Kumkikna Lamen Innkuan - Khen 11

THUKHEN 11

Tate—Khangno Koppihte

TATE VANTUNG’ SEHNA

Tate-in Christ’ Sisan’ Leeisa.—Tate in Pasianin sang ngaihsut ahihmanin a Tapa’ nuntakna pia khia hi. Ama’ sisan tawh leisa ahibang mahin amaute thupi bawl in. Ama adingin lungduaina leh kiptakin pantahin. Lungsim sau sakin leh itna tawh khal in. Hih bangin nabawlna tawh nang adingin kipaakna lukhun hiding uha, leitung ah khuavak bangin ataangding uh hi.1

Pasian it leh akihta aneupen ta in siamna leh pilna nei-in gupna anialpa sangin Pasian’ maiah lian zaw hi. Pasian kiangah kiapin, Pasian adingin anungtate in pilna leh siamna nak tawh akizom uh ahi hi.2

“Vantunggamin Tuabangte gam ahi hi.”—Jesu aum naupangin vantungtokhom kimah aom vantungmite bangmahin Pasian’ maiah manpha hi. Amaute Jesu kiang paipihin, kipantah ding hi. Amaute thumanna lampiah kimakaih dinga, manthanna leh zualzannaah hun bei saklo ding uh hi.3

Naupang neute zangin Jesu in anungzuite ahilhnop thu akan hilengh, tulianin mual bangin alian haksatnate zangtam suak ding hi. Nungzuite hong pai in Jesu kiangah, “Vantungah kua lianpen ding hiam?” acih ciangin Jesu in naupang khat akiangah kai-in, amaute laizangah akoih hi. “Amantakpi kongcih inah, note nakikhel kei uhleh a, hih naupangte bang nahihkei uhleh, vantung gam nalut keiding uh hi.Hih naupang bangin akiniamkhiatte in vantung gamah milianpente ahiding uh hi” naci hi.4

Pasian Neihsate Nu leh Pa Ki-ap.—Naupangte in nu leh pa kiangpanin nuntakna ngahsawn uh hi. Pasianin nuntakna apiapa ahihmanin tate in Pasian piansakna vangliatna tungtawnin nuntakna ngah uh hi. Tate pen ei aituam neihsa bangin ihbawl nading thu omlo hi. Gupkhiatna ngimna ah amaute leh eite ading zong kihel hi. Topa sungah kimakaihna leh thuhilhna angah nadingin Pasianin nu leh pa tavuan ap hi. Tuabangin tu leh atawntung adingin na asem theidingin apicing ding uh ahi hi.5

Nute aw, na taneute uh migitna tawh bawl un. Christ zong khatvei lai-in taneu ahi hi. Hih nasep pen asiangtho nasepna hi, cii in mu unla, no leh biakbawl kei un. Asiangtho, anamtui, mipi atang dingin hilh un. Amaute in Pasian’ neihsa hi, it un. Pasian tawh kipawlin acing zia leh tong aneidingin huh un.6 Kilemna tawh Pasian amu nuam nahihleh tu-in natate kha-an vak in. Banghang hiam, cihleh naupang khat simin gupna ngah nading lametna nei hi. Naupangte leh khangnote in atuamdiak Pasian’ neihsa ahi hi.7

Khangnote pen thumaan tawh khetcip ding ahi hi. Tua hileh amaute neih siamnatein amaute aituam hilo ahihna theiding uh hi. Athahatna, ahun, apilnate in Pasian hong kawm ahi hi. Pasian’ neihsa ahihmanin khangnote kipun suah nadingin adongin zatding ahi hi. Khangnote in ahiang hia, Pasian adingin agah ding uh ahi hi. Abulin ameetkhang amuding ahi hi. Leitung khuamial atanding khuavak ahi hi. Khangno, naupang khatsimin, Pasian pahtawi nadingin leh mihingte sanglap nadingin na asemding uh ahi hi.8

Vantungam Lampiin Naupang tawh Kituak.— Jesu in eite thanemna hong theihsak hi. Mawhna abawlloh hangin eite thuakna khempeuh hong thuak pih uh hi. Eite tha leh eite siamna tawh kituakin ihlampi ding hong vaivan sak khin hi. Jacob bangmahin naupangte leh ganhingte hatna tawh kituakin akalsuan pih mahbangin eite nopsakna ding ngaihsunin hong makaih ding hi. Amahin eite hong simmawhlo, hong nusialo ahihkei leh atuunote hong taisanlo hi. Mailam manawhin hong sawlin, hong nusia deuh selo hi. Eite lampi naupangte nangawn adingin lam hong ziktang sak hi. Lampi kawcik ah tate lam atonpih dingin Topa in nu leh pate hongsawl hi. Tate hatna tawh kituakin khual azinpih dingin Pasianin eite hong koih hi.9

