Zomi Sabbath School LESSON 5: PASIAN ADING IN NUNTAKNA

LESSON 5: PASIAN ADING IN NUNTAKNA       APRIL 22-28

NIPINI (SABBATH) NITAK LAM April 22

SIM DINGTE: 1 Pet. 3:8-12; Gal. 2:20; I Pet. 4:1, 2; Rom. 6:1-11; 1 Pet. 4:3-11; 2 Sam. 11:4.

KAMNGAH: Bang hang hiam na cih uh leh, Topa mit in midik te a en hi, a bil in zong amau thungetna a ngai hi. Mawhna ahihte a hih uh leh, Topa in a nungngat hi. (1 Pet. 3:12)

Laisiangtho at te in, mawhna thu tel mahmah uh hi. Bang hang thei lo ding? A guu te muhtheih dingin om hi ven. Tua mah bangin mawhnei te ih hihna thu zong kithei mah mah uh hi. (I Tim. I:15). Bang zah takin mawhna gau in suuk hiam cih zong thei uh hi. Ahi zongin, Zeisu Singlamteh hangin mawhna hanga buaina khempeuh hong veng thei a hih na zong thei uh hi.

Tua ahih manin, Laisiangtho at te in, Zeisu vangliatna bekin, ih nuntakna hong khel thei a, a ma sungah bek mah ah mithak ki suak thei a hihna thu zong tel mahmah uh hi. 

Peter thubu panin, Tu kaal sungin I sin toh ding thu in, Zeisu sungah ki aapin Tui a Kiphum te nuntakna’ sungah nuntakna thak neih theih na, leh nasia taka kikheel theihna thu om a hihna a hi hi. Hih kikheelna in a baih hi dek lo a, gualzawh na ih ngah theih na dingin, pumpi sung lam pan in thuakna a om ding lam hong theisak hi. (1 Pet. 4:1).

Peter agenthuah na ah, Ki-itna in bel "mawhna tampi sel" hi, cih thu a hi hi. (1 Pet. 4:8). Ki itna ih neih ciangin, maisak theihna ki nei thei beka, Zeisu lim leh mel sun in, Ama vang’ ki tan thei pan ding a hi hi.

NIKHATNI (SUNDAY) April 23NGAIHSUTNA KIKHAT

1 Pet. 3:8-12, sim in. Christian te koi ci nungta ding ih hi hiam? I Pet. 2:20, 21 sunga a gen ngei thu khat hi a, bang hangin gen kikkik mawk hiam?

________________________________________________________________________________________________________________________________________________

Peter gennop thu in, ih vekpi in “Lungsim kikhat” neih ding cih thu a hi hi. Mi khempeuh aputham om dan, pongsan khata ki batkim na (uniformity) a gen nuam a hi kei hi. Ih ngaihsutna, ih sepna, ih upna kibang sakin mapang khawm ding cihna hi zaw hi. I Cor. 12:10-26 sung tungtawn in, Paul in a gentehna ahi, “Pumpi in na a tuamtuam tampi a neih hangin pumpi khat bek mah” ahih veve mah bangin, Pasian in pawlpi sungah Khasiangtho silpiak te, mi khempeuh in ama pan’mun ciat ah ma ih pan khop ding hong deih cihna hi zaw hi.

Tua banga ki pumkhat theihna ding pen a baih den lo ding hi. Tanglai Pawlpi masa te zong na ki lungtuak den zo tuan lo uh hi. A hi zongin, ih hih theihzah a mungtup in ih neih ding hong hanthawn a hi hi.

