Kumkikna Lamen Innkuan - Khen Sawmna

THUKHEN 10

Innkuan ah Nu-Kumpinu

 

NU’ PANMUN LEH TAVUAN

Pasal’ Zakimpih.—Numei in apiancil a adinmun ahi pasal tawh kizakimna alakik ding ahi hi. ‘Nu’ cih min bek hilo-in, “nu” cih dinmun abuplak ding ahi hi. Numeite tavuanin atuamdiak hia, pasal tavuan sangin siangtho zaw hi. Numei in ama nasep siangtho thei henla, Pasian kihtakna leh Pasian’ tha tawh asem khia ding ahi hi. Leitungah kimanna aneidingin numei in atate pantahin, ahoihzaw leitungah ateeng dingin pilsak hen.1

Zi leh nu in athatangte beisakin, athadah manin apasal tungah akingapnain avang kiamsak kei hen. Pasal’ mimal hihna sungah ama mimal hihna abeisak ding hilo hi. A pasal’ zakimpih numei ahi hi. Pasal tawh ding khawmin asem khawm ding ahi hi. Zi ie tate pattah nasepin akoi koi ah zahtak huai leh siangtho hi. Pasalin bangzahta in lian taphialin, gam khat a uk zongin azi dinmun zahin thupi lo hi.2

Innkuan ie Kumpinu.—Kumpi tokhom tungah atu kumpipa in nu’ nasep sangin sangzaw lo hi. Nu in innkuan ie kumpinu ahi hi. Amahin tate zia leh tong asui ding vangliatna nei a, tawntung nuntakna tawh akilawm dinga apantah ahi hi. Vantungmi in ama dinmun sangin asangzaw dinmun ngen theilo hi. Banghang hiam, cihleh nu’ nasep in Pasian’ sawl nasep ahi hi. Ama nasep asanlam thei henla, hangsan takin kalsuan hen. Leitung dinmun azuidingin ze-etna apaltan zawh nadingin anasep ie manphatna thei in, galhiam namcin silh hen. Ama’ nasep in hun leh atawntung ading ahi hi.3

Nu in innkuan kumpinu hi. Atate in agam mite ahi hi. Nu ahihna tawh vangnei tak leh pilvang takin inn sung ukding hi. Inn sungah ama’ huzaapna athupipen ding hia, ama’ kammal in thukham ahi hi. Pasian’ ukna nuai ah Christian ahih leh tate’ zahtak angah ding ahi hi.4 Nu in innkuan sungah nasem khat hilo in, innkuan amakaih ding, lam alak ding kumpinu ahihna tate hilh ding hi. Tate pen gual khat pan gual khat, thukhun panin thukhun khatah apantah ding ahi hi.5

Thupi Ihsakte Saikakna.—Nu in ama’ nasepte manpha sakhollo in, thadah vuina danin ngaihsun zel hi. Nisim, nipi sim in akibang nateng mah semin bangmah akilamdang thu meetkaikhia mukhollo hi. Ni atum ciangin azawhzawh thu neuneute zong gentheilo hi. Apasal gualzawhna tawh akitehkak ciangin gentham dingin bangmah zo kisa lo hi.

A pasalin hong ciah ciangin nikhata azawhkhiat thute hangin lungkimin genpih hi. Akampau dan bangleh azi in bangteng sem, cih agending angak tawh kibang hi. Azi in ahihleh tate kemin, anhuanin, inn hahin, cihloh bangmah gending omsa lo hi. Amahin sum lei sumzuak nasep asem hilo a, lokho zong hilo, huanbawl zong hilo, motor puah hilo a, agim nazahdingin bangmah bawl kisalo hi. A pasalin piansak khempeuhte’ topa bangin mimawhsakin, gensia in, leh thunei kisa hi. Hihteng mahin azi leh nu adingin nikhat nasepna ah gim kisa hi. Anasepte muzolo ahihmanin lungkia hi.

