Zo Phualva Vol 07, Issue 14: KHRIS SUNGAH KHANTOHNA (A ZOM)

Colossete sung aa sawltaakpa in siangtak in agenna pen ciapteh taakcing mahmah hi. Khatna ah, Khris in ukpite leh giitlohna ie vaangliatnate suut khiatsak khinta hi. Greek lai disarmed ie akhiatna taktak in suutkhia khinta cihna hi. Singlamteh hangin, amaute in singlamteh tawh agualzo Pa tungah upmuanna akingak laisiah Pasian mite tungah Satan vangliatna khempeuh kisuut khin zo hi. Nihna ah, piansaksa khempeuh in Satan leh alawmte ahih bangbang teekteek singlamteh in mu sak khinta hi. Hun khat lai in “Asangpen Pa bang ka hi ding” (Is 14:14) hi acih pen- tun’ leitung vantung a om khempeuh muhna ah zumna leh guallelhna hong nei khin hi. Thu um mite, khuamialna ki-ukna kaantan khin aa, khuataang ki-ukna sung atung khinsate tungah giitlohna in vaangliatna nei nawnlo hi (Col 1:13). Thumna ah, singlamteh in anunung pen gualzawh ding ahi Satan, mawhna leh sihna tungah gualzawhna hong kitel cian sak khin zo hi.

Hih dan tawh Khris’ singlamteh in Pasian ie giitlohna tungah gualzawhna vanh zat khat hong suak hi:

Mawhnate maisak theihna taktak hong tutna (Col 2:13)

Piansaksa khempeuh kipawlkikna leitung vaantung ah kilaakna (2 Co 5:19)

Atutawm mahmah in zong akip agualzo nuntaakna leh Khris sung khantohna hong hi sak thei aa, tua bang tawh mawhna in ih lungsim ahih keileh ih pumpi uk saklo ding (Rom 6:12) – leh eite in Pasian ta/nute dinmun ih suakna hi (Rom 8:14).   

Leitung gitlohna hun bei ding kician mahmah aa, hun khat lai in Satan ukna nuai-ah akihente, mawhna ie vangliatna panin kisil siang ding hi (Mang 21:1).

Hih  tatkhiatna leh gualzawhna kahlei tungah kalsuan sim in, Khris ie genkholhna te hong kicing a hihna ih mu thei hi, “Khawphelep bang Satan vantung pan akia kamu khin zo hi,” aci hi (Luk 10:18).

  Khris’ singlamteh pen mawhna pan Pasian’ tatkhiatna nasepna hi. Ama sisan in “mawhna tampi maaina ding aki bua khia khinta hi” ci in Zeisuh in kiptakin agen khin hi (Mat 26:28). Tua hong luangkhia sisan in gupkhiatna ading in ih phut khak ding leh lungdamna ih neih theih na’ng thulaigil pi ahi hi. Tua in mawhna ading gen thu khat ahi hi. Mawhna in ataktak hi. Mawhna thamanh in lianlua hi. Mawhna’ hong letcipna lianlua-zaailua leh sih theihna ding guu ahih man in “a manh pha Khris sisan” lo tawh mawhmaaina ding leh mawhna leh tua ie vaangliatna pan suakta zolo hi (1 Pe 1:19). Hih mawhna thumaan thu ih gen zeelzeel ding kisam hi, bhh cih leh eite in mawhna ie ahihna taktak anial,mawhna athusimlo aa leitung ah ki nungta lai ih hih man ahi hi. Ahih hang in singlamteh tungah mawhna ie siat-giitloh mahmahna ih maitangah ih mu khinta aa, tua in “mawhna tampite maaisak na’ng hong kibua khia sisan bek tawh aki siang sak thei ding hi” (Mat 26:28).

Tua thutak ahi Zeisuh Khris in ih mawhnate ading hong sihna leh Ama hong sihna lo tawh mawhmaaina om theilo cih thu thusimlo-donlo in om kha kei ni. Zeisuh singlamteh tung atun na’ng atawsawn pen eite ie mawhnate hang a hihi. Paul cih mah bangin, “Eite tha ih neihloh laitak, ahun hong tun ciang, Khris in ei migilote ading in … mawhneite ih hih laitak mah in hong si hi” (Rom 5:6, 8).  Ellen G. White genna ah, “mawhna vangikpi pen Khris tungah kisuanto aa, mawhna tungah Pasian’ thangpaihna in Ama nuntaakna suzaan hi.” “Atawntung ading khatvei” cih tangkona leh kipkhona pan suakta theilo hi (Rom 6:10; Heb 7:27; 10:10) Zeisuh sihna in nuntaakna-piakkhiatna leh a taanga ki guanna ahi hi.

