Zo Phualva Thupuak - Vol 07, Issue 11: A NOPSA, A MAVANG INNKUAN

A NOPSA, A MAVANG INNKUAN

Nupate’ kikal ah a kicing ki-itna leh kithutuahna a om ding Pasian geelsa ahi hi. Pasian’ geelsa bangin khat leh khat a ki-it dingin vanpi leipi’ mai ah lawmtate kiciam uh hen. Numei in a pasal a zahtak ding hi-a, pasal in a zi ita a ngaih ding ahi hi.

Kiteen cil pan mahmahin numei leh pasalte, Pasian’ tungah a ki-ap ding uh ahi hi. Lim takin, kidawm takin kiteenna a kivai hawm hangin, kiteenna pawi ah mi tawm bek pum khat suak uh hi. Kiteenna ah mi nih a kipum khatna taktak pen a nungsanga nasep hi zaw hi.

A kiteeng thakte in nuntak lungkhamnate hong tuah uh ciangin, kiteenna tawh kisai-a a lawpna, a uknate uh hong bei thei hi. A kiteen ma uha a kikholhnate uah a theih khak nai loh uh a zia a tongte uh hong kitheih pih ta hi. Tua hun pen nupa hihna ah a thupi mahmah hun khat ahi hi. Mai lam a nuntakna uah lungnopna leh kimuanna a neihna ding uh tua lai taka a khensatna uh tawh kisai hi. Lamet loh thanemna leh ginat lohnate hong kimu uh himah taleh ki-itna in a gawm khop lungtangte in a theih khak nai loh uh a hoih nate hong mu thei uh hi. Eima lungsim puak leh kim leh pam omziate in, mi dangte’ omzia eite’ tungah hong lak thei zel hi.

Mi tampi in itna lah khiatna pen ginat lohna bangin seh uha, mi dangte’ itna zong ngah kha lo pah uh hi. Tua lungsim in kikhualna zong om sak lo hi. Citna leh siamnate a kinen cip ciangin hong keugawin, lungsim hawmin vot cip hi. Tua ding kidop huai mahmah hi. Lah khiatna om lo-in ki-itna kho thei lo hi. Nang tawh a kizom mi’ lung sungah migitna leh hehpihna kial tung sak kei in.

Ki-itna kisiik bawl lo-in kipia zaw un. Na sung uha om a hoih pen khangto sak un la, khat leh khat na hoihna uh kitheih pih ding hanciam un. Hong kipakta cih kiphawkna in a lamdang lungkimna leh lawpna piang sak hi. A hoih bel dinga hanciamna pen kihehpihna leh kipahtawina in tha ngah saka, ki-itna in zong gamtat hoih khang sak hi.

Nuntakna Nih Gawm Khopna

Haksatna, lungkhamna leh lungkiatna a om hangin numei hi in pasal hi ta le uh a tuak khial a kamsia-in kingaihsun kei uh hen. Khat leh khat a hoih thei pen dinga kibawl ding ngaihsun un. Na kingaih cilnate uh zom to un. Nuntak gal dona ah khat leh khat kihansuah un. Khat leh khat na kilungnop sakna ding uh hanciam un. Ki-it tuakna, kithuak zawh tuakna om sak un. Tua hi leh kiteenna pen ki-itna a beina hi lo-in a kipatna hong hi ding hi. Lawmta kingaihna, lungsim khat leh khat a hen khawm ki-itna in van gam maleepna ahi hi.

Mi khempeuh in lungduaina kisin ding ahi hi. Migitna leh kithuakna tawh lung sungah ki-itna kip thei-a, Vantung’ thukim pih hoihnate hong khang ding hi.

Kiteenna ah amaute pum khat a suak ding, numei in a pasal ita a thu a mang ding, pasal in zong a zi ita a ngaih ding kiciam zo uh hi. Pasian’ thukham kizui hi leh, innkuan sung ah kitotna dawi lut lo dinga, kithu tuah lohna, kilem lohna cihte om lo ding hi.

Kiteenna ah - nuntakna nihte khata gawm khopna - a thupi mahmah kalsuan-na khat ahi hi. Ama nasepna ah numei leh pasal kithuah khawma, cidamna leh sianthona tawh mai a nawt ding uh Pasian’ deihna ahi hi.

Tua bang innkuan sungah Pasian’ thupha pen vana nitang bang ahi hi, bang hang hiam cih leh Jesu Khris’ khut nuai ah, Ama ukna leh Ama Kha makaihna tawh a nihun a siangtho pum khat suahna ah a kizop ding Pasian’ geelsa ahi hi.

Pasian in innkuan pen leitunga a nuam bel mun, vantunga innkuan lim a lak a hi dingin deih hi. Innkuan sunga nupa masuante zawn khopna, amau’ lawpnate Jesu Khris tawh zop khawmna, Ama khut leh Ama thu tungah kingakna tawh nupate in Pasian’ van mite’ om pihna lungnopna ngah ding uh hi. AH, laimai 101-107.

Lungsim Hong Kituah Loh Ciang

Nupate in a lungsim uh Pasian a ap kei uh leh, a masuan tuamtuamte uh ahoih a pha-in a hawm thei ta uh zongin, innkuan buainate leptuah ding haksa thei hi. A innkuan nuntakna uha a lawpnate uh kibang kei leh khat leh khat a ki-itna uh kip thei ding hiam? Innkuan khawsakna khempeuh ah amaute a kipumkhat ding uh hi-a, numei in Khristian a hih leh, a lawm a hi a pasal’ deihna a zuih ding ahi hi; bang hang hiam cih leh pasal pen innkuan lutanga ahi hi.

