Kumkikna Lamen Innkuan - Khen 12 (Azom2)

THUKHEN 12

Innkuan Nuntakna Tuktehna

  INNKUAN SUNG BIAKNA

 Innkuan Biakna Bang?—Innkuan biaknaah Topa thuhilhna leh thapiakna sungah tate makaihna zong ahi hi. Innkuan mimaltein Christ ie thuhilhnaah tha kipia ding hi. Mimalte’ lungtupnate kikepcing sak dinga, Satan in Christ ie kiangpanin amaute lam pialsaklo ding hi. Hihin innkuan sial ie tupna tuktehna ahi hi. Amaute in lungkiat ding leh guallelh ding ngaihsunlo ding uh hi. Tate thuhilhnaah nu leh pate in kuhkalin vil hileuh, leh Pasian’ minthanna dingin mitsuan hileuh, Pasian tawh kikopin, leh Pasian zong amaute tawh kikopin Christ in asihlawh liang tate kha gupkhiat ding tum ding uh hi.1

Biakna thuhilhna in thuhilh maimai hilo hi. Tua-in tate tawh thungetkhopna, Jesu’ kiang koici zuatding cih hilhna leh adeih uh bangci ngetding, cih hilhna ahi hi. Tuabanah, Jesu in nanuntakna sungah nakhempeuh ahihna lakding, acihna zong ahi hi. Ama’ hong itna in lungduai saka, migisak, thuakzo sak, leh Abraham bangin tate thupiakna ah kip sak hi.2

Innah na omdan banglianin vantungah kiciamteh hi. Vantungah misiangtho asuakding mikhatin a innsungah misiangtho suak masa ding hi. Nu leh pate in innsungah Christian hile uh pawlpi sungah kimanna aneite hiding uha, pawlpi nasepte sem theiin, tuabangmahin khuatual ah diang theiding uh hi. Nu leh pate aw, nabiakna uh paubek hisak kei unla, ataktak hisak un.3

Innsangah Biakna kihilhding.—Innbiakna kikin hetlo hi. Numei pasalte in gamdang mission nasep lungtupin nei uh hi. Sumpi zong cinghtakin pia uha, akisuantakna uh lungkimsakin, innkuan sunga Christian zia leh lim alah zawhlohna uh athoih nadingin Pasian nasepna ah piakhia uh hi. Ahihhangin inn in Mission phual khatmah ahi hi. Hih inn mission a awlmawhloh nadingin paupending omlo hi.4

Innkuan biakna in nisim nuntakna asuah ciangin hoihna tampi pungsak hi. Innkuanbiakna bekin Pasianin nu leh pa asepsaknop naseplian semsak thei hi. Tate pen Pasian kihtakna leh thuhilhna ah kipaipih ding hi.5

Tulai khangnote in biakna lamah a uituilohna uhpen apilna sinna uh kicintaaklohman ahi hi. Zualzang dingin akiphalna, ahihkeileh dan pialo in thumanlohna akikhah khong ciangin tate tungah itna maan kizanglo hi. Singkungah ahiangte a awn bangin akungzong awn hi.6

Biakna in khuatual ahuzaapding ahihleh innkuan ahuzaap masa ding ahi hi. Innkuan sungah Pasian kihta ding leh a itdingin tate kipantah hileh leitungah vai akuankhiat uhciangin Pasian adingin a innkuanciat uh kipantah dinga, tuabangin khuatualah Pasian thukhunte kizel ding hi. Leitungah akizel huzaapna omding hi. Innsangah biakna kipattahna kilakhia lo ding hi.7

Innkuan Biakna in Biakinn Biakna Masuan.— Pawlpi khantoh nading inn panin kipankhia hi. Innkuan sung huzaapna pen biakinn sung nuntakna ah kitonpih hi, tua ahihmanin pawlpi sung tavuante in inn panin akipan ding ahi hi.8