Gentehna in: Christian te pen hehpihna theihna lungsim (Lainatna) nei dingin hong hanthawn hi.(1 Pet. 3:8). Tua ki hehpihna ih cih in, nuntakna sungah, mi khatpeuh in gimna a thuak leh ki thuakpih tek in, khat in a lungnop leh ki lungnop pih liailiai ding cih thu ahi hi. (etkakna. 1 Cor. 12;26)

Lainatna lungsim a hi kei leh hehpih theihna lungsim in, lungsim neem taka, midang te a hi bang lian in ih va muh theihna a hih manin, kipum khatna hong guan hi. “Ki-itna lungsim nei un” cih kammal tawh hong zom lai hi. (I Pet. 3:8), Topa Zeisu mahma in zong a genna ah, “Note khatlekhat ki-it le uh cin keima nungzuite na hihna uh mi khempeuh in hong thei ding uh hi,” na ci hi. (John 13:35).

“Angsung sihna ih cih in, eimah sangin mite dinmun  thupi ngaihsut zawk na hi a, tua lungsim in Zeisu sungah pumkhat na hong suaksak hi. Vantung ah ahi zongin, Leitungah a hi zongin nangin Pasian’ tapa tanu cihna a ngah na hi hi. Nangma vang’ hangin midang te in, Pasian minthanna lo khia ding uh hi. (EGWhite: 9T. p.188)

Peter gen a hi, ”siatna te siatna tawh thukkik na, hong samsia mite samsia kikna” (I Pet. 3:9) cih kammal, bang ci bangin na palsat kha ngei zel hiam? Paul in agen, Angsung sihna ih cih te koi ci bangin Ih nuntakna ah nei thei ding ih hi hiam? (Gal. 2:20).

NINIH NI (MONDAY) April 24A THUAK PUMPI

Topa Zeisu in Eite tang dingin hong si a hih manin, Gupna sungah ih lametna pen ama sung bek ahi hi. A ma dikna in a hong tuamcip na hangin Pasian mitmuhna panin midik a tangthei pan ih hi hi. Bang hang hiam cih leh, tua Zeisu hangin mawhnei lo bangin Pasian in hong sang thei hi. (Step to Christ. p. 62)

A hi zongin tua Pasian’ Hehpihna ih cih pen, a thu bekin a om hi lo a, ih mawhna te hong maisak khin zo hi ci-in, tangko khiatna bek tham lo in, Mawhna tungah gualzawh tohtoh na dingin zong, tua hehpihna mah tawh hong panpih lai ding a hi hi.

1 Pet. 3:18, 21; I Pet. 4:1,2 : Rom. 6:1-11, sim in, Thuakna leh mawhna tungah gualzawh theihna te-in ki koi ci zop hiam?

_________________________________________________________________________

1 Pet. 3:18 sunga “Khat vei” cih kammal pen, Greek pau in “hapax” ki ci a, a khiatna in, a huampi in, eite a dingin, Topa Zeisu in a hong thuakna leh a hong sihna a gen khawm nuam a hi hi. Hi zah taka ih mawhna tang dingin a hong thuakna pen, eite in Pasian kiangah a hong tunpih theihna ding a hi hi. (1 Pet.3:18; 4:1,2). Tua zom ih sim suk ciangin “Tuiphumna” in, hotkhiatna limciin na ahih zia hong lak hi. (1 Pet. 3:21).

1 Pet. 4:1 sunga “pumpi-in a thuak mite peuhmah, mawhna tawh kisawhkha nawnlo uh hi.” cih kammal ih tel theihna dingin, “Tuiphumna” tawh Christian te in, Topa Zeisu hong thuakna, hong sihna leh hong thawhkikna te sungah a ki hel thei ih hi hi. Tua ahih manin, ih ki Tuiphum khit nak leh, ih leitung nuntakna sungah, ei deihna bangin gamta loin Pasian’ deihna bangin i gamtat theihna ding a hi hi. (1 Pet. 4:2). Tua bangin ih gualzawh theih na dingin, ih leiitung lungsim pianzia te, ih Leiitung lungsim deihna khempeuh, ih Topa tungah nisim in ki aapna tawh, ih phiat siang ding a hi hi. (Gal. 5:24).

