Sinna 1: PAUL: GENTILE TE KIANGAH SAWLTAK

NIPI NI (SABBATH) NITAK LAM June 24

SIM DINGTE: Act. 6: 9–15; 9: 1- 9; I Sam. 16: 7; Mat. 7: 1; Act. 11:19 – 21; 15: 1 - 5.

KAMNGAH: “Amaute in hih thu a zak uh ciangin mawhsakna thu gen nawnlo uh a, “Gentile mite zong kisikin a nuntak theihna dingun Pasian in hunhoih pia hi,” ci-in Pasian a phat uh hi” (Sawltak. 11:18).

Tarsus khua mi Saul (a pianthak khit ciangin Sawltak Paul) a kici pa-in, bang sem a, bang hangin sem cih te, a sep a bawlte tungtawn panin a ma thu I tellah ding hi lo hi. Biakna a kin mahmah Jew mi a hih manin, a nuntak sung atam zaw Thukham thu leh Isreal mite a dingin a sawtlo in a Gam uh a suahtak theihna dingin a hong pai ding Messiah thu a limsin mahmah pa ahi hi. Tua bangin a ngaklah mahmah Messiah a ki ci pa-in, mi gilo pen banga thah dingin aki bawlsiat gawp hangin thuak keiikaai cih pen, a ngaihsut dan tawh kituak thei mahmah lo a hih manin, Messiah dingin sang zo vet lo hi.

Tua ban ah, Zeisu’ Nungzui pi te pen, Jew Laisiangtho Torah tawh a kikalh, Isreal mite a dingin Pasian geelsakna tawh a kituak lo a gamta te ci in, ci in um hi. Singlamteh tunga thahna a thuak Zeisu pen Messiah a hih banah amah in sihna panin thokik hi ci in a gen te uh amah (Saul) ading in, lampialna hi ci in tuat hi. Tua bangin a haivai upna leh tua upna a nusia nuamlo te maisak theih ding hi kei ci hi. Tua bangin Isreal gam sungah Upna pial te a phiat siang Pasian ai-awh pa a hi dingin hong khensat ta hi. Tua ahih manin, Laisiangtho laigual te sungah, Zeisu pen Messiah hi ci-in a um a mipih Jew te a dingin a hiamgam mi bawlsia pa ci in, a minhong dawk hi.

A hi zongin Pasian in, Saul tungah a tuamdang khatin ngimna a nei hi. Tua in, a mah nangawn a ki lam-et bang ahi vet lo, Zeisu in Messiah takpi hi ci-in a tangko khia ding leh, Gentile gam khempeuh ah tua thu a gen dingin Pasian in teel hi cih thu ahi hi.

NIMASA NI (SUNDAY) June 25

CHRISTIAN TE A BAWLSIA PA

Tarsus khuami Saul, a hong kidawk masak penna in, Sawltakte Tangthu sunga Stephen suang tawh a kiden na munah kihel cih ahi hi (Sawl. 7:58). Tua khit ciangin, Jerusalem khua sunga a nasia zaw bawlsiatna te ah zong kihel hi (Sawl. 8:1-5). Sawltak Tangthu bu sungah a ki phamawh mahmah min te in, Peter, Stephen, Philip leh Paul cih te ahi uh hi. Bang hang hiam cih leh amau te in, Jew minam te’ gamkuam khengval in Christian Upna thupuak kizelh sakna ah a ki hel-te ahi uh hi. A maute sung pan-in Stephen a tuamdiakna om hi. Bang hang hiam cih leh ama thugen te leh ama sihna hangin, Tarsus khuami Saul tungah nakpi takin huzapna hong nei hi.

Stephen pen, Greek pau a zang Jew mi khat hi a, Deacon sagih a kiteel na ah a kihel khat zong ahi hi (Act 6:3-6). Sawltak Thubu tungtawn panin I muhkhiat theih thu in, mundang panin Jerusalem ah a hong lal kik te Jew minam honkhat in (Sawl. 6:9), Zeisu thu a genna tungtawn pan in Stephen tawh hong kiseel uh hi. Tua kam tungnung kituh, kinialna sungah Tarsus khuami Saul zong na kihel tuak hi.

Sawl. 6:9-15 sim in. A langpang te in Stephen a mawhsak theih na dingin bang thu tawh ngawh uh hiam? Tua ngawhna te in bang hong phawksak hiam? (Mat. 26:59-61 zong sim in).

