Mihing te in bang zah in gi lo uh hiam cih Thuciam Lui sunga a kigelh tuamtuam te kaikhawm in Paul in (Rom. 3: 9 - 10) sungah hong lak hi. A laigual gelh zia te zong ki thutuak khin khol lo hi. Tua sungah Paul in, mawhna a pian khiatna mihing’ lungsim ahong sia sak ki phatsak na lungsim puak zia tawh hong pan khia a, mawhna a hong hong lutna leh a Leitung bup ah aki zelhna tawh hong khup hi. 

Paul in a gennop thugil in, mawhna a hong kizelh na leh Thukham in ciangtan aneih na  hangin nuntak tawntung theihna kamciam in eite aitang dingin Zeisu’ cihtakna bek in hong ngahsak thei bek hi cih thu a hi hi. Tua ahih man in Hih a thumaan thugui uptheih na in Biakna puahphat hun laitak in kikhelna apiang sak mapang te’ thugui let ahi hi.

Thukham zuihna in honkhiatna apiak theihloh hangin thukham zuihna tawh bang hamphatna te kingah thei hiam? Pasian thukham zuihna hangin muhtheih dingin bang hoihna te om hiam?

NINIH NI (MONDAY) August 7
THUKHAM NUAI AH HENCIPNA

Gal. 3: 23 sungah Paul in “upna thu hong tun’ma hun sungteng… Thukham in eite a hong hencip phot hi” ci hi. “Eite” cih kammal in Galati Pawlpi sunga om Jew thu-um mite a gen nuam ahi hi. Amau te in Thukham tawh a kimel theih mahmah hi uh a, Paul in Gal. 2: 5 a kipan a mau te atuam in hopih hi. Tua ahih man in Gal. 3: 23 sunga “eite” cih kammal leh Gal. 3: 26 sunga “no te” cih kammal in atuamtuak a hihna leh a kilam danna kimu thei hi.

Gal. 3: 23 sunga “Upna thu a hong tun ma”cih kammal pen Greek lai tawh a ki gelhna ah  “Tua Upna a hong tun ma” cih khiatna nei hi. Paul in Thukham zat zia tawh kisai in Topa Zeisu a hong pai ma leh a hong pai khit kilam danna a gennuam ahi hi (Gal. 3: 24). Tua ahih manin “Tua Upmuanna thu” a  cih pen Christian te in I upmuan na (Faith) agen nuam hi lo zaw in, “Zeisu” mahmah a gennuam/a kawk nuam na hi zaw hi.

Paul in Jew te kiangah, Zeisu a hong pai mateng in no te in Thukham nuai ah na ki hencip  uh hi ci hi. Tua “Thukham nuai ah” a cih in bang agen nuam hi ding hiam?(enkaal in: Gal.  3:22, 23 leh Rom. 6: 14, 15; 1 Cor. 9: 20; Gal. 4; 4, 5, 21; 5:18). 

______________________________________________________________________________

Paul in “Thukham nuai ah” cih kammal” ama Laikhak te sungah 12 vei na zang hi. A thu pai zia tawh kizui in a khiatna a tuamtuam om a nei hi.

1. Gal. 4: 21 sunga Thukham nuai ah om acih in: Gupkhiatna thu lampi dang tawh teel zawkna hi a, Galati bu sunga om Paul a langpang te in, dik kisak theihna a ngah theihna dingun thuman na tawh hanciam uh hi. A hi zongin Paul in a kingah loh zia na hilhcian na nei hi (Gal. 2: 21, 22). A nung ciangin Paul in a genna ah, Hih thukham nuai a om nuam te in, Zeisu tawh kipawl lo ahih zia gencian hi (Gal. 5: 2 – 4).

2. Rom. 6: 14, 15 sunga Thukham nuai a om a cih in: khialhna hangin mawhsakna a thuak te a genna ahi hi. Bang hang hiam cih leh Thukham in mawh maisak theihna nei lo ahih manin, a mawh mi peuhmah atawp na ah mawhna thaman sang ding hi. Mihing khempeuh in tua hun ciangin thuak pelmawh ding hi. Thukham in thongcing pa dan hi a, a gilo khempeuh amau leh amau a si dingin kol a bulh sak uh hi. Gal 3: 23 (zingteh sinding) sunga “kikhumcip” cih kammal azat na in “thukham nuai ah om” a cih nopna mah ahi hi.

