Kumkikna Lamen Innkuan - Khen 14 (Azom1)

HONGZOL MUHNA LEH AWTE 

Aw Sia leh Muh Sia in Umcih.—Natate akhantoh uh tawh kituakin atuahding uh ze-etnate hangin nakpi takin ngaihsut ding thu om hi. Lawm sia tawh kipelh ding hilo hi. Amaute in mu in, za in, tuate huzaapnain kha nuntakna susia dinga, tuapanin kikep ding ahi hi. Tua huzaapnate in lungsim siasakin zia leh tong zong poi sak hi.1

Ze-etna Do Nang Kulh Ciangding.—Christian inn sungah ze-etna do nading kulh cianding kisam hi. Satanin siatna leh thupalsatna aminthan nadingin lampi azat theihbang tawh gamtang hi. Laibu leh pawi inn sungteah akilah bangmahin siatna mulo in kongzing khat kikantanlo hi. Mawhna ah azongsang dingin lungsimte pilna kipia hi. Nipi sial khasiala akihawm laite sungah hih siattatnate akigelhna tawh mite lungsim siatna ah khanglo sak uh hi.2

Nu leh pa pawlkhatte in thulamdang ngaihsutlo uha, atate un kumpi sang akaha, pawlpi sang akah zongin bangmah kilamdang kei, ci uh hi. “Leitungah ihom a, ihtaikhia thei kei hi” ci uh hi. Nu leh pate aw, leitung panin paikhiatna lampi hoih ihdeih nak leh ihnei thei hi. Hih nitawpni huna apiang siatnate muhloh phamawh hi. Hih thusiate ihzaknop keileh ihkipelh thei hi.3

Thukhamlo Khaci Vawhin, Palsatna An ihla.— Tuhuna akikhenkhia aminthang laite in tate siatna leh manthanna ah amakaihding pilna leh tangthu vive ahi hi. Amaute in asim tangthu tawh siatna gamtang sak hi. Tangthu sunga tatsiatna akigelhkhiate in mawhna khat peuh bawlnopna tho saka, dantatna kipengsak hi.

Khangnote’ lungsim ah amuh uh mite phuaktawm ngaihsutna pulaaknate ataktak sa uh hi. Langpannate

kigenkhiain, ukna leh thukhamte kibalkek in, gamtatna in lungsim lawng mahmah hi. Mawhna abawldingin sawlna angah uh suaka, lai-at siamte genna sangin asia zaw in zong gamtang nuam uh hi. Hihbang lai-atte tawh mite hong kihuzaap hi. Thu palsatna khaici akivawh hia, lamdang sakding hilo, tatsiatna mah aki at ahi hi.4

Popular Music ie Toksuahna.—Thumaan aum khangno numei pasalte’ thenthawlna hangin kadip hong kuasak hi. Amaute’ lungsim sungah Pasian omtuaklo hi. Amaute lungsimah bangmahlo thu tawh kidim hi. Akihonate uhzong thutak omlo a, paumaimai ahi hi. La zasiam uha, Satanin bang kongvang kitoksuahleh hoih cih, thei hi. Christ aki iplahlo dingin amaute’ lungsim ki kaikhia hi. Khalam lunggulhna, Pasian’ thu theihnopna, leh hehpihna sungah khantohna omlo hi.

Khangnote in dinmun asangzaw ah akah uh kula, Pasian’ kammal pen amaute’ amakaih thuhilhna-in aneih ding uh kisam hi. Khangnote tungah tavuan lianpi Pasianin suan a, amaute in tangzang ngaihsut uh hi. Amaute inn sungah la akisakna tawh siangthona leh khalam thamalhna apian sangsikin, thumaan panin lampialkna suaksak hi. A popular la leh khiatna aneilo late bek zaknop sa uh hi. Thunget hunte music tumna hunin kizang hi.

Kizangkhial hikei leh music in thupha ahi hi. Ihzatkhialh ciangin samsiatna suak hi. Pasian’ tokhom panin akingah tha leh hansannate hong ngahsaklo-in lungsim hong lawpsak hi. Pasian’ maiah kisik nopna lungsim, khitui luanna, vantung tha lunggulhnate piang saklo-in, ze-etna konghonna suak sak hi. Satanin khangnote thaangah awksak nuam hi. Hih music uukna panin amaute asuahtak theih nadingin bang kihih theiding hiam? Amahin siatnaah mite makaihin siamna tawh zol hi.5

Asiangtholo Ngaihsutnain Asiangtholo Tatna Makaih.— Tuhun in siatna alan kawikawi hun ahi hi. Mittang lunggulhna, leh siatna duhna in muhna leh simna tungtawnin hong lut hi. Ngaihsutna tungtawnin lungtang kisia hi. Ganhing lungsim athosak thute ngaihsutna tawh lungsimin gualnopna zong hi. Amuh uh limte, lungsim nin tawh aet uhciangin kha nuntakna susia in, kiuk kikhalna beisak hi. Tuaciangin mawhna leh palsatna in Pasian lim leh meel sutna panin kaikhia in siatna sungah atungdingin ganhing lungsim sungah kia sak hi.6

Siatna Nate Kamulo ding.—Pasian’ lamah amanthanloh nadingin nu leh pa in tate cingding uh hi. David in Late 101 ah apiak kamciam bangin, inn huzaap akemcingte in zong tavuan ihlakding ahi hi. Lateah “Ka mit maiah siatna kakoih keidinga, lam apialte nasep kamudah hi; keitungah hong luailo ding hi. Lungsim leengzaute in kei kiang panin kihemkhia dinga, misia ka theikei ding hi. Avengte agensiate kahemkhia dinga, lungsim kisangsakin akiphasakte kathuak keiding hi. Kamit in kaleitanga aom athumaante endinga, amaute in kei tawh ateengkhawm ding hi. Siangtho takin anungtate in ka na asemding uh hi. Khemna tawh nasemte in kei tawh omkhawmlo ding uh hi. Zuauthu agente zong ka mittang maiah tawlngalo ding uh hi.”7

Kiptakin genin, “Kei adingin meetna ahong pialo laibute simna in kahunte kazang keiding hi, midangte adingin nasemdingin ahong kilawmsaklote ka sim keiding hi. Ka hun leh ka ngaihsutnate Pasian’ nasepna tawh akilawm dingin kazang ding hi. Mawhna tawh akisai thute ah kamit kasi ding hi. Kabilte zong Topa’ a hia, kagamte’ ngaihsutna kangaihsak kei ding hi. Pasian’ Khasiangtho huzaapna nuaiah aomlo deihnate adingin ka aw kazang keiding hi. Kapumpiin Pasian’ teenna biakinnpi hia, kanuntakna sunga aom kaneih vangliatnate zong ahoih nasep nadingin ka ap ding hi” ci in.8