Kumkikna Lamen Innkuan - Khen 17 (Azom1)

 BANG KIMAWLDING?

Amawhbaang asiangtho tawh Khek.—Uhamte bangin khangnote dai-in apisuah ding leh naupangte apil leh thu aneidingin bawltheih hilo hi. Mawhbaang gual- nopnate akimawhsak dingmah hia, nu leh pa, siate. leh khangno uktein amaute adingin amelhemsaklo asiangtho kimawlna piading hi. Cilgil takin khangnote ukcip ding hilo a, amautein kinencip, cih thuakna nei leuh haina leh siatna lampiah taimang ding uh hi. Akip, amigi, angaihsun thei khut tawh ukna leh makaihna pia in, alungsim uhleh angimna uh khalsakin migitna, pilna, leh itna tawh zawt ding hi. Tua hileh amaute’ hoih nading deihsak nahihna uh atheisakna ahi hi.1

Vantungin amawhsak kimawlnate in laamna, laithai kimawlna, sapi khinna, sum kitahna, kikhapnate ahi hi. Hih kimawlnate in siatna kong ahong uh hi. Phattuamna anei zong hiloa, lunglawpna pia in, sum kitah kikhapna manawhsak hi. Hihbang kimawlnate Christiante in mawhsak ding hi. Tuate munah natna apialo kimawlnate guangding uh hi.2

Asia sak, lam apial sakthei leitung gualnopnate panin tate ihkhal mahbangin mawhbaanglo tawlngakna pia in, lauhuaina aomlo lampi nuamah paipih ding hi. Pasian’ tate khat zong dahin amaikhingden dingin Topa in deihlo hi. Pasian’ thupiakte leh kamciamte lakin. Mipilte’ lampi in “nopsakna lampi hia, tua lampi in kilemna hi.”3

Phuaktawm leh akhialnate ihpelh bangin sakol tai kidemna, phe kimawlna, che leina, zudawnna, zatepnate nawlkhinin mihing asiangtho leh apicingsak, gualnopna taktak apiangsak nate zangin tawlnga sak ding hi.4

Kimanna anei kimawlna Inn.—Sang tampi takte ah thalak nading kimawlna tampi kipia a, makaihna kipia keileh kiuangtat hi. Tha leh sagolh deih lua uh ahihmanin khangnote tampite in khantawntung amanding uh liamna ngah uh hi.

Kimawlna innpiah thalakna in phatakin akibawl hangin huih lakah tawlngakna zahin hoihzolo hi. Tua hia, ihsangte ah tawlngakna hoih zaw ihpiakding ahi hi.5

Bawlung kimawlna Makaih Thukhunte.— Bawlung tawh kimawl namaimai mawhsakna ding omlo hi. Ahizongin ki uangzat khathei hi.

Hih kimawlna alan laitakin anung thupiangdingte in hong linglawng sak hi. Hih kimawlnaah akizang sum leh paaite Christ neilo-a mite tungah khuavak puak nadingin akizangzaw ding ahi hi. Mihing’ gualnop nadingin kimawlna leh sumbeinatein damdamin mihing pahtawina ah hong puaka, hih kimawlna itna leh uukna apiadingin pilna piakna-in Christian zia leh tong picinsak nadingin phattuamna pia hetlo hi.

Sangah tuabang kimawlnate akibawldanin vantung’ huzaapna kilang lo hi. Khuak zong hatsak zaw lo hi. Zia leh tong zong sangkhan zotuanlo hi. Akimawlte zong ngeina, zongsatna, leh leitung gualnopnate in tuamcip a, vantungah Pasian itna sangin gualnopna ait zawte, ci in kiciamteh hi. Sang laite bawl nadingin khuak hatzawk nading munah, Christian nasepna asemdingin kilawm zawk nading munah, hih kimawlna in akhuak panin laisimna nopna hemkhia in, kimawlnopna guansak hi.

