Kumkikna Lamen Innkuan - Khen 14 (Azom2)

LAISIMNA LEH TUA’ HUZAAPNA

Anhoih tawh Tate Khuak Vakin.—Naupangte khuakin thu kana, thei nuam diak hi. Nu leh patein thu theih kisama, tate khuak pen an hoihtaka vak theiding ahi hi. Pumpi bangmahin khuak in zong an nekna panin tha ngah hi. Asiangtho thute ngaihsutna tawh khuak kitang zaisaka, athanghuai anin ngaihsutna in leitung leisuak sak hi.

Natate khuak pen ahoih apha ahihkeileh thusia lasia tawh dimsak ding pen nu leh pa khensat ding ahi hi. Tate khuak pen ahawm in kikoih theilo hi. Siatna zong paaikhia ziau theilo hi. Thukhun hoihte ihguanna tawh ngaihsutna ahoihlote kilakhia thei bek hi. Tate khuak sungah thumaan khaikungte kituhlo hileh galpa in tahum vawh ding hi. Omdan hoih asusiathei mi tawh kizopnate dal nadingin ahoih thuhilhna neihkul hi. Akituakding zeetna tul tampite panin thumaan bekin kha nuntakna hong dal sak thei hi.1

Laisim Zongsatna Nu leh Pain Ukding.— Khangno tampite in laibu deih uh hi. Angah theih khempeuhuh kaikhawm uh hi. Amaute laisim vai a ukdingin nu leh pate kong thum hi. Itna tangthu akihel laihawm leh tadensate na sabuai tungah koihding phal kei un. Pasian itna, leh Pasian kihtakna, Christ theihna tawh kisai zia leh tong alamto thei laibute tawh khangnote huh un. Amanpha theihna tawh tate in akhuak uh adimsak ding hanthawn un. Ahoih in khuak ukin, avanglianate amakaih ciangin ganhing lungsimte lut mannawnlo hi. Khuak adinga anhoihlo laite nakhiapsak ding uh hi.2

Hoihna apialo huzaapna peuhpeuh nu leh pate in innsung lutsaklo ding uh hi. Hih vaiah nu leh pa pawl khatin asin phat uh kul hi. Suakta takin ki it kingaihna tangthu asimte hih thuhilhna kapia nuam hi: nangmah in na at noploh khaici avawh nahi hi. Tuabang laisimna panin khalam meetna kingahlo hi. Thumaan thu it theihna susia zaw hi. Tangthute tungtawnin ahitakpi ahilo thu tawh khuak kidima, beltakin Pasian thubu kisim thei nawnlo hi. Tua in atul mun atul tampite hun leh tha leh ngalte sutin, nuntak haksatnate bek tawh amaute thu kihilhzo bek hi.3

Tate in laisim hun hoih ngahding uha, tawlngak hun, gualnop hun te zong pumpi leh khuak gimsak zawloin hun alak ding uh ahi hi. Kingaihna leh tadensa tangthute ait theidingin natate napattah leh kilamthakna apia laibute lim salo ding uh hi. Naupangte leh khangnote in laisim ding neiding uh hi. Akiteel sak kei leh amau mahin teel ding uh hi. Siatna apia thei lai tampi mu kawikawi ding uh hi. Asawtlo in sim nuam hong sading uha, laibu hoih napiak leh thuhoih sim nopna neiding uh hi.4

Khuak Pilsakna leh Ukna.—Khuak deihdan ahoih nadingin pilna pia in ukkul hi. Tate khuak kizanna tawh kituakin nu leh pa in aneu laipek panun Laisiangtho simpih ding uh hi. Tua hileh akhuak limsakdan kimakaih thei pah hi.

Laisim zongsatna hoih neihsak nadingin thasitlo in panttah in. Alungsim uh vakzau leh, ciahsak kik in. Phuahtawm tangthu te simpihna tawh atheihtheihna leh khalam limsakna asiat leh hih zongsatna phiat nadingin gal naksim mahmah kul ding hi. Phuahtawm tangthute simnopna thakhat thu in susiatsak ding ahi hi. Lungsimte maantakin aluan nadingin thukhun khauhtakin letding ahi hi.5

Phuahtawm Tangthu Simnopna Pelin.—Ihtate in bang simding uh hiam? Hih in dotna thupi hia, dawnna thupi kisam hi. Sabbath atang tate in phuahtawm tangthu tawh kihuzaap sakin aomna kamuh ciangin hong lungmang sak hi. Tuabang simnopna akipat uhzong kamuhsak hi. Amaute in thumaan azak hun ding uh zong nei uha, upna aneihna hang uhzong thei hinapi in, biakna taktakah nopsakna neilo uh hi.6

Phuahtawm tangthu asimtein khalam nuntakna leh Laisiangtho ie laimaite amialsak zongsatna sia ahi hi.7

Alauhuai Laibu Tam.—Akihawmkhiat sangin kihaltum zaw leh ahoih laibu tawh leitung kisia uh hi. Sumbawl nadingin kikhenin akihawmkhia phuahtawm laibute khangnote in sim khavet kei leuh hoih zaw hi. Tuate sungah Satan’ natna tampi om hi.

