“LEO’ Gamh”- (Khen Khatna) (April 15, 2017)

Simpeuhmah Lo In Gen Ding!

April 15                                                                 Gabon Gam

“LEO’ Gamh”- (Khen Khatna) Agen: Bienvevu

Alamdang thu khat: “Nang Tapidaw suak maw. Ahi theilo pipi khawng,” ci-in ka innkuanpihte’n hong nuihsan uh hi.

Kanaupa Leo pen kum (12) a phaak ciangin tui kia in hong sih san hi. It mahmah ka hihmanin ka lung zuang lua a, zuu dawn in guihtheih khamtheihte ka zangta hi.
Leo a sih laai-in Tapidaw ka suak naikei hi. Ahizongin ka nau Leo leh ka U Rene tawh ka thum un Adventist Pawlpi panin Pastorpa in Lai Siangtho thu hong hilh hi. Ka u leh ka nau in bel, sawt lo in tui kiphuum sawm uh hi.
Ka nau Leo kivuuina in ka lungtang hong nasak lua hi. Adventist pawlpi bup in ka nau kivuuina tawh kisai vaai khempeuh ah hong huh uh hi. Puanbuuk lian hong bawlsak in, tutphah leh anneek ding hong vaihawm sak uh a, la hoih nonote sakna tawh a nungtalaai ko innkuan hong hehneem uh hi. Ka innkuan un ka lungdamzia uh kigen theilo liangh hi.

A Lipkhaphuai Ka Tuahsiatna
Ka u Rene pen ka nau Leo kivuui khit a sawtlo in tui kiphum hi. Kei gamtatzia tawh kisai in bangmah hong genpihse loin ama’ upna tawh kituak in amah om lel hi. Kei ka hihleh ka lung zuang seemseem in a hoihlo lam ah ka thuuk pai seemseem hi.
Nitaak khat ka lawm Rachidy tawh laamna pawi ah ka pai uh hi. Zuu ka kham simsim uha, ka ciah uh ciangin lipkhaphuai takin ka tuahsia uh hi. Ka sih lohuh lamdang kakisa uh a, ka ki taihpih uh mawtaw ka et phat uh cih simloh thudang ka phawk nawnkei hi.
Nipi kaal thum khawng khit ciangin ka lawmpa Rachidy tawh ka tuahsiat vai uh ka genkik uh hi. Rachidy in, “Nang hangin ka nungta hi, ci-in ka pu in hong gen hi,” ci-in a lamdang sa in kong gen hi.
“Keihangin nang nungta maw Pu!”, ci-in um het lopi mahin ka dong hi. “Bangci theih nahi hiam? Hong that dektak ing,” ci-in hong dawng hi.
“Ka pu in a lian vangliatna a nei khaate um hi. Tua khaate in ih nih aa ih sih ding deih lo hi cih ka pu ngaihsutna ahi hi,” ci-in Rachidy in hong dawngkik hi.
Rachidy tawh ka nih un ama’ gen limpha takin ka ngaihsun uh hi. “Tu-in ka kipuahpha taktak ding hi,” ci-in ka lawmpa ka gen hi. Inn ka tun ciangin ka nuntak sung a khatveina Lai Siangtho ka simpah hi. Lai Siangtho kammalte khuavaak bangin ka lung sungah hong luut hi.
“Topa aw, sihna pan hong honkhia teh! Ka nau Leo hong ki-pumpiak mahbangin kei zong ka lungtang ka nuntakna Nang tungah hong pia nuam ing,” ci-in thu ka ngen hi.
Kha thum sungbang, nisim in Topa Pasian tawh hunnuam ka zangkhawm hi. Lai Siangtho leh Ellen White gelh Laibute ka sim kawmkawm in Sabbath thu maan ka sa seemseem a, Seventh-day Adventist suah ding ka khensatta hi.

“Tui Ka Kiphuum Nuam Hi”
A Sabbath kik ciangin biakinn ah ka kikhawm a, hun mawk bei sak nuam lo kahih manin vaai dawnpa in ka khut hong let ciangin, “Tui ka kiphuum nuam hi,” ka cipah saisai hi. Thu dot nop mitheek tawh hong et kawm in upat zawk deuh ciangin tuikiphuum dingin hong gen hi.
Tua zawh minute (3) khawng ciangin a zahtaak huai papi haam khat hong pai hi. “Tuikiphuum nuam nahihlam hong thei ing,” hong ci hi. “Sia aw, tuikiphuum nuam mah ing,” ci-in ka dawng hi.
“ Tuikiphuum cihpen a lamdang leh a thupi mahmah ahi hi. Ahizongin Seventh-day Adventist Pawlpi Upnate na tel masak ding kisam ding hi. Lungdamnathu taangkona zingciang aa kipan bawl ding hi ung. Tua lai ah nong pai zo ding hiam?,” ci-in hong gen pha hi.
Lungdamnathu taangkona nitaak sim in ka ngai hi. Thu taangkona a man uh ciangin mai Sabbath ni ciangin tui kiphuum ding ka hihna ka innkuanpihte tungah ka pulaak ta hi. Ka kikheel lam ka gen kei aa, tui kiphuum taktak dingin hong um zolo uh hi. “Nang tapidaw suak ding maw! Piang thei kei mawk in ciai,” ci-in ka innkuanpih te’n hong nuihsan ngeeingaai uh hi.
Sabbath zingsang khat Pawlpimite in hong uap theih nadingin tui kiphuum nuam teng Pastorpa in hong ding sak hi. Kei zong ka din to leh ka lamet kholh hetlo pi-in ka innkuanpihte biakinn sungah na tuu uh a, ka lungdam mahmah hi.
“ Na u Rene in Thumaan gen nahihlam hong thei hi. Banghanghiam cih leh amah in Tapidaw na suah nadingin thu hong nget sak den hi,” ci-in ka nu in hong nung gen hi.

Saang Kahkikna
Zuu kadawnlaai in ahoihlo khensatna ka nei a, saang ka tawp hi. Ka innkuanpihte ka vaak nadingin nasep ka zong a, ahizongin pilna nei lo te kuamah in hong cial nuam lo uh hi.
Sabbath ni khat biakinn sungah kuun in, “Topa aw, ka khial mahmah hi. Nang hong dong kha keng, ka innkuanpih ka vaak nadingin nasep ka ngah nading hong huh tapeuh in,” ci-in thu ka gen hi.
Tua ni anitaak ciangin pawlpimi khat in a ansai ah naseem dingin hong sam hi. Nasep ka hanciam mahmah a, Topa hehpihna tawh ka sang kahkik zawh nadingin sum ka nei ta hi.
          Ka sangkahna ka zawh ciangin nasep hoih mahmah khat ka ngah hi. Ka vaaite hong lem mahmah hi. Adventist pawlpimi a suak dingin Lai Siangtho sinna ka nei uh a, kei zong ka daupai mahmah hi. Tua kawmkalah thakhat thu in ka pa hong si mawk hi. Tua baan ah ka nasep ka sep suak theih nadingin Topa Pasian’ deihlo na pawlkhat ka sep a kul lam ka tel hi.
Theih ding: Maai Sabbath ciangin a zom ngai kik ni maw.

***************