SSL SINNA 3: A KI PUMKHAT LUNGDAMNA THUPUAK

NIPI NI (SABBATH) NITAK LAM July 8

SIM DINGTE: Gal. 2:1 – 14; I Cor. 1: 10 – 13; Gen. 17: 1 – 21; John 8: 31 – 36; Col. 3: 11.

KAMNGAH: “Tua ahih manin kei tawh ngaihsutna kibangin note khat le khat ki-itin, khat le khat lungsim kituakin na omna uh tawh keima lungdamna na hong cingtaaksak na dingun ka hong kun hi” (Filippi 2:2)

Pawlpi puahphatna a makai John Calvin in, Dawimangpa in Pawlpi a hong do na dingin a zat galhiam in ki pumkhat theihlohna leh kikhen khapna hi ci in um a, puulnatna namkhat a hih manin, Pawlpi ciatin kidop ciat na dingin vau hilh ngei hi.

Ahi zongin, ki pumkhat theihna ding ci-in na neih Thumaan’ tawh kheel zaw ding maw? Pawlpi ki puahphatna makaai Martin Luther dinmun ngaihsun dih in, “Diet of Worms” thukhenna zum sungah thu a ki sit lai takin, “Upna bek tawh Gupna ngah” cih a thumaan muh na dok kik hen la, kipum khatna mah thupi zaw veve na ci mawk leh! 

A zenzen in Martin Luther in, a thumaan muh malno khat na suut kik bang hi zen leh, Satan leh a pawlte in gualzawhna ngah takpi ding na hi hi. A hi zongin neuno khat beek kilok lo in, ama kipna hangin Pawlpi te suahtaak na dingin hun thak a hoih zaw khat a hong kihong khia thei ahi hi. Ellen G. White, Kidona Lianpi. p. 156 (Tdm).

Gal. 2:1 – 14 sim in. Sawltak dangte tawh a kipumkhat na uh a suksiat sawm thu-um mihon khat hangin, tua buaina a veng theihna dingin Paul’ hanciam na ki mu thei hi. Paul a dingin, Kipumkhat theihna athupit mahmah hangin kipumkhat peuh le’ng ci in, Lungdamna thumaan deihna te mite san theih dingin a khiapsawm tuan kei hi. Ki pumkhatna sungah a

kibat kim lohna a tuamtuam om thei mah hi. A hi zongin Lungdamna Thu (Gospel) sungah

kipawlkhop theih na dingin (Gospel tawh a kingkalh thu leh la, ngeina te a om leh) leptuah

theih om lo hi.

NIKHAT NI (SUNDAY) July 9
KIPUM KHATNA A THUPI’T NA

I Cor. 1:10 – 13 sim in. Pawlpi sungah, bangzah takin Kipum khatna a thupit zia Paul in koi ci bangin gen hiam?

________________________________________________________________________________

A lungdamna Thupuak Pasian-piak hi lo ci in, a langpang te’ mawhsakna a thukkik khit ciangin, Gal. 2: 1,2 sungah, thudang khat mawhsakna tawh hong ngawh leuleu uh hi. Galati

gamah a om a langpang thuhilhsia te’ cih na ah, Paul in a hong gen Lungdamna thupuak te leh Peter leh Sawltak dangte thupuak, thuhilh dan tawh kituak lo hi cih thu ahi hi. A mau te in Paul pen a tuamkaai pikhat hi ci uh hi.

Tua bangin a kingawhna te a dawnkik na ah, a kikhel khit a tawmpen kum 14 khit ciangin Jerusalem a zinkik na thu a gen hi. Bang hun in zin kipan hiam cih bel ki thei lo hi, a hi zongin nidang lai in khualzin I cih pen a baih thu hih dek tuak lo hi. A zenzen in, Lei lam tawh Antioch pan in Jerusalem a tawn ding hi leh, tai 300 a kigam latna ah, atawm penpen kaal 3 sung bang, haksatna leh lauhuiana lak ah a pai kul hi. Ahi zongin tua bangin haksakna kawmkal mah ah, Sawltak dangte in a sapna hang hi lo in, Khasiangtho’ sawlna hangin a pai na hi zaw hi.Tua lai mun ah, a Lungdamna Thupuak te Sawltak te tungah a sungkhia hi. 

