Zii A Vua Pa(Khen Nihna)

July 15                                              India Gam A Laizang

Zii A Vua Pa,  (Khen nihna)

Agen: Chadamla (Min thak Samuel)

Chadamla’ zi in khalam kikhopna ah pai pahpah in a sungah dawi luut sak pahpah hi. Chadamla in hi bang aa a zi in a sungah dawi a luutsak zeel pen zadah mahmah ahih manin peello a, a khawl nadingin kun hi. Banghanghiam cihleh a zi sungah dawi a lut ciangin dawi in a pasal tawnggawp a, heh lua a hihmanin a zi a vuak gawp khak pen khial kisa mahmah hi. Ahi zongin a hehna pan kikeem zo lo hi.

Sabbathni khat, a inn uh tawh a kinaai Adventist biakinn ah hong pai aa leh, Jacob a kici mi khat thu biakinn sungah a kigen laitak za kha hi. Amah zong biakinn pang ah khawl in tawlkhat sung ngai khiikhee hi. Jacob thu a gen siapa tawh kiho nuam ahih manin kikhop hun a kiman ciangin biakinn sungah amah hong luut hi. Siapa tawh a kimuh ciangin siapa pen tua pawlpi a makaih pastorpa a hihlam hong thei ta hi.

Chadamla in biakinn pua lam pan pastorpa thugenna a na ngaih lam gen in, Laisiangtho thu a theihbehnopna thu pulaak hi. Pastorpa in zong Sabbath School lesson bu khat leh Laisiangtho bu khat Chadamla pia pah hi.

Hong Genbeh In

Ni tawmcik sungin Chadmla in Sabbath School lesson sung aa thu khempeuh sim khin hi. Laisiangtho mun a om khempeuh zong Laisiangtho bu leem in a vekpi in sim khin hi. Tua khit ciangin biakinn ah hong paikik hi. “Lesson sungah a kigelh Pasian’ thu leh Laisiangtho thu hong genbeh in,” ci-in Chadamla in siapa tungah thuum hi.

Pastorpa zong Chadamla tawh Pasian leh Laissiangtho thu kikum theih pen ama’ thangahna a hihna thu gen in, a nih un Laisiangtho thu sinkhopna hong kipanta uh hi.

Laisiangtho thu hong sinkhop sungun, Chadamla in, Korin Masa 3:16: “Note pen Pasian biakinn na hihna uh leh note sungaah Pasian Kha Siangtho a teeng a hih lamtak thei lo nahi uh hiam?” cih thu hong tek ta hi.

Hih Lai Siangtho mun ama’n hong ngaihsun pha in, amah leh amah thu hong kisit ta hi.  “Mihing pumpi pen Pasian biakinn himawk a hih ciangin kuamah in pumpi tung nawngkaisak hetloh ding ahi hi. Ken ka zi vuavua mawk leng, Pasian biakinn khat a susiasia hi mawk lo ding ka hiam,” cih hong phawkta hi.

A zi a vuakvuak mawk pen a khial ahih lam hong kitel mahmah ta hi.

Nuntakna Thak, Min Thak

Kha nih kha thum bang hong sawt khit ciangin biakinn ah kikhawm kik a, tua ni mahin tui kiphuum pah hi. A min zong min thak Samuel tawh kheel hi.

Samuel in pastropa tawh Laisiangtho thu a sinkhawm dingin a zi zawn hi. Amasa lam in a zi ut lo a, ahi zongin a pasal nuntakzia a kikheelna a muh ciangin hong lungneemzaw deuh hi. Khasapna ah a pai ciang in heh lua mahmah a amah a vuagawp a pasal pen tu-in hong migi mahmah ta hi. A zi vua nawnlo hi. A pasal in nisim in, Lai Siangtho a sim ciang leh a Pasian thak tungah thu a nget ciangin a migiit semsemna hong mu hi. Ama’ lungsim zong hong neem seemseem a, a pasal tawh Lai Siangtho thu pastorpa kiangah hong sinkhawm ta uh hi.

Lai Siangtho thu hong sin kawmkawm un, a zi zong a sungah dawi luut aa a ki-uksak pen a khialh lam hong kitel siangta hi. Amah in a vanglian Pasian thu hong telta a, dawi tawh kipawl pawite ah pai nawnloh dingin khensatta hi. Ahi zongin tua pawite ah a kihel dingin kisam veve lai hi. Tua bang pawite ah pai dingin a nial ciangin a sam  te’n phuisam gawp uh hi. Ahih hangin a upna ah khauhpai in dawi te sangin Pasian tungah tu-in hong thumaan zawta hi.

A Kilem Innkuan

Samuel tui kiphum zawh kum nih khit ciangin a zi zong tui hong kiphuumta hi. A zi zong a min Ruth tawh laihta hi.

Ni khat, Samuel in Lai Siangtho lam Pasian nasem (Bible workers) kisam hi ci-in pastorpa’  tangkona hong za hi. A lungsim sukha ahih manin a taxi hawl nasep khawl a, Bible worker suah ding hong khensatta hi. Ahi zongin Samuel in Bible worker a sep theih nadingin Lai Singtho thu a sinbeh zom ding kisam kisa hi. Pastorpa in Bible worker sep theih nadingin kha 4 sung thusinna ah a kihel dingin a min khum sak hi. After that, Samuel in  Amazing Facts India pawl ah na a sep theih nadingin thusinna ah hong kihel hi. Tua khit ciangin pastorate thusinna ah hong kihel leuleu hi.

Tuni in, Samuel pen kum 42 upa ta a, amau teenna khuapi naai, khuata khat ah pawlpi keem sia seem hi. Amah leh a zi, (dawi biakna ah khasapna a sep lai-in a sia nau nih), tu-in Topa kiang pan thupha a hi tapa nih kum 8 leh kum 10 tawh Topa’ nasepna ah mapang uh hi.

Samuel in kuata sim aa kibawl Sabbath School lesson te khua sungah hawmkhia kawikawi hi.  Amah bangin mi pawlkhat in Topa Zeisu Gumpa in saang thei ding cih Samuel in lametna nei hi.  

Tu kuata Sabbath sawm leh thumna sumpi khen khat in  India gam laizang ah a teeng Samuel leh Ruth te’ inn panin tai 20 a gamlaatna mun ah a kilamsaan phualpi lam khit zawh nadingin hong huh ding hi. Hih phualpi pen Southern Asia Division bup ah amasa pen thusinna leh kikhopna phualpi hi ding hi. Hih phualpi pen Samuel leh Ruth bang pawlpimite leh pastorte  leh division bup aa om Pasian’ nasemte in deih bangin zang thei ding uh hi.

Hehpihna tawh India gam a laizang mun ah a kilam ding phualpi aading leh Pasian’ nasepna a taangzai nadingin thungetna leh na sumpi uh tawh hong huh ciat ta un.

                       @@@@@@@@@###############@@@@@@@@@