Kha suksiatna dingin Satanin laibu simna zong nazang hi. Laibu simnain amaanlo lawpna, cidam huailo, lungsim zaulenna leh kimanna aneilo ngaihsutna piangsaka, khalam tat nadingin hoihlo hi. Thungetna leh khalam nate iplahna zawngkhal sak hi.8

Lunglawpna, khuavalna tawh kisai laibute in atawm atamin asimte tungah samsiatna tungsak hi. Laiatpa in thuhilhna khat mungtupin neikha ding hi. Hih alaiatna sungah biakna leh kingaihna zong hel kha mah ding hi. Asungtawngah man aneilo haina leh siatnate zep hi.9

Pasian Aneilo Laiatte.—Pasian aneilo laiatte’ laibute simlohna in lauhuaina pana kipelhna ahi hi. Tua laibute pen thumaan’ galpa humopna tawh akiat hia, kha nuntakna susia lo in kuamahin sim theilo hi. Tuate simnaah nuam asate zong akhaknaah Satan’ huang sungah lutin, ahuzaap sia tawh tuancil ahihna phawk kik san ding uh hi. Satan’ ze-etnate samin, tua zeetna anilkhiat nading tha ama sungah omlo hi. Uplohna, lawpkhialhna, leh khemna in amaute khuak tuamcip hi.10

Phuahtawm leh Dawi Nungak Tangthute.— Dawi nungak tangthu, phuahtawm tangthute tawh tate pahtahna kipia hi. Sang leh inn tampiah hih laibute om hi. Thuzuau bekbek ahi hih laibute banghangin Christian nu leh pate in atate simsak uh hiam? Tua tangthute khiatna nu leh pa dong uha, nu leh pa in amau thuhilhna tawh kilehbulh ahihlam phawk uh hi. Tua tangthute in thuzuau ahi hi. Ahizongin tua tangthute huzaapna beipah hilo hi. Tuate in tate lampial sak hi. Amaanlo nuntakna pia in, aom taktaklo nate lunggulh sak hi.

Thumaan aomlo laibute tate’ leh khangnote’ khut sungah koih ding hilo hi. Tate in pilna azonna uhah mawhna khaici khat peuh aneih suak loh nadingin nu leh pa in lamlah ding ahi hi.11

Khuak-hatna Bangci Suksiat.—Nu leh pate in tate’ thanemnate tawsawnin, ahoihlote netcipding atavuan uh awlmawhlo ahihmanin lungsim akikhaikimlo thu tampi hong piang hi. Tate kintakin acingdingin tavuan kipia ahihlam phawklo uha, zongsatna ahoih leh amaan ngaihsutna ah apantahding uh nelhsiah uh hi.12

Kha leh khuakpilna vangliatna pattah sak un. Hih hoihnate dualdap sak kei unla, phuahtawm tangthu simna tawh sia sak kei un. Khuak hoih aneih pen laisim akikhallohmanin lungsim maanlo tawh am leh si ahihlam ka mu hi.13

Alawpsak Lai Simnain Khuak Tawlngasaklo.—Lunglawpsak tangthu asimtein nisim nuntakna tavuante asemdingin kituaklo hi. Amaute in sunmang leitungah nungta uh hi. Tuabang tangthu anuntakpih sawm naupangte kamu hi. Innah ahia, apualamah ahizongin omkhong theilo, mi tawh kiho theilo, ngaihsutna bek tawh kitom thapai uh hi. Biakna ngaihsutna leh kihona ah lungtung lo uh hi. Tuabang laisimna tawh akhuak ie limsakna kisia sak ta a, tuabang nate nelo ding omthei nawnlo hi. Tuabangte genteh nading pen khuak zukhamna ahi hi. Cidamna apialo laite asim nain zu adawnte bangin alung amsak hi.14

Tulai thumaan asaan main mipawl khatte in phuahtawm laite nasim uh hi. Pawlpi tawh akizop uhciangin tua zongsatnate zawhnading hanciam uh hi. Amaute maiah asim ngei uh laite vakoih kikna in zudawn dinga sawlna tawh kibang hi. Mawhna zolna zuihding pen amasuan uh hidena, thumaan simding haksa sa uh hi. Laisiangtho simding zong uuklo uh hi. Akha’ vangliatna zawngkhal hi. Mawhna pen nawlkhin zolo tektek hi. Thumaanlohna zangto in, nisim nuntaknaah nopsakna tawm semsem hi. Alungsim akisiat bangin amuh bangbang asimdingin kitawsawn hi. Tuabangin Satan’ lut theih nading leh ukcip nading lampi hong kihong ta hi.15

Nawh leh Puatham Laisimna in Thukanna Nemsak.—Laikhennate panin laite tuihual bangin kinawnkhia a, khangno leh khanghamte in lai nawhsim leh puatham sim ding kipantah uh hi. Khuak kuhkalna tha nemsak hi. Nipi leh khasiala akikhente zong Egypt gama uiphukte bangin leitang khempeuh tuam a, thadahna, siangtholohna kizelsak hi. Tuate in khuak amsak, siasak hibek loa, kha nuntakna zong susia hi.16

Pawlpi Khet Laite Tanzokeng.—Hih bang sang gamte in Review, Signs, Instructor, ahihkeileh Good Health laihawmte kaleei zokei uh, ci in laloa, apualam laite la uh hi. Anu apate’ sim apualam laite, phuahtawm tangthute, atate in zong sim nuam sazaw uh hi.

