Sabbath School LESSON 13: PETER MASA LEH NIHNA SUNGA THU BULPI TE

LESSON 13: PETER MASA LEH NIHNA SUNGA THU BULPI TE 

SABBATH (SATURDAY) June 17

SIM DINGTE: Isa 53:5,6,9; Siam 16:16-19; Siam 11:44; Rom 13:1-7; 1 Cor 14:40; 2 Tim 3:16 

KAMNGAH: “Mawhnate i sihsan theih nading le thumaanna i nuntakpih theih nadingin Ama pumpi mahmah in i mawhnate sing tungah pua zo hi. Ama liammate hangin note hong kidamsak zo hi.” (1 Peter 2:24, ZIV)

Peter masa leh nihna pen ii zatpah dingin a ki-at ahi ahi. Peter masa sungah Christian te kibawlsiat zia ding haksatna thute hong gen hi. Peter nihna sungah, sia maanlo te thu limgen phadiak hi. Peter in a laikhak a simte tuah ding haksatna te ah thapiakna leh vauhilhna khauhtak leh siangtak gelh hi.

Bawlsiatna leh sia maanlo te thu a gelhna ah Peter in biakna vai bek mah tawh a genna thu phawk ding kisam hi. Bawlsiatna hang tawh thuaksiatna te in tatkhiatna ding aa Zeisu hong thuakna te Peter in ngaihsut phawkna in nei zaw hi. Zeisu hong kumkik ciangin sia maanlote in thukhenna thuak taktak ding ahihna zong hong telgen hi. Peter laikhak tegel sungah a gen bulpi te hih thu tem ah ahi hi. 

Tukal sinna sungah Peter at thu bulpi nga ahi: tatkhiatna hong pia Zeisu thuakna, Ni tawpni thukhenna ah i sepna bang aa thu kikhen ding cih theihna tung aa i gamtat zia, a sawtlo aa Zeisu’ kumkik ding lamet i neihna, pawlpi sung leh kim le paam a kilawm nuntak nunzia, leh i nuntakna ah Lai Siangtho makaihna a thupi zia te a thukzaw in i kantel ding hi.

NIKHAT NI (SUNDAY)      JUNE 18
THUAKNA, ZEISU, LEH TATKHIATNA

Anuai aa Lai Siangtho munte sim inla, tatkhiatna thu hong lahtelna en in.

1 Peter 1:2 ____________________________________________

1 Peter 1:8, 9 __________________________________________

1 Peter 1:18, 19 ________________________________________

1 Peter 2:22-25 ________________________________________

1 Peter 3:18 ___________________________________________

Peter in tatkhiatna thu hong gen ciangin, mawhneite tang ding aa Zeisu’ thuakna te hi den hi. Gentehna in, 1 Peter 2:22-24 sung ah, Peter in Zeisu thuakna a genna ah Isaiah 53:5, 6, 9 sung aa thu te langsak kik hi. “Zeisu in Ama pumpi mahmah tawh i mawhna te sing tungah pua zo” leh “Ama liammate hangin note hong kidamsak zo hi” (1 Peter 2:24, ZIV) cihte in tangding cih leh kipiakna (biakpiakna) kilangsak hi.

Hebrew Lai Siangtho in biakpiakna thu a genna ah, mawhnei mi in a biakpiakna biakinn ah hong paipih ding aa a tungah a khut nga ding hi. Hih in mawhnei mi mawhna te ama tang aa si ding ganhing tungah suan cihna limla hi (Lev. 4:29, 30, 33, 34; 14:10-13). Aki khol toto mawhna hanga biakna tau aa ninte siansuahni ciangin kisiakkhia aa kisiangsak hi (Lev. 16:16-19).

Biakpiakna si in mawhna siansakna ah nakpi takin thupi hi. Christian te a manpha mahmah Zeisu si tawh hong kilei khin zo hi (1 Pet. 1:18, 19). Paul in zong tangding aa thuakna a genna ah mawhna a neilo Zeisu eite aa dingin mawhna a suaksak hi (2 Cor. 5:21). 1 Peter 3:18 ah a gen mah bangin, a thumaanmi [Zeisu] in mithumaanlo [ei te] aa dingin hong thuak hi.

Paul gen (Rom 3:21,22) bangin Peter in upna akisap zia ultung gen hi. “Note in amah mulo napi na it uh hi…na upna un a tup note kihotkhiatna a ngah na hi uh hi” (1 Peter 1:8, 9, ZIV). Tatkhiatna pen gamtathoih tawh kingah hilo aa, Zeisu in eite’ aa ding aa hong sepsakna te upna leh eite mimal Tanpa aa i upsan na tawh hong kipia ahi hi. Eite kitelcianna in eite dikna hilo in Ama sungbek ah om hi. Eite kimuantawmna hi leh bang kitelcianna nei thei ding i hiam? 

