Zomi Sabbath School Lesson 11: SIA MAANLOTE

LESSON 11: SIA MAANLOTE         JUNE 3-9

SABBATH (SATURDAY) NITAK LAM June 3

SIM DING TE: 2 Pet. 2:1-22, John 8:34-36, Matt. 12:43-45, Jude 4-19, Pian 18:16-33

KAMNGAH: “Amau te mahmah zong siatna sila in om lai napi, amaute suahtakna a kamciam tazen uh hi – mi khat peuh amah a kizosak zo na khatpeuh sila ahi hi” (2 Peter 2:19, ZIV)

Lunghimawhna lianpi tawh a laikhak masakna ah, Peter in bawlsiatna ii lauhuai zia laisim te theih ding hanciam hi. Bang ci bang bawlsiatna te cih eite in ii telcian loh hangin, dawibia Roman kumpi te in a khangpha mahmah Christian kici te beisak ding a hanciamna uh bawlsiatna leh gimna te pawlpi in a tuah thu ii thei hi. Satan in suksiat theihna hiam nih hong zang hi. A pua lam pan aa bawlsiatna pen hiamgam in lauhuai aa muibun mahmah hi. Ahizongin, pawlpi in a pualam vauna sangin a lauhuai zaw bawlsiatna hong thuak hi. Tua in a sunglam pan bawlsiatna ahihi. Jew te hunlai in kamsang maanlo a om mah bangin, Peter hun lai aa Zeisu nungzui te in zong pawlpi sungah thuhilhna maanlo a hilh sia maanlo te tawh kituak kha uh hi (2 Peter 2:1). A siazaw lai ah, tua thuhilhna maanlote mitampi in zui ding uhhi ci in Peter in hong vauhilh hi (2 Peter 2:2).

Peter hong vauhilh tua amaanlo thuhilhna in bang te hiam? Tua te Peter in bangci zawh ding cih hong hilh aa, ama hong vauhilhna tung panin a sunglam lauhuaina te ii zawh theihna ding hilhlak bangci ngah ding ii hiam? 

NIKHAT NI (SUNDAY) JUNE 4
AMAANLO KAMSANGTE LEH SIATE

Nungzuipite hunlai pawlpi masate lungnopna leh pawlpi sung kithutuaktak aa om hun ci aa a hoih mahmah ding aa ih baih ngaihsut kha thei zel hi. Ataktak in ii tua ci ngaihsut khak pen khial hi. Zeisu hun lai mahmah in zong a sunglam buaina (Judas ngaihsun in) tuak kha uhhi. Thukhunthak laikhak te ah en le hang buaina tampi tak pen amau sungpan aa thuhilhna maanlo te hang ahihna kimu thei hi. Pawlpi masa te in a pualam bawlsiatna bek

hilo in pawlpi sung buaina te zong nak phutkhak mahmah uhhi. Hih laikhak sungah Peter in pawlsung a tawknawi haksatna pawlkhat hong gen hi. 

Tua te in bangte hiam? “Ahi hangin mihingte lakah kamsang zuaute a na om bang tektek in note lakah zong sia zuau a om ding hi. Amaute in siatna a piangsak thei thu-upna maan lote a simthamin hong lutpih in amaute a lei –thuneipipa Topa nangawn nial ding uh aa, amau le amau siatna a kitun pah ding uh hi. Mi tampi in a zumhuai amau makaihna lam zui ding uh aa, thutak lampi minsiasak ding uh hi” (2 Peter 2:1-3, ZIV). Pawlpi sung lungnop hun leh pawlsung kilem hun na hih tuak deklo mawk hi, ahi hia le?

2 Peter 2:1-3, 10-22 sim in. Hih lai ah Peter in bang hong vauhilh hiam? Pawlpi sungah thumaanlo aki hilh bang te khawng hong gen hiam?

________________________________________________________________________________________________________________________

2 Peter 2:1 sungah Topa in Peter a laikhak sakna a hang hong hilh tawh ki bang hi. A beisa aa kamsang zuaute a om mah bangin mailam ah zong sia zuaute om ding cih vauhilhna ahihi. Asia huai thuhilhna maanlo te a banban in Peter hong gualsuk diudeu aa sila ciang dong dinmun hihna hong laktel hi. A lai at na panin, hilh thuhilhna te nak lauhuai mahmah aa Peter ngiat zong hih thuhilhna te a muhdah zia ii tel thei hi. Upna laigil te a thupi sak lam

Peter tungpan ii mu thei hi.

Hih thuhilhna te Peter in bangci muh cih encian in. Hih in thumaan a thupi na hong bangci gen hiam? Pawlpi sungah upna maanlo hong lutlohna dingin ei leh ei bangci bangin kidal thei ding ii hiam?

