Kumkikna Lamen Innkuan - Khen 17 (Azom2)

CHRISTIANIN TAWLNGAKNA BANGCI TEEL

 Christian Tawlngakna, Leitung Gualnopna.— Gualnopna leh tawlngakna kibanglo hi. Tawlngakna in lamkik leh thaguan hi. Kinngei nasep ngeite panin kihei khia in, nasep maban adingin khuak thaksuaksak ding leh pumpi tha adimkik ding ahi hi.

Gualnopna in nopsak ding bek ngaihsun a uangtat thei hi. Nisim nasep nading tha aomsunsunte zatsaka, gualzawhna dongkhak thei hi.1

Christ ie nungzuite’ tawlngakna leh leitungmite gual- nopna kilamdang mahmah hi. Thungetna leh Christ’ min pulaakna, asiangtho thute akizakna munah ahaihuai nuihzakna, man neilo kihona kiza hi. Amaute’ ngaihsut- na ah nuamsa ding hi lel hi. Amaute gualnopna in haina tawh kipana, amawkna tawh tawp hi.2

Gualnopna ah kidek kidam kul hi. Gualnopna dan sittel ding ahi hi. Khangno khat sialin “hih gualnopna in ka pumpi, kakhuak leh ka kha adingin bang huzaap ding hiam? Nuam sa lua in Pasian kamangngilh ding hiam? Kamaiah Ama’ minthanna kakhaksuah ding hiam?” cih dong in.3

Amaan Gualnopna Theihnading Thukhun.— Jesu in lungnopna tuinak hi, cih mangngilh ngeikei ni. Amahin nihingte’ gentheihnaah lungnuam theilo hi, alungnop uh bek mu nuam hi. Christiante in adeihdeih un lungnopna nak tampi nei thei uh hi. Amaute in khial hetlo in bang gualnopnain maan hi, khial hi, cih genthei uh hi. Lungsim asusialo gualnopnate ah tawlnga uha, adahsak alungkiasak thei leh mai azumsak huzaapnate tawh buailo uh hi. Amaute in Jesu tonpih theiin, thungenin, aomtheih uhleh ngaih- muang pah uh hi.4

Upna tawh Pasian thupha angenthei gualnopnate in lauhuailo ding hi. Simtham thungetnate anawngkaisak, thunget kikhopna apailo sak gualnopnate in lauhuai a, ngaihmuan huailo hi.5

Nisim Tavuan Ahong Semsaklo Gualnopna.—Eite ihhihleh nisim ihnuntakna tawh leitungah Topa’ aminthangsak ding ihhi hi, cih upna aneite ihhi a, ei nopsakna dingin leitungah agualnuamte ihhi kei hi. Mihingte phattuamna apiading ihhi hi. Mitampite in azon uh nuntakngiam gualnopna, haina leh amawkna ah alungsimte uh phalin, nungta hilengh midangte adingin thupha ihhi theiding hiam? Nisim tavuan sepna adongkhak gualnopnate ah eite ihtualbial theikei hi.6

Kha nopsakna pen angsung nopsakna tawh ihsisak keiding hi. Lungsim alawpsak, nisim tavuante ahong lungtunglo sak leh ahong pelsak gualnopnate ihpel ding hi. Tuabang gualnopna tawh lamkhialah lungsim kipin, Satanin lungsim suksiatsakin, akhialte amaanin musak hi. Jesu in anu leh apa tungah apiakbangin kikhalna leh nu leh pa tungah kiapnate apiangtheilo suaksak hi.7

Paubang Mihon kikaihkhopna Gen.—Athuthu in ahoih tampi omnapi Satan’ suksiatna tawh agim atawlte adingin thaang abang thu tampi om hi.8

Gualnopna partyte-in khuak leh zia leh tong khanna dongkhak hi. Zualzanpih lawm leh gual, uangtat zong- satna, gualnop zonnate in khantawn manding siatna ahi hi. Tuabang gualnopnate nu leh pa leh siate in acidam huai leh nuntakna apia thudang tawh laihsak ding hi.9

Mihon kikaihkhopna khat om ngeia, pawlpi leh sang adingin dongkholh ngei hi. Tua in puansilhnaah kiphatsakna thapia-in, guaksuak kizepnaah kisialhna, angsung gualnopna, ciamnuihna, leh manthanna vai vive ahi hi. Leenglapi-in Satan zindo uha, hih kikaihkhopna maikaite pummat hi. Tuabang kikaihtuahna dang khat hong kilak ngeia, akikaikhawm mitein thumaan aum mah kisa uh hi. Music kiangah mikhat tu-a, la kisa a, a encik vantungmite kapsak hi. Namtui kihala, nuihna ging buahbuahin, lawpna lianpi omin, lungsim kituahna oma, Satan bekin tuabang bawl thei hi. Hih lawpna leh ngaihna pen Pasian’ mite adingin azumhuai thu ahi hi. Akihelte asiangtholo ngaihsutna leh gamtatna aneidingin kithawisak hi. Tuabang munah lawptakin akihelte pawl khatin azum-huai pawibawlna hangin akisik lam kamu hi.