Innkuan biakna ahat ciangin anasia biakna kikaih tuahna omding hi. Innah galdalna lamun. Pasian kiangah na innkuan apin, tuaciangin Christian bangin innah kampau in nagamtang ding hi. Innsia nahihna tawh innah migiin, lungduaiin, leh thuakzawhna neiin. Nu khatsialin innkuan sia hia, Christ sangah nute in sangnaupang zong nahi hi. Tuahileh tate zia leh tong lamsak theiding hi.9

Innkuanbiakna aomlohnaah biakna kineihsakna in manneilo hi. Christ ahong kumciangin gamtatna kikhelna omding hi, ci a ngaihsutna tawh mitampi kikhem uh hi. Christ ahong kumkik ciangin kikhelna omnawnlo ding hi. Apicinglo zia leh tong khempeuhin hih leitungah kisikna ngah masa dinga, hehpihna kong akihon lai-in Christ ie hehpihna tawh ihzawh ding ahi hi. Hih leitungin vantung innkuan ihlut nadingin ihkipuahna mun ahi hi.10

Innkuan biakna in nakpi in kisam hi. Innsungah ihkampaute in zia leh tong hoih neiding hi. Tua hikeileh biakinn sunga ihtetci pannate in bangmah manlo ding hi. Innsungah ziadamna, migitna, thusiamna naneihkeileh nabiakna in amawkna teeiteei ahi hi. Innkuanbiakna amaan kinei hileh pawlpi sungah vangliatna kinei ding hi.11

Azekai Biakna kihilhna Khial.—Pasian’ theihna neilo in tate khantohsakna in thusia taktak ahi hi.12

Biakna pattahna tate apialote in nakkhialh uh hi. Hong gol le-uh biakna hong deih lualel ding hi, ci uh hi. Aneulai in thumaan, itna, vantung lungsim khaicite vawh kei leuh Satanin amaute lungtang sungah tahum vawh ding ahihlam nu leh pa in theilo nahi uh hiam?13

Christian tavuan apuadingin naupangte neulai lua, ci in nu leh pate in biakna neilo in tate khangkhia sak uh hi. Biakna tawh kisai tate’ tavuan puakdingte zekailo in khensat ding kisam hi, banghang hiam, cihleh amau zong innkuan mimalte ahi uh hi.14

Nu leh pain Pasian’ tangdingte hi-uha akicing khalna leh kipna tawh bawltuak bawllohdingte gending uh hi. Amau adingin kizeknaah awnem leh kikhalna tawh sepna in azia atong adingin kipna leh khensatna hoih pia hi.

Tate aneulai mahin hihvai khensat sakding ahi hi, banghang hiam, cihleh amaute in Sabbath palsatding, biakpiakna ah pailohding, innkuan biaknaah kihellohding banah guktaklohding ngaihsun lo pahding uh hi. Nu leh pa ie khutte in tuabang siatna panin dalding hi.15

Aneulai panun Christ ie deih pilna kipia ding hi. Tate lungsimin thu asaan theihlaiin tawntung nuntakna tawh kisai nate kihilh ding hi. Nu leh pain Pasian maiah nungta, kampau, gamtang ahihna phawkden ding uh hi.16 Nu leh pate aw, bang lampi natawn uh hiam? Biakna tawh kisai in naupangte khal kisam asalo nahi uh hiam? Aneulai leh akhangno lai-un tai leh thuhilhloin akoihdap nahi uh hiam? Autbangun atadingin akhah nahi uh hiam? Tuahangin Pasianin ahong piak tavuan anelhsiah uh hi.17

Tate’ Kumtawh kituakin Hilhna Pia.—Tate in thu atheihtheih uhciangin nu leh pain Jesu’ thu genpih ding hi. Tate’ sungah biakna lungsimpuakte akum uhtawh kituakin kiguansak ding hi. Jesu’ kiangah thungen dingin tate paipih ding hi. Amahin naupangte teltheih dingin biakna kammalte zang hi.18

Aneucil panun naupangte in vantung’ huzaapna saangthei uh hi. Topa in tate kinbawl hi. Topa sungah amaute thu kihilhin akikhansuah ciangin nu leh pa adingin huhna hia, dongkholh ngeilo uh hi.19

Nu leh Pa in kikopin Innah Biakna Sanglap.— Innsungah nu leh pa in biakna akemding tavuan nei hi.20

Nu in innsungah vai tampi kaitukin biakna thu hun apialo ding hilo hi. Hih nasep nadingin Pasian kiangah ngen uh hen. Ama’ maiah akhuksukna uhtawh amaute tungah akipia tavuanin anget nasep theician ding uh hi. Thuhilhna leh makaihna akhial ngeilo Pa kiangah atate ap tawntung uh hen.

