MCS Vol 01, Issue 02: PASIAN IN KUA HIAM?

Add caption

SINNA 02 - PASIAN IN KUA HIAM?

“TOPA hoih hi, ciam unla mu dih un; amah beel mi thupha ngah ahi hi” (Late 34:8)

Thupatna: Pasian bang tawh kibang hiam? Bang hun in hong om hiam? Amah i thei ding hiam? Dotna tampi tak om hi. Dawnkik nading a om hiam? Om mah hi. Tuate dawnkik nading Lai Siangtho sungah Pasian in hong lak hi. Lai Siangtho tawh kisai i sin khin zo hi. Pasian' thubu taktak ahih lam i thei khin hi. Lai Siangtho Pasian' kammal takpi hi ci-a i up nak leh Pasian' thu a maan in hong gen ding hi, cih i muan ding ahi hi.

Lai Siangtho pen Pasian tawh kipan in, Pasian tawh tawp ahih manin, Pasian' Laibu kici hi. Lai Siangtho in, Pa-sian bang tawh kibang a, Amah tawh koici kizop ding cih, A hong theihsak nadinga Pasian' hanciamna ahi hi. Pasian' thu i muh khiat pak theih ding bangteng hiam cih en dih ni.

1. A nungta, a maan Pasian khat bek kua hiam? Jeremi-ah 10:10.

Theih ding: Pasian pen lungsim seh le phuahtawm thu hilo hi. Up-mawh sansat zong hilo hi. A om tak-tak - "a nungta Pasian" ahi hi.

2. Pasian koi-ah teeng hiam? Phatna Late 11:4.

Theih ding: Aksite khengin, mihing muh zawh lohna mun ah Pa-sian teeng hi. Ama vangliatna in khua vannuai khempeuh huam hi. Hun le mun in Amah khaktan thei lo hi. Na Khempeuh Ama'n thei-a, vangliatna khempeuh Ama kiang pan hong pai hi. Kumpi Masa 8:39.

3. Pasian a mu ngei a om hiam? John 1:18.

Theih ding: Mihing' kicin lohna in a kicing Pasian tawh hong kikhen sak hi. Pasian a kihilna a mangmuhnate uh kamsangte in Lai Siangtho sungah agen uh hangin, maitang kisi-in Pasian mu kha lo uh hi.

4. Pasian' omzia koi bang hiam? 1 Peter 3:12.

Theih ding: Pasian in mu thei-in za thei hi. Ngaihsun thei-in phawk thei hi. Phatna Late 84:11. Mimal a a om Pa-sian ahi hi. Maitang nei-in, bil nei-in, mit nei-in, muk nei-in, kam nei-in, khut nei-in, khutmete zong nei hi. Paikhiatna 31:18. Phatna Late 34:15; 89:34. Mimal a a om Pasian ahih hangin, mun khat bekah omlo hi. Hun khat sungin mun khempeuh ah om thei hi. Zak loh, theih loh nei lo hi. Phawk thei-in, ngaihsun thei-in, mawh maisak thei-in, i tuah khak dahna le haksatnate hong hehpih thei hi.

5. Pasian' omzia a thupipen bang hiam? 1 John 4:8.

Theih ding: Pasian' omzia khempeuh le Ama sepna khempeuh tungah Ama itna tung tuangpen hi. Amah thutang ahih hangin itna picing a neih manin hehpihna tawh kidim hi. A maan itna khempeuh Pasian' kiang pan hong kipan hi.

6. Pasian' tawntung pianzia koici kigen hiam? Phatna Late 90:2; Hebrew 13:8.

Theih ding: Pasian a om loh hun om ngei lo hi. A om loh ding hun zong hong om ngei peuhmah lo ding hi.

7. Pasian' hih theih loh na khat peuh a om hiam? Mat-thew 19:26.

Theih ding: Pasian pen vanglian tawntung ahih manin, Ama hih theih loh na khat beek om lo hi. Job 42:2.

8. Pasian bek in ahih theih na nam nihte bang hiam? Isaiah 45:28; 46:9,10

Theih ding: Bangmah a om nai lo pan a na khat peuh om khiat sak theihna, le mai lam thupiang ding genkholh theihna pen a maan Pasian bek mah in a neih ahi hi. Pasian kici napi hih bang siamna a nei lote khempeuh pasian-zuau ahi hi.

9. Bang zah ciang dong ei' kiang nai-in Pasian hong om thei hiam? Phatna Late 139:7-10

Theih ding: Pasian om lo ding ci-a mite a taimang theih nading mun khat zong omlo hi. Pasian' kiang panin a bumang zo kei ding hi.