Bang hangin tua bangin hih hiam? A thuhilh te amahmah in, ki muanmawh na a neih hang’ hih tuak lo hi. Sawltak dangte kiang pan-in zong amau thukim pihna a la nuam zong hi tuan lo hi. A taktak in, hih Lungdamna Thupuak mah zong kum 14 sung bang a na genkhin zo ahi hi. A diakdiak in, Sawltak dang te in a thukim pihna, a phalna uh Paul in kisam kisa lo mah ta leh, a mau te’ panpihna leh thapiakna te nakpi takin lunggulh mahmah hi.

Tua ahih manin, Paul Thupuak in “tuamkaai diak hi” cih’ a ngawhna uh pen, Paul a langpan na bek uh hi lo zaw in, Sawltak sung leh Pawlpi sung kipum khatna a do na uh na hi zaw hi. Sawltak sungah kipumkhatna pen kinak sap mahmah hi. Bang hang hiam cih leh, Paul in Gentile te kiangah a mission nasep na leh, Jesusalem Pawlpi kikaal ah kilamdan na a om khak leh, a thunung ah a lungkham huai mahmah buaina hong om to ding hi. Gentile Christian te leh Jew Christian te kikaal ah ki pawlna a om theih kei leh, “Chris mahmah a kikhen kham hong suak dinga, Paul in a mungtup, a ki pumpiakna, a lam-etna, Gentile te tungah a thupuak khempeuh, a kikhak tan mang hong suak ding hi. (F.F Bruce. The Epistle to the Galatiions hilhcianna: 1982, p. 111)

Tu laitakin, Pawlpi sung i kipum khatna, ahong lausak, a hong khaktan thei bang thu te om hiam? a thupi zaw ah, tua te in bang hi a, koi ci bangin kidal thei ding I hi hiam? Kipum khatna sangin a thupi zaw bang hi ding mawk ding hiam?

NINIH NI (MONDAY) July 10
VUN-AT NA LEH A KHIAL SANGGAMTE

Bang hangin Vun-atna in Paul leh Jew Christian te kikaal ah buaina lian pen hong suak hiam? Sim in. Pian. 17: 1- 22; Gal. 2: 3 – 5; Gal. 5:2, 6; Sawl. 15:1, 5. Bang hangin, Gentile te in zong Vun-at ding kisam hi, ci-in a um mi te ngaihsutna’ telsiam dingin haksa lo hiam?

______________________________________________________________________________

Vun-atna I cih pen, Jew minam te’ Pupi, Abraham leh Pasian kikaal ah, a kiphut thuciamna tawh kizui a a kizopna uh ahi hi. Abraham’ suan leh khak sunga pasal te ading bekin a kipia hi mah ta leh, Pasian tawh thuciam na sungah a kizom nuam mi khempeuh tungah Vun-atna tawh ciaptehna dingin kizang hi. Piancil. 17 sungah, Thuciamna lim dingin Vun-atna Abraham tungah kipia hi. Hih thuciamna pen, Suan leh khak nei dingin, Egypt salnu tungtawn Abraham in a hanciam na, nungsang ah a hong piang thu a hi hi.

Vun-atna in thuciamna tawh a kituak ciaptehna lim ahi hi. Tua in, Pasian in a kamciamsa khat pen, mihing te in a theihtawp in a hanciam hangin, cikmah hun-in lawhcing zo ngei lo ding hi cih’ phawkna ding ahi hi. A puatham vun-atna in, sunglam vun-atna limciin na zong ahi hi (Thuhkik. 10:16; 30:6; Jer. 4:4; Rom. 2:29). Tua in, ei leh ei kipum muanna suahkhiatna leh, tua sangin citak taka Pasian tungah kingak zawk ding cih lahkhiatna ahi hi.

