Kumkikna Lamen Innkuan - Khen Sawmna (Azom2)

THUKHEN 10

Innkuan ah Nu-Kumpinu

NAUGAI SUNG HUZAAPNA

Nu ahidingin Numeite kicing ding.—Numeite in nu picing asuah nadingun lungduaina kisam hi. Nu’ nasep tawh akituak dingin Pasian in geelsak zo hi. Christ tawh akizopna hangun nute’ nasepin ciangtan neilo hi. Hih thu in theihbat hilo hi. Numei dinmun in siangtho hi. Innah Jesu ompihna kitangsam hi. Nu ie itna nasepin inn pen Bethel suaksak hi. Zi leh pasal kikop ding uh hi. Nute in Pasian’ tokhom maiah ki-apin, asuan akhakte asuah ma leh asuah khitin Ama’ tungah ap ding uh hi.1

Naugai sung Huzaapna.—Naugai sung huzaapna pen nu leh pa tampite in thu neu ngaihsut hi. Vantungin tuabangin ngaihsunlo hi. Vantungmi in akibang lianin nihvei athupuaknaah ngaihsut ding thu om hi.

Hebia nupi, Manoah’ zi tungah, Pasianin agen thute pen khangtawntunga nute ading zong ahi hi. Vantungmi in “Kidawm hen, ka piakding thute zui ta hen.” Ta ie nopsak nadingpen nu ie zongsatna in huzaap ding hi. Nu’ duh leh dahte pen thu tawh khal kul hi. Pasian in ta apiakna tawh angimsakna atangtunsak nopleh nu in apelh ding leh azatloh ding tampi om hi.2

Leitungah, naupangte’ lampi ah awktheih nading thaang tampi om hi. Mi tul tampite in angsung khuatna leh zualzannaah gualnopna zong uh hi. Amaute in akiseel sim lauhuainate mu zolo uh hi. Lungnopna apia takpi abat hangin lam tawpna ah dahhuai takin beina ngahding uh ahihzong theilo uh hi. Duh leh dahte alunggulhna hangun atha angal uh za’ang uha, atul athenin hih leitung ah kisia uha, ahong paiding vantung mansuah uh hi. Tate in hih ze-etna namte phukha ding uh hi, cih nu leh pate in theihding ahi hi. Naupang asuahkhiat mapekin hih siatnate do zawh nadingin kigin kipat ding ahi hi.3

Nau asuah ma-in nu in zualzangin, angsungkhuatin, lungtomin, sittelin aom leh ata lungsimah tuateng hong kilang kik ding hi. Hihte in azozo ngeilo nu’ kiang pana akiluah suk gaam ahi hi.

Nuntak hoih thukhun ah anute in lampiallo in adin leh, nu in kidek kidamin, kei-nialin, migi in, ziadamin, leh angsung akhuat keileh, hihbang zia leh tong lungsim puakteng mah ata akhak sawn ding hi.4

Naugai Lai akisam Kepdan.—Nau suahma nuntakzia in nau adingin bangmah huzaapna neilo hi, cihpen maanlo hi. Naugai hun sungin nute vangik azang theipenin zang sak ding hi. Ama pumpi sungah kikhelna tampi om den hi. Sisan zong tampi kisam a, sisan apiang sak anhoih tampi anekding zong ahi hi. Acidam huai an tampi angah keileh thatang neihsa kem suak zolo in, apaai nau zong thagum kisam ding hi. Asilh puante zong ngaihsut kul hi. A pumpi pen khuavot panin kidal kisam hi. Puansilh akicing silhna tawh thagum akicing hituanlo hi. Nu in cidamna apia anhoih kisam hileh sisan zong ahoih dingzahin hoihlo ding hi. Pumpi sunga sisan kizelhna zong hoihlo pah dinga, asunga nau zong tuabangmahin thuak ding hi. Nau sungah anhoih panin sisan apiansakna ziakai pahding hi. Nu leh nau khantohna pen ahoih, alum puan leh tha apiangsak an tawh kisai mahmah hi.5