Khalam thuhilhna pen pa in nu tungah pumsot kei hen. Nu leh pa in nasep lianpi nei uh hi. Thukhenna adingin atate akigingsak tuakding uh ahi hi.21

Khalam kizeknaah natate uh kithuahpih un. Amaute kimah naupna khut uh kawi unla, Jesu Christ tungah apun. Maantakin napattah nadingpanun bangmah kinawngkai sak kha kei un. Leitung’ tupna leh sawmna khat peuh tawh amaute nungngat kha kei un. Na Christian nuntakna uh amaute kiangpanin kaikhia kei un. Topa kiangah hong paipih unla, thumaan ah kitualbial sak un. Pasian ait mite tawh kikhawlkhawm sak un. Vantung tawh akitangaih dingin amaute zia leh tong lamtohsak inla, Pasian’ tate ahihlam uh theisak un.22

Innkuan biakna in bang tangcingsak loding hiam? Innkuan sungah bawlding Pasian’ ngimna khempeuh biakna in semkhia ding hi. Topa hilhna leh pattahna tawh tate hong khangkhia ding uh hi. Amaute pilna kipia in, kipantah ding hi. Topa innkuanpihte bangin hiding, khuatual kiapna ciangbek hilo ding hi.23

Tatein Christian Nuntakna akipnangin Nu leh Pa Mitsuan.—Khangnote khuak anawk khempeuhte kiciamteh pahpah hi. Maipuakte kienin, awgingin zong huzaap, leh nikteen puansilhin zong kiciing kik hi. Alinglawn thei, akisatsuahbaih nu leh pate in atate tungah kumtampi anawk khakuh sinding thu tampi khaksawn uha, hithei hileh leitungbup nangawn pia nuam uh hi. Anawk khak thute kinusia kik thei nawnlo bekmah ahi hi. Tate in anu leh apate nuntakna amuh uhciangin nu leh pa nuntakna mantakin azilkik uh ahilam muding uh hi. Mantakin anuntakna uhleh akikhalna uh tawh, nu leh pain atate zia leh tong asui uh ahi hi.24

Pasianin Ciantakin Akilam Innkuan Pahtawi.— Kiciantakin innkuan lamin, innkuan ukin, Pasian langpan sangin Pasian Pasian itin, thu amangte in innkuan sungah Pasian thumasa in akoih nu leh pate, Pasian kihtakna in pilna kipatna hi, ci-in tate ahilhte, mite mai leh vantung mite maiah Pasian aminthangsakte ahi uh hi. Tuabang innsungah Christ in leengla hingeilo a, Ama’ minin amaute bangkua min hia, zahtakin, minthangsak uh hi. Pasian Kumpiin ateenna innah vantungmitein omnuam sa uha, tate zong biakna, Laisiangtho, leh Piangsakpa azahtak dingin kihilh hi. Tuabang innkuante in “Kei ahong zahtakte Keimahin Ka pahtawi ding hi” cih kamciam ngen thei uh hi.25

Bangci Bangin Innsungah Christ kitumpih?— Lungtang sungah Christ aom ciangin, Amah innkuan sungah kitumpih hi. Nu leh pa in Khasiangtho’ thu mangin anuntaknauh mannei sa uha, gupkhiatna aluah ding mite adingin na asem vantungmite in zong amaute innsungah thuhilhsia ahihna uh tawh pilna pia in, leh tate pattahnaah nu leh pa panpih uh hi. Innkuan sungah biakinn neu khat neihding apiangthei thu hia, tua in Honpa pahtawi in, minthangsak hi.26