Nu leh pate in amit uh kihongin nikhat anasepte uh muthei hileh, khat leh khat nasep kisaikak uh hileh, vantung pulaakna amuh uhciangin lamdang samah mah ding uh hi. Pa in ama’ nasep amuhdan zong hong hoihbek zaw dinga, nu in zong pilna, kuhkalna leh lungduaina tawh hangsan takin nasem zo zaw ding hi. Tu in zo in ama nasepthupi sa ding hi. Pasal in abeithei nate semin hun beisak ahihna kimu dinga, nu in tawntung nuntakna tawh akisai lungsim leh zia leh tong khantoh nading asem ahihlam kimu ding hi.6

Ama’ Nasepding Pasianin Pia.—Nute in amaute nasep bangzahin lian in, athumaanna uh thaman bangzahin gol ahihna aphawk ding uh hiam?7

Amaiah akikoih nasepte tawmpah biambiam-a aom nute’ anuntakna thupi sading hi. Banghang hiam, cihleh, tua nasepte Pasian piak nasep ahi hi. Hih nasep nadingin alungsim, atheihnate thazawmsak nading thu omlo hi.8

Nu’ nasep pen Pasian piak hia, Topa’ thuhilhna tawh kituakin tate akhansuah ding ahi hi. Pasian kihtakna leh itna hih khangmoite lungsim sungah koihden ding hi. Thu akihilh uhciangin Topa taina hi, ci in sangthei sak dinga, khemna, thumaanlohna, leh khialhnate in Topa lungdam saklo hi, cih theisak ding hi. Tuabangin naupangte in Pasian tawh kizopna neiding uha, Pasian’ minthan nading bekin nakhempeuh semding uh hi. Kum kibinglet in ut leh tavuan kikalah huihmut pumpeeng bangin hoi koi koi loding uh hi.9

Tate Jesu kiangah paipih ding bek hilo hi. Jesu nungzui ahidingin tate kipantah ding hi, “tate in akhangno l;ai un singkungno bangin akhangto ding uh hia, tanute in innkiu suang bang hiding uha, kumpipa inn tawh akilawmdingin kitaatzol ding hi.” Hih taatna, zolsakna, leh suihnate pen nu’ nasep ahi hi. Tate zia leh tong kilamto ding hi. Atawntungin lungsim sungah akip dingin nu in tate lungtang sungah atsak ding hi. Hih nasep a awlmawh keileh, thudang akituh sak leh, Pasian’ hehna muding hi. Christian nu in Pasian piak nasep anei hia, Pasian tawh kinaitakin leh Khasiangtho tha angah ahihleh awlmawhlo in omlo ding hi.10

Alian athupi Sawlna.—Aman akiciangtan theilo hunhoih, ciangtan omlo in nute tungah aki ap nasep ahi hi. Agimhuai athupilo a akingaihsun nute nasep pen alian athupi in muhding ahi hi. Leitung pen ama’ huzaapna tawh thupha apiakding pen nu hamphatna leh hun hoih ahi hi. Hih nasep asepna tawh amahmahin lungnopna angah ding hi. Nitang khuamialte lakah atate adingin lamtang asial sak leh vantung minthanna ah apuak ahi hi. Pasian zia leh tongte tate lamto sakin, Christ ie thuhilhna zongin azuih ciangbekin hih thu atangtung ding ahi hi.11

Nute’ nasep ding tampite lakah tate pattahna in asiangthopen nasep ahi hi. Lunggulhna akizuih theih nadingin banghangin hih nasep kinawl khin hiam? Tate tu leh mailam masuan ding pen nute khut sungah kikoih hi. Tate ukin, Pasian azahtak dingin tate asek ding uh ahhi hi. Pasian’ thukham pen tua nasep ie tuktehna hidinga, na khempeuh pen itna bek tawh kizek ding hi.12

Nasep dangte Siangtho leh Lianzawlo.—Pasalte in nasepna ah kuankhia in, tate akemdingin azite uh innah anutsiat uhciangin, zi leh nu in pa leh pasalte bangmahin alian leh athupi nasep asem ahi uh hi. Khatin mission phualah nasem ahizongin adang khatin inn mission phual ah asem hia, alunggimna leh akin nasepte in apasal buainate sangin lianzaw pek hi. Nu’ nasepin thupi mahmah hi. Mission phualah asem apasalin mite phawkna tampi angah laitakin, innah aom azi nasep pen kuamahin phawk khaksak loding hi. Ahihhangin innkuan adingin ahoihpenin na asep a, Pasian zia apua dingin atate apantah leh, thuciamteh vantungmite in leitunga missionary alianpente in ciamteh ding hi. Mihingte in amuhlah hangin Pasianin ciangtan neilo in mu hi.13