Ahi zongin Paul hun laitak in, Vun-atna pen, a tunga ngimna dan hi lo zaw in, Minam hihna leh Biakna ciaptehna hong suak hi. Topa Zeisu pian ma kum 150 kiim a kipan, a ki citak sak minam-it pawlkhat te in, Palestine gam sunga om, Jew peuhmah thagum hatna tawh vunatna neih pih bek tham lo in, a mau ukna sunga huamkhak, gam vengte pasal khempeuh te zong a vun uh a-at sak uh hi. Mi tampi phial in Vun-atna pen, Gup ngahna, Vantung tun theihna ding passport hi ci in um uh hi. Tanglai laigual no khat sungah zong a tomno in, “Vun-at mi peuhmah hell gam kuamah in manawh lo” ci in muanna tawh na tangko uh hi (C.E.B. Cranfield, A Critical and Exegetical Commentary on the Epistle to the Romans, 1975, p. 172).

Paul in Vun-atna pen, langpan mahmah hi i cih leh zong i khial kha ding hi. Paul in a langpan zawk thu in, Gentile mite Vun-at ding kulsa lo a hih manin nasia takin a do hi zaw bek hi. Thukham hilh sia te hilhna in “Moses Thukham sungah a kigen bangin na vun uh na at kei uh leh hotkhiatna na ngah kei ding uh hi,” (Sawltak. 15:1) cih thu ahi hi. Hih thu in, Vun-atna tawh kisai thu bek hi nawn lo in, Gupna thu tawh kisai hong suak hi. Gup ngahna I cih in, Zesu sungah Upna bek tawh a hih kei leh mihing’ thuman na tawh kingah thei tuak hi cih thu hong suak hi.

Tu khanghun in vun-atna pen a buai lua thu hi nawn lo khamah ding hi. A hi zongin tua thu tawh a kibang thubuai bangdan khawng I Pawlpi in nei I hi hiam?

NITHUM NI (TUESDAY) July 11
KIBAT LOHA SUNG PAN-IN KI PUMKHAT NA

Gal. 2: 1 – 10 sim in. Khris Jesuh tawh a kipawlna hangun suahtakna a ngahna thu uh a kansim dingin Thu-um mite sungah a thumaan lo thu um mi kineihkhem mi hong kihel uh hi. Amaute in kote pen sila hong suaksak nuam uh ahi hi (Gal. 2:4) ci-in Paul in gen hi. Christian te ading in, bang dinmun pan-in suahtak ding kul a hi hiam? John. 8: 31 – 36; Rom. 6: 6, 7; 8: 2, 3; Gal. 3 : 23 – 25; 4: 7, 8; Heb. 2:14, 15. I nuntakna sungah koi ci bangin suahtakna man taktak nei thei ding I hi hiam?

____________________________________________________________________________________________________________________________________________________________

Christian nun sunga I tuahkhak thu te tungtawn pan-in “Suahtakna” I cih pen, Paul in, thupi a sak mahmah a gennop thukhat ahi hi. Laisiangtho Thak bu agelh midang te sangin in hih kammal a limzat pen pa zong ahi hi. Galati bu sung mahmah ah zong, “Suakta” cih leh “Suahtakna” cih kammal te, vei tampi tak kihel hi. Bangbang hi ta leh, tua Suahtakna a cihin, Christian te adingin Christ sungah suahtakna ahi hi. Tua Suahtakna in Topa Pasian tungah kiphal taka kipiakna hunpha nunzia hong nei sak hi. Tua Suahtakna in, ci leh sa lunggulh na tawh kipawl mawhnop sila suahna lungsim panin, suahtakna hong nei sak hi (Rom. 6). Tua suahtakna in, mawhna thukhen na pan in zong hong suakta sak hi (Rom. 8: 1,2). Tua Suahtakna in, a gualzo sihna vangliatna pan in suahtakna hong pia hi (I Kor. 15:55).