Nang tang ding asi Zeisu banghangin tatkhiatna ding na lametna pi hi thei hiam? Hih a lamdang thumaan panin bang kihehnepna te na ngah thei hiam? 

NINIH NI (MONDAY)      JUNE 19
KOICI BANGIN NUNTA DING?

Thudang sangin Peter in a gen thupi bel ahih leh 2 Peter 3:11 sung aa dotna “Hih bang zia in na khempeuh kisusia ding ahih khit nung sang, bang ci mi na hi ding uh kilawm ahi hiam?” cih ahi hi.

Hih a nuai aa Lai Siangtho munte ah Christian te nunzia ding Peter in hong bangci gen hiam? 1 Peter 1:15-17, 22; 1 Peter 2:1; 1 Peter 3:8, 9; 1 Peter 4:7-11; 2 Peter 3:11.

___________________________________________________________________________________________________________________________________

Peter lai at tegel ah Christian te nunzia ding tampi hong gen aa thupi pawlkhat te hong genkik phapha hi. A masa in, Pasian thukhenna leh Christian nuntakzia a ki meemat na thu hong gen hi (1 Peter 1:17; 2 Peter 3:11). Mi khempeuh gamtatna Pasian in thukhen ding hi. Tua hi aa, Christian khat in a siangtho aa a nuntak ding kilawm hi. 

A nihna ah, tamvei pi tak Christian te a siangtho kulna Peter in hong hilh hi. Thukhun Lui lai in biakinn sungaa zat ding van te a siangtho in kituamkoih hi (Exo 26:34; 28:36; 29:6, 37) ahih kei leh Pasian zat dingin ki tuamkoih hi (Gen 2:3 aa Sabbath). A taktak in, Pasian a siangtho mah bangin Ama mite zong a siangtho ding Pasian geelna ahi hi, hih thu in Peter gen bulpi mah hi pah hi (Lev. 11:44; 19:2; 1 Peter 1:15, 16). A siangtho ding aa na khat i tuamkoihna sepna pen “siangthosakna (Santification)” ki ci aa Peter’ deih thu in Kha leh Zeisu thumanna tawh siansakna a ngah ding uh ahi hi (1 Peter 1:2).

A thumna ah, a kisiangsak te i kilawm nuntakzia ding teltak in hong gen hi. Tua bang te in etsatna khempeuh, khemna khempeuh, kineih siamna, enna leh mindaisakna namkim paikhia ding hi (1 Peter 2:1). Amau te khat leh khat ki-thuhual, khat leh khat ki-it ding, leh kiniamkhiat kul hi (1 Peter 3:8, 9). Amaute in hoihna, pasian-mina, itna zong nei ding hi (2 Peter 1:5-7). Amaute in itna a kepcing det ding uh zong gen hi (1 Peter 4:7-11). A tawpna ah, Peter in laisim mite a zot thu in lunghimawhna khempeuh Zeisu tungah suat ding ahi hi (1 Peter 5:7).

Peter hong laikhak sung aa hong deihsak bangin eite in khat le khat thu kikhen tawmna hilo, kithapiak panpihna i bangci neih thei ding hiam? 

NI THUM NI (TUESDAY)      JUNE 20
KUMKIK DING LAMETNA

Anuai aa Lai Siangtho munte sim inla mailam a piang ding thute ngaihsun in.

1 Pet. 1:4 _____________________________________________

1 Pet. 1:17 ____________________________________________

1 Pet. 4:5, 6 ___________________________________________

1 Pet. 4: 17 ___________________________________________

2 Pet. 3:1-10 __________________________________________

Peter masa sung aa i sim leh i zak thupi pen in bawlsiatna thu hi. Tua bang aa a lauhuai bawlsiatna in amau nuntakna haksa sak ding ahih hangin a kisut theilo vantung ah gouluahna in ngak gige ahihna thu tawh Peter in amaute hehnem hi. Peter lai at masakna ah hih bangin a sia theilo gouluahna in vantung ah Christian te hong ngak ahihna Peter in telsak nuam hi (1 Peter 1:4).

Mailam ah hong piang ding thunih ahi a tawpna thukhenna leh siatna a kisuksiatna thu Peter in i muh ding ong langsak hi. Kammal dang tawh gen leng, tu in bawlsiatna a om phial hangin thumaan aa thukhenna om ding aa thu-um mite in a tawntung pahtawina ngah ding thu Peter in hong lak hi.