Eite in Khris-mihoih hangin gupkhiatsa ih hi kei aa, mi-Pasian ahih na hang peuh, Khris-sia thupi ahihna hang peuh leh mawhna abawl theilo etteh ding Khris ahihna hang peuh hilo hi. Singlamteh tunga Khris ahihna hangin gupkhiatsa ih hi hi: “Eite ngah ding akilawm thuakna Khris in ngah aa, tua in Ama ngah ding akilawm bawlna eite in ih ngah theih khit na’ng a hi hi. Eite mawhnate hangin Amah kimawhsak khin aa, tua ah Ama’n mawh lo, eite tua bangin Ama thumaanna hangin diktanna angah khinsa ih hi thei aa, tua thumaanna sungah eite thumaanna kihel lo hi. Eite ading ahi sihna pen Ama’n hong thuak khinta aa, tua in Ama aa ahi nuntaakna eite’n ih saan theih na’ng ahi hi. “Ama liammate hangin eite in damna ih ngah khin hi.”

Tua Zeisuh sisan in mawhna pan maisakna kician leh khantohna khaici thak hong vawh khia hi. Hih Khrisian nuntakna ah thaksuahna leh khantohna gah akilangh masa penin kilemkikna hi. Pasian leh mihing kilemkik sak theih nading in singlamteh pen Ama ie vanh zat ahi hi. Sawltaak Paul in, “Pasian mahmah in leitung tawh kilemkik theih na’ng Khris sungah Amah hong te’eng hi” (2 Co 5:19) aci hi. Singlamteh tungah tua hong sepkhiatna hangin Pasian mai ah mawh neilo leh laulo in ih ding thei hi. Tua Pasian tawh kikhenna vai bei siang khinta hi. “Ni suahna pen nitumna panin agamlat mah bangin, ih mawhnate ei kiang pan in gamlapi-ah Ama’n hong hepkhiat sak zo hi” (Late 103:12). Singlamteh tung aa Mipa in Pasian omna taktak dong lampi thak hong hon sak khinta hi. Amah in singlamteh tungah “Kizo zo hi,” ci in gen khia aa, A nungzuite kiangah Pasian tawh kipawlkhopna sungah atawntung te’eng theih nading ngaihsutna apia khin hi.

  Pasian tawh kilemkikna in thakhatin hotkhiatna khantoh zia thu nihna hong lak pah a: tua in ih mipihte tawh kilemkikna hi. Singlamteh ah ahoih a etlawm mahmah lim khat pen, tua gei tengah minam kim kidimna hi. Tua tak a om mi khempeuh in Zeisuh a paaktate leh misiangtho hi gaikhin lo uh hi. Tua mun ah amau’ sumbawlsiamna hangin akimisak Egyptte; nam picing suahna leh minam ngeina lam ah picing kisa in akisial Romte; pil-sinnate ah midangte sang apil zaw Greekte; Pasian’ teeltuam mi ci-in amau le amau aki ngaihsun Jewte; teeltuam lak pan teeltuam akingaihsun Phariseete; upna bulpi siangtho nei akisa Sadduceete; suahtaak nading azong silate; leitung nopsakna ah akidiah misuakta akicite; tua mun ah numei pasal leh naupangte a om kim tek uh hi.  

Ahang in hiteng khempeuh kikaal ah singlamteh in kilamdanna nei sak lo hi. Singlamteh in tuate khempeuh mawhneite ci in thu khen khin hi; singlamteh in avekpi tungah Pasian lampi ahi kilemkikna pia khin zo hi. Singlamteh khephung pen dinmun kikimna hi. Bangmah in mihingte khen nawnlo, kisanggam thak khat hihna hong phuul khia ta aa, kilawmtaatna thak khat kipan khia in, a vekpi in kikaikhawmtuah khin ta hi. Nisuahna leh nitumna lam kigawm kik aa, saklam te khang lam ah hong pai suk in, mikangte mivomte tawh khut hong kilen ta aa, mihaute diangin mizawngte khut hong be’eng ta hi. Vekpi tungah sisan naak hong pia singlamteh – ciap ding a lungkim huai nuntakna, hopsawn ding ih phutkhak thusiamna, leh leitungah hong kilangkhia nuntaakna thak khat ih tangko ding, innkuan thak khat hih na (Eph 2:14-16) te hi. Tua dan tawh singlamteh in mawhna leh Satan tungah gualzawhna hong kipan khia khin in, tua teng apianna panin Khris sungah nuntakna hong tun hi.

