Kumkikna Lamen Innkuan - Khen 14 : Kha Lampi Cing Ding

THUKHEN 14

Kha Lampi Cingding

KONGVANGTE CINGDING

Banghang Pasianin Mit, Bil, Kam Hongpia.— Pasian’ thukham panin alamdangnate ihmuhtheih nangin Pasianin mit hongpia hi. Anungta Thuhilhsiapa’ thupuak te ihzak theih nadingin bil hong pia hi. Honpa in mawhna amaisakdingin hong kipia ahihna ihgenkhiat theih nangin thugen theihna kam hongpia hi. Lungtang tawh mitein dikna ah um uha, gupna kam tawh kigen hi.1

Satanin Eite sungah Bangci Lut.—Pasian in ahong piak theihtheihnate ihcing ding hi. Tua hikeileh Satan in eite tungah gualzawhna ladinga, hih theihtheihna kongvangte tawh ih sungah lut thei hi.2

Namit, nabil leh natheihtheihna kongvangte belcing takin cing in. Tua hileh nalungsim na ukzo dinga, kha nuntakna aninsak amawkna leh asia lungsimte panin nakikem zoding hi. Hih thu ah Pasian’ hehpihna bekin hong tangcing sak ding hi.3

Satan leh ama’ vanmitein hih theihtheihnate amsaka, kihilhna, kitaina, leh kigenkholhnate zalo sak hi; zathei, muthei hinapi kikhelna, puahphatna neizolo sak hi.4

Sanggamte aw, khuavakah anungta dingin Pasianin anungzuite hongsam hi. Khanglo un. Mawhnain eite sungah oma, mawhna ahilua dingin ihngaihsun kei hi. Mitampite’ theihtheihna kongvangtein duhgawl hangin leh zongsatna mawhnate hangin hikin am hi. Vantung lam ihkalsuan ding ahi hi.5

Satanin Theihtheihna Buaisak.—Pasian akinlo dingin Satanin hong makaih hi. Mawhna ah ihlungsimte hong diahsak a, ihngaihsutna ah Pasian omkhalo hi. Amaute’ piak pilna inzong ngaihsutna buaisakin, khuavak maan mitsak hi. Satanin mite Pasian’ theihna neisak nuamlo hi. Kimawlna leh pawipite tawh khangnote’ theihtheihna buai saka, amaute’ kim tengah khuavak tang napiin khuamial sungah mangthang sak hi. Tuapen nuamsa

zaw lai uh hi.6

Phallohin Lungsimah Satan Lut Theilo.— Ihthuak zawhloh ding ze-etna hong tunglo ding hi, ci in Pasianin hong vaihawmsakna ihmite tungah ihgen ding ahi hi. Ze-etna alut leh zong suahtakna lampi hong honsak ding hi. Pasian adingin anungta ihhihleh khuavalna angaihsun dingin ih lungsim ihphal keiding hi. Satanin lungsim kongvang khat angahleh ama’ khaici vawhdinga, pungsak ding hi. Anlak ding tamsak ding hi. Ahizongin eite in kiphalin, ei’ ut thu tawh kong ihhon keinakleh ihlungsim, kammal, leh gamtatnate hong uksak theilo hi. Ihkiphal ciangin amah hong luta, ihsungah aom khaici hoihte botkhia in, thumaan lalthangsak hi.7

Ze-etpa Kongvangte Khaksan un.—Christ min alo khempeuhte in kha kongvangte thungenin, vilin ngakin omun. Ahangin Satanin angahzahzah tawh kituak suksiatna abawldingin hanciam hi.8

Satan’ hong cianpiaknate zui in lungngaiin, thaman a atdingin nautual kaih thapaaiding hilo hi. Mawhna in ama sungah agualnuam khempeuh suksiatding ngimna nei hi. Apianzia pen hongkhihin, mittaw sakin, hong zol hi. Satan’ huang sungah ihlut ngam leh ama’ vangliatna panin kidal nading vangliatna ihnei kei hi. Eite sungah aom huneihnain ze-etna ahong lut theihna kongvang khempeuh khak ni.9