Sawltak dang te in zong, “Jew mite tungah lungdamna thu hilh ding nasep, Pasian in Peter tungah a piak mah bangin, Gentile mite tungah lungdamna thu hilhna ding nasep”, Paul tungah zong, Pasian in a piakna thu theician uh hi (Gal. 2:7). Hih thu te tungtawn pan in, Pawlpi sungah siamna theihna kibat lohna sung pan-in kipumkhat theih zia bang ci bangin hong hilh hiam?

______________________________________________________________________________

Nungzui pi te theihsiam thu in, Pasian in Gentile mite tungah Lungdamna thupuak a gen dingin Paul samkhia a, Jew mite tungah ama thupuak a gen dingin Peter teel hi, cih thu ahi hi. Lungdamna thupuak pen akibangin thukhat aluang hi na pi-in, a gendan a kilamdan na in, a mun amual tawh kizui-in mite santheih ding ngiimna hi zaw hi.

“A tunga laisiangtho mun in, A kibang thupuak khat mun leh mual kihal na leh, ngeina kilamdan na ah athu paizia tawh kizui in kizaksakna cih hong theician sak hi...tua thupuak khata luangkhia i cihin, Christian kipum khatna bulpi hi a, kibat lohna sung pan-in kipumkhat na hong lak hi”. James D. G. Dunn, The Epistle to the Galations (Peabody, Mass.: Hendrickson Pub., Inc., 1933), p. 106.

Ei te in bang ci lampi tawh lungdamna thupuak genkhiatna leh teci panna neihtheih na dingin, nop I sakna phual “comfort zone” pan in koi ci bang dinmun ciangciang kihong zo ding I hi hiam? Na lung nopmawh hong buaisak thei thugen dan khawng a om hiam? Om a hih leh, tua thu na san theihna dingin, koi ci bangin lungsim kihong takin sang thei ding na hi hiam?

NILI NI (WEDNESDAY) July 12
ANTIOCH KHUA A KIPHUUT TUAHNA

Jerusalam khua ah Paul in, a ma hangin buaina a ven theihna dingin, thu kikup tuahna a neih khit zawh a sawt lo in, Gentile te adingin Pawlpi masa pen Paul in aphuh na Syria gam, Antioch khua ah Peter a zin na thu Sawltak bu sungah kimu thei hi. Tua lai mun ah Peter in Gentile te tawh suakta takin an nekhawm uh hi. A hi zongin Jame in a sawl Jew Christian honkhat te tua khua ah a hong tun uh ciangin, a mau te muhkhialh ding lau na tawh Peter in, a ngeina zat (Gentile te tawh omkhop, nekkhopna)pen hong ut nawnlo mawk hi.

Bang hangin Peter in a hoih zaw na thei kha mawk lo hiam? Gal. 2:11 – 13 leh Sawltak. 10:28 enkaak in. I nuntakna ah bangzah takin I ngeina, I omdan te in I lungsim hong huzap hiam cih, Peter gamtatna pan in kimu thei hiam?

______________________________________________________________________________

Mi tampi takte upna ah, Peter leh a lawmpih Jews te in Thuciam Lui sunga, A siangtho an leh a siangtho lo an tawh kisai Thukham te zuihkul nawn lo in, beisak ta uh hi, ci in gaihsun 

kha uh hi. Tua thu tawh kisai bel hih tuak lo hi. Tua bangin Peter leh Jew Christian te in, Jew te’ neek leh dawn Thukham a beisak takpi bang hi leh, Pawlpi sungah nasia takin buaina hong om takpi ding hi. Tua banga buaina om phial mah leh zong a thupiang I theihkhop ding thubu sungah a ki ciaptehna hong dawk ding hi, a hi zongin tua bang buaina kimu lo hi. A piang buaina zaw in, Gentile mite tawh sawltak te in sabuai khat tunga tukhawm nekhawm cih thu hi zaw hi. Bang hang hiam cih leh, Jew a tam zaw te muhna ah Gentile te pen, a niin in ciamteh uh ahih manin, a hih theihnak leh amau te tawh ki kholh khopna, omkhop na limlim ah pelh sawm uh hi.