Nute in innkuan Christian asuak sakdingin Pasian khutzat ahi hi. Amahin Laisiangtho biakna alak ding hia, nisim nasepna, gualnopna ah huzaap in, hehpihna bek tawh gupna kingah thei hi, cih ahilhding ahi hi. Gupna in hehpihna tungtawnin upna tawh sanding Pasian’ khong piak ahi hi. Jesu in ei ading leh amaute adingin bang hia, Ama’ hong itna, ahoihna, alainatnate in hotkhiatna ngimna sungah akipulaak bangin, lungsim siangthosak ding hi.14

Tate pattahna in Christian biakna ie avangliatna pulaak nadinga Pasian geelna ahi hi. Leitungah tate pattahna in nu leh pate tavuan hia, akithuahpihte tungah thusia bawllo in, thuhoih abawlding uh hi.15

Pasian’ Nasemte’ Koppih.—Pasian’ nasemte in sepding nei uh hi. Nu in zong sepding nei hi. Amahin thupha asang dingin Jesu kiangah tate hong paipih hi. Amahin Jesu’ kammalte iplahin atate zong hilh ding hi.

Naungek hun panin nu in akikhal ding, deihna anial ding, sianthonaah azongsat nadingin apantah ding ahi hi. Nu in Pasian’ nasemte thuhilhna aza dingin tate lungsim kihongsa in hong paipih ding hi. Pasian’ piak talentte zangin innkuan sung puahpha dinga, vantung innkuan tawh akituak dingin azem ding nute Pasianin kisam hi.

Pasian’ thu ahilhte sangin inn sungah maantakin na asem nute in Topa’ na sem zaw uh hi. Sanga laihilhsiate zahmahin nu leh pate in zong innah tate ahilh uh hi.16

Christian nute ie kimanna pen bangkua sung nasep bek tawh toisaklo ding hi. Innsungah simtham taka huzaapna in innveng innpam ah azai zawin huzaap na tawh kimanna nei hi. Innveng bek hilo in biakinn ah zong huzaap lai hi. Inn in zi leh nute adingin thonginn bang hilo hi.17

Nu in Khantawntung Sepding Nei.—Nupi in ama nasep siangtho ahihlam phawk hen. Pasian kihtakna leh itna tawh anasep sem ta hen. Leitungah kimanna anei dingin tate pantah hen. Ahoihzaw leitung tawh akilawm dingin sui hen. Christian nute thu ihhilh hi. Nu nahihna tawh nasep kin unla, gualnopna zong lo-in, Pasian’ min thangsak un. Christ in Amah leh Amah kilungdam sak tawm lo hi. Sila lim pua in nungta hi.18

Leitungin siatna huzaapna tawh kidim hi. Ngeina leh kizepnain khangnote tungah vangliatna nei hi. Nu in hilhding, makaih ding, leh khal ding semzo kei leh tate in athuthu in siatna pomding uha, hoihna panin lampial ding uh hi. Nu khempeuhin Honpa kiangah pai in thungen hen: “Ka ta bangci sawl ding kahiam, hong hilhin, ama tungah kabangci bawl ding hiam?” Topa in akammal sungah ahong hilhnate kin ngaihsut hen. Tua hileh ama kisapna bangin pilna kipia ding hi.19

Pasian tawh Kisuun dingin Suiding.—Asangna ah Pasian om hi. Siatna huzaapna anial zodingin kuhkal takin apantah nute tungah Pasian’ khuavak leh vangliatna kinga hi. Ama’ nasep tawh akikim nasep omlo hi. Limsuaite bangin puantungah ahoih dingin zepding nasep nu in neilo a, suangsekte bangin ama khut sungah sekkhu omlo hi. Lai-atte bangin ama khut sungah thu anei ngaihsutna ahoih nono agelh laikung, lasaksiamte bangin athuakna pulak dingin la zong nu in neilo hi. Pasian’ huhna tawh amahin mihing sungah Pasian tawh kisutna lamtohsak thei hi.

Hih thu hoih asa nute in ama’ nasep pen manpha sa ding hi. Nu in kuhkal takin lampi azong ahihleh pattahdan ahia, zia leh tong ahizongin, ahoihpen tate maiah koihsak ding hi. Deihkin tak, lungduai, leh hangsan takin nu in ama siamnate khangto sakin, asangpen lungsim tawh tate pantah ding hi. Pasianin agenkhin hiam, ci in teldot ding hi. Pasian kammalte sin ding hi. Jesu’ minsuangin, nisim nasepnate ah Jesu nuntakna akilat sak nadingin hanciam ding hi.20