_______________________________________________________________________________

Hi ci bangin Stephen in a thugen na tungtawn panin, a lauhuai simsim kilang neihna a hang nam nih a hong piang khia hi. Thu khat pan in Stephen in, a langpang Jew miman te’ thupi a sak mahmah uh, a Biakna uh leh a minam hihna uh a luankhiatna Jewish Thukham te a thupi seh pih masak loh hang ahi hi. Stephen in bel tua minam ciaptehna gamh nam nih te sangin, Jew mite a dingin Sihna panin a thokik Messiah ahi Zeisu thu bek mah Up dingin deihhuai zaw cih mu hi.

Tua ahih manin, Pharisees te’ khutzat, gam-uk kumpi te mimuan, Pawlpi masa te a langpang, a bawlsia den, Saul tungah Stephen in a heh ding mah ahi hi. Saul muhna leuleu pan-in, hilhkholh na tawh kisai a hong tung ding’ Pasian gam kamciam na te tangtung thei nai mahmah lo ahih manin (Dan. 2; Zech. 8:23; Isa.40-55), Isreal gamsung tengah Biakna siagawp ta a hih man in, siansuahna kisam hi cih mu hi, tua siansuahna sungah Zeisu in Messiah ahi hicih upna zong beisak nuam hi.Ama dinmun panin maan kisa ahih manin, Saul in khial a sakte a thahlup ahi hi.

Ei te in zong, I Upna tung tawn pan-in thalawp tak leh kintak in I sepkhiatna khat ah, a khial zong kihi kha thei a hih manin, tua thupiang te hangin, I hehna te koi ci bangin kikeem thei ding I hi hiam?

NINIH NI (MONDAY) June 26

SAUL’ A KIKHEEL NA

Saul in, “Topa aw kua na hi hiam?” ci in a dong hi. Zeisu in, “Na hong bawlsiat Zeisu ka hi hi, (ciangkhut hiam na khe tawh peek le nang a dingin haksa hi…)” Sawltak. 9:5 Pawlpi masa te bawlsiatna ah Saul thu ki tamphawk pah lo hi mah ta leh (Stephen a kiden lup laitak in, a dengte puan kempa hi lel), hong uangtat semsem ta hi(Sawl. 8:1-3; 9:1, 2, 13, 14, 21; 22: 3-5). Luke in Saul’ pianzia a gen na ah, a gamhtat, a kihtak huai ganhing, Siatna tawh kidim langpang galkap, ci liang hi. Sawl gitlohna pen(Sawl. 8:3)sunga “ravaging” cih kammal pen Greek tawh (Late 80:13) sunga “suksiatna tawh kidim gamlaka om ngal gilo” tawh

kigen teh hi. Christian te tungah Saul in a bawlsiat na pen, a lungnop hun ciangciang cih bek hi lo in, Christian Upna a phiatmai cip nuam ahi hi.

Sawl a kikheel zia hilhcian na mun thum te sim in(Sawl. 9:1-18; 22:6-21; 26:12-19).

Hih mun te sungah Pasian hehpihna koici bang in kimu thei hiam? Kammal dangin gen leng; Hih zaha Pasian hoihna a ngah kha dingin Saul in a kilawm mah a hi hiam?

______________________________________________________________________________

Mihing lam panin, Sawl kikheelna pen a piangthei lo thu a hi hi. (a thu I zak tung thu tawh en leng muanmawh huai mah hi).

 Danpiak zawk ding bek mah tawh kilawm zaw hi mah ta leh, Pasian in a langtat Saul pen a hehpihna tawh theisiam hi. Saul tung pan in, I phawk ding thu khatin, a kikheelna in thatang hat thu tawh ki hahsawl a hih loh zia leh, a hawmpi in kikheel lo hi cih thu ahi hi. Saul pen Pasian om lam a umlo mi hi lo hi. Biakna mi mahmah khat hi zaw na pi in, Pasian a theihna tawh kisai a teldan tawh a gamta khialpa ahi hi. Zeisu in Paul a hopih na ah, “ciangkhut hiam na khe tawh peek le nang a dingin haksa hi” (Sawl. 26:14) cih kammal in Khasiangtho in nang hong mawhsak hi cihna ahi hi. Tanglai in, “ciangkhut” pen adawn kizum

saka, lo kho Bawng te a lampial uh ciangin lokho te in, a utna mun a zuatsak theihna dingun a dawn zum tawh sun uh hi. Saul zong Pasian Ciangkhut zum tawh kisun zel mah hi. A hi zongin

a tawpna Damascus lampi ah a thokik a vaanglian Zeisu tawh hong ki bingtuah ta uh a, Saul in langpan thei nawn lo hi.

