Kumkikna Lamen Innkuan - Khen 12 (Azom1)

THUKHEN 12

Innkuan Nuntakna Tuktehna

KIPAWLKHOPNA

Ukna ah Tavuante Hawmsem.—Thungetna leh kipawlkhopna tawh nu leh pa in tate makaihding tavuan lianpen puakhawm ding uh hi.1

Nu leh pa in pumkhat bangin kikopin nasem khawm ding hi. Kikhenna omlo ding hi. Nu leh pa pawlkhat pen ki-elna tawh nasem uha, atate kiuk khial hi. Khatvei vei khat khauh lua in khat pen nem lua leuleu hi. Hih kilamdanna in tate gamtat hoih nadingin nasem hi. Kipuahphatna akibawl ciangin zawhthawhthu tawh kisem theilo hi. Tua kawmkalah thanemna pulaak khakding hilo zel hi. Nu in tate’ gamtat siatna amulo dingin pa’ mai sit sakding hilo hi. Pa in aphalloh nate asemdingin nu in atate ahanthawn ding zong hilo hi. Pa’ innkuan zekna tawh kisai-in tate maiah nu-in muanlahna khat zong pulaaklo ding hi. Nu in agamtatna tawh pa’ nasepte lehpanlo ding hi.2

Nu leh pa in kibatlohna anei in, khat in khat ie huzaapna alangdo leh, innkuan sung kitawknawi dinga, nu leh pa in anih un innkuan hoihtein aneihtheih tate zahtakna ngahlo ding uh hi. Innkuan kiukna tawh kisai in tate in na theithei baih mahmah uha, adiakdiakin, amaute’ gamtatna aciangtan khat peuhpeuh phawk pahpah uh hi.3

Tate khalnaah nu leh pa in kipumkhat ding uh hi. Khattuakin nasep hawmding uh hia, Pasian’ tungah tavuan nei uh ahihna kiphawk ding uh hi. Tate’ pumpi cidam nading leh zia leh tong khantoh nadingin apantah ding uh ahi hi.4

Khemna ading Thuhilhna.—Nu pawlkhatte in atate hangin mawhsakna thuak kha uh hi. Tuabang pen phalding hingeilo hi. Tate khialhna pen pa theihloh dingin kiselsim hi. Nu in puansilh vaiah phalna piasim a, pa in theizo kei in teh, athei zongin taibek kei in teh, ci uh hi.

Hihsanah khemna tawh kisai in tate tungah akihilh ahi hi. Apa in khialhna mukhia hileh zong, paulapding zongin thumaan alangzong genkhia lo hi. Anu in alungsim kihonglo lua hi. Nute zah mahin pate in zong tate ading deihsakna aneihlam nu in phawkzo lo hi. Naupangte aneu lai mahin akhialhnate puahphat sakding ahi hi. Tuasangsikin kihukcip sak hi. Tuaciangin nu leh pa kithutuaklo ahihlam tate in theita uha, thaman ngah ding uh hi. Naupangte in neulai pan mahin khem kipanpah uh hi. Imcipin, sawigenin, nu a’ lah hilo, pa a’ lah hilo khatin thukawng hei uh hi. Pehtawi thugenna kipanta uha, thuzuau gen lelin, kisuantakna zong neinawnlo hi.

Nu’ thu ipcipna hangin thusiate kiimcip a, tate puahphatnaah lungsim kituaklo uh hi. Pa pen atawn tungin kithudot ding ahi hi. Na khempeuh ama’ maiah honsa in omding hi. Tu in, alehlamin tate mawhna thu kim a, akhem dingin thapiakna kinei ta hi. Thumaan neihlohna leh thutanlohna ahi hi.5

Tate thuhilhna ah nu leh pa in akikhel ngeilo thukhun dingin pumkhatna neiden uh hi. Nu leh pa pawlkhatte in khialhna bawl uh hi. Kipumkhat lo uh hi. Tua khialhna pen hunkhat ciangin apa khialhna hia, atamzaw pen anu khialhna hiden zaw hi. Nu in tanu tapate ngek bawlin phatden hi. Pate in nasepna ah kuankhia in, tate tawh kikhawlkhawm manlo hi. Anu in huzaapna in gending nei hi. Nu huzaapna in tate zia leh tong lamtohna ah thu tampi sai kha hi.6

Nu leh Pa’ kiuituilohna hangin Tate Buai.— Innkuan kipawlna pen phatakin kikhilding ahi hi. Nu leh pa in atavuante uh ngaihsunin teltakin kalsuan ding uh hi. Kitumkakna omsaklo ding hi. Tate maiah nu leh pa in angimna leh athukhensatnate uh kigensiatsak lo ding hi.

