SINNA 13 – JESU HONG PAI KIK NA'NG LIMTE

  Thupatna: A hong kamciamna bangin Jesu hong pai kik ding ih lametna ah a khengval dinmun nih om thei-a, a nihin upna lamah lau huai hi. Khatna ah, Jesu hong pai kik ding gamla lai, mawhna sungah nopsak theihna ding hun tampi nei lai hang, cih leh, a nihna ah, hong pai kik ding hun sehna a hihi. Tua banga hun a kiseh ciangin, hong pai kei leh, A kamciam uplahna-in kinei thei hi.

1. Khrist hong pai kik ding a hun lian a kithei hiam? Matthew 24:36. 

Theih ding: Kuamah in hun seh thei lo ding a hih lam, hong pai kik ding hun Lai Siangtho genkholhna zong om lo a hih lam Jesu in teltakin hong gen hi.

2. Nungzuite in Jesu' kiangah a lawphuai bang thu dong uh hiam? Matthew 24:3. 

Theih ding: Jesu hong pai kik hun ciangin Jerusalem khuapi zong a kisusia pan dingin nungzuite in ngaihsun kha uh hi. Jesu in tua dotna nihte na dawng hi. A hi zongin khat leh khat a pian hun ding kum tampi kigamla hi. Jesu in tua thu a gen zawh kum sawmli a cin kuanin Jerusalem kisusia hi.

3. Amah hong pai kik ma-in bang gimna lianpi piang ding Jesu in ci hiam? Matthew 24:21,22. 

Theih ding: Khrist thuzuite in gimna lianpi hong thuak ding uh hi. Lawkite in kum zali sung bawlsia uh hi. Khristian hi ung a cite in kum tul leh kum zanih sung bawlsia uh hi.

4. Tua gimna lianpi khit ciangin bang hong piang ding Jesu in ci hiam? Matthew 24:29. 

Theih ding: 1780 kum May kha 19 ni-in, hih Lai Siangtho genkholhna a thei mi a tamna gam lamah ni khat bup dektak ni hong mial hi. Tua nizan mahin kha a liik laitak hi napi-in zankim ciangin hong kidawk phinga, sisan bangin san hi. 1833 kum November 13 ni-in, vana aksi khempeuh a pulh khia khin ding bangin aksite kia zuahzuah hi. Joel 2:30,31; Mangmuhna 6:12,13.

5. Leitung hun bei ding a hihna lim koi bangin hong kigen hiam? Jacob 5:1-5,8. 

Theih ding: A beisa kum 70 pawl pan kipan mi kimkhatte in sum leh paai kholpi-in kholin, nasemte leh thacialte' kikalah sisan luanga kidona tampi om hi.

6. Tu huna piang launa leh lungkhamna tawh kisai-in Jesu in bang gen hiam? Luke 21:25,26. 

Theih ding: Leitung bup galpi khat hong pian kik khak ding, hydrogen bomb khawng hong kihal ding launa in hih genkholhna a tangtunna a hihi.

7. Hun bei kuan a hihna a hong lak mite' omzia leh biakna lam omzia Lai Siangtho in bang gen hiam? 2 Timothy 3:1-5.

Theih ding: Khangnote gina lo semsem ding a hihna, pianthakna taktak om lopi-in biakna lam khanlawhna om ding a hihna, hih bangin hong kigen khol zo hi.

8. Tu huna hong piang na-lamdang pipite tawh kisai-in Lai Siangtho in koi bangin hong gen hiam? Daniel 12:4. 

Theih ding: A beisa kum za khawng pan kipanin mihing' siamna hong khangto mahmah hi. Siamna a thak a thak zong hong kibehlap den hi.

9. Amah hong kum kik ma-in leitung buppii ah bang thu kigen ding Jesu in ci hiam? Matthew 24:14. 

Theih ding: Jesu hong pai baih dinga, Ama gam hong phut ta ding hi cih thu leitunga om gam 200 bangah kigen ta hi. Radio khawng, television khawng zangin hih thu kitangto hi.

10. Khrist hong pai kikna in mi tampi a patau sak ding hiam? 1 Thessolonian 5:2-4. 

Theih ding: Gam khat leh gam khat kihona leh kitotna tawh leitung a kidim hangin gam makaite in kilemna a omna ding hanciamin lamen lai uh hi. Leitung ah om mihong tampi takte' a dingin Khrist hong pai kikna in theih kholh loha zana guta hong pai bang hi ding hi.

11. Amah ong pai ding hun nai ta a hih lam ih thei thei ding hiam? Matthew 24: 32, 33. Theih ding: A kum, a kha leh, a ni lian ding ih theih loh hangin Khrist hong pai ding nun nai mahmah a hih lam ih thei hi.

12. Jesu hong pai kikna ding a naina limte ih muh ciangin eite bangci om ding ih hi hiam? 2 Peter 3:14.

Thukhupna: Mite' tung leh nate' tunga a piang ding limte hong tangtung khin lah oma, hong tangtung saan zong om hi. Jesu in a hong gen mah bangin Ama hong pai ding "kong biang dongin hong nai zo hi." Ih mawhnate hong kimai saka Pasian' deihna tawh kituaka nungta ih ih lam kician sakin kigingsa-in om ciat ni. Mi dangate zong a kiginkholh theihna dingin amaute va hilh ni.