Nu pen anuam leh alungnophuai nate tawh kikiim- um ding kisam hi. Zi leh nu atangzan sak nadingin pa leh pasal tavuan hidiak hi. Ahithei zah pasalin azi pianzia ading tavuan lading hi. Pasal in ziadamin, migi in, awnem in, leh nu tangsapnate kinpih ding hi. Ganbuk sungah aom ganhingte akikinzah ie alangin zong nau apaai nute kikin lo hi.6

Ankam Limna bekin Ngaihmuanna hilo.— Naupaai nute in ngeina tawh kituakin ankam limlo, cih ziau pen cidam huailo hi. Nute pen lungtom thei, lungkim theilo, cih pen ngeina ah angeidingin kingaihsun hi. Ahihhangin ankamlim lo cih sangin nu leh nau khantoh nadingin tha apia an akicingin angah hiam, cih ngaihsut ding hizaw hi. An pen cidamna piang sakding a, lunglawpna apiangsak an hilo ding hi. Mawltakin akibawl, anhoih kisam hi.

Thukhun azui numeite in naugai sungin amawltak a akibawl anhoih panin lampiallo ding hi. Nuntakna khat tawh an zawngkhawm uh ahihlam phawkding kisam hi. Tua hia, annek tuidawnah adiakdiakin kidawm mahmah dinghi. Tha apiangsaklo, lungsim alawpsak, kamsungah alim taphial zongin, nelo ding hi. Hih ngaihsutna in maanlo akicih hangin utut anedingin athuhilhna in maanlo zaw hi. Nu leh pate-in aduh adahna alungkimsak manin ta damlo tampi suak khia hi.

An tam nek lua in, angawi nading hun tampi gilpi in nasemin, angawi sung pumpi sung nopsaklohna tampi apianciangin, nu in khialna abawl hia, nau adingin natna neih nading tawphah abawl asuak hi. Nu in aduh bangbang anekna tawh, a utut agenna tawh, anungzui thupiang ding ngaihsun lo-in, asepna thaman dantatna amah bekin ngahlo hi. Anu maanlohna hangin anau in zong thuakpih hi.7

Kidek Kidamna kisam hi.—Nu ie pumpi taksa kisapna awlmawh lohding hilo hi. Nuntakna nihte in ama tungah kingam hi. Ama’ deihnate phatakin ngaihsak ding hia, atangsap bangin cingtakin piak ding ahi hi. Hih hunin adangdangte sangin, annek tuidawn kidam mahmah ding kisam hi. Pumpi taksa leh lungsim thahatna akiamsak an kidawm ding hi. Pasian thupiakna tungtawnin nu in amah leh amah akidam ding tavuan lianpi nei hi.8

Ahong piangding mipa zia leh tong abul ding pen naugai sunga nu ie kidek kidamna tawh akibawl ahi hi. Hih thu pen sankhialh ding hilo hi.9

Maitai, Lungkim Theihna Hanthawn.—Nu ahiding numei khempeuhin koikoi ah ateeng uh zongin, lungnuam, maitai, leh alungkim theidingin kihanthot ding ahi hi. Hihbang hanciamnain ata adingin pumpi, lungsim, kha leh gamtat hoih azah sawm a angah nadingin thaman ngahna ahi hi. Zongsatna tawh nu in amaitai theidingin kipantahin, ama lungnopna leh maitaina tawh innkuan sungah leh akim apaamah khuavak tan kawikawi thei hi. Tua in pumpi cidamna khangkhan ding hi. Nuntakna tha piadinga, dahna leh lungzinna ah akipia nute bangin sisan zong awltakin luanglo ding hi. Ama’ lungsim leh kha nuntakna thamalh dinga, lungsim tangzang ding hi. Utna thahatna in lungsim muhnate nialin, theihna sazangte tawldam sak ding hi. Thagum aneilo tate in nu leh pate awlmawh lohnate aluahto ahi hi. Mihing pumpi auk thukhunte zuihna-in nuntakna ahoih zaw hong guan hi.10