“Thukham nuai”(Under the Law) cih kammal pen Greek kam in “ennomos” (within the Law)  cihna hi a, a khiatna in “Thukham sungah” cih ahi hi. Zeisu tawh kipawl khopna hangin Thukham deihna kicing tak in zuihna tawh nungta a hih na a gen nuam ahi hi (1 Cor. 9: 21). Zeisu kihel lo in, Thukham zuih ding a hanciam te in, dik kisak theihna ngahna ding in piang thei lo hi. Bang hang hiam cih leh “Upna hangin Pasian tawh a kipawlthei mite bek nungta ding hi,” (Gal. 3:11) sungah ci hi. A thumaan Gupkhiatna luan zia in Thukham zuihna nial lo a, Thukham zuihna tawh Gupna kingah zo tuan lo cih zong pom veve hi.

NITHUM NI (TUESDAY) August 8
EITE HONG KEMCING (GUARD) THUKHAM

Paul in Thukham tawh kisai in thu 2 tawh a thu khupna nei hi. (1) Thukham in Abraham tunga Pasian kamciam te nawlkhin/ beisak lo hi (Gal. 3: 15 – 20). (2) Thukham te leh Pasian kamciam te ki tukalh/ ki langneih ngei lo hi (Gal. 3: 21, 22).

Tua bang ahih leh, Thukham in Gupkhiatna thu sungah bang panmun ah kihel hiam? Gal. 3: 19 sungah, “khialna hangin” ahong kipiak thuah hi ci hi. Ngaihsut na aki behlap theihna dingin Thukham tawh kisai in kammal 3 Paul in na zanga “kept” “hencip” (aneu 23), “shut up” “khaktan”(aneu 23) leh “school master” “hong Uk”(aneu 24) cih te ahi hi.

Thungetna leh kidawm, pilvang takin, Gal. 3:19 – 24 sung sim in. Thukham tawh kisai Paul in bang gen hiam?

______________________________________________________________________________

Thukham tawh kisai in, khangthak Hilhcianna bu sungte ah, Paul in Gal. 3: 19 sunga agen  khempeuh a sia lam bekbek in gen zaw uh hi. A hi zongin aneu (23) sunga “hencip” a ki ci pen, Greek kammal bul sungah “a keemcing dingin”ci in ahoih lam in na ki gelh zaw hi. Tua kammal te mah a ki zatna mumdang te ahi (2 Cor. 11: 32) sungah, “ukna sungah maan cip” a hih kei leh “encik” ci in, a sia lam in na zang a, Thukhun Thak sungah a tam zaw bel a hoih lam mahin genna ahi “daal” ahih kei leh “keem” ( Phil. 4: 7; 1 Pet. 1:5) ci in kiphen hi. Tua ahih manin, Gal. 3:23 sunga “hencip” acih pen, a sia lam hi lo a, a pha lam “keemcing” ci-in i khiat zawk ding ahi hi. Tua mah bangin, (Gen. 20: 18 sunga “khakcip sak”, (Exo. 14: 3; Jos. 6: 1; Jer. 13: 19) sunga “khuhcip, khakcip”, (Luke 5:6) sunga “khuh” cih te a hi zongin, (Rom. 11: 32) sunga “thongkia bang” cih bangin a tunga a kigenteh na te tungtang ah, a khiatna I teltheih na dingin, a tangthu luan zia tawh kizui in, a kammal luan zia in, ahoih lam hi ta leh asia lam hi ta leh ki zang thei tuak hi.

Isreal mite a dingin Thukham (Thukham 10 hi ta leh Zehtan thukham te) in bang phattuam na nei sak hiam?(Rom. 3: 1, 2; Deut. 7: 12 – 24; Lev. 18: 20 – 30).

______________________________________________________________________________

Paul in, Thukham tawh kisai in khat veivei asia lam in a genna om a (Rom. 7: 6; Gal. 2: 19),  khat veivei ciangin zong ahoih lamin agen na zong om hi (Rom. 7: 12, 14; 8: 3, 4; 13: 8). A taktak in, Thukham te in, Isreal te adingin samsiatna ding hi lo zaw a, a Thupha ngah theihna dingun ngimna tawh a kipia hi zaw hi. Gangawh Biakpiakna in, mawhna sawpsiang khin thei lo na pi in, A hong tung ding mawhna a tawh kisai a sawpsiang thei Messiah’ sepzia ding khempeuh hong telsiam sak hi. Zehtan thukhamte tawh kisai Ngeina Thukham khempeuh te in, Isreal te tungah buaina apiang sak thei siatna khempeuh pan in kidal theihna ding zong guan hi. Mi te phattuam na ding ngimna tawh Paul in agen Thukham zuihna a hong gen khempeuh, asia lamin laksawm in, asia lamin ngaihsut na in, khialhna tampi piangsak thei hi.