Peter mahmah zong tua buaina anei ngei khat mah hi a, Pasian kiang pan-in mangmuhna tungtawn panin siangtakin hong telthei hi. Galkap bu Cornelius tungah Peter genna ah, "Note mahmah in zong limtakin na theih ciat uh mah bangin Jew mite pen minam dangte kiangah hawhin a kikholh ding a ngeina hilo hi. Ahi zongin mi khat peuhpeuh a nin hi, ci-in ka ngaihsutlohna dingin Pasian in kei tungah a thu hong lakkhin zo hi" (Sawl. 10: 28), ci hi. Tua  bangin a kician leh teltak in a theisiang ngei hi na pi in, a mipih te in a langpan gawp ding uh a lau manin a ngeina lui mahah hong nungtolh mawk hi. Pupa ngeina leh omdan te in bangzah takin Peter’nuntakna ah khauh takin kai kawikawi hiam cih kimu thei hi.

Peter’ gamtat khialhna hangin, Paul in zong khauhtakin na kawk paha, a taaina kammal sungah “mi meidawi” cih kammal hong zang liang hi. Tua kammal mah Barnabas tungah  zong zang hi (Gal. 2:13). Tua kammal in Pasian nasem ciatciat sunga zat dingin khauhpai (kammal khauh) lua hi.

Bang hangin ahi lo pi a, simtat ding baih mahmah mawk hiam? (Mite khialhna naak zon nop lua kisa, ei khialhna ki theihmawh bawl kha ngei mah hi lo I hiam?) Na nuntakna ah koi bangin simtatna nei na hi hiam? A thupi zaw ah, tua gamtat siatna te koi ci bangin kiphawkin, a bul panin longkhia thei ding I hi hiam?

NINGA NI (THURSDAY) July 13
PAUL’ LUNG HIMAWH NA (Gal. 2: 14)

Antioch pawlpi sung hong kinak sa-ai mahmah uh hi. Pawlpi makaipi nih ahi Paul leh Peter te in, mipi te mai ah hong kinial uh hi. Peter gamtatna hangin Paul in, a ki telgen siang na ding kun hi. 

Paul in, mipi te lakah Peter a taigawp na ahang’ bang ci gen hiam? Gal. 2: 11 – 14.

______________________________________________________________________________

Paul in, Jerusalem pana hong pai zinte tawh Peter in an a neek khop hanga taai a hih loh zia kithei hi. Tanglai Jew ngeina sungah, lengla dosiam na kinak zat mahmah hi. A thubuai zaw in, neekna dawnna tawh kipawlkhop na hang hi lo in, “Lungdamna thutawh kituak lo a

gamtatna”hang hi zaw hi. Peter gamtat zia in, Lungdamna thupuak pan-in lampial bek tham lo in, a ma ut thu tawh (deihkaih) lua hi.

Gal. 3:28 leh Kol. 3:11 sim in. Hih Laisiangtho mun sung panin, Paul kammal te in, koi ci bangin thumaan hong telsak hiam?

_____________________________________________________________________________

Paul in, Jerusalem ah Peter leh Sawltak dangte tawh a kimuhkhop masa pen tungun, Vun-atna anei lo Gentile te in, Pawlpi sungah Zeisu hangin kipawlkhop theihna thupha ngah khawm dingin khensatna nei ngei uh hi. A hi zongin Peter gamtatna in tua ki thukimna nawngkai sak hi. A beisa hun lai takin, Jew te leh Gentile thu-um mite in, suakta takin kipawl khopna nei thei na pi, tu-in mipi te hong ki khenkham ta a, mailam hun ah Pawlpi sung a ki phelkhap na ding hong suak hi.