Tawldamna, Muanna Lungsim Nei un.—Nu ahidingin akilam-ente in anuntakna Pasian itna sungah koih ding uh hi. Lungsimte ngaihmuang dinga, Jesu sungah tawldam dinga, Christ ie kammalte zekkhia ding uh hi. Nu in Pasian tawh kikopin na asemkhawm ahi hi.11

TA NEUTE DONNA

Amaan Naukem Nu’ Lungsim.—Ahoihpen nau- an in pianpih an ahi hi. Hihbang ante ah tha aomloh ding thu omlo hi. Nu in ama’ nopsak nang, mi tawh kikholh nopman, nau kepna panin asuahtak nopmanin bawltawm an piakna in thukhuallohna ahi hi.1

Angeksen nau adingin anu nawi in athupipen ahi hi. Nau an  apiak uhciangin nu tampite in kimanlah sakin anhuanna tawh sisan sa sakin manlahnain nu’ nawi panin nawi ngawlhlawhna ahia, nu ie sisan zong gu suakin cidam huailo thei hi. Nu’ pumpi tua si in zel a, cisa sakin tua-in nau lawh hi. Nu’ lungsim puak inzong naungek sukha hi. Lungnuamlo, hehbaihin, awngin hangmangthei in aom leh nu pana angah an zong sa-in, nau adingin angawi hatlo sakin, sagawlhte kisat sakin, leh luakna piangsak hi.

Nau ie zia leh tong zong atawm atamin nawi apia nu ie zia leh tong mah hipah hi. Nawi apia nu in anawi piak kawmin lungsim anopding, leh ama’ lungsim auk siam nang thupi hi. Hihbang hihna tawh nau-an sialo in, lungsim daitakin nawipiakna in naungek’ lungsim puak sek nadingin ahoihpen ahi hi. Nu’ lungsimin patau loin, heh loin, nawhsalo takin anopsak theihtheih dingin huzaapna in naungek cidamna khangkhan thei hi.2

Naungekin mawltak leh adai theipenin nungta leh pumpi leh lungsim khantohna adingin ahoihpen ahi hi. Ahihtheih laitengin nu in lungsim tawlngain, gamdai in, leh ngaihmuanna nei tawntung ding hi.3

An in Mihing’ Tang Hilo.—Phatakin bawllohna in naungette susia hi. Acitloh ciangin naungekte adaih nadingin an kipia hi. Atamzaw pen, naungekte in an tam kipia lua ahihmanin acinglo hizaw hi. Acitlohna pen anu’ zongsat hoihlo panin angah ahi hi. An tampi piakna in siasak zaw lai hi. Banghang hiam, cihleh agil uhah aom zahding sangin an tam lutkhin lua hi.

Naungekte pen luai sungpanin nek zongsatna tawh kipantah a, an nedingin anungta suak uh hi. Aneu laiun nu in hih ahoihlo zongsatna apuahpha toding ahi hi. A anduhna khal ding hia, an nek nekna in anhai suak sak hi. Nu in nikhat adinga ta’ gaihding an asehding hia, naungekin anawngkaisak ciangin adahna panin khemin aheikhiat sangsikin, an pia kik kik ahihmanin nau ciing tuam ahihhangin nau siasak tektek hi. An kham khin napi nau’ gil pen an tawh kineng suk hi. Nau’ deihna pen anu awlmawh ding leh kinding hilel hi. Ata’ lungnop nadingin ahun piakding pen hawmthawh lua hi. Leenglate in a innzep hoihsa in phat angah nadingin leh an zong a etlawm dingin ahuan nopna tawh nau cidam nang leh lungnop nang ngaihsun man nawnlo hi.4

Cidamhuai leh alim, Mawltakin Huanding.— An pen mawltakin huan lecin nu hun tampi beilo ding hi. Alim dingleh cidamna apiangdingin an huan ding hi. Ut peuhpeuh huan thopthopna in nau adingin cidam huai pen lo hi. Cidam huailo ante huan nadingin hun tawm bek zat zawkding hia, leei khemna tawh hunbei saklo ding hi. Tate pattahna-in hun tam beisak zaw in.5