A hoih mahmah thu khat koi ci bangin ki zang khial theih hiam cih ngaihsun in. Gentehna in, Cinat na mun a zat dingin a kibawl zatui pen, khamtheih guihtheih suak thei hi. Nangma nuntakna ah hih thu tawh kisai tuahkhak thu, theihtheih na na nei hiam? Thu hoih dingin a kibawl khat pen thusia lam ah a kizat theih thu telcian na pan in, Paul in atunga agen thu te  tawh kisai in hong bang ci telsak thei hiam?

NILI NI (WESNESDAY) August 9
THUKHAM’ EI TE HONG UK SIAPI

Gal. 3: 23 sungah Paul in, Thukham in ei te a hong daal, ahong keem a vangnei khat hi ci  hi. (aneu 24) sungah tua thukham pen bang tawh kibang ci in genteh a, a khiatna in bang agen nuam hi ding hiam?

______________________________________________________________________________

“Hong uk siapi” (School-master) cih kammal Greek lai in,”paidagogos” hi a, hilhcian na  sungah, “Khauhtaka ki ukna”(NRSV), “Laihilh sia”(NKJV), “A keemcing pa”(ESV)ci in a kilet khiat hangin, Tua kammal te khat mahin, a deihna, akhiatna maan, akician in pia zo lo hi. Paidagogos I cih ciangin, Rome gam ki-ukna sungah Sila khat hi dinga, ama tavuan in, a To’ (Amah aneipa) ta te’kum 6 leh kum 7 kiim pan in, a picin ciang dong a kem dingin thuneihna aki pia te ahi uh hi. Tua naupang te’ ci leh sa ading in a kisam te ahi: kisil sakna, anpiak na, niik leh puan khelsak na, a lauhuai mun khempeuh pan in daalna cih te bek hi lo in, tua naupang te’ sang kah maw kah lo, innlai te bawl maw,bawl lo cih te nagawn a sit dingin tavuan kipia hi. Tua bek tham lo in, tua naupang te tungah, lungsim gamtat hoih  theihna ding hilhin sin sak dinga, tua naupang te’n zong tua lungsim gamtat hoih te nuntak pih, zangkhia maw,khia lo cih nangawn kician taka a encik dingin sep ding tavuan a nei hi.

Tua sila khatkhat te (padagogues) in itna leh thukhualna nei mahmah uh ahih man un, a  cinkhak uh naupang te in zong it mahmah phial mah ta le uh, a mau tangthu a ki-aatna tanglai laibu te sungah a maute in khauhtak in a gamtang te ci in gelh uh hi. Naupang te a thumanh theihna dingun, aw khauh tak tawh vau gawp uh a, nasak takin mawhsak in tawt gawp khuan angah uh ban ah, a kisap leh ciangduai tawh zong satgawp thei uh hi, ci in ki gelh hi. 

Thukham in a hong uk zia tawh kisai Paul in, a thu pia zia atel dan in a genna ah, naupang  a uk kha (pedagogue) sila te dan in genteh hi. Thukham I cih in mawhna hong phawksak ding leh hilhcian na hong pia thei sia khat bangin gen hi. Tua bangin in thukham kizat theihna a gen ciangin mihing te in mawhnei te na hi uh hi, ci in hong mawhsak na tungtawn pan in khat veivei thukham kizatna in a sia lam zong a kawk hun hong om thei hi. A hi zongin tua asia lam in zong akawk’ Thukham pen Pasian in mihingte phattuam na dingin a hong piak hi leuleu hi. Bang hang hiam cih leh, hong mawhsak den Thukham in mawhnei mi hihna tawh Zeisu kiang hong tung sak hi. Tua ahih manin Lungdamna thupuak leh Thukham in ki langneih lo hi. Gupkhiatna kalsuan na sungah ma apang khawm dingin  Pasian geelna ngiat ahi hi.