10. Cihmawh hun cianga mihing in Amah abelh theih nadingin Pasian in bang kamciam pia hiam? Isaiah 41:10.

Theih ding: Pasian' kiang pan a ih bukmang ding hilo hi. Mimal khat ciat hong huh dingin kamciam hong pia hi. Mihingte' tunga Pasian' hoihna bei cih om thei lo hi.

11. Mihing' tunga Pasian' hehpihna abei thei ding hiam? Phatna Late 103:17,13.

Theih ding: Ama hong hehpihna bei thei ngei lo hi. I nu i pate' hong hehpihna sangin Ama hong hehpihna lian zawtham lai hi. Isaiah 66:13.

12. Hong itna hangin koi-ah a teeng dingin Pasian hong kumsuk ding hiam? Isaiah 57:15.

Thukhupna: Hih bangin Lai Siangtho in Pasian' thu hong gen hi. Vangliatna nei mahmah napi hehpihna nei mahmah zel hi; pil mahmah napi dik mahmah zel hi; thutang mahmah napi thukhual mahmah zel hi. Mihing in pianna a neih hangin Pasian in pianna nei lo hi. Tua ahih manin mihing le Pasian kizakim thei ngei lo hi. Mi-hing in Pasian zong a, Pasian' deihna bangin gamta-a, Pasian lungsim ahih theih zah a azil ciangin, lungnopna lianpi ngah thei hi. Mihing in Pasian a zon ciangin a mu theihna dingin Pasian mah in na huh hi. Pasian i zon ciangin i nuntakzia zong hong kikhel hi. Src: http://www.maranatha-zomi.com

CIDAMNA THU

N - Nutrition (Anhoih Anpha) Azom:
Nisim a i nek den ahi buh pen akhiah loh asan phingphengte (san-lung-ti or brown rice) hileh cidam nadingin hoih penpen hi. A zawdeuh in zumkhum, sikhum, sikhang neite in nek ding hoih hi.
Mehgah Mehtehte Sungah: 1). Mineral (tattuh dat)te kihel hi. 2). Vitamin A pan Z kihel hi. 3). Sadat (be nam tuamtuamte ah) kihel hi. 4). Thau (Cholesterol) kihel lo hi. (Eg. Mipe (leibe), Ung-gah (coconut) te ah kihel lo hi).
Sa tam nekna pen lauhuai mahmah hi. Eskimo mi-namte in mehgah mehteh ne loin sa bekbek anek manun akhan uh tom in, atun uh zong tom lailai hi. Zomite sung-ah zong sa tam lua ane-te aci uh dam lo zawdeuh tham hi. Sa-em bang phadeuh lauhuai mahmah hi. Tuhun teh mipil siavuante in sa-em khawng ne nawn lo uh hi. Sa-em, sa kankeu, sahan-keu cihte in cancer thapia mahmah hi. Tua ban ah sasi le sathau zong nek ding hilo hi. Banghang hi-am cihleh sate' thau pen sihui sungah khal in lungtang si-hui khak, khuak sihui khak cih dante piangsak hi. Tua hangin mihing adam avakvak kimlai khawng tuk in siziau thei hi. Lupna ah ihmu suak, lungtang khawl vat acihte zong atam zawpen a tunga i gen Cholesterol (sathau)te hang ahi hi. "Hih in note tenna peuhpeuhah khang sawnsawnte dongin a kiptawntung thuzek hiding hi: Note in athau ahikeh a sisan na ne peuhmah kei ding uh hi" (Siampi 3:17). Hihteng i gen khit ciang sathau kihel loin aktui na kan nop leh, tui tawm suang in. Tua sungah sia-la-ka-tui tawm taak inla, aktui khahsuk lecin aktui kan mah hong bang ding hi. (Zop Lai Ding)  Syama Aye Cing

“Temperament: PIANPIH LUNGSIMPUAK”