NINIH NI (MONDAY) June 5
CHRIS SUNGAH SUAKTAKNA?

“Ahang in, amaute in kisaktheihna mawkna kamte zangin khialhna tawh a nungta mite lak pana a suakta lai liailiai te, pianpih mawhdim kilunggulhna in a zol uhhi (2 Peter 2:18, ZIV). Hih mun ah Peter in bang hong vauhilh hiam? 2 Peter 2:19 ah hih tawh kisai hong koici hilh hiam? Aneu 19 sung aa “suahtakna” cih kammal ii thupi na bang hiam?

___________________________________________________________________________________________________________________________________

Akhauh thei penpen kammal tawh Peter in laisim te siamaanlo te lauhuai zia hong vauhilh hi. 2 Peter 2:18-21 sungah suahtakna a kamciam napi sila suahna a tun sia maanlo te thuhilhna a kidophuai thu hong gen hi. 

Chris sung ah suahtakna in mawhna pan aa suahtakna ahih kul hi (Rom 6:4-6). Peter hong vauhilh thu in mawhna pan suakta lo pi aa Chris sungah suahtakna cih ngaihsut khialhna ahihi. Laisiam tampi te in hih thu-upna maanlo hilhna te bang hiam ci in kinial den mah ta leh, tua te in mawhna leh mawhna sungah sila hihna tawh ki meemat na thu ki tel mahmah hi. 

John 8:34-36 sim in. Peter hong gen thute ii tel na dingin Chris’ kammal in hong bang ci huh hiam?

_________________________________________________________________________________________________________________________________

Hih sia maanlo te thuhilh bang thu bang la ahi zongin, Topa Jesu a sangcil a mucil thu-um mite amau pianngei mawhna ah kaikik tunpih kik hi. Sianthona leh siangtho nuntakna kisam saklo iin hehpihna lungdamna thu mantawm sak na tawh a nusiatsa uh siatna (2 Peter 2:19) ah awk kik uh hi. Peter in hih thuhilhna maanlote a langpanna leh tua hilhna te hang aa hong piang siathuaina te tangtak leh khauhtak aa hong vauhilhna pen a kul mahmah ahi hi. 

Chris sungah suahtakna ii cih bang ci tel na hiam? Chris in bang pan in hong suakta sak hiam?

NITHUM NI (TUESDAY) JUNE 6
UI IN A LUAK NEKIK

2 Peter 2:17-22 leh Matt. 12:43-45 sung sim in. Christian a hong suaksa mi khat a nunngei ah kileh kik ciang a lauhuai zia bangte na mu hiam?

___________________________________________________________________________________________________________________________________

Sia maanlo te in a nunngei ah a tunpih kik mite om zia lauhuai thu Peter lung himawh bel hi (2 Peter 2:18). Hih sia maanlo te in suahtakna kamciam uh aa, ahi zongin Peter gen mah bangin, amau ciam suahtakna leh Jesu in Amah azui te a ciam suahtakna kilamdang pha mahmah hi. Khauhtak aa Peter hong vauhilhna thu en in. Thumaan lampi thei khin aa nungngatsan kik sangin theikha vetlo hi leh hoihzaw tham hi (2 Peter 2:21).

Ahi zongin amau aa dingin lamet bei cihna hi tuanlo hi. Topa nungngatsan aa hong kileh kik mite thu tampi ii thei khin zo hi. Tua bang aa hong kilehkik uh ciangin Topa lungdam mahmah aa a lakkikna thu zong ii thei hi (Luke 15:11-32). Topa nungngatsan na pen a lauhuai mahmah leh a deihhuai hetlo ahihna hong theisak hi bek zaw hi. Ui in a luak ne kik cih kammal tawh Peter hong tehkak pen khauh leh kha mahmah aa ahi zongin kician mahmah hi.

Matt. 12:45 leh Luke 11:26 sung aa Jesu kammal te 2 Peter 2:20 sungah hong ki langkik zel hi. Jesu in kha gilo a vei mipa a suahtak sakna thu hong gen hi. Ahi zongin tua kha gilo a vak kawikawi na pan in a nusiatsa inn ah hong kileh kik hi (Matt 12:44). A awngsa leh a kipuahsa in a om mu hi. Amah bek hilo amah sang a suksia zaw kha gilo sagih hong tonpih lai hi. Topa Jesu in “mipa nuntak masa sangin a nunung siazaw” (Matt. 12:45, ZIV) ci hi. Peter leh Jesu te hong lah lauhuaina in thu mawkmawk hilo hi. Thu-um thak mikhat in a pianngei nuntakna te kha nuntakna tawh a laih ngiat kul hi. Pawlpi sung kiheldan leh upna thu hilhzia te in leitung gamtat ngeisa te a laih kei leh nuntak lui ah kileh kik ding baih mahmah kha ding hi. 