Hih kimawlnaah Pasian’ minthan nading bek ihngim hiam? Hilo hi. Pasian’ lampi leh angimnate kimansuah hi. Hunkawm sungin khuak anei mihingte in ahong kilak Pasian’ deihna pen upmawh sansat thu leh phuahtawm thu tawh laih uh hi. Satan in amaute kiangah ompihin thapia hi. Mihingte in alunggulh uh hih kimawlna uukna leh kisinnate vantung Topa in deihlo hi.6

Kimawlna Tampite Haksatna.—Sangnaupangte in nakpi takin tha lading uh hi. Thalaknain ngimna tupna neiloa thadahna sangin siatna peikhia zaw hi. Ahizongin kimawlnain khangnote hoihzawk nading hitakpi hiam, cih patauhhuai tampi om hi. Sia tampitein zong hih kimawlnain sangnaupangte khantoh nading leh anung cianga nuntakna ahuzaapna ngaihsun mahmah uh hi. Hun tampi ala kimawlna in laisimna panin lungsim lakkhiatsak hi. Kuhkal taka hanciamna leh nisim nuntak nadingin kiginna pialo hi. Hih huzaapna in pasal picinna, citna leh sianthonna pialo hi.

A popular gualnopna ahi bawlung leh boxing kitupnatein gitlohna piangsak hi. Tanglai Romete kimawlna nam piangsak hi. Uknopna, thagum hatnaah kiphatsakna, nuntakna khuallohnate khangnote in lakkhia uha, mihing’ lungsim siasak hi.

Adang kimawlnate, ganhingvai ahihlianloh hangin tuazahta in mawhsakhuai lua lo hi. Tuate in gualnopna khangsakin, lawpna piaa, nisim kimanna anei nasepte deihlo sak hi. Nisim sepding tavuante pelsak hi. Amaan nuntakna phawksakloin, amangthangding gualnopna pia hi. Ngoltolna leh thupalsat nadingin lampi honga, alauhuai thamanin nungzuih hi.7

Nuntakna Abuailuatloh ciangin.—Kum masapek laite in Pasian’ makaihna tawh mite’ nuntakna mawl mahmah hi. Piansaknate tawh kinai-in nungta uh hi. Nu leh pate nasepnaah tate in zong seppih uha, piansaknate panin thuthuk leh hoihna sin uh hi. Agamdai mun leh singhon lakah khangkhat panin khangkhat ahong kipia suksuk thumaante ngaihsun uh hi. Tuabang kipattahna in mithahatte piangsak hi.

Tuhun ciangin mihing nuntakna in bawltawm tama, mihing lungsim zong kisia hi. Tua hun masa lai mawltaka nuntaknaah ihciahkik zawh nawnloh hangin bangci tawlngak ding, cih ihsin thei lai hi. Lungsim, pumpi leh kha nuntakna thamalh nading hun lak ding hong hilh hi.8

Innkuan Paikhia-a Tawlngakna.—Khuapi leh khuata ah aom innkuante in kipawlkhawmin, pumpi leh khuak agimsak nasepte nusia in, gamlakah kuankhia ding uha, bualtui kiang, singhonlakte, amuhnop huai piansak nate lakah omding uh hi. Cidamna apiangsak an mawltakin huanin, singgah leh singtangte singlim nuai, van lukhu nuaiah lui in ne ding uh hi. Cycle tuangin, tha lain, kumpite en dingin nuamsa ding uh hi.

Tuabang hun ciangin nu leh pa leh tate in kin, nasep, leh buainate nusia in omding uh hi. Nu leh pate in tate tawh naupang suakkikin, anuam theitheidingin kikhawlding uh hi. Anibup tawlngakna in zangding uh hi. Tu-in, innsungah tawlngalo-in na asem thapaite adingin huihlaka tha laknain cidamna piangsak hi. Avaihawmzote in hihbangin paikhia zel ding uh hi. Tampi sumlo ding uha, tampi meetding uh hi. Thathak, lungsim thak tawh nasep lutkik dinga, natna zong dalzo zaw ding uh hi.9

Piansaknate Hoihnaah Lungnopna Zongin.— Ihlungnop nadingin ihkepcingding nate apiakhia dingin Pasianin hongdeih hi, cikei in. Ihkep manin eite hoihna apiangsaklo dingte bek ahong piakhiasak ahi hi.