I vekpi in i pianzia kidang tek a, tua in ihkiim ihpaam, munlemual thak le midangte tawh i kizopzia hong tawsawn hi. Tano na nei ahi a, naupangte tawh na ki thuah ngei ahi zongin, naupang khat le khat ki lamdang cih natel ding hi. Naupang gamtatzia lunglut takin en hile hang, amau pianpih-lungsim pen ki-khuai khau-khun thei hi. Nulepate dong hileng a tate uh laigui-zom ahih hangin a nunzia uh lungsim puak kibang hetloh cih hong gen thei ding uh hi. Tua a ki-lamdang sak penin pianpih-lungsim i cih pen ahi hi. Pianpih-lungsim i cih in i suahpih lungsim nunzia hi a, kizun thei aa ki paaikhia theilo hi. Pianpih-lungsim in “Bangci bangin (How)” naupang in thupiang phu, nawk, a bangci bangin gamtang kik hiam cih lak hi. “Banghang (Why)” hih ci nawk, gamta kik hiam cih hi lo zaw hi. Naupang i pianpih-lungsim puak nam omteng kan in telsiamna in THUPI mahmah hi, ahang in nulepa ahi nang, le naupang tawh na ki-pattahna uh hong sukha hi. Tua manin pianpih-lungsim in naupang pianpih luhekzia zong ahi hi.
Naupang in mi tawh ki bangci kholh cih leh midangte, vante, munlemual thak ah a om ciang bangci luhek cih pen pianpih-lungsim puak tawh ki memat hi. Nulepa pattah khialhna hang hi khin loin lunghek-zia tampi pen pianpih-lungsim hangin khat-le-khat kidang hi. Kim-le-paam le ngeina in zong naupang nunzia lamh hi.
Pianpih-lungsim Nampi Khenna: Stella Chess, Al-exander Thomas le Howard Birth te in New York Longi-tudinal Study cih bawl uh a tua sungah innkuan 85 te’ naungek 141 te a nulepa, siavuan siamah, sianu siapa tawh kop in pianpih-lungsim kankhiatna kum10 val tatsat loin nei uh hi.
Naupangte kha 2, kha 6, kum 1, kum 2, kum 5 le kum 10 apha teng thukanna/etcikna bawl uh hi. Lungsim puakzia khen 9 suah uh a, tua sung panin a muhkhiatna tungtawn un naupang pianpih-lungsim puakzia nampi 3 suah uh aa tua teng in;

1. Akep-baih naupangte (Easy Children)
2. Damdam a thalawp naupangte (Slow to warm up children)
3. Akep-hak naupangte (Active/Feisty children)
Akep-baih Naupang Chess le Thomas te in akep-baih nau-pangte pen lup hun, annek hun, mun thak, hun kikhel cihte ah puasiam pah in nulepa naucingte adingin haksatna bang mah pia lote ci-in khen uh hi. 40% te in hih khenpi sungah lut ci-in mukhia uh hi.
Damdam a Thalawp Naupangte: Chess le Thomas te kanna sungah 15% te hih sungah om uh hi. Hih sunga kihel naupangte in zumthei pian in, mun thak mithak omna maingal ngam pah loin tawl khat khit teh maingal in nuamsa uh hi.
Akep-hak/ a Ommawh Naupangte: Nulepate genna tungtawn in hih naupangte pen kep-hak ci uh ahih manin kep-hak naupangte cih minvawh hi. 10% te pen hih khenpi sunga kihel uh hi. Ommawh, tu khinkhian theilo, cim pahpah, anpiak hun kibang gel haksak cih bangin om uh hi.
Adang 35% te ahih leh hih atung a nampi thumte lak ah nih/thum gawm khawm in khenkhat ah kia lian loteng ahi hi. Naupang i pianpih-lungsimpuak tel ding a thupitna Nau-pangte in a pau theih ma siah uh hih lungsim puak luhek tungtawn in nulepa tawh kizopna bawl uh hi.
Naupangte pianpih-lungsim puak telna in naupang khangcing hoih asuah nang uh panpih nadingin a thupi pen khat ahi hi. Naupang pianpih-lungsim puak tungtawn in naupang kemzia, pattahzia le thuhilhzia-te naupang khan-toh theih nadingin nulepa kiging khol thei ding huh mah-mah hi. Pianpih-lungsimpuak telna in nulepa mahmah kimawhsakna le naupang gamtat mawhsakna tawmsak tu-am hi. A pianpih-lungsim puak pen kikhel theilo mah taleh tua tungtawn in nulepa, naucingte in atel’ na tungtawn in naupang pattahna le hilhnate lawhcing takin gel thei uh hi. Ahoih lohnate ahoih zaw dingin panpihzia ding gel thei uh hi. Nulepate in zong naupang pianpih-lungsim puak tung-tawn in telsiam dan ding panpih dan ding kan in kisin toto thei hi. Tua bangin panpihna a om loh manin naupang pawl khatte a khantoh zah ding khangto loin, lungtom sai-hak zaw thei uh hi. Tua ahih manin naupang pianpih-lungsim puak theih akul mah bangin nulepa in zong ei mimal pi-anpih-lungsim puak tel’ aa, i bulhsiam thei ding thupi mah-mah hi. By, Muneihthangdal

Volume 01 Issue 02 by DavidLian on Scribd