Nu in Pasian thu atheilo ahihleh, ahang leh thupiang panin thusut ding hi. Ama’ khalna in gupna san nading hia, apa-in atate akhalna tawh kitumkak semsem zaw sak hiam, cih kidong ding hi. Topa’ lampi azui mah kahi hiam? Hih dotna in athupipen hiding hi.7

Nu leh pa akithutuah kei uhleh, atate kiang panin kihemkhia in akithutuah dong kikum ding uh hi.8

Innkuan kiukna ah nu leh pa kithutuaklo zel uh hi. Pa in atate tawh tamvei sawtvei omkhawm manlo ahihmanin tate’ lungsim puak theilo a lungtom thei hi. Ama’ hehna kikhallo in, alungsim zong puahphalo thei hi. Ta in hih thu thei hi. Apa daanpiakna in amah hehsak hi. Hihbanga gamtat khialhna zong anu in kisam sazel ahihmanin awi-am thei hi. Ta in bang piangding theilo a, hih ngoltolna ah bangtanvei mawhna bawl laiding uh, cih ngakin om hi. Tuabangin khaici hoihlo vawh uha, agah gahkhiading hi.9

Tate khalna ah nu leh pa kikop uh hileh ta in amah akilametna theiding hi. Azenzenin nu’ danpiakna pa in

lungkimpihlo hizenzen leh, anu khauhpai sa lua hileh, apa in ata khembawlin ngekbawl ding hi. Tua hileh ata kisusia ding hizel hi. Tomvei sungin ata in aututin omding khensat ta hi. Tate tungah hihbang mawhna abawl nu leh patein kha nuntakna akisiat hangin tavuan alakding uh ahi hi.10

Nu leh pate, bangkua makaite, leh lawm leh gualin in atate uh bangci bawl uh hiam, ci in vantungmi in lungtung takin engige hi. Nu leh pa akipumkhat lohna innkuanah innkuan kiukna bangzahta in khial hiam? Nu leh pa ie awte, aetdan, akammalte uh in tate ukna ah kipumkhat hetlo ahihna lak hi. Nu in taneute tunga awnem leh ngaihnate enin pa in nu zahtakna apialo dingin tate makaih hi. Nu ahihleh atamtheithei tate tungah it leh ngaihna piakdingin kisam sa hi. Tate in tua ngaihna ah tualbialin zangkhial uha, pa in ngoltol hi, cih ngaisutna musak hi. Apa ngattaka ukna pen anu in langdo hi.11

Thungetna Tampi leh Enkikna Kisam.— Ngaihna in innkuan sung nangawnah atawntungin kiplo hi. Pasian deihna leh mihing deihna akiai-hualna bekah kip hi. Lungsim leh pumpi khempeuh Jesu Christ ie lungsim puak tawh kibang sak ding hi. Nu leh pa in Pasian itna leh zahtakna ah pumpi suak le uh, innkuan sungah thuneiding uha, thu tampi nget akisapna mu in, nung-et kik ding tampi kisam ahihna muding uh hi. Thungetna leh Pasian azon uh tawh kituakin vantungmite in amaute akemcing dingin om tawntung ahihna mu theiding uh hi. Amaute thanemna zong gualzo dinga, picinna ngah ding uh hi.12

Itna Khauin Lungtangte Khihding.—Nu le pa aw, nalungtangte uh anaipen, anuampen dingin khih un. Nuntakna kikakin khangkhia kei un. Khat leh khat anaitheithei dingin kikhih un. Tuaciang bekin natate uh note tawh akinai thei pendingin itna khau tawh nakhih thei panding uh hi.13

Hun leh atawntung adingin khaici vawh un. Christian nupate hanciamna vantungin enin vil gige hi.14

(Zop Lai Ding)