Naungek Puanding Kiginna.—Naungek puan ding kiginnaah anuamding, cidamna akemding et ding hia, puan kidemna, mi pahtakding ngaihsut ding hilo hi. Puan ahoih dingin zemin akhelkhelin akisamlopi sum beiding vaihawmding hilo hi. Nu’ cidamna leh nau’ cidamna ngaihsut masak ding ahi hi. Mitzung na, pumpi golh, tha akiamsak puankhuina sangin tawlngak leh cidam nadingin thalak ding kisam zaw hi. Nu in ama neih thate kemcing dinga, tua hileh amah akisapnate ah diang zo ding hi.6

Siantho, alum, leh Huih Siang ngahding.— Naungekte in cilumna kisam hi. Ahizongin huihsa akipia khan sungah koihcip in huih siang ngahlo ding, cih zong hituanlo hi.

Apumpi azawsak ding leh sihui te-ah gu alutlo dingin amau-in kemding hi. Asiangtho leh nuam asak ding pen ngaihsut mahmah ding ahi hi. Ahizongin akilumlet lua khuahun ah kep phat mahmah kisam a, sun ahihkei leh zan a ihmutna leh thawhnate leh tha apiangsak huih siang dikna nei sak ding hi.7

Nau Cina Kepdan.—Kepkhialh manin zong nau cina thei hi. An nek hun maanlohna, nitak khuamui kuana puan lum zolo, pumpi tatna tawmlua in si kizelhna maanlo, si asiang sakding huihsiang akicinga ngahlohnate in damlohna’ ahang hithei hi. Natna apiangsak thute nu leh pate in sinkhia uh henla, maanlohnate kipuahpha kik hen.

Natna dal nading leh natkhit ciangin kepdanding nu leh pate in asin ngeingei ding uh ahi hi. Natgual maimaite adingin nu in tavuan lazo ding hi. Acina ta’ tungah bawldingte amahin thei henla, ama’ itna leh sungpilna in midangte khut sungah amaute apa sangin amah mahin cina akep ding ahoihpen hi.8

NU TAVUAN MASA TATE PANTAH

Phataka akipantah Naupang Piandanding.— Amansel mihingte adingin Pasianin apiangthei thu hong muhsak hi. Hoihtakin pattahnain leitungah hoih nadingin vang khat suak thei hi. Ama’ ngimnate nu leh pa in asemkhia uh hiam? Ahihkeileh angimnate telloin a ut bangbangin anungta sak hiam? Awi-amna tawh tu-a nuntakna leh tawntung nuntakna asuksiat sak hiam, ci in patau takin Pasianin vil gige hi. Bangmah amanlo mihingte tungtawnin leitungah thupha atungsak ding leh Ama’ liatna apahtawi dingin Pasianin eite hong puahpha hi. Nu leh pate in amaute leh atate tungah abawlding tavuan kikal ah alut dingin bangmah phallo ding uh hi.1

Pasian leh Gam ading Nasep.—Pasian’ thukham azuite in mailamah ahong tungding buainapi ah atate in bangci tatding uh hiam, ci in akigentheilo lametna leh dipkuatna tawh vil uh hi. Apatau thei nu in, “Bang mun ah ding ding uh hiam? Amautein hoih takin atat theih nadingin kabangci pattah ding hiam? Bangcih leng tate in tawntung minthanna ngah ding uh hiam?” Nute aw, note tungah tavuan lianpi kong suan hi. Kumpi uliante lakah nakihel kei zongun Pasian leh gam adingin nalianpi sem theiding uh hi. Tate pilna napia thei hi. Siatnaah ahoi lo dingin amaute nahuh thei hi. Midangte ahoih dingin na huzaap thei hi. Upna tawh nasia takin nathungetna tawh leitung bup akikhinsakpa’ khut nakhin thei hi.2