Thukhenna thu Peter in munt hum ah hong gen hi (1 Pet. 1:17; 4:5, 6, 17). Mi khempeuh gamtatna bangin guptuam neilo in Pa Pasian in thukhen ding Peter in hong gen hi (1 Pet. 1:17). A hing mite leh a sit e thu khen dingin Zeisu mahmah a dinna thu zong hong lak hi (1 Pet. 4:5). A lunglut huai mahmah khat ahi thukhenna in Pasian' innkuan sung pan kipat ding zong hong gen lai hi (1 Pet. 4:17). Pasian-milote mei tawh a ki suksiatcip ding thu zong gen hi (2 Pet. 3:7).

Zeisu hong kumkik ding maw kumkiklo ding cih tawh kisai buaina tampi a siansakna dingin Peter in hun tampi na bei hi. Zeisu kumkik ding hong kaina hangin mi tampi kisikkik aa hotkhiat ngah theihna ding ahihna thu hong telsak hi. Hong tung taktak ding thute hangin a siangtho leh paubanglo nuntakna neih ciat ding zong hong thalawp sak mahmah hi.

Tua hi aa, i ngak lametna pi tawh bangbang piang ta se leh upna leh thumanna tawh citak tak aa gamtatna zuih upna leh a siangtho nuntakna i neih ding Peter in hong deihbel hi. 

Bangbang piang ta se leh upna leh thumanna tawh banghang in nuntak ding kisam hiam? Adang tel theih ding a om hiam?

NILI NI (WEDNESDAY)      JUNE 21
KIM LE PAAM LEH PAWLPI SUNG A KILAWM NUNZIA

Anuai aa Lai Siangtho munte sim in. Kumpi leh pawlpi ki-ukna a thupi na leh Christian te in bangci nuntak ding cih Peter in hong koici gen hiam? Koi mun ah teng ta se leng, ama kammal te i koici zat theih ding hiam?

1 Pet. 2: 11-21 ________________________________________

1 Pet. 5:1-5 ___________________________________________

Peter nuntak hun pen ukna nei kumpi te leh biakna thunei te bawlsiat hun hi. Hih thu in Peter leh Paul te thugen kumpi thunei te thuman ding thupi sak hi. Siatna a bawl te langah nasem dingin Pasian in kumpi thunei te a koihna thu Peter leh Paul in hong gen hi. Kumpi thunei te in buaina a piangsak thei zel lua hi. Peter hun lai aa Christian te in zong na thuak kha uh aa, kum tampi sung suksia zawlai hi.

Ahi zongin, a huampi in, gam-uk kumpi te in thukham, a kilawm nunzia, leh lungmuanna kemcing ding ahi hi. Tu hun in zong thukham leh kilawm nunzia te kizui nawnlo in, a lungkim huai ki-ukna akisap mahmah na kimu thei hi. Ki-ukna hoih in Pasian in mihing te a piak letsong lakah khat ahi hi.

Paul gen mah bangin Peter in zong pawlsung kiukna  hoih a thupi na hong genbeh hi. Biakna sungah na khempeuh ah kilawm kituak aa hih ding Paul in hong gen hi (1 Cor. 14:40). Tua mah bangin Peter in zong, pawlpi makai te in kep ding aa kipia tuuhonte hoihtak aa kep ding hong hilh hi (1 Pet. 5:2). Kiniamkhiatna leh itna tawh zuunkep ding ahi hi. Khuatual pawlpi zong hoihtak kimakaih ding hi aa, makai te in pawlpi mite Kha silpiak te Pasian minthanna ding aa a zattheihna ding un ngimna hoih leh kithutuahna tawh makaih ding ahi hi. 

1 Peter 5:5 sungah note khat leh khat kiniamkhiatna  puan bangin na kisilh un ci hi. En i koi ci hih theih ding hiam? Midang te tawh na kithuahna ah hih thu na koici zat thei ding hiam?

NINGA NI (THURSDAY)       JUNE 22LAI SIANGTHO A THUPI PEN A HIHNA

Anuai aa Lai Siangtho munte sim in. Hih munte in i nuntakna leh i upna ah Lai Siangtho a thupi pen na hong koi ci hilh hiam? 

1 Pet. 1:10-12 _________________________________________

2 Pet. 1: 16-20 ________________________________________

2 Pet. 3:2 _____________________________________________

2 Pet. 3:16 ____________________________________________

Hih Peter laikhak nihna ah, sia maanlote tawh kisai Peter in hong hilh hi. Laisim te in thuguipi luanna a telna ding un “a beisa huna kamsang siagnthote thungente leh na sawltakpite uh tungtawna i Honpa leh topa in a thupiakte nap hawk kik dinguh ka deih hi” ci’n hilh hi.  Tuhun in zong Pasian kammal hng luanna “kamsang siangthote gen” Thukhun Lui eite in i nei hi. Sawltakpite ei te tawh hong nungta nawnlo uh aa, ahi zongin ahoih mahmah khat ah Thukhun Thak sungah amaute tungtawn in Pasian humop kammal eite in i nei hi. Matthew, Mark, Luke leh John te in Zeisu nuntakna, sihna leh thawhkikna te cingtak in hong gen uhhi. Sawltak te sungah sawltakte nasepna kicing takin om aa, Pasian kiangpan hong pai sawltak te kammal te zong i sim thei hi. Pasian kammal in upna guipi leh gamtat hilhna ding a thupi na thu Paul leh Peter in hong hilh uhhi. 