Athumaan Nute Tawntung Minphatna Laibu ah Kiciamteh.—Deihnialna leh singlamteh in eite satan ahi hi. Hih satan ihsang ding hiam? Gentheihna lianpi eite tungah ahongtun ciangin kisam ahihmanin ei’ deihna nial leng deihsakna lungsim ahong lutvat ding hilo hi. Hihbang lungsim hoihin nisim ihthuakna tawh akihual ding ahi hi. Tate lungsim leh lungtang sungah hilhna leh limlahna tawh alut ding ahi hi. Israelte sungah nute in galhang hilo khading uh hi. Ahihhangin pasal picing takin Topa’ gal asimding galhangte piang sakding uh hi.21 Nute aw, tate mailam thu ding note khutsungah om hi. Na tavuan uh khin kei le uhcin, eite’ galte tawh kipawl ding uh hi. Ahoih na ukna uhleh nalimlahnate hangin Christ kiangah na puak theiding uh hi. Kha tampi gup nadingin Pasian’ khutzat asuak ding hi.22

Christian nute in thumaan takin nasem uh hileh anasep uh hing tawntung ding hi. Leitung kizep kipuahna in tawntung hoihna anei nute Christian nasepna tel zolo ding hi. Mawltak leh kineihtawmna aomlo akizepnate amuh uhciangin khanglui vai sain zahpih ding uh hi. Tua athumaaan nupinu’ min pen vantung Kumpipa in minthanna laibu sungah gelh sak ding hi.23

Hunte in Mannei.—Moses ie mailam nuntakna leh Israel mite amakaihna in Christian nute nasep thupi ahihna hong lak hi. Hih tawh akikim nasep dang omlo hi. Tate aneu lai mahin hilh leh pattah ding hia, tua hileh atawp dong Christian hiding uh hi. Pattahding in eite hong kiap hia, leitung kumpi tokhom tungah atudingin ahong kikemsak gaam hilo hi. Pasian tungah khang tawntungin kumpi ahidingin Topa in deih hi.

Nute in ahun khempeuh uh mannei ahihlam thei uh hen. Anasepna khempeuh uh nikhat ciangin kisittel ding hi. Tate aneu laipek panin lammaanah apattah loh manun numei pasal tampite in Pasian maiah tatsiatna bawl uh hi. Pilna khuavak leh sianthona tawh leitung thupha apia mite in amaute’ huzaap hoihpen ahi Christian nute’ thu ngetna hang hi, ci in kipulaak ding uh hi.24

NU HUZAAPNA

Nu Huzaapna in Nuntaktawntung Baan.—Nute dinmun angiam abat hangin pa tawh kikop in ahuzaapna- in nuntaktawntungna ban hi. Thu hoih ah Pasian simloh leitungah athahatpenin nute huzaapna ahi hi.1

Nu’ huzaapna in tatsatlo huzaapna hi. Lammaan ah ahuzaap ahihleh atate zia leh tongin akin leh amanphatna pulaak ding hi. Anuihmai, ahanthotnate in athalawp sak vang ahi hi. Itna kammal leh phatna nuihmai in tate lungsim sungah khuavak tangsak hi.

Ama’ huzaapna in thumaan, minhoih ading ahihleh pilna tawh amah akimakaih ciangin ama’ nuntakna pen Christ ie vangliatna ading ahi hi. Ama’ huzaapna in tu leh atawntungin paisuak ding hi. Nu ie nuihmai leh gamtatte in tawntung nuntakna adingin gah gahin, leh ama huzaap nahangin mitampiin gupna ahihkeileh siatna angah ding ahi hi. Bangzahin ngaihsut tham ahi hiam?2

Kidawmtakin tate pattahnain tu leh atawntung adingin huzaap zo hinapiin nute in phawkzolo uh hi. Vantung tawh akipawl zia leh tong ah ahuzaap nangin thumaanna, kinna, thuakzawhna, kisam hi. Kha gupkhiat nangin anasepnate Topa in thaman pia ding hi.3

Nu Bang, Tate Bang.—Tate leh nu kikhihna in angekpen ahi hi. Pate sangin nu ie nuntakna leh limlahnate in tate’ bilvut zaw hi. Banghang hiam cihleh, ahatzaw leh angek zaw kipumkhatna in amaute khih hi.4