A beisa hun lai a, nangma kikheel dan ki ngaihsun kik in. Paul dan bel hi kei kha mah ni. A hi zongin Pasian hehpihna I ngahzia pen kibang lel ding hi. Zeisu sungah I kipiak (ki-aap) na pen, bang hangin I mangngilh ngei vet loh dingin thupi mawk hiam?

NITHUM NI (TUESDAY) June 27

DAMASCUS AH SAUL

Zeisu tawh a ki bing muhna hangin, Saul a mit taw a hih manin, Judas cih min nei pa inn zuat pih uh a, tua pan in Ananias cih pa tawh kimu dingin sawlna a ngah hi. Saul in ci leh sa tawh a mit a tawt na pan-in Zeisu nungzui te a bawlsiatna pen kha lam mittaw a hih zia nasia takin hong phawk ta hi.

Damascus paina lampi pan in, Zeisu a kilaak na hangin na khempeuh hong kikheel ta hi. A mah leh amah maan a kisa mahmah dinmun pan-in nak khialh mahmah a hih zia kiphawk hi. Pasian na sem kisa mahmah napi, a langpang mahmah khat na hi zaw hi.

Jesusalem khua pan-in a ki hisak, a ki citak sak mahmah Pharisees pa-in, Damascus khua sungah a kiniamkhiat mithak dinmun tawh hong lut ta hi. A piang thu khempeuh a kisit kik theih na

dingin, ni thum vilvel, thungen antang kawm in ahun hong zang ta hi.

Sawl. 9:10-14 sim in. Ananias lungsim sungah bang teng om ding hiam cih ngaihsun in: Mi bawlsia pa Saul in, tu in Zeisu sungah thu-um mi a suak Paul hong hi ta, bek tham lo in, Gentile mite kiangah Lungdamna thu a tangko dinga Pasian’ teel sawltak hong suak ta hi (Sawl. 26:16-18).

Ananias lungsim ah buaina om ding hi cih bel lamdang lo hi. Jerusalem a om Pawlpi mite in zong, a kikheel Saul a san theih na dingun kum thum sung bang sawt a hih leh (Sawl. 9:26-30), tunai a thupiang khat hangin Damacus a om thu-um mite lungsim sungah, bang zahin dotna leh ngaihsut na atuam tuam om ding hiam cih theihsa ahi hi.

Lamdang tak leh, lam-et loh pi in, Tarsus khua mi Saul tawh kisai mang sungah Topa in Ananias a hopih na zong phawk kik ni. Jew thu-um mite ii gal pa in tu-in amau mi hi ta ding cih thumaan pen, san theih na dingin, mangmuhna (vision) bek mah tawh up theih ding hong hi mai hi.

Christian te Upna zungpi satmai dingin, Saul in, Siampi lian te thupiakna leh tuavuan letna lai pua kawmin Jerusalem pan a hong ding khia ahi hi (Sawl. 26:12). A hi zongin Topa in a thudang tawh a za lianzaw leh, nasepna lianpi a zai zaw sem sak nuam zaw hi. Tua in Gentile te kiangah Lungdamna Thu puak ding ahi manin, Ananias leh Jew thu-um mite ading in, a hong kikheel na sangin ling lau sak, lamdang sak lawh zaw uh hi. Christian te Upna a bei na dingin a butom nuam khat pa in, tu in Jew thu-um mite nangawn in a ngaihsut khak ngei loh uh, tua Upna thu mun citeng ah a theh dingin Paul pen, Pasian in hong zang ding hi ta hi.

1Sam. 16:7; Mat. 7:1; I Kor. 4:5 sim in. Midang te’ Kha lam dinmun a tuahkhak thu te uh i muhkhiatna tawh kisai in ei te in bang ci bangin kidop huai hiam cih hih mun te panin, bang kimu khia thei I hi hiam? Midang te na muhna pak tawh koi ci bangin thu na khen khial kha ngei

hiam? Tua Khialhna te pan-in bang ci kisin thei ding na hiam?

