Zo Phualva Thupuak Vol 07, Issue 17: SUNDAY TANG PASTOR NUPA KOI DANIN ADVENTIST SUAK? (Azom)

Hee-Sook Kim, (Kum 64) pen South Korea ah Laibu Zuak
Pasian nasem nu hi. (Andrew McChesney/ Adventist Mission)

Ni Khat, Pasian nasem laibu zuak mi 2 leh kei tawh inn khat khit inn khat laibu zuak in  South-Korea Khuapi( Seoul) tawh akinai Palya -ri khuapi neu khat ah kapai uhhi. Ka pai suksuk vua leh, Laimal golpi aa kisuang Pasian thusin nang cih khat ka mu uh hi. Ei zong pai in va en sin ni ci in khensatna ka nei uh hi.

Tua Lai tung aa Address om bang ka kan uh leh Sunday tang Pastor nupa khat ii inn ong tun mawk hi. A hi zong in Inn kongkhak ong hon laitak un amau kua te hiam cih ka thei ngei peuhmah kei uh hi. “Ko pen Korea Laibu bawlna zum pan aa, laibu pawlkhat zuak aa ong pai hi ung” ci in ka ki pulak hi. A lamdang khat ah, Innteek Pastor pa’n Seventh Day te Laibu Bawlna cih khat na phawk aa, “Bang a cih leh Saturday ni in Kikhawm mawk na hi uh hiam?” ci in tha khat in ong dong seisai hi.

Keizong Leitung piancil thu ka ban suutsuk pah hi. “Pasian in a ni 6 sungin na khempeuh bawl aa a ni 7 ni; Sabbath ni in tawlnga in siangtho sak hi.” Ci in ka gen hi. Laisiangtho galphi na Lesson pawl khat ka pia aa, ka pai kik ciang a Lesson dang zong piak kik ding kaciam hi.

Thu ka ki gengen uh leh, Pastor pa Kim-Jo Moon pen Laisiangtho zong a tam theih simsim khat na hi hi. Kum 30 sung bang a zi Soon–Ae Byun tawh Pasian na ana sem khin ahih lam zong ka thei hi. A inn ah ka pai kik ciang Laisiangtho Sinna cih te ka pia nawn kei aa; Kamsang E G White ii laigelh “Tuan Pu Pa leh Kamsangte,” “Kamsangte Leh Kumpite,” “Khangcin Lung Deih,” “Sawltakte Tangthu” leh “Kidona Lianpi” Cih Laibu 5 teng ka pia zaw hi. Tua laibu te Dollar 265 bang man aa Korea sum in Won 300,000 bang man hi. Hih te ong letsong ning ci in ka mawkpiak hi.

Pastor pa in Daniel leh Mangmuhna thu lunglut mahmah aa, a hih theih leh akup pih thei hi leng ut mahmah hi. Ka hawh kik ciangin Daniel leh Mangmuhna Hilhcianna Laibu pawl khat ka puak hi. 

Hun them vei khit ciang in sms ong khak aa “Ka nuntak na ah Laisiangtho pen nasia tak aa kan mahmah pa khat in ka ki ngaihsun hi. Ahi zong na pawlpi vuah ong kikhawm sin nuam ing, ahi thei ding hiam?” ci in lai ong khak hi.

Pastor pa tawmvei ding bang ong kikhawm zel aa, hunzat dan te zong nuamsa mahmah leh kilawm hi. Hi mah leh Kikhop ong khawl vat ciang in abang cidan ai tam ci in lamdang kasa  hi. Ka zawn kik zel aa, ka zawt sim in “tuni manlahing, tuni ngap pha keng” cih bang peuh in paulap zon ong kipan hi. Ka nung theihtheih leh a zi in Adventist Pawlpi aa kikhop ding aphal lo na hihi. 

A zi in “Nang Pastor pipi, na va kikhop Zumlo nahiam? Ci in Na tai dikdek mawk hi. A hi zong in kikhop ding ka zawn veve lel hi. Ka ki muhcil uh aa kipan kum 7 khitteh khatvei Adventist te’ Cidamna Lamsang Seminar khat ah akah dingin ka zawn hi. Tua Seminar ah ‘Pumpi tung aa ahoihlo guu’ pawlkhat te singgah tui pawl khat in siansuah thei ahih lam’ cih te kihilh ding ahih lam ka gen hi.

Tua bang kagen leh Pastor pa’n “Ka zi tawh kigen lecin hoihzaw in um veng aw” ong ci hi. A zi ka phone tawh ka ho pah aa, a pasal tawh ong pai ding uh thukim pah bilbel hi. Hih pen Pastor nu in Adventist te Vai a lunglut cil a lahna masa hi.

Nungkum beikuan lam in Pastor te nupa Pasian thu tangkona khat mah ah kasap leh ong kihel uh hi. Pastor pa bang athuzak te in lawngkha sim hi leh kilawm mah hi ven, ahi zong in khensat zo lian nai lo hi. A Pasian thugenna a kikciang zong anupa un ka sam leuleu hi.

Nitak sim mah in thu ong ngai uh aa, “Hih Na Pasian thugen un ong tuisuak(lawng) sak mahmah hi” ci in pulak uh hi. Ka ki muh zawh uh A kum 8na, 2017 kum, February kha in Pastor te nupa Adventist pawlpi ah tui ong kiphum uh hi. Pasian Kammal leh Cidamna  thupuak in a nuntakna uh khel sak hi.

Sia James Mamang in www.adventistmission.org pan hong teikhiat ahi hi.

DOTNA PAWLKHAT:

Pastor a ki ci khempeuh Pasian sathau nilh mah a hi khin diam?
Pasian sathau nilh lohpi in Pastor hi zo dingin na um hiam?
Hunbit sia a kici khempeuh na(ministry) sep hun a bit mah diam?
Hunbit siate in Pasian nasep gen kei gen nailoh in, a pawlpi beek a vei mah diam?
A nasepna pawlpi a veilo pastor khat ie makaihna pawlpi ah siapa in hunbit in a hun a pia zo diam?
A tuute a vak ding leh a cing dingin tuucingpa a cidam takpi mah hiam?
USA lam gam thumna a tungsa Pastor te thu gen dingin Kawlgam ah banghang a kileh sap lo hi ding hiam?

Zo Phualva Thupuak - Vol 07, Issue 17 by DavidLian on Scribd