Naupan laileh khangno hun laitakin thu nahilh ding hi. Kimanna aneidingin tate pilna napia ding hi. Innkuan sungah sepding akisamte asem theidingin nahilh ding hi. Hih inn nasepte maitai takin asep theih nadingun nu leh pain awnem takin hilhin, pahtawi ding uh hi.3

Inn Pattahna Mi tampiin kinlo.—Pilna piaknaah kisialin masot akisa tampitein tate pattah ding kinelh siah sak hi. Inn pattahna kinlo hi. Nu leh pa, adiakdiakin nute in atavuan uh phawk zolo hi. Amaute in thuhilhnaah lungduaina kisam uha, kepdinga akiap taneute pilna tawh khalding kinlo uh hi.4

Amaantakpi in nute in adinmun uhah panglo uh hi. Ama’ tha tawh akisem zolo ding thu-ah amapang dingin Pasianin hong kallo hi. Tate leh ei adingin ahoihte asemdingin hong kal bek hi.5

Nutein Pasian’ Huhna Zongding.—Nute in Pasian piak nasep athupina thei leuh simthamin thungen ding uha, tate Jesu kiangah paipihden ding uh hi. Tate thupha apiaksak, asiangtho na asemdingin thupha apiak sakdingin thu ngending uh hi. Tate’ lungsimpuak leh zongsatnate asuidingin nute-in ahamphat lam kithei ding uh hi. Tate’ zia leh tong khantohna encik ding uha, ahoihlohnate khakin, athanemnate thapia ding hi. Hih nasep apicin nadingin amah zong asiangtho leh mipi suahin tate thuhilhna leh limlahna tawh lamlak ding hi.

Nu in hih nasep asep nadingin hansanna leh tha kisam a, Pasian huhna kisam den hi. Tate’ gamtatna aki sanglap zawk uhciangin nute’ lungkim pahlo in, ngimna asang aneih dongin gualnopna zangsaklo ding hi.6

Thu angen nu ie huzaapna vang ciangtan theih hilo hi. Alampi khempeuhah Pasian phawk hi. Atate hehpihna tokhom maiah paipih dena, Jesu kiang zotpih in thupha ngetsak hi. Hihbang tate ading thungetna in nuntakna ciktui bang huzaapna nei hi. Upna’ thungetna in Christian nute apanpih thahatna ahi hi. Thungetna tawh tate panpihding akinlotein ihkinaipihpen thupha akhahsuak ihhi hi. Thungetnain buaina, kinte, leh vangikte lakpanin alianpen huhna zong ahi hi.7

Nu’ thungetna ie vangliatna pen tuatkhialh ding hilo hi. Aneu lai panin alauhuai khangno hun, panin tanu tapate tawh khukdinin thungetsakna-in thukhenni ciangdong amanseh beilo hi. Upna tungtawnin Pasian Tapa tawh akizom uh ahihleh nu’ khutnemin ze-etna pan atate kaikhia ding hi. Mawhna sungah atualbiallo dingin tanute zong akaikhia ding hi. Zualzannain ukna atuh ciangin nu’ itna’ vangliatna, sekna, deihsakna in lammaan ah nuntakna akipdingin huzaap ding hi.8

Leenglate-in Hongnawngkaisak ciang.—Tate tawh kiho khopding leh thunget khopding hun nalading hi. Pasian leh tate tawh kizopna anawngkaisak ding thu khat zong naphal kei ding hi. Leenglate kiangah, “Pasianin nasep kei hong pia hi, siagen leh gensia ding hun kangah kei hi” naci ding hi. Hun leh atawntung adingin nasep ding kanei hi, ci in kingaihsun in. Na tate pen na nasep masa ahi hi.9

Leenglate’ mai leh ngaihsut thudang tuamtuamte maiah natate ngaihsut masak ding ahi hi. Aneu lai huna nasepsak ding mangngilh theih hilo hi. Hih thukhunte nelhsiah hunding omlo hi.10

Leengla do nadingin natate kongpua pusuak sak kei in. Leenglate maiah gamdai in zahtakna tawh aomdingin hilh zaw hi.11