Pa bel hi napi-in, na zi in nang’ muh bangin mu lo a hih lam thei napi-in, bang teng sukha ding cih ngaihsun lo-in, nang’ muhna teng na thungetna leh na kampauna ah na ut bangin na paaikaan niloha, hoih takin thu na khai kim kei hi. Na zi’ ngaihsutna don lo-in, miliante’ ngeina bangin na kithu tuah lohnate uh koih khong lel lo-in, a deih huai lo thute na lenlena, na kim na pamate khual lo-in nang’ muhna bekbek na gen den keei hi. Na innkuan pih dangte in nang’ ngaihsut bang lo peuhmah a ngaihsut ding uh na phal kei hi. Tua bang gahte Khristian kung tungah gah lo hi.

Ka naupa, ka naunu aw, Jesu a sang dingin na lungsim kongkhak hong in. Kha-innpi sungah Amah lut sak un. Nupa nuntakna sunga thu nawngkaite na zawhna dingun khat leh khat kihuh un. Na galpa uh na zawhna dingun nakpi-in do kul ding hi. Tua kidona ah hong huh dingin Pasian na deih uh leh, na nihun na pankhop uh kul dinga, khuk dina, “Topa aw, ka galpa uh hong taai sak in,” na cih uh ciangin zong, kam khial na pau khak lohna dingun kidawm un.

Pasian’ deihna tangtung hi leh, nupate khat leh khat kipi-bawlin, ki-itna leh kimuanna nei ding uh hi. Innkuan kilemna leh kipum khatna a susia thei peuh mah nakpi-a nuai cipa, kihehpihna leh ki-itna pahtaak bawl ding ahi hi. Lungsim ah migitna, lungduaina leh ki-itna,  kilang khia sakte’ tungah tua lungsim mah kilang kik ding hi. Pasian’ Kha in a ukna mun ah, nupa kikal thusia genna om lo ding hi. Vanglian lametna a hi Khris, nang lungsim sungah a om takpi leh innkuan sungah kipum khatna leh ki-itna om ding hi. Numei’ lung sunga om Khris pen pasal’ lung sunga om Khris tawh kithuhual ding hi. Khris in Amah a itte’a a dinga a bawl kholh innpi a luahna dingun hanciam ding uh hi.

Kiteenna pen Pasian in A thukham tawh a cin, ngeina siangtho khat hi ci-a a ngaihsun mite in ngaihsut siamna hong nei ding uh hi.

Nupate khat veivei a ki-uk lo naupang gilote bangin gamta thei uh hi. Pasal lah ama thu, numei lah ama thu-in gamta-in, a thu uh kimang nuam lo uh hi. A nupa-un a thu uh a kiman ding ahi hi. Amau’ ut bang teka a om lai teng uh lungnopna om ngei lo ding hi. AH, laimai 118-121.

Itna le kithuak siamna a om kei leh nang leh na pasal Khristian kipum khatna ah kuaman hong len zo lo ding hi. Pasian’ deihna bangin khat’a dingin khat a thupi pen na hih tuaktuak theihna dingun, nupa na hihna uh kinai-a a nuam, siangtho-a a vaang nei, kha lam nuntakna a neite na hih ding uh kisam hi. Pasian in no a ding hong deih sakna mun ciang na tun uh ciangin, leitung pen vantung hi-in Pasian pen no sunga om na thu na mu ding uh hi.

Kong it ka naute aw, Pasian in ki-itna hi-a, na kiteenna uha na kiciamna uh bangin, Ama huhna tawh khat le khat kilungdam sak zo ding na hih lam uh phawk un. AH, laimai 112.

Khris’ hehpihna tawh nangma deihna leh angsung khualna na zo ding hi. Ama gamtat bangin gamta-a, kalsuanna khempeuh ah angsung nialin, huhna a kisamte huh den le-uh cin, a banbanin zawhna na ngah ding uh hi. A ni a ni-in angsung bang ci zawh dinga, thanemnate koi ci thahat sak ding cih na thei toto ding uh hi. Ama deihna bangbang na zuihna hangin, Topa Jesu pen na khawvak, na hatna leh na lungdamna lukhu hong hi ding hi. 7T, laimai 49.

E G White, Pawlpi Thu Lamlak, Khawkpi 21 pan tomlak

Thupilte:

 Ih ngaihte tawh kigamlat pen sihna sangin suksia zaw hi. William Cowper

 A zi in a pasal lunguam takin a ciah na dingin bawl henla, amah in a zi khialhna te mangngilh hen. Martin Luther

 Maisak siamte kiteenna pen kiteenna hoih ahi hi. Ruth Bell Graham

 Kiteena thu ah thuman zo lo cih pen Pasian tungah thuman zo lo cih lah khiatna hi. Adam Copenhaver

 Inn sungah itna taktak longal ini muanhuaina pia zo lo hi. Billy Graham

 Pasalte pen mei tawh kibang uh. Thudon kei leng om nawnlo hi. Zsa Zsa Gabor

 Kingaihna in kiteenna om ta kei leh etlawm khin mahmah a, itna omlo innkuan hihna pen etlawm ngeingei lo  hi. Ellen Key

 Khinkhai in lawm ngai in, a kip ding kisam hi. Manlang luatna in ziakai lua kik thei hi. Romeo & Juliet

 A hoih kiteenna khempeuh a bawl Pasianin na lungsimte uh khat ah hong gawmsak hi. William Shakespeare

  

Zo Phualva Thupuak - Vol 07, Issue 11 by DavidLian on Scribd