Paul muhna ah, Peter gamtatna in Gentile Christian te pen, thu-um mite kiza kimna pan in, a dei nihna ah kiatsuk na hi a, ki lungtuak taka kipawlkhopna sungah ki nengniam na nasia

takin piangsak hi cih mu hi. Tua ahih man in, Paul in Peter kiangah, “Nang pen Jew mi hinapiin Jew mi bangin gamta loin Gentile mite bangin a gamta khinsa na hi hi. Tua bangin a gamta khinsa hinapi-in bang hangin tu-in Gentile mite, Jew mite bangin a gamtatna dingun na gamtatna tawh lakkik na hi hiam?” ci hi (Gal. 2:14). “Jew mite bangin gamtatna” cih laigual a khiatna in, “Jew biakna ah lutna/ suahna” ahi hi. Gentile te khatin Jew te biakinn ah pai in Jew te ngeina khempeuh zuihpih cih nopna ahi hi. Tua ahih manin Paul in, Galati a om amah alangpang te tungah, “ki Jew biakna sak” “ ci in sam hi.

Peter a gamtatna ah, a lampial lua lo hi zen leh, Barnabas zong tua ci dinmun tunglo dinga, minpha zong ngah zaw ding uh hi. Kilawm tatna ah ki huzaapna bangzah in vaangnei cih kimu khiatna zong ahi hi. Eite in, a lamkhial kiim leh paam huzap na pan in, ei leh ei lam I pial khak loh nading in ki dal theihna ding, koi ci bangin sin thei ding I hi hiam?

KIGIN NI (FRIDAY) July 14

SINBEH DING: “A kician mi hoih penpen na hi phial zongin, a mau dinmun a kiphawk kha lo

te in, khialna tampi nawk kha uh hi. Pasian aitang nasep na ah, na dinmun a san semsem ciangin na mawhpuak tam semsem dinga, zuih ding leh kikep na ding mun tam semsem ding hi. Topa hilh lampi ah pilvang takin a zuih kei uh leh alauhuai lampial theihna lungsim leh lungtang nei kha ding uh hi. Peter mahmah zong Antioch khua ah cihtakna ding munah na tuuk hi. Paul in zong kimai tang ngat kawm in a gamtat khialna langpan kawm in, na ta-ai pah hi. Tua thupiang hangin midang te in phattuam na ngah lawh uh a, dinmun sang a tungte adingin lam a pial khak loh na dinguh leh, thuman ah a kingak na ding hong sin sak hi.” Ellen G. White comments, The SDA Bible Commentary Vol. 6, p. 1108.

KIKUP DING:

1. Ki maingat kawma ki thuhilhna mi atam zaw in deih lo uh hi, a hih zongin a kul hun om thei zel hi. Pawlpi in thuhilhna amang nuam lo te leh, mawhsakna a sang thei lo te, koi ci lampi tawh hilh ding I hi hiam?

2. Leitung mun tuamtuam ah, SDA pawlpi a kikhantoh semsem mah bangin, kibat lohna a tuamtuam hong om hi. Tua bangin I kibatloh na tampi te lak panin koi ci bangin ki pumkhatna keem cing veve thei ding I hi hiam? Koi ci bangin ngeina kibat lohna sungah kipumkhat na tawh nuamsa thei veve ding I hi hiam?

3. Ngeina kibat pih lo mi namdangte kiangah lungdamna thupuak I genkhiat ding ciangin kheel ding a kilawm bangte hi a, I kheel loh ding bang thu te hi ding hiam? I kepcing ding leh, paihkhiat dinga kilawm thu te koi ci khentel theih ding I hi hiam?