Tua hi a, “Gal. 3: 24 sungah Paul in Khasiangtho theihsakna tawh agen’ Thukham in, Pasian

Thukham 10 te a gen nuam ahi hi. Tua Thukham in mawhna hong lak khia a, Zeisu I kisap  zia hong phawksa ban ah, tua mawhna sung panin suahtak theihna dingin Zeisu sungah Upmuan na tungtawn pan in Pasian tungah kisikna tawh zuatkik theihna ding in hong huh hi.” Ellen G. White: Selected Messages, book 1, p. 234.

Na nuntakna sungah, a nunung pen Thukham tawh kituak in, na gamtatna, na ngaihsutna leh na kampau te bang hun in ki tehkaal na nei na hi hiam? Na kiteh kaak nai kei leh, a  laidal tung beka om Thukham hi lo in, Khasiangtho panpihna tawh, tun kipat sawm in (Matt.  5: 28; Rom. 7: 6). Na dawn kikna in Paul deihdan tawh kituak in bang ci bangin nangma dinmun tawh a koi ci ciangciang ki thuhual na nei sak thei na hi hiam?

NINGA NI (THURSDAY) August 10
THUKHAM LEH THU-UM MITE (Gal. 3: 25)

Mi tampi tak te in Gal. 3: 25 sunga Paul genna tawh kisai in, Thukham nawl khinna in tuat uh ahih manin tua bang mah in letkhia pah hi. A hi zongin Laisiangtho a mun dangte sungah Paul in, Thukham tawh kisai in, a hoih lam in gen zel ahih man in, mi te letkhiatna tawh kisai in maan thei lo hi. Tua ahih leh Paul in bang agen nuam hi ding?

A masa pen in, Ei te in Thukham mawhsak na pan in I suakta ta hi (Rom. 8: 3). Thu-ummi te hihna tawh, Zeisu sungah a om, Zeisu’ Hehpihna nuai ah nopsaktheihna a ngah thei te I hi hi (Rom. 6: 14, 15). Tua ahih manin, Zeisu a dingin suakta takin lungsim takpi tawh nasep theihna hong nei sak a, tua suahtak na in, mawhna khialhna hangin mawhsakna tungah launa teng hong vengsak thei hi. Tua in, Lungdamna thu sungah suahtakna taktak hi a, mi tampi takte in agen Zeisu sungah “suahtakna” I cih in Thukham zuihna pan in khawlna a hi hi, a cih uh tawh hong ki lamdang mahmah ding hi. Tua bek tham loh in, Thukham zuih lohna in mawhna hi zaw a, Tua Mawhna in kuamah suahtak na pia thei lo hi  (John 8: 34).

Rom. 8: 1 – 3 sim in. Mawhna thukhen na tawh kipelh a cih in bang a ci nuam hi ding hiam? Hih a lamdang thumaan in, bang ci bangin a nungta dingin ngong hong nei sak hiam?

______________________________________________________________________________

Khris hangin mawh maisakna I ngah khit tak ciangin, eite leh Thukham kizopna hong ki lamdang ta mahmah ding hi. Pasian’ deihna leh Ama’ lungkimna dingin sapna angah te I hi ta hi (1 Thes. 4: 1). Paul in, Kha Siangtho’ deihna bangin gamtatna zong na ci hi (Gal. 5: 18). Tua in, Thukham Sawmte zuih dingin kul nawn lo hi a cihna leh thukham bei ta hi a cihna hi dek lo hi. Tua a hih manin, Thukham in mawhna hong thei sak hi cih kician takin I telcian khit ciangin eite in, bang ci bangin om ding I hi hiam?

Bang bang hi ta leh, Thukham in Pasian’ zia leh tong lahkhiatna a hih manin, Thukham  zuihna tawh eite in, Pasian’ zia leh tong te awlno tak in, anei thei te I hi hi. Tua bek tham lo in, eite in thukhun a zui te bek ki hi lo a, Thukham in a hong sepsak theihloh khempeuh a hong sepsak thei Zeisu nung a zui te I hi hi. Topa in tua Thukham te’ I lungtang sungah hong gelhsak ta hi (Heb. 8: 10). Tua Thukham’ deihna teng a kicin’ theihna dingin Topa in eite sungah hong sem hi (Rom. 8: 4). Tua bangin Zeisu leh eite I kizopna tungtawn panin, nidang lai in I neih ngei loh a vanglian thuman na tawh, Thukham deihna kicing tak in a zui thei te ki hi ta hi. 