Rom. 6: 1 - 11 sungah Paul in zong, Khrih Zeisu tawh ih kipawl theihna dingin ama sungah Tui a kiphumte pen ama’ sihna tawh a sikhawm, ama’ thawhkikna-ah zong a thokhawm te I hi a, Khrih Zeisu tawh kipawlin mawhna thu-ah si-in, Pasian’ thu-ah a nungta-khawm thei te ih hi hi, na ci hi.

Nangma nuntakna ah cik hun in mawhna na do zawh na dingin, "Pumpi in thuaklawh” in na om kha ngei hiam? Tua na dawnna in na Christian nuntak zia hong koi ci lak hiam?

NITHUM NI (TUESDAY) April 25SUAHKIK NA (PIANTHAK NA)

Zeisu sungah, nuntakna thak, kipat thakna, pianthakna, cih kammal te ih zakngei thu te a hi hi. Tua banga a kammal te in, amau adingin a lamdang khatin, a nuntakna uh ah kitheih telna leh kikhelna takpi nei hi kha ding hi.

Peter in Zeisu sungah angsung sihna leh nuntak thak (Tuiphumna) thu a genkhit ciangin, mikhat nuntakna sungah kikhelna thukhat tawh hong zom to hi.

1 Pet. 4:3-6 sim in. Mihing khat nuntakna sungah bang thu ah ki lamdanna nei thei ih hi hiam? Tua kilamdanna hangin midang te in hong koi ci muh uh hiam? 

_________________________________________________________________________

Hih lai mun ah Peter in a hong gen thu in, Zu zatkhialhna tawh kisai a hi hi. Zu nekna, zukham luatna, uangtatna cih thu te hi a, Tulai kammal dingin Night Club  ah a hunzang, thamangcip cihna a hi hi. Hih thu tawh kisai in Peter’ gennop thu in, a beisa hun lai in, a phengtat, gualnopna a uuk khat, hong piangthak in, Pasian adingin a hong kizat nop tak ciangin, a ma’ thu a thei ngei te in lamdang hong sa bek thamlo in zong hong zahpih kha thei ding hi. (1 Pet. 4:4). Amah in, a lawp mahmah hangin thu-um lo mite kiangah Lungdamna thu tangko dingin hong lem khin thei nawn lo hi. Tua ahih manin, Pasian thu-um Christian khat ii zia leh tong neihna, gamtat hoih neihna limlim in, Thugenna (sermon tampi) sangin muibun zaw cih’ a theihhuai thu a hi hi. 

1 Pet. 4:5 sim in. Thukhenna tawh kisai Peter in koi ci gen hiam? Laisiangtho mundang a hi: John 5:29; 2 Cor. 5:10; Heb. 9:27 sim kawm in.

_________________________________________________________________________

Peter in kician taka ahong telgen thu in, Nikhat ni  ciangin, “mihingte’ ih deihna bangin ih gamtatna” tungtawn pan in thukhenna om ding ci hi, (I Pet. 4:2). Peter kammal sungah “mi sisate kiangah Khrih in Lungdamna Thu a hilh” (I Pet. 4:6) cih kammal in, “sih nungah ki puahphat kik theihna dingin hun om lai” ci in, a telkhial mi tampi om hi. Tua a hih manin, Peter in a cihnop na, a deihna leh khiatna zaw in, “hih a sisa mite in, a nuntak lai un Pasian hehpihna thu a theihtheih na dingun hun nei mahmah uh hi. A hi zongin tu in a mau si khin a, thukhenna ngak in om uh hi, cih thu mikim in thei ta hen!” a ci nuam a hi hi.

Thu-um mikhat na hihna tawh kizui in, Zeisu na theihtel ma leh na theihtel khit na nuntak zia a koi ci bangin kilam danna om hiam? Ahih kei leh, Zeisu in koi ci bangin a ki lamdang thei dingin hong kheel hiam?