2 Peter 3:16 ah laisim te in kidawmtak aa sinna leh Kha Siangtho makaihna om kei leh thumaan thutak na ngawn telkhial in lehlakna tawh siatna hong tun thei ahihna Peter in hong vauhilh hi. Lai Siangtho sim ciangin thungetna tawh ki-ap sa aa sim ding a kulna Peter kammal tungpan in kimu thei hi. A lai at bup ah a gennop bang hi aa Lai Siangtho bup i gennop bang hiam cih tawh i sim ding ahi hi. Lai at pa in bang thu hiam a gelh nop cih thupi hi. A ki at hun laitak aa thupiang te zong ngaihtuah khop ding thupi hi. (Peter masa leh nihna bang Roman kumpi te uk hun BC 100 ma lai ding hi). Kha makaihna ngen aa ngentel tak aa sinna tawh Chris sihna in tatkhiatna hong tun cih Lai Siangtho thu bulpi ahihna i tel ding hi (1 Peter 1:10-12). A tawpna ah, eima nuntakna tawh ngaihsun aa sim ding ahi hi. Pasian in eite bang thumaan hong hilh nuam hiam? Pasian kammal i nuntakna ah kibulh na tawh Pasian’ gam aa ding bang phattuamna pia thei ding i hiam? 

KIGIN NI (FRIDAY)      JUNE 23

NGAIHSUT BEH DING: Biakna ngaihsut thuk tampi lak ah, Peter laikhak in eite khat leh khat ki bangci zop ding cih leh Christian nuntak zia ding ultung tak in hong hilh hi. Zeisu thumaan ahi bang lian aa i theih ding kisam hi. Tua sangin a thupi zaw ah i theih thumaan i nuntakpih ding ahi hi. Ih gens amah bangin, “tu in na sanggamte uh itna takpi na neih na ding uh le khat le khat na lungsim tawng uh tawh na ki-it tek na ding un thutak thu mangin no le no na kisiansuah khin zo uh hi” (1 Peter 1:22, ZIV). Kha nuntakna siansuahna leh thumanna hong meemat zel hi. Tua thumaan in eite lungsim tawng tawh khat le khat ki it dingin hong khel hong bawlpha hi. Thumanna,  lungsim siansakna leh itna – hih teng thum kihualkhawm hi. Hih in eite hanciam ding nun hoih ahi hi. Hih te zui hi leng i nuntakna leh i pawlpi a kilamdan ding zia na ngaihsun thei hiam? A dang ahi kei zongin pawlpi sung kithukhatna ding beek in na ngaihsun in. “Kong it sanggamte aw, na inn leh na pawlpi uh na ciahkik uh ciangin Chris lungsim bang na ciapih ding hiam? Uplahna te gensiatna te na hemkhia ding hiam? Kithutuak tak aa sepkhopna nidang sangin a kisap zawk hun hong tung ding hi. Kipumkhatna sungah thahatna om hi. Kikhenna leh kilemlohna sungah thanemna longal bangmah omlo hi.” – Ellen G. White, Teltuam Thupuakte Bu Nihna  (Selected Messages, book 2), laimai 373, 374. 

KIKUP DINGTE:

1. 2 Peter 3:12 sung a Pasian’ ni hong tun baih theihna dingin hanciam un … cih kammal in bang a deih na hiam? Pasian’ ni ahi Nihvei Kumkikna bang ci tunbaih sak thei ding i hiam?

2. Piangei nate Pasian thubu nihna i ci aa, Pasian thubu masa (Lai Siangtho) bang mah in thubu nihna pianngei na te thu kitelkhial thei mahmah hi. Gentehna in, mi tampi te in pianngei pianlim te leh piansakna thute lakhia in Darwinian thuthilhna tawh up laih uh hi. Leitung pen kua mah in limgeel (design) lo aa ahi ci bang aa om hi ci mawk uh hi. Tua ahih leh, hih thubu nihna bang ci bang in diktak in sim in tel thei ding i hiam? Thubu nihna in Pasian’ thu hong hilh theihna bang ciang ciangtan om hiam? Thubu masa in thubu nihna teltak aa i theihna ding hong bang ci huh thei hiam? Thubu nihna i tel zia leh thubu masa i telzia a kitukalh ciangin bang buaina teng om thei hiam?