Pastor 4 leh Saangnaupang 4 Te

July 29                                         India Gam Nitumnalam

Pastor 4 leh Saangnaupang 4 Te

Agen: Siyon, Snehal, David leh Abhishek

Seventh-day Adventist pastor te-in Adventist saang ah panmum thupi a nei mah uh hiam?

Adventist pastor te-in panmun thupi nei lo uh hi leh, saangnaupang a tul aa simin India gam aa kihong Adventist saang ah hong kah lo ding uh hi. Pastor 4 te thu en dih ni.

Siyon

Siyon in kum 10 a phaak ciangin Adventist pastor khat tawh kimu kha uh hi. Kaal khat in khat veita pastorpa a inn vuah hong hawh in a nu leh a pate tawh Lai Siangtho sinpih hi. Pastorpa in innkuan aadingin thu hong ngetsak in, tua khit ciangin hong ciahsan hi.  Tua zawh a sawt loin, mun dang Adventist pawlpi pan pastor khat hawh hi. Amah zong Lai Siangtho sinpih in thu a ngetsak khit ciangin ciahsan hi.

Hih bangdaan in tawlkhat sung pastorte hong hawh uh hi. A tawpkhakna ah, Siyon ii nu leh pa zong ni sagih Sabbath ni-in Pasian biak ding hong khensat ta uh hi. Ahi zongin buaina kha tom a: “Ih khensatna pastor te tung kuan gen ding cih ka khensat theikei uh hi,” Siyon in ci hi.

A nu leh a pate in vaihawm ding vai tampi nei uh a, ahi zongin Siyon sangkah nading tawh kisai bel buai nawnlo uh hi. Pasorpa in Siyon om nading bawdaa pen a inn pan un minute 40 bek kipai ahih lam a gen ciangin, a nu le a pa in zong manlang takin sangkah ding a kithawi dingin atapa uh Siyon sawl pah uh hi.

Siyon bel saang hong tun ciangin a pai masakna ahih manin kuamah a theih om nai lo a, a lung zuang hi. Ahi zongin amah in Manglai hanciam in sin a, kithuahpih ding lawm zong nei ta hi. Tu-in Mangpau zong siamta a, a saang thak ah saang a kah zong nuamsa ta hi.  Makai khat suah ding sin to in la mkaih zong nuasa a, thunget kikhopna leh Sabbath School hunte ah zong mapang kawikawi hi.

A kinaihuaipihte leh a lawmte in Siyon nuntakna a kikheel lam thei uh hi. Amah sangkhak sung inn a ciah ciangin amau inn ah kikaaikhawm in thungetna ah amah makaaisak uh hi.  Amau in Siyon kahna saang ah a tate uh kahsak nuam uh a, pawlkhat in zong atate uh kahsak khin uh hi.  Siyon leh leh a innkuanpihte a kikheelna uh hangin tu-in  adang saangnaupang 5 zong tua Adventist saang ah kah uh hi.

Siyon pen India gam nitumna lam ah kihong Alate Adventist saang ah a kah saangnaupang 260 te lak ah khat ahi hi. Tu kuata Sabbath sawm leh thumna sumpi pawlkhat tawh laisinna inndei lui te a thak tawh laih in kilam ding hi. Kiman khin leh saangnaupang a tam zaw saangkah thei ta ding uh hi. Pawlkhatte Adventist innkuan pan ahih uh hangin pawlkhatte Topa Zeisu thu leh Ama’ hong piak tawntung nuntakna leh hong itna thu a thei kha nai hetlo inkuan pan ahi uh hi.

Sinehal leh David

Sinehal pen kum 15 apha khin, Alate Adventist saang ah a kah zawh kum 5 a sawtta saangnaupang numei khat ahi hi. Amah pen Sabbath School hun leh adang biakpiaknate ah a kizangthei mahmah khat ahi hi. “Saang ka tun ni aa kipan Lai Siangtho sim ka kipan a, biakinn ah kikhop zong ka lawp mahmah hi. Hih saang ah pilna ka sin khaak pen ka lungdam mahmah hi,” ci-in Sinehal in lawptakin gen hi.