______________________________________________________________________________

NILI NI (WEDNESDAY) June 28
GENTILE TE KIANGAH LUNGDAMNA THU KIZEEL
Koi mun ah Gentile te a dingin Pawlpi kiphut masa pen hiam? Bang thu hangin
Gentile thu-um mite tua mun ah pai uh hiam? (Sawl. 11: 19-21). Thuciam Lui sung pan in bang thu in tua thupiang te hong phawksak hiam?(Dan. 2).
Stephen a sih khit ciangin, Jerusalem khua sungah nasia takin bawlsiatna hong khan ciangin, Jew thu-um mi tampi tak te in, tai 300 bang a ki gamla leilu lam Antioch khua ah hong galtaai uh hi. Rome te ukna sunga om Syria gam ii khuapi khat hi a, Rome khua leh Alexandrea khua cih loh Rome gam sungah a lian pen nihna ahi hi. Gam sungah mi phazah Tein nga (500,000) bang om uh a, minam namkim om a hih manin, Gentile te a dingin Pawlpi phut na dingin a lem mahmah mun a hih banah, Pawlpi masa te a dingin Leitung bup Pasian nasep (Mission) kipat theih na dingin a hoih pen phualpi hong hi pah hi.
Bang thupiang hangin Barnabas in Antioch khua sik dingin hong pai a, a khua nungah bang khensat na tawh Antioch ah a a mah tawh kikhawl dingin Paul sam hiam? Tua lai muna om Pawlpi in bang limciin na tawh kiteh thei hiam? (Sawl. 11:20-26).
_ _ _ _ _ _ _ ___ __ _______________________________________________________________________________
Paul’ nuntakna a khangthu sut ding a baih hetlo thu ahi hi. A hi zongin, A kikheel khit Jerusalem a hawhna (Sawl. 9:26, 30) leh Barnabas in Antioch ah hawh dingin a sap kikaal sung kum nga bang hi thei ding hi. Tua kum 5 sung tengin Paul in bang hih hi ding hiam? A kician in bel thei kei hang’. A hi zongin Gal. 2:21 sunga a kammal te I siksan tak ciangin, Syria gam leh Cilicia gam te ah Lungdamna Thu tangko hi ding hi ki ci thei hi.
Khat khat te genna ah bel, tua hun sung teng a innkuan pih te in innkuan sung, innluah za pan- in phiat (Fili. 3:8) uh ahih manin (II Kor. 11:23-28) sunga a gen mah bangin haksatna tampi nawkto zong hi thei hi. Antioch khua a om Pawlpi in, Khasiangtho makaih na tawh hong paak
khia lihliah ta hi. Sawl. 13:1 sunga a gen mah bangin, mi namkim a ten mah bangin, tua khuapi sunga om Pawlpi sungah zong mi namkim, ngeina namkim kihel ngeingai uh hi. (Cyprus pan in Barnabas, Cyrence pan in Lucius, Cicilia pan in Paul, Africa pan in Simon, midang Gentile piangthak tampimte’ khua om lai hi…) Tu in, Khasiangtho in, Lungdamna thu a kizelh semsem na dingin, Syria gam, Judea gam te khengval in, Missionary nasepna a tangzai zaw a gamla zaw a tun theih na dingin Antioch khua mah bulphuh in hong kipan khia ta hi.
Sawl. 11:19-26 simkik in. Mi namkim, ngeina namkim kihelna Antioch Pawlpi’ hoihna pan in, tulai I Pawlpi sungah a mau I phak zawh theih na dingin bang cih ding I hi hiam?

