Kumkikna Lamen Innkuan - Khen 16

THUKHEN 16

Inn leh Mihon Kizopna

MIHON KISAPNA

Mihon’ kisapna Pasianin Pia.—Teeltuam Pasian’ mite adingin pilna in ageelkholhna thu in: nuntakna bucinna in Pasian laitakna hi, cih hong lak hi. Kisapna khempeuh ahong piakna-in Amah lungkim sak a, adangdang khempeuh hong khangkhan sak hi.

Piangsakpa in hoihna khempeuh a iplahpa hia, hoihna a iplah atate alungkim sak nadingin apiapa zong ahi hi. Mihon tawh nuntakna ah kitangsapnate zong hong piaa, amigi leh ahuh theite lakah hehpihna asin theiding leh nuntakna avak sakding leh anuamsak dingin hong sepsak hi.1

Kithuahna’ Huzaapna.—Mi khempeuhin lawm mu dinga, lawmbawl ding uh hi. Ih kithuahna zah tawh kituakin hoih nading ahihkeileh siat nadingin hong huzaapna zong khang hi. Mikhempeuhin kithuahpih neidinga, mite ahuzaapna mahin amah huzaap ding hi.2

Laisiangtho in lawm leh gualte in numei pasalte tunga ahuzaapna genmun mahmah hi. Naupangte leh khangnote tunga ahuzaapna in bangzahin lian zaw hiam! Aneih uh lawm, azuih uh thukhun, alamtoh uh zongsatna in hih laitakah akiman nading uhleh ahong tungding hunah atawntun nading uh khensat hi.

Khangnote in lawm neiding uh hi. Alawmte’ huzaapna zong thuakding uh hi. Akizopna uh kinai mahmah a, khat ie lungtang khat in dawngkik ding hi. Khat ie ngaihsutna, thuakna, leh lungsim tawng kitheihpih uh hi. Akithuahna uhin thupha ahihkeileh samsiatna hiding hi. Khangnote in khat leh khat kihuhin kipanpih ding hi. Kizep kipuahna kikhangkhan ding uha, lungsim leh theihna zong kihawmin, khat leh khat zong kinneilo leh thumanglo dingin zong kiphal ding uha, ahoihlo in kihuzaap ding uh hi.3

“Na lawm hong lak lecin, nagamtatna hong lak ning” ci in akigenna maan hi. Ateel uh lawmte hangin khangnote in azia leh atong uh leh amin uh sia thei ahihna phawklo pahpah uh hi. Mihing khat in nekna dawnna akibatpihte lawmin zong uh hi. Apil leh thuhoih zong lawmte sungpanin paikhia a, kinneilo agilote lawm- in azongte in gamtatsia ahihlam kithei hi. Akithuah cilun aduh adah uh zong kibang khinlo dinga, akithuah semsem uhciangin ngaihsutna leh thuaknate kikhelin, amaan thukhunte khia in, alawmpa dinmunah tuaksuk thei uh hi. Lui leh gunte in amaute nawk leitangte panin nate ataih bangin akithuahpih lawmte in ama’ thukhun hoihte taihkhiat sak hi.4

Pianpih Zongsatnatein Suktai.—Khangnote in lawmhoih tawh akithuah uh hileh angaihsutnate leh lungkimnate limci zaw ding hi. Topa akihta lawm tawh kithuahdingin teelna aneih leh, alawm’ huzaapna in thumaanna, tavuan, leh siangthona ah paipih ding hi. Amaan Christian nuntakna in nahoih adinga vangliatna ahi hi. Alanglamah, kimawhsakna anei lawm leh gual ateel leh thukhun khial leh kizekna sia lampiah paipih ding hi.

Pianpih zongsatnate in lamsuk ah tuak hi. Pasian aumlote tawh akithuahte in thu umlo suak ding uh hi. Asiattatte tawh akithuahte in siattat ding uh hi. Pasian akihtalote’ thuhilhna azuite in amasa in mawhneite khephungah ding dinga, migilote’ tutna ah tu ding hi.5

Leitung a iplah khangnote adingin lawm leh gual ngaihna leh gualnopnain amaute hup hi. Kizepna, kihawhna, duh leh dah zongsatnah gualnopna, leh khanguallaka kihelna in amaute’ nuntak mungtup hong suak hi. Amau kia kikoihdap leh nuam salo uh hi. Amaute’ utpen thu in kiphatding, kideih ding, milakah omna thupi sa ding, cih hia, alunggulhna uh akicinloh hangin anuntakna uh thuaklah lo uh hi.6

Pawl leh lawm adeihte in anuntakna bup uh auk zongsatna ahihdongin gualnopna zang uh hi. Laisiangtho sim zolo uha, vantung thute ngaihsun zolo uh hi. Alunglawpsak ding aom keileh asiding kisa uh hi. Amaute sungah lungnopna apia vangliatna omlo hi. Lungnop nadingun ngaihsutna neilo asiattat alawm agual tungah kingam uh hi. Nahoih sep nadingin zattheih avangliatna uh haitatna leh khuak beisaknain zang uh hi.7

Christian kithuahna’ Thupha.—Pasian’ mitein Christian kithuahna lamtolo lua uh hi. Amau leh amau akikalhnelhte in tua kithuahna tawh lawm leh gual thupha apia nuamlo uh hia, thupha tampi amansuah hi. Ahangin, mitampi tawh kithuahna tawh lungsimte kisuipha in siangtho a, tuabanga kinaina in lungtang kipumkhatna piangsak, itna khuahun sungah luang khawmin, tua in vantung muhna ah lungnop huai mahmah hi.

Christ a it theikhinte in adiakdiakin hih kithuahna ie vangliatna khansuah ding hilo hi. Tua-in Honpa adingin khagupna piangsak hi. Christ in amaute lungtang sungah akiiplah neihsa, akhum leh asiangtho, amau bekin neihding bangin selcip ding hilo hi. Tuathamlo-in Christ in eite ahong lungdamsak mite bek ading hilo hi. Christ tawh kibatna pen tup kibang, lungsim puak kibangte tung bekah lahkhiat ding hilo ahihna sangnaupangte hilhding hia, amaute lawm ahihloh hangin akitangsam pente nangawn piakkhiat ding ahi hi. Hun khempeuh leh mun khempeuhah Jesu in itna ie kinna leimi innkuante sungah laka, biakna kiapna ie maitaina zong tangsak hi.8