Pawlpi innkuan hihna tawh ii pawlmi te, adiak in pawlmi thak deuhte, bang ci phungvuh aa nungzui suaksak thei ding i hiam?

NILI NI (WEDNESDAY) JUNE 7
PETER LEH JUDE

Mi tampi te in Jude 4-19 in 2 Peter 2:1-3:7 sung aa thu te gen kikkik ci uhhi. Lai Siangtho in a gen kikkik thu khat a om ciangin, Pasian in a thupi khat hong hilh phapha nuam hi ci aa ii phawk ding thupi hi. Hih a ki huang thuhilhna te ah, Peter leh Jude te in a thupi thumaan khat hong lak aa tua in mi gilo te tung a piang ding te Pasian khut sungah om hi. Peter leh Jude te in Pasian in siatna a vil gige thu muanmawh huailo tak in hong telsak hi. A diklo mihingte ahi aa a mawh vansawltak te a hi zongin a mawhbawl khempeuh Pasian in hoihtak

in ciamteh aa, thukhen ni ciangin a thuak ding uh gimpiakna te geelsa in nei hi (2 Peter 2:9, 17; Jude 6). 

2 Peter 2:1-3:7 leh Jude 4-19 sung sim in.Mawhna tawh a kisawh te Pasian in bangci gimpiak aa thuk hiam cih Peter leh Jude te in hong gen hiam?

__________________________________________________________________________________________________________________________________

Peter leh Jude in Pasian gimpiak zia tehkaakna thum hong gen hi. Tua te in tuiciin tawh leitung suksiatna, Sodom leh Gomorrah a kaatna, leh vansawltak te sikkhau tawh suksiat ding aa hencipna te ahi hi (2 Peter 2:4-6; 3:7; Jude 6,7). A tawpna tawntung bawlsiatna tawh kizom hi. Lai Siangtho in Pasian’ lainatna leh hehpihna thu a limgen teei hangin, mawhna thu ah thutang aa Pasian’ thukhenna zong hong hilh hi.

Tua bang a lauhuai gimpiakna a ngahsak thei bang mawhna te hiam? Tua te lak ah upna lampialna ding thuhilhna, thuneihna nialna, amau a zo peuhpeuh te’ sila suahna, pianngei deihna zuihna ding aa Pasian’ hehpihna zatkhialhna, Jesu Chris Vanglianpa leh Topa ahih thu nialna, pumpi nitsakna, kiphatsakna tawh kampauna, theihtel lohpi kampauna leh migensiatna te ahihi (2 Peter 2:1,10,19,18; Jude 4,8,10). 

A lungluthuai thu in, hih gitlohna te sungah hong linglawng sak thei ngongtatna leh hiamgam tatna te kihello se hi. Tua te tawh ki lamdang khollo a ki langlo mawhna te na hizaw thei hi. Pawlpi sungah zong a ki thupi ngaihsut khollo mawhnate hi thei hi. Tua hi aa pawlpi sungah lungsim tak tawh kisikkikna leh kipuahphatna akisap mahmah lam ii phawk ding thupi hi. 

2 Peter 2:12 leh Jude 10 sung sim in. Peter leh Jude in hih mawhna a bawl te ngaihsutna neilo thutello ganhing te bang uh hi ci hi. Pasian hong bawl cil mihing pianzia tawh tehkak inla, tua bang na nuntakna ah a pianlohna ding na ki koi ci dal theih ding hiam?

NINGA NI (THURSDAY) JUNE 8
THUCIAM LUI HILHLAK DANGTE

2 Peter 2:6-16 sung sim in. Gitlohna in bang ciang hong tun thei hiam cih Peter in hong hilh hiam? 

__________________________________________________________________________________________________________________________________

Sodom thu tawh kisai Lai Siangtho in a gen masakna Gen. 13:12,13 ah kimu thei hi. Lot leh Abraham te neihsa vai tawh a kikhen uh kul hi (Gen. 13:12). Lai Siangtho in, “Tu in Sodom mite gilo in, Topa lang ah mawhna lianpi te bawlbawl uh hi” (Gen. 13:13, ZIV). Tua nungah, Pasian in Sodom mite gitlohna hangin suksiat ding Abraham a gen ciangin, mi dik 10 ciang om leh Pasian in a suksiat lohna dingin Abraham in Pasian deek/kun hi (Gen. 18:16-33). Midik sawm zong a kimuh tuak lohna thu Lot zinte nasep tungtawn in kimu thei hi. Khuapi ki susia cip aa, Lot leh a tanu tegel bek suakta uh hi (Gen. 19:12-25).