NILI NI (WEDNESDAY) April 26CI LEH SA MAWHNA

A beisa hun lai in ih bawlkhak mawhna honpi khat om diudeu thei hi. Peter in zong a gualsuk na sungah “nuu leh paa mawhna” cih thu tawh kisai, ih kikum ding hi.

1 Pet. 4:3 sim kik in. Peter in bang mawhna teng gualsuk hiam? 

_________________________________________________________________________

Hih “sex” ih cih numei leh pasal omkhopna, sungah a khiatna nei kammal nih om hi: aselgia cih leh epithumia hi a, ei pau in “kilunggulh luatna” leh “Huukna lanna” ci-in kiphen thei hi.

Hih Sex tawh kisai in Christian te a dingin a hoih lo lamin zatkhiahna sungah lunglutna kinei hamtang thei hi. Laisiangtho in hih nupa omkhopna pen langdo lo hi. Bang hang hiam cih leh Pasian mahmah in thupha a piak, Eden panin a hong phuatkhiat sak a hi hi. “Tua thu hangin pasal in a nu leh a pa nusia-in a zi tawh kigawm a, amaute gel pum khat a bang uh hi. Mipa leh a zi a guaktangin om uh a, maizum lo uh hi.” (Gen 2:24,25). Hih bangin, nupa te in kiciamna tawh khantawn in kitulpih ding uh a, suan leh khak te a neih ding uh a hi hi. Tua bangin Nupa te’ kinai na, ki maingap na,ki pumkhat suahna pen, Pasian in a mite tawh I kinaih zia laktel na dingin ki genteh thei zel hi. (Jer. 3; Ezek. 16; Hos. 1-3).

Hi ci bangin nupa omkhopna pen, a hoih lam in ih zatsiam tak ciangin, thupha ngahna hi a, A hi zongin, a hi lo lamin ih zat khakna hangin, Leitungah siatna lianpen a hong tun thei buaina lianpi a hi hi. A ki zatkhiah na hangin, Leitung mun khempeuh ah lungkham lungzin na tehtheih loh zah phialin muh dingin om hi.

Hih Laisiangtho kammal te in a cihnop kammal in bang hi ding hiam? 2 Samuel. 11:4; I Cor. 5:1; Gen. 19:5; 1 Cor. 10:8)

_________________________________________________________________________

Mawhna in Mawhna mah hi den a hih manin, Christian te in, ih kidop mahmah ding thu ahi hi. Pasian in thupha dinga ahong piak pen zatkhialhna hangin siatna nasia takin hong tung thei a hih manin, ih zatsiam ding a hi hi. Tua a hih manin, Pasian nasem dinga kipan te nuntak na ah, “na mit sung uha singluang tang lakhia masa le uh cin, na lawmte uh mit sunga ninthem tang mu-in na lakhia thei pan ding uh hi.” (Luke 6:42) cih hanthot na tungtawn pan in, mite etteh gamtat na ih neih ding thupi hi.

NINGA NI (THURSDAY) April 27ITNA IN KHUH SIANG THEI

Peter te hun laitak in zong, Christian te in Leitung a bei ding leh, Topa Zeisu a ong kumkik na ding lamet pi in na nei uh hi. I Pet. 4:7 sungah “Na khempeuh a beina hong nai zo hi. Tua a hih ciangin phatak in kikeem in pil un, thungen in ngak un," na ci hi. A thukhat pan in, “Nitawp ni a dingin kiging un” a ci nuam a hi hi. Ih sih khak leh zong, ih mit ih si dinga tuakhit, kum tul val zong kihal thei a, khua ih phawk kik ciangin hih Leitung abei na leh Zeisu hong kumkik na a mu ziau ding ih hi hi.