Tuabang dan mihon kikaihkhopna dang kamu hi. Atezelzal kizepna, puan kisialhna kamu hi. Aom tein thungaihsun theibangin tu uha, otna, hai ciamnuihna, kipumphatna adingin kipiakhia uh hi. Mittangte te-in, biang sanin, lungsimciimna ihmu hi. Annek, zudawn, leh gualnop bawlna tawh Pasian amangngilh nadingun hanciam uh hi. Tua gualnopnain amaute adingin paradise ahi hi. Vantungin enin, za hi.10

Gualnop nadingin kikaihkhopnain upna buaisaka, lungsim tawng buaisak hi. Topa in lunghiangte sanglo hi. Amahin amibupin deih hi.11

Gualnopna tawmte bek Muanhuai hi.—Tuni a popular gualnopnate in, Christiante’ gualnopna akihel, lawkimite’ gualnopna abeidan mah tawh kibang hi. Tua mite lakah mi tuamte bek kha asusia dingin Satanin ciallo hi. Khangtawntungin Satanin mihingte si-le-sa lawpsaka, asiatna uh pahtawisak hi. Lasak pawi Opera ah music khelnono tumin, muhnop huai sakin, laamna, laithai kineihnate zangin Satanin amaute’ nuntakna thukhunte satzan saka, zualzanna ah gualnuamsak hi. Tuabang gualnopnaah kikaihkhopnate in kiphatsakna hatsakin, duhgawlte lungkim sak uha, Pasian amangngilhdingin makaih leh tawntung lametnate lakkhiatsak hi. Hih tawh Satanin khaukhih hi.12

Christian maan khatin tuabang gualnopna munah lut nuamlo dinga, Pasian’ thupha anget theihlohna munah kihel zolo ding hi. Tuabang theater innpi, laam inn, kimawlnaah kimulo ding hi. Lungsim sung panin Christ anotkhia ding gualnopnate ah mi tawh kipawllo ding hi.

Hihbang lehtat nuntakna aneite kiangah, Nazareth mi Jesu’ min tawh hong kihelzo kei ung, ihcih kul hi. Tua pawikhaamna leh laamna innpi ah Pasian’ thupha kingen theilo ding hi. Christian khat mah inzong tua inn sungah si nuamlo ding hi. Christ ahong pai ciangin tua munah kuamah kimu lo ding hi.13

Theater Pawi-inn Siatna Phual.—Alauhuaipen gualnop tawlngakna munin theater ahi hi. Vangzonna leh kha sangkhan sangsikin siatna phualpi zong ahi hi. Amaute’ leengladona tawh akihhuai zongsatna leh mawhna zongsatnate thapia hi. Huukna lanna apiangsak la, kampau leh omdante, lungsim sia ngaihsutna tawh kidiah hi. Zongsatna tawh nisialin tua mun ahawhtein anuntak thukhun uh siasak ding uh hi. Hih munin mihingte’ ngaihsutna, biakna kipattahnate gu tulhin, asiangtho tawlngakna, asiangtho nuntakna asusia zo zaw thudang omlo hi. Zu dawnna tawh hihbang gualnopna deihna hong khang hi. Suahtak nading lampi hoihpen in hihbang theater innte, circus munte, mawhbaang gualnopna munte pelhding ahhi hi.14

Laaminn Guaksuakna Sanginn.—Biakna anei innkuan pawl khat in hunbei nadingin innsungah laamna leh laithai kimawl uh hi. Hihte in daitakin inn-a gualnopna hia, nu leh pa cinna nuaiah kimawlna hi, ci uh hi. Ahizongin lunglawpna apiangsak nopsakna ihsinkhit ciangin, lauhuai kei, ihcih hangin asawtlo-in innpua lamah lauhuai ding hi. Hihbang munte panin nahoih om ngeilo ding hi. Pumpi tha pialo, lungsim thaksuak saklo hi. Nakha nuntaknaah vang khat, siangthona khat behlaplo hi. Tua sangin biakna thupi takin nangaihsutna susia in, kikhopna mun zong hong paisak lo hi. Hihbang gualnopnaah anamnam, adawldawlin aom hangin avekun kisiatna sungah tum uh hi.15

David’ Laam tawh akipan Hilo.—Khangthak alaamte in amau leh amau akisiansuah nadingin Pasian’ maiah zahtakna tawh David ie laamna paulam uh hi. Tuni laamna in zankim haina tawh kipawl hi. Gualnopna ah cidamna leh biakna kipaaikhia hi. Laampawi innnah apaimunte in Pasian zahtak dingin ngaihsun masa lo uh hi. Thungetna leh lasakna in zong hun ngahlo hi. Hih tawh kisittel thei hi. Leitung gualnopna in asiangtho nate leh Pasian’ nasepna thanemsak hi. Thukham 10 singkuang apuakkhiatna lai-in laamna in tuhun a laamna tawh themzong kibanglo hi. Khatin Pasian phawk a, amin pahtawi hi. Adangkhatin Pasian mangngilh leh zahpih a Satan vaihawmna ahi hi.16