Biakna Mi akaihup Theidingin Bawlin.—Na Christian nuntakna mi ahuptheidingin bawlin. Christ ie nungazuite in inn asuan nopna gam thu genin. Tuabang nahihna tawh Pasianin natate thumaan sungah makaih dinga, Jesu in Amah a itte ading abawl innpi sungah alutdingin kilawmna anei nuamdingin utna pia hi.27

Biakna lim leh meel apuadingin nu leh pate in tate aana sawllo ding hi. Hupna anei khuavak ahi tawntung thukhunte amaute maiah koih zaw ding hi.28

Maitaina, Christian thusiamna, leh aziadamna, mite ahehpihtheihna uh tawh nu leh pate in Christ ie biakna ie mihuptheihna lakding uh hi. Ahihhangin zahtakna leh thumanna kal sitset ding uh hi. Tate lungsim sungah thukhun maante guansak ding hi.29

Thuhoih sep nadingin khangnote lammaan tawh ihzol kul hi. Hih nasep nadingin ngun leh kham kicinglo hi. Amaute maiah itna, hehpihna, leh Christ ie hehpihna, Ama’ kammal ie manphatna, leh agualzote kipaakna ihlak ding hi. Hihbang hanciamna tawh nangmahin atawntung in akimangdinga na asem uh ahi hi.30

Banghangin Nuleh Pa Pawlkhatin Hihzolo.— Nu leh pa pawlkhat in biakna anei akisak uhhangin atate maiah Pasian pen thuman ding, nasepsak ding sangin hunnuam lakna, gualnopna, ahihkeileh lunglutnate Pasian thu tawh buaisak nuamlo uh hi. “Pasian kihtakna in pilna kipatna ahi hi.” Hihthu in si leh sa sungah akizel ding ahi hi. Jesu Christ theihna tungtawnin Pasian amantakin theihna hong paiding hia, Ama’ sihna tawh eite ahong hotkhiatna in eite lungsim sungah akhencip ding ahi hi.31

Nu leh pate aw, hih vaikhempeuh bawl manding hilo hi, naci khading uh hi. Innsungah hihnate nabawl nadingun hun nalak uh kul hi. Tua hikeileh Satanin ama’ thu hong guangding hi. Hibanga nasepna panin nakidal nadingin, nanuntakna panun thudang khempeuh paaikhia un. Pasian deihdanin natate uh pantah un. Hun tawh abei nate nusia phot unla, sum cilin, nadeihnate in hencip photin, Christ adingin natate biakna pattahna namangngilh keiding uh hi.32

Innkuan Mimal Khempeuh Pasian’ tungah Kiap hen.— Moses in Paisanpawi bawldan ding agen naah thuthuk tampi om hi. Nu leh pa leh tate adingin sinding thu hong lak hi.

Pa in innkuan siampi asemding hia, pa asih khit lehzong, tapa upa penin sisan la in kongbiangah atat ding ahi hi. Innkuan sialah hihlim akibawlding ahi hi. Nu leh pa in innkuante kaikhawmin, Christ in amaute paisan pawi tuuno ahihna lakding uh hi. Pa in ainnkuanpihte Pasian kiangah ap dinga, paisan pawi in ahilh nasep asemding ahi hi. Hih nasep pen midangte tungah kiap theilo hi.33

Christian nu leh pa in Pasian tungah thumaan ding khensat phot ding hi. Tua khit ciangin amaute tawh innkuanpihte kaikhawm dinga inn kongpi pen sisan tawh zut ding hi. Hih in Jesu bekin ih it, ihngaih innkuan ahong that dinga ahong pai vantungmite suksiatna panin eite hong dal, hong honthei ahihna lak hi. Inn sungah mihing sanga avanglian zaw huzaapna khat in nasem ahihna leitung theisak un. Nu leh pa in Pasian tawh kizom hen. Christ ie lamah dingin, khutzat nu leh pa tungtawnin Pasian’ hehpihna in bangzahta in nasem thei, cih hong lakding hi.34

(Zop Lai Ding)