Peter in hih tangthu tung panin hilhlak nih hong lak hi. A masa in, hih khuapi nih te in Pasian’ mi-na a neilo te kisuksiat ding hong lak hi (2 Peter 2:6). A nihna ah, midik te gimna pan a hotkhiat zia ding Topa in a tel zia hong hilh hi (2 Peter 2:7-9). Sodom leh Gomorrah ah suksiatna a ngah mite nunzia Peter hong genna ah: pianngei lunggulhna ah kidiah, thuneihna simmawh, uang-tat leh ki mawk hansan sak in vansawltak te nangawn gensia ngam hi (2 Peter 2:10,11). Hih pianzia te pen Peter hong gen sia maanlote leh anungzui te pianzia tawh kibang mahmah hi.

Balaam tangthu Num. 22:1-24:25 sungah kimu thei hi. Israel mite samsia ding Moab kumpi Balak in cial hi. Ut masa lo hi mah ta leh sum tampi tawh kiguai ahih manin Balak thu maang hi (Num. 22:7-21). Lampi ah Topa vansawltak khat in na pang aa Balaam laa kihei ahih manin sihna panin suakta hi. Balaam in a laa sat thapai aa ahi zongin a mit hong kihong in Topa vansawltak amuh ciangin akhialpa in amah ahih lam hong kiphawk hi (Num 22:22-35). A tawpna ah, Isreal te thupha hong pia hi (Num 23:4-24:24). Angkawm nopna leh huaihamna lahna dingin Peter in Balaam thu hong gen aa (2 Peter 2:14,15), tua bang mite in a zuih ding uh kilawm lampi pan in pialkhia uh hi.

Lai Siangtho leh Ellen G. White lai at tung tawn in ei hong kipia thu te ngaihsun in. Tua hi aa, ei te hong ki hilhvau lo hi bang hang in ci thei ding i hiam?

KIGIN NI (FRIDAY) JUNE 9

LUNGNGAIH DING: Christian te in “Chris sungah suahtakna” cih ii za mun mahmah kha ding hi. Tua thu amaan ngaihsut mah ahihi. Thukham’ mawhsakna suaktakna leh eite hanciam hang hilo iin Chris in ei te aa ding hong sepsakna hangin gupkhiatna kician ii neihna in suahtakna taktak hi. Martin Luther in hehpihna thu a telma aa sila hihna pan upna tawh suaktakna angah in etteh ding thuhoih khat ahi hi. Ahi zongin, Peter sung aa ii muh bangin, tua alamdang thumaan pen kihuihek in kitelkhial thei hi. “Gupkhiatna ding aa Chris tung bek ah kingak liuleuna thumaan in upmawh khialh theihna tawh ki nai mahmah hi. Chris sungah suahtakna in thukham beisakna tawh kikhial kha den aa, Chris in thukham pan in hong honkhia ding aa hong pai ahih manin mi tampi te in thukham mahmah aa, thukham zui lailai te hehpihna nuai omlo bangin tangko uh hi. Tua hi aa, thumaan leh thukhial kihuang mFahmah ahih manin Kha Siangtho makaihna om kei leh thukhial ki sang kha pahpah aa, tua bang mite in Satan’ khemna sungah amau le amau kipia tawm hi. Thukhial pen thumaan bang aa a saan na dingun Prostestant te pibawl zahtak bawl ding Satan in nakpi in nasem hi.” – Ellen G. White, Christ Triumphat, laimai 324.

KIKUP DINGTE:

1. 2 Peter 2:19 aa Peter in thuhilhna maanlo hang aa siatna honggen te hoihtak in ngaihsun in. Ih up thumaan hoihtak sittel aa sin ding banghang in thupi hiam? Ih up ding thu ah kithukim aa up theih ding bangzah tak in thupi hiam? Bang hun ciangin thu-uppih te tawh ngaihsut ki batlohna te a lauhuai suak thei hiam?

2. Thukhenna leh gimpiakna tawh kisai “amau lehamau siatna kitun pah ding” (2 Peter 2:1), “amau siatna ah mangthang ding” (2 Peter 2:12), “thukhen ding aa suksiat ding aa koihkhol” (2 Peter 2:9), “amau kisuksiatna ihcip/ihmu lo” (2 Peter 2:3) Peter zat kammal khauh pawl khat en in. Hih mun te ah thukhenna om taktak ding bek thamlo in thukhial ah Pasian mi a tun te Pasian in a mawhsakna thu hong bang ci gen hiam?

3. “Chris sungah suahtakna” ci aa thukham khemepuh hi samlo napi (pawlkhat in a ge hang) a diak in thukham lina, Sabbath thukham ah a kigenna na bangci ngaihsut hiam? Tua bang kinialna te in “Chris sungah suahtakna” cih pen a kihuihek lehgen theih lam hong tel sak thei hiam?

Lametna Aw!
https://voice-hope.blogspot.com