Kumkikna Lamen Innkuan - Khen Sawmna (Azom3)

THUKHEN 10

Innkuan ah Nu-Kumpinu

NUKIK

Nukik Thuhilhna.—Ta neisa pa tawh nakiteenna in nang adingin thupha ahi hi. Nang leh nangmah thupi nakisak khakding lauhuai hi. Amanpha zia khat nanei a, tua pen tawhkuang ding leh zatding kisam hi. Na thuaknate in natatdan ding hong hilh ding hi. Naupangte ngaihna, itna, leh lungsim nemnaah nakhangto ding hi. Innsuhngah natavuan neihna-in nang’ adingin alian thupha ahi hi. Tate in nang adingin laisinbu ahi hi. Phatakin en lecin, thupha tampi nangah ding hi. Amautein nangmah ahong awlmawhna panin migitna, itna, hehpihnate nangsungah hong khanglo sak ding hi. Hih tatein nangmah ie si leh sa ahihloh uhhangin amaute’ pa tawh nakiteenna hangin nanga asuak uh hi. Na it, nangilhlah, nahilh, leh nakep ding uh hita hi. Amaute tawh nakizopnain hamphatna taktak asuah

nadingin ngaihsutna leh ngimna naneih kul hi. Inn panin natheih beh nadingin ahong buaisak nang leh nangmah thupi kisakna panin nalungsim nanem sakding hi.

Na migitna, nahehpihna, leh na itna kammal adeih te tawh naitakin na om dinga, ziadamna leh hehpihna agol zaw naneih kul hi. Naupangte in hih zia leh tongte lam-en uha, tua in nalungsim zaisakin na thukhenna kipsak hi. Itna tawh amaute na kithuahpih nahangin hehpihna leh migitna nasin pha dinga, agenthei mihingte ading nasem theiding hi.1

Itna Neilo Nukik Taina.—Na pasal it in nakiteenpih hi. Na kiteen ciangin ama’ tate’ nu ahidingin zong kamciam napia hi. Hihvai ah nakisam hi. Dahhuai takin napicing zokei hi. Napasal’ tate na it kei hi. Kikhelna leh kiphuahphatna naneih keileh na innkuan ukdan in hih suangmanphate siasak ding hi. Na thuhilhnaah ngaihna apulaak itna kihello hi.

A ithuai tua naupangte nathangpaai sak hi. Adiak diakin atanu in thuakzolo hi. Ngaihna, itna’ kepna, lungduainate koiah koih na hiam? Nalungsim tawngah itna sangin muhdahna omzaw hi. Phatna leh thapiakna munah mawhsakna vive om hi. Na omdan, nakamkhauh, hehpihna abaanglo napianziate in lopano abang atanu tungah gialbangin kia hi. Kung awnte tungah kia ahihmanin nuntakna kituanzanin, liamin baai in om hi.

Na innkuan ukdan zong itna luanna hawk hilo a, kipaakna omlo hi. Dahna in atanu khima, nasungah itna leh hehpihna phong lo-in, lungtomna leh muhdahna na tho sak hi. Na ut nakleh hih lungsimte nakhel thei lua hi.2

Na Uatna ie Thaman.—Hunkhat lai-in J. vai hong kilak hi. Akhialhna leh apoinate amai-ah kilangtanga, ahihhangin kamuh tawpnaah ama sungah teenglai hi. Amahin apasal tate’ tungah hehpihna neilo in, om gelgal hi. Khialhna lianpite adingin puahphatna leh taaina bek kipia hilo a, thu neuno nangawn nelhsiahlo hi. Atawntunga mawhsakna in khial a, tuabang munah Jesu Christ ie lungsim teeng theilo hi. Ahoih gamtatnate zong pahtawina omlo in koihdapa, khialhna khat peuh amuh ciangin mawhsakna tawh balnen pahpah hi. Hih in naupangte lungkia sakin, taaina zong kizaakloh bawl sak hi. Amaute lungsim ah siatnopna tho sak hi. Mawhsakna aza tawntung naupangte sungah “awlmawh keng” leh nungthu piangding ngaihsunlo in siat nopna lungsim khang sak hi.

Sanggamnu J in itna leh hehpihna nalam ding ahi hi. Nu aneilo tate adingin ngaihna ngumngek na pulaak ding hi. Tua hil;eh amaute tungah Pasian’ thupha tungin, itna leh ngaihna nu tungah hong kilehkik ding hi.3

Kinna Azahnih Akisapciangin.—A angsungah itna tui aluang nu asih khit ciangin tate adingin atangding om nawnlo hi. Nu tangin mikhat peuhin adah tate adingin ahong dinkhiat ciangin kinna azahnih pulaakding kisam hi. Tua hia, anu taktak ie lungduaina munah lungtomna leh mawhsakna hong lutin, amaute akemcing amualsuahpih ding, amansuah uh itna leh ngaihna angah kikding kisam hi.4

CHRIST IN NUTE AHANTHOTNA

Jesu in Naupangte Thuphapia.—Jesu’ hun in nute in atate uh thupha piakding deihin Ama’ kiangah paipih uh hi. Tuabanga abawlna uh tawh Jesu um uh ahihna lak uh hi. Amaute tungah akiap tate tu leh mailam adingin apatauhna uh zong alak uh ahi hi. Naupangte Jesu’ kiangah ahong paipih uhpen nungzuite in Topa anawngkai sakin ngaihsun uh hi. Naupang leh nupite ahawlkhiat uhciangin Jesu in nungzuite taiin, naupangte ahong paipih nute adingin lampi a awndingin thupia hi. “Naupangte hong paisak un. Kei kiangah ahong paiding khaam kei un, tuabangte gamin vantung gam hi,” ci hi.

