Kumkikna Lamen Innkuan - Khen 13

THUKHEN 13

Sum Zatdan

PASIAN’ SUMKEMTE

Pasian’ Neihsate Phawkna.—Pasianin na khem peuh aneipa, ci-a ihsaannain sumbawlnaah thumaanna leh gualzawhna maan ie abul ahi hi. Na khempeuh apiangsakpa in acil apatin aneipa ahi hi. Eite in Ama’ sumkemte ihhi hi. Eite in Ama’ muanna ihngaha, Ama’ makaihna tawh kituakin ihzat ding ahi hi.

Hihin mihing khempeuh tungah aom tavuan ahi hi. Mihing’ gamtatna khempeuh tawh akisai thu ahi hi. Ihphawka ihphawk keizongin eite in sumkem ih hia, Ama’ kiangpanin siamna leh vanzatte ihngaha, Ama hong sawlbang asemkhiading ih hi hi.1

Sumin eite-a hilo hi. Inn, leitang, innvanzatte, puansilh leh tawldam nadinga ihneihte eite neih hilo hi. Eitein khualzinmi leh leengla ihhi hi. Eitein cidamna leh nuntakna angahte ihhi hi. Tutuam adinga ihngah thuphate in muanna tawh ahong piak hia, tawntung nate piaktham, piakthamlo, cih ahong sittelna ahi hi. Pasian’ sittelna ihzawhleh, man tawh akileilo minthanna, pahtawina, leh hin tawntungna ihngah ding hi.2

Tavuan ihnei hi.—Ihmite in Pasian’ nasep nadingin piakhia uh hileh muanna tawh ahong kikawm sumte, tuate lak panin angsungkhualna, gualnopna, milim biakna adinga ihzatte vantung sumbeemah akhol hilengh, Pasian ahong deihsakna asem ihhi ding hi. Gentehna sunga mihaupa bangin mitmuh thu bek tawh ihnungta hi. Muanna tawh Pasianin ahong leeitawi sumte Pasian’ minthan nadingin zat ding hinapi, ki-uangsakin ihzang hi. Pasian’ tungah tavuan ihneihlam angaihsun dingin hun ihla kei hi. Nikhat ni ciangin thu hong kisit dinga, ih sumkepte tavuan

ihlak kulding hi.3

Pasian’ sum ihzatdan thukhenni ciangin ihgen kul ding hi. Ei nopsak, ei lungkim nadingin sum tampi ihzanga, ei’ hoih nading bangmah abawlloh banah hong nasak zaw hi. Nahoih khempeuh ahong piapa Pasian hi, ci-in aphawk thei hileng, tua sumin Ama’a hia, sum ihzatna ah pilna ihzang dinga, Ama’ deihna tawh ih kituak sakding hi. Leitung ngeinaah ihkizepdante Ama’ dan hilo ding hi. Leitungdan ihzui theikei ding hi. Eima utna zong ih kiuksak keiding hi.4

Pasianin asiangtho muanna tawh ahongpiak sum ihzat ciangin khalam kikhangkhan nadingin ihzek ding hi. Kiphatsak nading, amawkna ading leh gawl leh duh leh dah lungkim sak nadingin ihzang kei ding hi.5

Vantungmi in ihpiak sumpite mantakin aciapteh lam keimah hong kilak hi. Tuabanga piakna tawh apiangthu zong kamu hi. Pasian’ nasep nadingin pya khat ihzak khiatna, ihpiakkhiat nopna lungsim ahihkeileh ih itsikna nangawn Pasian’ mittangin mu hi. Apiakhia lungsim tawng zong kiciamteh hi.6

Innkuante in Hawmsem taka Piakna.—“Mikhat ciatin Pasianin ahong punsakna tawh kituakin nasehkhia un.” Innkuan sungah a uham pen panin aneupen in piakkhiatnaah kihelding uh hi. Hawmsem taka piak khiatna in akisamlopia sum zangdinga zeetna panin hong kemdinga, ahautein uangtaka nuntaknopna zeetna panin hong khal ding thupha ahiding hi.