Rom. 8: 4 sim in. Paul in bang agen nuam hi ding hiam? Hih kamciamna tawh kizui in na nuntakna sungah bang ci bangin kician takin kimuh theihna nei thei na hi hiam? Tua tawh kizom in, a hoih kikhelna hong nei thei sakin, bang hangin Gupkhiatna thu ah a tawntungin, eite a dingin Zeisu hong sepsak lo siah thudang kihel thei kilkel lo ahi hiam? 

KIGIN NI (FRIDAY) August 11

SINBEH DING: Galati sunga Thukham thu tawh kisai in, dotna hong kidong thei zel hi. Zeisu kiangah ahong kha, lam honglak Thukham in bang a hi hiam? cih dotna ka dawnna ah, Moses Thukham ahi Zehtan Thukham te leh, Thukham Sawmte ahi uh hi, ka ci hi.

“Jew Biakna buppi sungah, Khris in a kingak na bulpi ahi hi. Abel sihna in, Zeisu Khris sihna  ding a kawk gangawh biakpiak na tawh kisai in, Zeisu sisan hangin Gupkhiatna ngah theihna ding lampi Pasian’geelna, Cain in a nialna hang ahi hi. Leitung mite a dingin a kibua khia ding Khris sisan a limciin na ahi gan sisan a luang ding pen Cain in hong nial mawk hi. Hih banga biakpiak zia ding pen, Pasian in a geelsak hi a, Khris in tua nasep na khempeuh a dingin a bulpi ahi hi. Jew biakpiakna bup sungah hih bangin gamtatna in Leitung mimawh khempeuh te a dingin Zeisu kiang ahong zuan sak thei lam hong lak (Schoolmaster)nasep na zong ahi hi.

“Leitung a om Biakbul nasep khempeuh te in, Mihing khanggui khempeuh te aiawh in,  Pasian leh Mihing ki kaal ah kizop na a om theihna dingin, Khris a hong kiguanna tawh kisai phawk tawntung theihna ding ahi hi. Biakbul sunga nasep te khempeuh in, Ama gam sung ading in thukhun te ahi Pasian Thukham te it theihna Lungsim neih theihna dingin Pasian in abawl sak a hi hi.”Ellen G. White: Selected Messages, book 1, p. 233.

“Pasian Thukham Sawm te pen, kikham na vive hi cih lamsang pan in et ding hi lo zaw a, a  hehpihna tawh hong kal hi cih lam in etsiam ding hi zaw hi. Tua a kikham te mah zuih theihna in, lungnopna ngah theihna dingin, a kician tavuan lakna hi zaw hi. Zeisu I san khit tak ciangin, tua Thukham in eite sungah gamtat luhek siangtho I neih theih na dingin hong sem ding ahih manin, a khang akhang in tawntung lungnopna hong ngahsak ding hi. A thumang mite a dingin tua in, kidal ahong pia kawmpi hong suak ding hi.” Ellen G. White: Selected Messages, book 1, p. 235.

KIKUP DINGTE:

1. I nuntakna sungah mawhna koi ci bangin do ding cih dotna om thei zel hi. Laisiangtho

bu sung panin, mawhna sung panin gualzawh theihna bang kamciamna te a om hiam? Tua kamciamna te tungtawn pan in a hoih zaw kalsuan na ah koi ci bangin tungto thei ding ihi hiam? Thudang khat pan in, Gupkhiatna ngah theihna dingin Zeisu’ in eite adingin a hong gualzawh pihna tungtawn pan in ahi lo, eimah leh eimah in I ngah gualzawhna tungtawn pan in, I kingak khak ding bang zah takin lauhuai cih I kidop kul hiam?

2. Christian tampi tak te tungtawn pan in I zak tawntung theih thu ahi: Singlamteh nungah Thukham kul nawn lo hi, ci na pi… mawhna tawh kisai thu lim gen mahmah ahih man in, thukham beinai lo a hih zia kilang sak hi. A taktak in zong Thukham bei cihna sungah a dang te sangin, bang thukham pen bei ta hi ci in gen nuam pha deuh uh hiam?

ooo00000OOOOOO00000ooo