Peter kammal tungtawn in, "Na khempeuh a beina ding hun hong naita hi” ci a hih manin, Christian te in koi ci bangin nungta ding I hi hiam? (1 Pet. 2:7)

________________________________________________________________________________

Pilvang un la, hoihtakin thungen un. Itna in mawhna tampi khuhcip thei ahih manin lungsim takpi tawh khatlekhat ki-it ding thupi ngaihsut pha pen un, ci hi. (1 Pet. 4:7,8).

Koi ci bangin, Itna in mawhna te khuhcip thei ding hiam? Peter in Paunak laibu siksan in hong dawng sak hi. "Muhdahna in kitotna piangsak a, itna in mawhna khempeuh maisak hi." (Pro 10:12). Khat leh khat ih ki-it theih ciangin, ei hong simmawh te, hong langpan te ih mangngilh theih na ding baih zaw hi. Zeisu hong itna in ei te adingin maisak theihna a piankhiat sak theih mah bangin, Ei te’i it theihna in a mau te maisak zawhna piangsak ding hi. I kiim I paam ah Itna a om nak leh, a thuneu ahi zongin, a thulian nangawn ah olno takin maisak theihna leh mangngilh theihna hong piang ziau ding hi.

Peter mah bangin Paul leh Topa Zeisu in zong, “lungsim khempeuh, nuntakna khempeuh, leh pilna khempeuh tawh Pasian ih it ding leh eima pumpi ih it bangin ih vengte na it ding, tua in thukham khempeuh a huam zia" hong gen uh hi. (Mat. 22:34-39; Rom. 13:8-10) “Itna in Mawhna khuhsiang thei” ci ahih manin, no tungah hong mawhkha a om hiam? Koi ci bang Itna tawh, nangmah in tua mawhna khuh thei ding na hi hiam? Bang hangin, Nangma’ aituam phattuam na ding hi zaw thei dng hiam?

KIGIN NI (FRIDAY) April. 28

SIMBEH DING: Laisiangtho sungah a hong gen theih zel thu in, a mawhmi pa/nu tungah maisak zawhna ih neih ding hi pen hi. Tua bang lungsim in Zeisu kiang zuansak hi. Zeisu hehpihna luan zia in mite mawhna cikmah hunin pholak khia ngei lo hi. Johan 8:1-11 sungah a mawh numei nu tangthu ih et ciangin, Mimawh te tungah Zeisu hehpihna liatzia cih ciang bek hi lo hi. Tua sangin a thuk zaw in Zeisu hong hilhnop thu om hi. Numei nu suang tawh deng dingin a hong pai, Biakna makai te mawhna thusim teng, Bang hangin pholak khia lel lo in, lei ah git ziau lel hiam? A mau te in,tua numei nu sangin a mawhna uh suuk zawk tuak lai hi. A hi zongin Zeisu in tangko khia se lo in, thei mahmah ahih zia lak ziau hi. Tua banga Zeisu zia in, mite tungah puahphat na a neih theih na dingun hunpha na pia hi. Ei tunga, a hong mawhte ih bawl zia ding ih kisin theihna dingin a hong hilhna a hi hi. 

KIKUP DING:

1. Pawlpi sung cidam takin a kalsuan theih na dingin Kipum khatna bangzah in thupi hiam? A hi zongin a bang ci bang hun ciangin, ih Lungsim ngaihsut zia a tuamtuam neihna in zong phattuamna ahong piak theih hun a om thei hiam?

2. Mawhna I khaktan theihna dingin “pumpi thuakna” a kisap zia bang ci muh na hi hiam? Pasian vangliatna in, pumpi thuakna kul se lo in, mawh thei lo dingin hong laih sak ziau thei lo ding hiam?

3. Zu zat luatna hangin, mite nuntakna ah siatna tampi a hong tun zia ih theihsa ahi hi. Pawlpi in midang te a hi zongin, ih Pawlpi sung khangno te mahmah tua bangin siatna a tun loh na dingin koi cih bangin huh thei ding ih hi hiam?