Translated by Pr Noel Cinh Mangthuam

Pasian’ sapna

Mihing khat in Lungdamna thupuak tangko dingin sapna a ngah hun lian mah in Khris ngiat in amah sam hi. “Mawhneite muh dingin Pasian Tuuno kawk inmmuhsakna in nasepna lian pen leh a zahtaak huai pen nasep  hi.” GW p. 18. “Pasianin pawlpi nei a, tua pawlpi in nasep ding a tuam vilvel nei hi.” TM p. 52. Ministry nasep cih pen siamna leh kivak(profession) cih bang hi lo hi. “...siampi lianpen a sem dingin amahmah a kisehtawm hilo a, Aaron a kisap mah bangin Pasian in amah a seh ahi hi.” Heb 5:4.

Moses in kum 40 sung hun bei a, Zeisu in zong kum tampi sung mah a nasep kipatma in kithawi khol hi. Bung le bang a sep ding hilo hi. Pasian ading nasemte in amau le amau “Kei le kei a kisam” ka hi ci kei hen. Paul in Gospel gen ding utin a teel hilo a, Pasian in a teel hi zaw hi. Khazih ading taangmi na hi hi.

Sawltaak masate in Khris kiang mipi tun ziahziah uh hi, amau mahmah in Khris kiang na pai masa photphot uh hi. Saul in sapna a zak ciangin, “Topa, bang serm ding hong deih na hi hiam?” (Sawl 9:6) na ci hi. Hih thubulphuh a kizuihna mun ah nasepna mazang hi: “Amah lian semsem dinga, kei ka neu semsem ding hi.” John 3:30. “Pasian thu sungah a thuk lut mahmah te pen kiphatsakna leh kiliatsakna tawh a kigamla te ahi hi. Amaute in Pasian vang lian sak uh a, Pasian nasepna ah a neu pen mun ah a om uh pen kilawm kisa mahmah uh hi.” GW p. 142. (Minister’s Hand Book, Chapter 1 pan tomlak)

Thupilte:

1. A sungtawng pan a lungdamna taktak pen gualzawhna ding meitui (fuel) ahi hi. Dr John Hagelin

2. Nuntakna nuamsa in, a om pakpak hi kei! Hi pen a nasia khualzinna hi. Bob Proctor

3. Thusim pen a piangsa te, a piang laitak leh a piang lai ding te ie dotna te a dawnna hi pah hi. R Waldo Emerson

4. Kaam(Bliss) um in zui leteh zuakpi(wall) bek a omna  ah khuavannuai in kongkhak hong hon sak na ve.  Joseph Campbell

5. Nuihna pen mihing maitang pana phalbi a hawlkhia ‘ni’ ahi hi. Victor Hugo

6. Kei in mite gentheih haksatna ka hehpih in ka thuakpih theih hangin, amaute nopsakna ah ka nuampih kei hi. Amau nopsakna sungah a dah huai mahmah thu om ahih man ahi hi. Aldous Huxley

7. Lai simsim Christian in khangto a, a laisim a khawl hunhun mah in a khantohna kiam hi. John Wesley

8. Khuavakna lam enin, khua dak lecin khuamial in hong paisan ding hi. Hellen Keller

9. Ka theih thu khat bek om hi. Tua in bangmah ka thei kei cih ahi hi. Socrates

10. Lungkhamna in upna beina hi a, lungmuanna in lungkham beina ahi hi.  George Muller

Pawlpi pan A Kingah Theite:

1. Quarter 3na Sabbath School Lesson(Zolai/Englsih)

2. Christ Kiang Zuatna(Zolai)

3. သုခခ်မ္းသာ လမ္းညြန္

4. သမၼာက်မ္းညြန္း

5. Pasian Thugenna Video pawlkhat