Singkunghoihte suanin, atehte tawh tuam a, apakte ie lim tawh aetlawmsak, Ama khutma tawh piansaknate itbaangsakin, eite nopsak nadingin abawlpa Pasianin hih nahoihte abawlna tawh nopsakna neiloin omding hiam? Eite nopsak ding deihna tawh ahong bawlsak ahi hi. Piansaknate etlawmna in Ama’ bawl ahi hi.10

Meetna apia Mihon kikaihkhopna.—Pasian’ itna in amaute’ lungtang taanin, Pasian’ kammalte akihawm sawn dingin leh Ama’ nasepna ma asotdingin leh mite ading nahoih semdingin kikaihkhopna in asangpen meetna ahi hi. Tuabang kikaihkhopna ah Khasiangtho leengla in kimuakin Amah dahsak nading bangmah kisem leh akigenloh ciangin, Pasian kipahtawi hi. Tua banga akikaituakte in zong thathak ngah sak hi.11

Eite kikaihtuahnate panin inn ihciah ciangin Pasian langpan khakna, kisuantakna omloin, mihing khat leh khat zong kinasaklo, kiliamsaklo-in, leh huzaapna ahoihlo kineilo-in, ihkikaihkhop theihding akisam hi.12

Mawhbaanglo Lungnopna Jesu in Muhnopsa.— Jesu in mimal gualnopna zonna atuamtuamte deihlo hi. Jesu in mi tawh kithuah thei hi. Mi dawl tuamtuamte leengladona zong saang hi. Mihau leh mizawngte, mipil leh mihaite’ inn zong lut hi. Amaute’ tualngiamnate khalam dinmun sangah lapsak nuam hi. Mawhna khat zong awi-amlo hi. Leitung gualnopna khatmah tawh agamtatna mualsaklo hi. Tua hinapi, mawhbaanglo lungnopnate muhnop sa-in, Amahmah aomna tawh mihon kikaihtuahnate thupha pia hi. Judahmite kiteenna pen alipkhaphuai pawikhat hia, Mihing’ Tapa adingin etlawm mahmah hi. Jesu’ lungsimah hih kiteenna ie lungnopnatein Amah ahong kumkik ciangin Pa kiangah amo ciahpih dinga, Honpa in hotkhiatna angahte tawh Tuuno’ kiteenna Nitak Annek tutkhopna musak hi.13

Kihona leh Gamtat amaan Limlak.—Nasep kipanin nitak an nedingin Pharisee ahihkeileh siahdongpa innah akisap ciangin tuasapna sangpah hi. Tuabang hun ciangin Christ in sabuai kima kihona uka, amanpha sinna tampi pia hi. Adang leenglate in zong Ama’ thungai hi, banghang hiam, cihleh Amahin cina damsak a, adahte hehnemin, atate uh apheitungah tusaka, thupha pia hilo hiam? Siahdongte leh mawhneite in Ama’ kimah vaneh uh hi. Akamka in thu agenciangin Ama’ thugen kingai hi. Biakna anei meellote tawh kikaihkhopnaah omdan ding Christ in anungzuite hilh hi. Mihon kikaihkhopna ah gennop bangmah neih luat kisamlo ahihna Amahin lim tawh lak hi. Ama’ kampaute in abeisa huna akinei kikaihkhopna-a thugente tawh kilamdang sitset hi. Agen sunsun kammalte azate adingin lim mahmah a, ngimna anei bangun thumanna tawh ngai uh hi.14

Ellen G. White leh anuam Mihon Kituahna.— Nisuah nalam kakhualzinna abeikuan ciangin Healdsburg ah kumthak nitak lapin katung uh hi. College innkhan pen Sabbath School kikaihkhop nadingin nakizem hi. Mangtaak singteh, phalbi kuan singtehte, animden singteh, leh pakte tawh pakkual nakibawla, etlawmtakin nakizem hi. Tehnim tawh biakinn daakpi kizemin inn sung lutna kongpi kiangah kikhai hi. Christmas Singkung khatin mizawngte huh nading leh daakpi lei nading piakkhiatna laite tawh kizem hi. Hih kikaihtuahnaah kuamahin thu genlo tanglo uha, mihing khatmah ie lungsim nawngkai saklo hi.

Pawlkhatte in kei kiangah, “Sanggam aw, hih bangci ngaihsut nahiam? Ih upna tawh akituak mah ahi hiam?” hongcih uha “ka upna tawh kituak hi” kaci hi.15

Azozo Vangliatna tawh Khangnote Kai in.— Pawlpi ciat leh innkuan ciatah Pasianin khangnote azozo dinga vangliatna tawh leitung siatna leh huzaapsia anei lawmte kiang panin akaikhiadingin hong deih hi. Jesu’ khangnote zawhdingin sin in.16