Nu ie ngaihsutna leh thuaknate in tate apiak alian huzaapna hia, nu piak gaam ahi hi. Nu in ama’ thuakna phalin, angsung genin, leh ama’ deihna ngenin om leh ama’ lungsim puak pen tate tungah hong kilang ding hi. Tuabangin mi tampite in zawh ngeiloh ding siatna lamah nute kiang panin gaam angah uh hi. Nu leh pate tampi sangin galpa in hihthu telsiam zaw hi. Tua hia, ama’ mawhzolnate nu tungah pia masa hi. Theinapi in nu in anial keileh nu tung panin tate tungah kikhak sawn ding hi. Nu in muanding Pasian bek nei hi. Tha leh hehpihna ngah nadingin Pasian beel hileh, agimnate amawkna suak lo ding hi.5

Tate a umcih lauhuainate atheithei dingin nute in akhanlawh sitset ding ahi hi. Ama’ nuntakna mahmah zong asiangtho, anam tui, kim leh paam zel ding hi. Tavuan maantakin sepding khensatna, leh alelh theihzel zia-etna neu neute akantan zawh nadingin asiangtho anamtui ama’ lungsim kuan leh Pasian’ kammal tawh kim leh paam kizelsak ding hi.6

Alungduai abucing Nu’ Huzaapna.—Nisimin tamveipi nu, nu, ci-a kahna aw kiza kinken hi. Tua kahna awte adawng dingin nu in akihei kawikawi kul hi. Khat in anu’ pilna akisam  buaina tuakin, khatin ama’ neihnate ah lungkim lua ahihmanin anu musak nuam hi. Anu kiang panin amanpha khuavak tampi ataankhiat ding kisam hi. Phatna leh pahtawina kammalte tate zasak ding hi. Tuabang tawh atate lungsim leh ama’ lungsim khih khawm thei hi. Ama’ ompihna in leitunga khuavak ataanpen namun suaksak hi.

Hih thu neuneute hangin nu lungduaina kiam dinga kindingte zong kintham salo sak hi. Aom khong theilo khutte leh atawlnga theilo khete in nasep tamsakin nu zong buai sak hi. Akam leh aleeite dekin akepcing keileh pausia khat peuh pusuak pak thei hi. Nu in amah leh amah zong kimangngilh zela, amah ahehpih alungsim adaisak Honpa kiangah daitakin thu anget zel kul hi. Tuabangin amah leh amah kikemcing thei ding hi. Aw nem takin pau-in, hehnate cillum tawh valhsukin, akikhal kul hi. Tua hikei leh ahuzaapnate susia dinga, ngah kik ding haksa mahmah hi.

Naupangte’ theihna pen manlang mahmah hi. Amautein alungduai, a it kamkhumte leh alungtom, agilo, amau cihbek acite’ kilamdanna thei baih uh hi. Mi hoihlote tawh akituah uhciangin naupangte’ lungsim sung panin itna leh ngaihnate bei thei hi. Christian nute in amau’ kiang panin alungkia, hehpihna akisam naupangte hawlkhia ngeilo ding hi.7

Lungsim Sekin Zia le Tong Sui.—Hih nasep pen nu tungah kinga phadiak hi. Ama’ sisan tawh naungek khansuahin, apumpi kilam to in, lungsim leh zia le tong zep nadingin pilna apia nu mah ahi hi. Kumpipa thupiakna kihta lo-in, Moses asuaksak Jochebed, Hebia nupinu in Israelte ahonkhia dingin apantah nu mah ahi hi. Thungetna, kipiakkhiatna leh vantung thapiakna tawh vantung in thuhilhin, golhguk alalo thukhenpa, Israelte biakna sang aphuancilpa Samuel akhansuah zong Hannah mah ahi hi. Nazareth khuami Mary ie behnu ahi Elizabeth in

Honpa kamtai ding ta khansuah hi.8

Leitung’ Nute tunga Leeiba.—Thumaan adingin kin in puahphatna abawl mite ie nute tungah leitungin leeiba uh hi. Topa’ ni atunciangin kilang ding hi. Laulo in ahihngam, bawlsiatna leh ze-etna lakpanin kilinglo in adingtang, leitung minthanna sangin asiangtho thumaan leh Pasian’ minthan nading atelzawte zong nute huzaap mah ahi hi.9

Nute aw, natate’ zia le tong leh amasuan ding uh nahuzaapna uh phawkin, khanglo un. Tua tavuante mitsuanin nalungsimte uh lamkim unla, asiangtho zia le tong lamto un. Tua in ahoih, amaan, leh a etlawm nate lending hi.10

(Zop Lai Ding)