Kum 11 a pha David zong pastor khat ii huzaap tawh hih Adventist saang ah hong kah hi.

“Ka pa pen pazaan sia hi a, tawlkhat sung nasep ding omlo ahih manin an neek ding ka nei kei uh hi. Tua laitakin meelthei ngeiloh mi khat ka inn vuah hong pai in Pasian thu tawh kisai laihawm khat ka pa tungah pia hi. Ka pa’n zong a thu thei nuam in lawptakin simpah hi,” ci-in David in lamdangsa kawm in gen hi.

“Tawlkhat khit ciangin inn kilamthakna mun khat ah ka pa in limtakin a kizeem mi pawlkhat va mu hi. Nasep ding om kha ding in lamen kawmin tua mite kiangah va paai hi. Tua mite lakah laihawm a pia mi khat a muh ciangin lamsang sa hi. Ka pa zong lungsam hangsak in, tua mipa kiangah a laihawm piak lawptakin a imna thu va gen hi. Pasian’ thu a theihbeh nopna thu zong genbeh hi. Tua pa in Adventist pastor khat ahih lam kipulaak a, Lai Siangtho thu a sinpih dingin ka pa sam hi.

“Tawlkhat pastorpa tawh Lai Siangtho thu a sinkhop khit uh ciangin ka pa in tui kiphum dingin khensat hi. Ka pa tui a kiphum khit ciangin ko a innkuanpih dangte in zong Adventist pawlpi sungah ka pa tawh ka luut khawmm uh hi. Tu-in Atlate saang ah tan nga ah pilna ka sin hi. Hih saang ah mailam nuntak nadingin ka kigin kawmin Topa Zeisu thu sin thei kahih manin ka lung dam hi,” ci-in genbeh hi.

Aphishek

Aphishek’s ii nu in a tapa Adventist saangah a kah pen nalamdang thupiang khat in ngaihsun hi. Guah zuklohna hangin a innkuan un a ciinsa uh ankung khempeuh simang hi. A nu leh innkuanpihte gilkial dangtaakin bang hih ding cih theilo in a inn vuah om uh hi. Tua khit ciangin Adventist pastorpa khat a inn vuah hong pai in thu ngetsak dingin kun hi.

Amau innkuan pen Khristian hi lo ahih manin Aphishek ii nu in pastorpa thungen sak loin ciahsak hi. Ahi zongin pastorpa hong pai kikkik veve hi. Atawpna ah, a inn kuan aadingin pastorpa thu ngensak hi.

Tuni-in Aphishek ii nu in, pastropa hong hawh zelna pen Kha Siangtho makaihna hi dingin um ta hi. Tua innkuan neek ding an pen pastorpa in vaihawmpih hi. A nungciangin pastorpa in Aphishek ii nu Lai Siangtho sinpih a, Adventist pawlpi ah hong luut hi. Tuma kum 2 lai-in a ngah saangkahna panpihna sum tawh Aphishek in Adventist saang ah pilna hong zom thei hi.

“Ka tapa in Adventist saang panin hong sin piIna hoihsa ing. Ka veeng vuah a hoih lam huzaapna nei tuam hi. Ama’ cihtakna leh a thudikna hangin ka veengte un Adventist pawlpi thu leh Sabbath thu hong kan uh hi,” ci-in maitai takin Aphihek ii nu in gen hi.

Adventist saangte pen tu aa ih zaak thuhoihte mah tawh huzaapna na nei uh hi. Sabbath School sumpi phalna tak tawh hong pia ding nahih manun lungdam hong ko ung.  Hehpihna tawh na thungetna vuah Alate saang leh saangnaupangte aadingin hong phawk pih un.

Adventist pilna ah a thupi mahmh saangnaupangte hong zol sak aa thu a nget sak pastorte aa dingin zong thu ngetsak ciat ni.

                            @@@@@@@@@@@@@%%%%%%%%%@@@@@@@@@@@@