Leivui akhu lampite tawnin Honpa kiangah hong lut uh hi. Khituite luangin lungsim sungah thungenin amukte uh lingsepsep hi. Tuabang nute Jesu in amuh ciangin naupangte adingin asimthamin thu ngetsak hi. Nungzuite’ khaamna kammalte Jesu in tai hi. Amaute a itna lungsim zaiin, naupangte saang hi. Khat khit khat hong pai uha a ang-ah pomin thupha apia hi. Ama’ angsungah kingamin naupangte ihmu uh hi. Nute’ kiapna nasepte Jesu in phatin, phawk kik sak hi. Tuabang tawh Ama’ hoihna leh hehpihna ngaihsun uha, phawk kik kik ding thu suak sak hi. Ama’ kampau manphate in amaute sunga aom vangikte pusuaksaka, lametna leh hanna tha guan kik hi. Gimna khempeuh mangta uh hi.

Hihin khangtawntunga aom nute adingin thangahna thu ahi hi. Atate adingin ahoihpen abawl khit uhciangin Jesu kiangah hong paipih uh hi. Nute ang-ah aom naungekte nangawn Ama adingin manpha hi. Nute in apiak theihloh, tate adinga alungulhsak huhnate, apiak theihloh hehpihnate anag dingin Christ angsungah amau leh atate hong kiap uh hi. Jesu in avekun sangin thupha pia hi. Amahin tawldamna, lametna, leh lungnopna nu leh tate tungah pia hi. Nute tungah Jesu in hih amanpha hamphatna pia hi.1

Jesu in Nute Samlai.—Vantung Mangpa, Jesu, in “Naupangte Ka kiangah hong pai sak un, khaam kei un: hihbangte gamin vantung gam ahi hi.” Jesu in naupangte Rabbite kiangah puaklo hi. Phariseete kiangah zong paisak lo hi. Tuabangin sawl hileh tuate in Lawmhoihpen Pa kiangpanin lampial sakding uh hi. Nute in Jesu kiangah naupangte hong paipih uh hi. Tu in zong nute in Jesu kiangah tate hong paipih ta uh hen. Lungdamna thu nasemte in naupangte a ang uhah tawi in Jesu’ min tawh thupha pia uh hen. Ta neute tungah itna awnem tawh hopihin, tuuhon laka tuunote tawi-in thupha apia hi.2

Jesu kiangah nute-in abuainate uhtawh hong pai hen. Tate aukna uhah ahuh ding hehpihna akicingin amu ding uh hi. Honpa kiangah vangik tawh ahong pai nute adingin kongpi kihong den hi. Jesu’ piak thupha asang dingin nute in atate uh hong paipih ta uh hen. Nute’ ang-ah aom naungekte in Vanglian Pasian limnuaiah aom theih nadingin thungetna tawh upna nei nute in hong pai pih hen. Tuiphum John in asuahhun panin Khasiangtho tawh kidim hi. Pasian tawh kizomin nungta lengh, hih naungekte asuahcil panin ahong suihsak dingin Pasian’ Khasiangtho in ompih ding hi.3

Khangnote Lungtangin Na Theithei.—Christ in mizawng, mingau, leh agentheite tawh khangkhia hi. Naupangte aang-ah tawiin, naupangte dinmunah hong tuak suk hi. Ama’ azai itna in amaute gentheihna leh akisapnate theihpih a, amaute lungnop tawh kipaak hi. Ama’ lungsimin khuapi sunga buainate leh akineih, lungsim kawite tawh kithuakna hangin gimin, mawhna abanglo naupangte kiangah tawldamna la hi. Ama’ omna in naupangte hawlkhia ngeilo hi. Amaute’ dotnate aza ding leh amaute teltheihdingin thu agen dingin vantungte Kumpipa in hong tuaksukin nautual hong kai hi. Atheibaih naupangte lungsim sungah thumaan thutak khaicite vawhsakin, anlak hunin at theihding gah tampi gah sak hi.4

Hih naupangte in Ama’ thuhilhna sangsiam ding uh ahihlam Amahin thei hi. Honpa in amaute sangding uh ahihzong thei hi. Mitampite in aleitungpil laitakun leh ngawngkhauhin aom laitakun, hih naupangte in Ama nung zuiding uha, Ama piak thuhilhnate leh thuphate sangin, saphuklai abang amaute khuak sungah Ama’ lim leh meel leh akammalte atsak dinga, kimelh ngeilo ding hi. Hih Christ ie gamtatna mangngilhloh ding ahi hi. Christian thuhilhnate naupangte in theisiam uha, kiapna leh Christian huzaapnaah sawtveipi kem thei uh hi.5

“Naupangte khaam kei un, Ka kiangah hong paisak un; amaute gamin vantung gam ahi hi.” Hih kamguite ciamteh un. Nute bek hilo, pate in zong mangngilh lo ding uh hi. Hih kammalte in nu leh pate in tate Pasian’ maiah phawkdingin leh thupha sangdingin ahong paipih nadingun tha ngah sak hi. Jesu Christ’ min tawh ngen uh hileh vantunga Pa in athuphate ainnkuanbup tungah tungsak ding hi. Amaute-in ahoihpen phawkna atuam diakin ngah hibek lo-in, pattah ding akisam aomkhong theilo, lampial tate neem takin makaih ding hi.6