Ngaihsut tawm tangthute panin nu leh pa in atate dalin, phaak bangin pelh ding uh hi. Na sabuai tungte leh na laisaalte vuah biakna leh kha tawh kisai laihawmte kiphalh zaw hen. Natate un akisanglap laisimna nei ta uh hen.17

Khangnote Laisim Thu ading Thupuak.— Laihoih simlohna alauhuaina kamuh bangin, hih siatna tawh kisai kagenbeh nuam hi.

Apahtak huailo gamtatna tawh kisai pawlpi nasemte vaihawmdan hangin apiang thaman lauhuaina kiphawklo hi. Hih thu amaute kilakin, hih vai tawh kisaiin zong lawpna nei uh hi. Laigualte amaute khuak sungah kigelh hi. Ngaihsutna zong kihilh hi. Tua hinapiin laisimte pen laiatpa kha sungah lutin, lungsim leh zia leh tongin siatna ah kikhencip hi. Pawlkhatte in upna neu nei in, akikhal dingin tha neilo uha, tua laite in apiak hilhnate anialding haksa sa uh hi.18

Lawpna apia laite simna ie huzaapna atheidingin khangnote khanglo leuh kadeih hi. Tuabang laite nasim khit uhciangin Pasian’ laibu lemin, lunglawpna tawh nasim thei uh hiam? Pasian’ Laibu lunglawp huai nasa uh hiam? Tua kingaihna laibute in amaute khuak sungah oma, acidam huaina susiat sakin, athupi thumaante tawh alungsim khihin tawntung thu ah lunglawp zolo uh hi. Ngimna hoihlo tawh nahun tampi nabeisak na hangin nanu napa tungah mawhna nanei a, Ama’ tungah na kiap nadingin nazat ding hunte namawk zat manin Pasian’ tungah namawh

hi.19

Tate aw, note ading thupuak kanei hi. Tu in na mailamthu ding akhensat ding thu nahih uh hi. Na zia natong kilamdan in Pasian’ Paradise tawh hong khenkhia ding hi. Leitung Honpa Jesu adingin bangzahta in dah huai hiam? Leitung hong ensuka, a innkuanpih sungah tate in Pasian itna neilo, Pasian’ kammalte zahtakna neilo, phuahtawm tangthu bek simdingin hun kipia uh hi. Hihbang laisim nadingin napiak uh hunte in innkuan bangkua nasep hun hong tuhkhia a, innkuan makai dingin nakilawmna hong sutkhia zo hi. Hihbangin nazop lai uhleh Satanin ama’ thaangsungah hong khihcip semsem ding hi. Na laisim pawlkhatte in nuntakna dingin thukhun hoih pawlkhat hong piamah ding hi. A thukhun ngahdingin simlo in, atangthu ngah dingin nasim zaw hi. Na gamtat lamtoh nadingin tua laibute panin akaikhawm hilecin, nalaisimnain ahoih na pawlkhat hong pia ding hi. Tua laibute la-in mai khat pan maikhat nalemtoh ciangin hih kalaisimnaah katupna bang hiam, cih na kidawngngei hiam? Akisam pilna azong mah kahiam? Sing, lopakeu, leh lopa bulsumte tawphahin nagamtat nalam theikei ding hi.20

Laisiangtho Thumaan Khuaksungah Vawhin.— Akikho ngeilo huan leh akipantahlo khuaktein kibatna nei uh hi. Tate leh khangnote khuak sungah galpa in tahumte vawhin, nu leh pa in vil lo uh hileh siatna gah hong gahding hi. Kitatsatloin khuak huan khawh kul hi. Laisiangtho thumaan khaici tuh kul hi. Nin abang lung alawpsak tangthute simna nial unla, Laisiangtho tangthu, tangthu leh kinialnate ah kihei un. Tua hileh asiangtho laimalte in khuavak hong taan dinga, phattuamna apia Laisiangtho simnopna hong pia ding hi.21

Pasian’ kammal asim nop kei uhleh khuak cidam leh amaan upna thukhunte neihding piang theilo hi. Hih Laibu in alunglawphuaipen tangthu hia, Christ tungtawn in gupkhiatna ngah nading leh ahoihzaw nuntakna ah ahong makaihding ahi hi.22