NINGA NI (THURSDAY) June 29
PAWLPI SUNG KI TUKALH NA
A taktak in ci leng, Mihing te pen mi picing ki om lo hi. A sawt lo in, Upna sandan a kibat lohna hangin buaina hong kipan ta hi.
A masa pen in, Pawlpi mi masa te sung pan-in, Gentile thh-um te hi ci banga Pawlpi sungah hong lut ciangin a lungdam khollo hong om hi. Gentile te tungah Lungdamna thupuak a neihna hanguh hi lo zaw in, koi ci bang kalsuan na tawh Gentile te in Pawlpi tawh ki zom thei ding cih thu ahi hi. Khat khat te in Zeisu sungah Upna bek tawh Christian hi cih ciapteh dingin kicing nai kei ci uh hi. A mau te in Upna tawh Vun-aatna ahi zongin, Moses Thukham te zuih beh ding kul lai hi ci in kal’ uh hi. Christian takpi suah theih na dingin, Gentile te in Vun-aatna nei masa uh hen ci ngiat uh hi. (Sawl. 10:1-11:18 sunga Peter leh Cornelius tangthu tungtawn pan-in Jew te leh Gentile te ki langneihna, bang dinmun ciang hiam cih kimu siang thei hi).
Philip in Samaritan te kiangah a nasep na (Sawl. 8:14) leh Antioch khua ah Gentile te tawh nasep khopna (Sawl. 11:22) te a en dingin, Jerusalem pan in a hong zin Biakna makai te in Biakna nasepna ah Gentile te kihel cih hong mu uh hi. A tungin zong, Rom galkap bu, a ki vun- aat lo, Cornelius, Peter in a tuiphum na tungtawn panin Gentile te tawh kisai in thu-um te sungah, buaina om ngei khin hi. Cornelius banga Gentile mi khatin Pawlpi sungah hong kihelna hangin, nuam mawh a sa mi honkhat om uh hi. A hi zongin, Zeisu sungah Upna bek tawh kalsuan theih na dingin Gentile te a ding ngimna tawh Biakna kawngkhak zaa pi a hong Paul hanciam na hangin, mi tampi takin Paul nasepna a beimai mang theih na dingin hong hanciam uh hi.
Koi ci bangin, Judea gam pan a Thu-um mi pawlkhat te in, Antioch khua a om
Gentile Christian te tawh na a semkhawm Paul nasep na langpan uh hiam? (Sawl. 15:1-5).
_____________________________________________________________________________
(Sawl. 15) sunga, Jerusalem Khawmpi ah, Vun-atna tawh kisai kikupna ah Paul thusunna mihon pi te in panpih mahmah na pi in, Paul nasepna langpan kik veve uh hi. Kum sagih bang a sawt khit, Jerusalem ah Paul hong zin tawpna hun ciang dong mah, Paul tungah a nasep dan muangmawh lai uh hi. Jerusalem Biakinn pi ah Paul a hawh lai takin, Asia gam pan-in Jew mi honkhat te in, “Israel mite aw, hong huh un. Mun khempeuhah thu hilh kawikawi-in, Moses Thukham, leh hih biakinn langpangin mi khempeuh kiangah Israel mite a hong gensiapa ahi hi. Tu-in Gentile mite nangawn biakinn sungah hong paipihin hih biakinn siangtho a ninsak hi,” ci-in hong awng gawp uh hi. Tua lai mun ah zong Paul in a nuntakna beilawh dektak phial hi.
Paul’ thuhilhna alang pang, Jew thu-um mite dan in nang leh nang a mau munah kibulh dih in. Bang hangin amau ngaihsutna leh a langpan na un koi ci ciang bangin khiatna nei hiam? Koi ci bangin I theihsa, I tel mahmah thute, ngeina te, biakpiakna te in lam hong pialsak thei a hih zia hong phawksak hiam? Eima ngimna te a hoih mahmah hangin tua bangin kikhial thei dinmun tawh koi ci kidal theih ding I hi hiam?

KIGIN NI (FRIDAY) June 30
SINBEH DING:
A tungin Paul pen, Jew te’ Biakna citak taka a huu pa, Zeisu nungzui te tawl thei lo liangin a bawlsia pa, mi hangsan, kua matung a kinga lo, a lungkia thei lo, a talent te leh a siamnate in na khempeuh phial a semsak zo hi. Kician taka telcian na nei kim a hih manin, a gamhpau giapgiap thei ahih man in, a langpang te lak ding om sak nawn lo hi. Tu in ahih leh hi bangin a tuam diak khangno pa in, nidang a a bawlsiat mi te tawh mapang khawmin, Zeisu min tawh hangsan takin thu hong gen ziahziah ta a hih lam Jew te in hong mu uh hi.
“Galdo na ah Galkap bu pa hong sih khak leh, galkap te adingin supna lianpi suak thei a, a hi zongin ama sihna in gal te adingin thahat na guan tuan lo hi. Mi hangsan khatin a gal te tawh a ki kop ciangin a ma hihna (a zaa) a suplawh zongin, a mah tawh a kipawl kha lam te ading in, meetna tampi ngah lawh uh hi. Damascus lampi tunga, Tarsus khuami Paul pen, Topa in olno takin a that thei ban ah bawlsiatna zong tampi kiam tuam mah ding hi. A hi zongin ngimna kician a nei Topa in Saul suahtakna pia in, kikhel sak a, gal te adingin mi hangsan champion pa pen, Zeisu lam ah mapang sak hi. Kampau a siam, nasia taka minial a hatpa, a lungkia thei lo, hangsanna tawh kidim Paul in, Pawlpi masate a makaih dingin siamna a nei pa
ahi hi”. EG.White: The Acts of Apostles, p. 124.

KIKUP DINGTE:
1. Kamkhauh tak tawh a kinial pih Jew te pen Zeisu a um te mah hi mawk, Paul’ dinmun panin bang thu sin thei ding I hi hiam?
2. Biakna sunga ngeina thugui let te lenkip si, Pasian langpan tuan se lo in, koi ci bangin ding tang thei ding na hi hiam?