Nipi khat sialin Pasian’ hong ngetnate picin sak nadingin innkuan mimal sialin amaute deihnate nialin sumpi hongkhia ding uha, Pasian’ minthan nadingin ei deihna nialding sinthak ding uh hi. Nipi khat ciangin khatvei abeisa nipikal sungah ihgamtatnate—ihsumlutte, ihcilnate, gualnop nadinga ihzatngamlohnate pulaak ding hi. Theihnate tawh Pasian’ maiah phatna ahihkeileh samsiatna angahbangin ihthuak ding hi. Pasian kiang pan in kilemna leh maipha ihngah ciangin ihnekna, ihdawnna, leh ihsilh ihtente in Ama’ min thansak nading hiding hi.7

Pasian’ Ngetna Masakding.—Pasian’ ngetna kin masak ding ahi hi. Ihdeih ihsap khempeuh ihleikhit ciangin acianlai panin piakhiatna-in Pasian’ deihna asem hinawnlo hi. Ihsum ngah khempeuh akizat khiat main Pasian’a ihcihteng ihkhenkhia pahding hi. Laisiangtho Lui hunlaite in Lungdam biakpiaknate in biakbuk sung biakna tau ah atawntungin mei kivakna hi. Tua in Pasian’ tungah ihpiakding pen khawlhun neilo ahihna hong lak hi. Leitung sum ihzonna ah gualzawhna ihngahleh Topa hong piak ahi hi. Hih sumlut lakah pawlkhat pen mizawngte ading, alian atamzaw pen Pasian’ nasep nadingin piakding ahi hi. Pasian hong nget sumpi Ama tungah ihpiakkhit ciangin acianlaiteng kisiansuahin ei kisap bangin zatding ahi hi. Pasianin ahong nget sumpi pialo in ihbuluh ciangin, sum khempeuh tungah samsiatna tungta hi.8

Mizawngte Phawkin.—Christ ie zia leh tong lim alak ihhihleh ihnuntakna sung panin angsungkhuatna athem anengin kipaikhia ding hi. Eite’ khut sungah sepding ahong piakte ihneih bangbang kheuhkhia in piakkhiat ding ahi hi. Innkuante zawnkhalna leh gentheihna ihmuhsak dinga, agentheite ihkhankhiat ding ahi hi. Ihkim ihkotah aom haksatnate ihtam theihpih khol kei hi. Hun hoih ihngah bangin dongtuahna in anencip mite ahuhdingin ihkigingding hi.9

Gualnop nadinga sum ihzat nahangin mizawngte nek leh puansilh leisak nadinga piakkhiatding dongtuak sak hi. Kiphatsakna pulaakna ahi puansilh, inn, innsung vanzat leh innpuahnate in mitampi takte gentheihna leh innkuante dongtuahna ihdomkang sak thei hi. Pasian’ sumkemte in dongtuakte ahuhding uh ahi hi.10

Angsungkhuatna leh Hazatna Damnading.— Deihna nialna tawh piakkhiatnain apiate alamdang huhna pia hi. Nasep hoih semin, gentheihna pan suahtakna piain, dongtuakte’ tangsapna ahuhna tawh asemkhia Jesu ie nasepte atheihpih dingin asin uh ahi hi.11

Atawntunga deihna nialin piakhiatna in angsung genna leh hazatna thoihdam nadinga Pasian’ nasepna ahi hi. Pasianin Ama’ nasep napen hawmsem piakhiatna tawh panpih hi. Azawng migentheite zong panpih hi. Piakkhiatna ah ihzongsat ding Pasianin hong deihsak hi. Tua hileh hazatna ie alauhuai kheemna ado theiding ih hi hi. Piakkhiat tawntungna in hazatna hong thahsak hi. Amanlangin neihsa hazatnate panin akilakkhiat nadingin Pasianin hawmsem piakkhiatna hong geelsak hi. Anei Pasian kiangah neihsate akiap theih nading zong ahi hi.

Pasian’ geel hawmsem piakkhiatna maanmaanin kizang hileh hazatna thanem sakin piakkhiatna thahat sak hi. Pasian um ing, acite nangawn, sum ahauh semsem uhciangin alungsim uh sum tungah oma, tam nei semsem, Pasian kiangah tawm piak semsem uh hi. Hauhna in mite angsungthu gensaka, sumkholna in hazatna piangsak hi. Sumkhol tektek, siatna khauh semsem hi. Pasianin ei adinga lauhuainate thei a, siatna panin eite ahong dal nadingin piakkhiatna hong geelsak hi. Atawntungin piakkhiatna ihneih ding ahi hi. Hih zongsatna hoihin siatna zongsatna panin ahong suakta sakding ahi hi.12