Nute in Hoihna leh Mipitanna ah Etteh.—Nute aw, nahun neih manphate zatsiam un. Banghang hiam, cihleh natate in na pattahna leh thuhilhna in aphak nawnlohna mun apai hun omding uh hi. Nu in ahoih, asiangtho, leh mipitanna ah etteh ding nahi uh hi. Amaute uuk leh nang’ uukna kibang sakin.12

Nakhempeuhah naguallelh phial leh zong, tate tungtangah kicianin paubaang kei in. Inn kipattahna pan siangtho tak leh picing takin tate ahong khankhiat nakleh leitung ahoihzawk nadingin Pasian’ ngimna ahi hi. Amaute-in dinmun niampen ah panmun ala-uh ahi zongin nanuntakna pen guallelhna hingeilo dinga, dahna tawh nunget kullo ding hi.13

Naungekte in nute’ zongsatna leh kizep kipuahna alengkik limlang bang ahi hi. Asinlai tate maiah nute kammalte leh omdante in bangzahin kidop huai hiam? Tate tungpanin amuh kik nop zia leh tongte nu in ama’ tungpan mahin alamto ding ahi hi.14

Leitung’ Tuktehna sangh Asangzaw Ngim.— Nute in leitung’ ngaihsutna tawh uk athuak ding leh leitung abandingin asemding hilo hi. Nuntakna ie tup leh sawmna aliante nu in teel ding hi. Tua tupnate atun nadingin ahanciam ding ahi hi. Hun kisapna hangin innsung vai tampi awlmawhlo khading hi. Siatna apiangpah ding hilo a, ahizongin tate pattah ding pen nelhsiah ngei ding hilo hi. Amaute’ thanemnate in nu’ thumaan zawhlohna kilangsak ding hi. Thuhilh khalo in siadingin a awiamnate, ngoltol leh kamkhauh pau nate, zahtaklohna leh thumanlohna, thadahna leh tup neih lohnate-in ama’ vangkiam sakin, anuntakna khasak ding hi. Nute aw, natate pianzia dingpen atawm atamin nang khut sungah om hi. Natavuan nasep lahleh Satan’ galkap suakdinga, midangte asusia dingin zat tangzangin omding uh hi. Khalnaah nathumaanna leh Pasian’ zia leh tong lim nalahnate in Christ kiang zuatpih ding hi. Amaute tunga nahuzaapna tawh amau zong midang ahuzaap ding uh hi. Pasian’ khutzat asuahna uh tawh kha tampi kigum thei hi.15

Hoihna Lamto inla, Siatna Tuancilin.—Pasian akihtading leh a it dingin tate pattahnaah Pasian tawh ihkikop ding hi. Tate maantakin pattahlohna tawh Pasian kidahsak hi. Tate’ kampau leh gamtatnate kepsak ding ahi hi. Tua hikeileh tate’ tunga galpa’ huzaapna hatding hi. Hibang tate lam apialsak nadingin amahin Pasian’ ngimnate langpangin nasem hi. Awnem, kinna, leh migitna tawh nute in tate bawlding uha, ahoih khempeuh ciingsakin ahoihlo khempeuh lakkhiatsak ding hi.16

Lungkimtaka Nasepzawhna.—Tate in Topa’ gaam ahi hi. Pasian’ neihsate ihkepcingna hong kisittel kik ding hi. Pilna piakna leh tate pattahna in Pasian adingin asangpen Christiante’ nasep ahi hi. Hih nasepin lungduai nasep ngen hi. Khantawntung sepding hia, bel kul a, tatsatlo-in sepkul hi. Hih nasep awlmawhlohna in Pasian’ sumkemza ah thumaanlohna ahi hi.

Itna, upna leh thungetna tawh nu leh pa in innkuan adingin nasem ding hi. Pasian’ kiangah kipaaktakin “En in, Pasianin ahong piak kei leh ka tate” ci-in hong kiap ding uh hi.17

(Zop Lai Ding)