Laithai Kimawlna in Mithah Kipatna.—Laithai phe kimawlna khamcip ding ahi hi. Hih tawh kizopna leh kithuahna in lauhuai hi. Laithai kimawlna khempeuhah khuamial kumpipa leh avangliatnain hun uk hi. Vantung misiate in hihmunte ah hawhden uh hi. Hih kimawlna panin kha leh pumpi ading meetna omlo hi. Khuak zong thahatsaklo a, mailam huna zatding ngaihsutna hoihna zong pialo hi. Kimawlah kampaute zong ahoih khat zong omlo hi. Laithai kimawlsiamna in aituam meet nadinga khemna hong manawhsak hi. Sum atawm panin atam kiciangto a, kikhapna lungsim lunggulhin, siatna hong tuh hi. Hih gualnopna hangin mihing bangzahin mawhna zongsatna, zawnkhalna, thong tunna, mithahna, leh gui-awkna ngah uh hiam? Khangnote in hih siatna lunggulhin om ahihlam nu leh pa in mulo uh hi.17

Guaksuakding Launa.—Puatham biakna tawh Christian ahite in mawhdinga azolpa’ thaang-antah ahi hi. Hihbang mite in gualnopnaah kikaikhawm pahpahin lawmzong kai thei uh hi. Christian biaknaah hanciama azui numei pasalte pawisungah alutdingin zola, kihelta uh hi. Amaute in Christian kungtungah bang gah ding uh, cih tuktehna Jesu dong tello uh hi. Hih pawikhaamnate in Satan pawi hia, Tuuno mopawiah apaidingte lam apialsak vaihawmna ahihlam theikhia zolo uh hi. Christ ie dikna puankang asilhloh nading un Satan dalna ahi hi. Christiante in bang bawlding thumaan hiam, cih lungbuai lai uh hi. Mi tawh kibanglo-in guaksuak ding lau uha, mite omdandan zui uh hi. Tuabang tawh, Pasianin khatvei mahzong lungsim leh lungtang alawnkhak nailoh mite huzaapna ah lam apial uh hi.18

Gualnopnaah Kalsuan Masa Pelin.—Gualnopna zongin nakal suan masak tawh lauhuaina namu kei ding hi. Ahizongin kilehkik nuamin nahanciam ciangin siatna sung lutding abaih ziau bangin thumaan zuidingin nungkik baihlo hi. Ngaihsun in. Hihin khialhna ahi hi. Lawm hoihlo nateelna tawh mi tampite in kal khat panin kal khat hoihna panin thumanlohnaah thukkiat suk zaw sem hi. Tuazahta in sia buang kei ning, acih uh banglo ding hi.19

Christian Thukhunte Siangtakin Pulaakin.— Christ in maantakin nangmah ahong neihleh, Ama adingin tetci napang ding hi. Gualnopna innte ahawh dingin hong kisam ding hi. Tuabang hunin Jesu adinga tetci panhun ahi hi. Christ adingin anungta takpi nahihleh napailoh nadingin paulap nazong keidinga, siangtakin Pasian’ ta ka hia, ka thukhunte in tuabang mun apaidingin hong phallo hi, naci pah ding hi. Pasian katonpih theihlohna mun ah khatvei zong paithei kei ning, cihding ahi hi.20

Amite-in atungtawnin Ama’ gam thukhunte apulaak ding pen Pasian ngimna ahi hi. Nuntakna leh gamtatna tawh hih thukhunte pulaak dinguha, leitung ngeina, zongsatna, leh kizekkhialhnate tawh kikhenkhiat ding hi.

Alamdang thu kamaiah hong kilak hi. Tua laitakin Pasian’ mite in anuntakna uhah tetci panna ahing neiding uh hi. Siatna in aumcih, mihon khat oma, amaute in adeihna uh nusia in, Pasian’ deihna zongin, amaute lungtang sungah Pasian’ thukham 10 kigelh hi. Tuate tungtawnin Pasian’ deihna kilangding hi.

Christ ie min apua khempeuhtein Ama tangding ahidingin Pasianin lamen hi. Amaute ngaihsutna siangtho dinga, akammalte uh picingin nuntakna lamsang ding hi. Christ ie biakna in amaute sepna bawlna leh paunate zel ding hi. Amaute’ nuntakna tawh leitung mawhna maitangah Christian biakna masot sak ding, asang leh asiangtho munah nasem ahihna uh alak dingin Pasian in amite deihsak hi.21