Ze-etna ahong tun laitakin, ihbawlkhak khialhna hangin bangpiang ding, cih kua in thei zo ding hiam? Eite ngaihmuanna in atawntungin Pasian’ hehpihna tawh ihkituamding bek ahi hi. Ih kha mitte si ngeiloin, siatna pen siatna mah cipahin, ahoih pen ahoih cihpah ding ahi hi. Zekai leh kinialna omselo in, siatna ahong lut theihna kongvang khempeuh ihkhak ding hi.10

Christian khempeuhin Satan alut theihna kongvang te atawntungin vilin acing kinken ding uh ahi hi. Pasian kiangah thungenin aom laitak mahun mawhna lamah hoi-na khempeuh ihnial ding hi. Ngapna, upna, hanciam kenkonna, tawh ihgualzo thei hi. Gualzawhna ih ngah nadingin Christ eite sungah omdinga, ei zong Ama sungah ihomding ahi hi.11

Siatna Simna, Etna, leh Zakna Pelin.—Sawltak Peter in thu-umte ahilhna ah, akikham thu leh late ah lungsim vakzau saklo dingin ahihkeileh thu nengkai khattawh tha abeisaklo dingin hong vaikhak hi. Satan’ mat athuak nuamte adingin sianthona ahong pialo simna, etna, leh zakna neilo ding hi. Galpa in akhahkhiat thute ah lungsim hemkhia ding hi. Lungtangin zong encik dinga, siatna in siatna tho saklo in, kha in zong khuamialah avakthap ding hilo hi.12

Leitunga mawhnate aomna ah nang leh natate aomloh nadingin hihtheih bangbang hanciamding ahi hi. Ihmit muhnate dalin, ihbil zaknate ihkhuak sungah lut sak khinlo ding hi. Nisim tadensate ahong tunciangin akhel leh mite lungsim alawpsak thute kaselcip nuam hi. Satanin tadensa kikhenna ah aom kinken dingin kangaihsun hi. Akimu thei mawhna khempeuh leitung maitangah kiphalhsa in om hi.13

Pasian’ maiah mipil ahinuamte in mipil ahih nadingun leitung mawhna khempeuhah mihai suakphot ding uh hi. Siatna mu leh asinloh nadingin amitte uh siding uh hi. Alungsim siangthote  akepcing nadingun siatna thusia aza abil uh hucip ding uh hi. Kamsia apaukhakloh nadingun aleei uh khih ding hi.14

Kong Honna tawh Dona Thanem.—Mualkil tawh akinaipenin lampai lecin ngaihmuanna bangzah nanei hiam? Lauhuaina akidawk masa pen pel pahin. Kha lunggulhna kimawl nading hilo hi. Nasumbul pen nazia natong ahi hi. Tuapen khambangin na iplah ding hi. Lungsim sianthona, nang le nang kizahtakna, dona vangliatna, te kiptakin kemcing in. Kikhenkhia kha kei in. Ze-etna kong nahon khakleh zongsatna khat peuhin na kha nuntakna lausak ding hi.Tua hileh nadona tha hong nem ding hi.15

Mailam Minthanna Satanin Mitsaknuam.— Ahong tungding leitung thak ie minthannate Satanin mite maiah mit sak nuam hi. Hih leitung nuntakna tawh eite hong zol hi. Eite’ ngaihsutna, patauhna, nasepnate in tutawm adingin kipumpiakna tawh tawntung minphatnate amangngilh ding hong deih hi. Leitung ihkinna lian mahmahin Jesu leh vantung ihkinna neu mahmah hi. Nisim ihnuntaknaah theihna tawh nasemin ihom hun mahin Jesu Christ Topa tungah itna siangtho ihneihding zong kisam hi.16

Vantungmite in Hong Huhding.—Ahoih leh ahoihlo muhtheihloh vaihawmte phawksa in ihlungsimte ih uk ding kisam hi. Amaute in akimuh theihloh hangun vangliatna nei uh hi. Ahoih vantungmite in mite lungtang sungah vantung huzaap hong pia a, ahoihlo vantungmite in eite asuksiat zawh nadingun atawntungin nasem hi. Akimu theilo galte’ dona ihthuak ciangin eite’ lungkimna leh phalna omlo in hong nawngkaisak theilo ahihlam ihtheihding ahi hi.17