NU HUHTE

Innkuan Kipawlnaah Tate zong Kikoppihte.— Tate leh nu leh pate in innkuan sungah sepding neitek uh hi. Innkuan kipawlna ah koppih vive ahi uh hi. An kivak, puan kiguan, ki it, leh kikem uha, innkuan sung nasepna ah zong hehpihna nasep ahawm dimdiam ding uh ahi hi.Hih hehpihna nasepte apuakna uh tawh innkuan nasep akipuakpih uh hia, innkuan khat mimalte ahihna uh tawh lungnopna apiangsak uh ahi hi.1

Innkuan kipawlna ah mimalte ahihna nute in atate hilh uh hen. Pawlpi mimalte in thumaan takin sepding khattek aneih bangun innkuan kizopnaah zong sepding khat tek anei uh ahi hi. Nasep aneuneute akisawl ciangin nu leh pa ahuh uh ahihlam tate in theih ding ahi hi. Nang adingin na khat tek sem uh hen. Tua azawh uhciangin kimawl hun nei uh ciai, ci in.2

Tate in lungsim tangzang nei uha, nisim nuntaknaah vangik apuakpih ding uh ahi hi. Nasep ding khattek aneih hamtangding kisam hi. Nu leh pate in hih thu a ukding uh ahi hi.3

Nu leh Pa leh Tate in Sepding Nei.—Nu leh pa in tate anvak, puanguan, leh pilna piakding tavuan aneih bangun tate in zong maitai takin nu leh pa’ na semding uha, thumang ding uh hi. Tate in nu leh pa huhding leh vangik puakpih ding nasep nei akisakloh uhciangin nu leh pa te in zong tate tungah tavuan nei kisa nawn kei le-uh akilawm ding hiam? Amaute tungah akia nasep asem nawnlo-in, nu leh pate nasepte in gimna leh tawlna bekbek hia, huhding lungkimna apiak theih nawnloh uhciangin, mailam hunah amaute kimanna asinding thu akhahsuah uh ahi

hi.4

Nu leh pa in tate akhansuah nadngin apuak vangikte adawn theidingin thu um mite tate khempeuh akipantah dingin Pasianin hong deihsak hi. Innkuanah innkhan ngahin innkuan thu kikupna ah zong thu aneih dinguh ahi hi. Pasianin tate an avak ding leh puan aguandingin nu leh pate tavuan pia hi. Ahihhangin tate leh nu leh pate tavuan kikim ding hi. Amaute lampanin tate in nu leh pa zahtakin apahtawi ding uh ahi hi.5

Nu leh pa in tate adingin sila hilo ding hi. Amau adingin nakhempeuh sepsakin, kipia khia in, tate pen bangmah awlmawhlo-in kikhangkhia sak hi. Kin neilo in vangik khempeuh nu leh pa tungah suankhin uh hi.6

Migitkhialhna tawh Thadahna Kihilh.—Tate aneu lai hun pan mahin kimanna aneidingin kihilh ding hi. Amau leh amau kihuh dinga, midang zong huhding hi. Tuhun tanu tampite in lungsim kisuantakna om hetlo- in nute anhuan, puansawp, puantaih in amanlah mu uha, amau ahihleh innkhan sungah laisimin, puanmong khui-in, puanzemin tu uh hi. Amaute lungtangin thuakna anei theilo suangtum bang hi.

Hih khialhna koi panin hong kipan hiam? Hih thuah kua ihmawhsak ding hiam? Lungsim zawngkhal, khemna athuak, nu leh pate mawhsak ding ahi hi. Amaute in atate kimanna anei masuan ding muzolo uh hi. Tate angaih luatna uh tawh thadah sak uha, tavuan pialo, lungsim leh thatang kisalna neisaklo uha, azualtat tanute mithanemte suak sak uh hi. Bangin thanem suak sak hiam? Nu leh pate lampialna in amaute thanem sak hi. Innsungah thasalna tawh lungsim leh pumpi khantohna om zaw ding hi. Hihbangin tate zawngkhal lawh uh hi.Ngaihsut khialhna tawh nasep kin nawnlo uh hi.7

Natate in nasep azongsat kei uhleh nuntakna ciimtak ding uh hi. Akhut, akhe, anungah natna gending uh hi. Nahehpih leh nangmah hong buaisak ding hi. Amaute nasep sak sangin nangmahin nasem hi. Akipatcilin ahaksa lo semsakin. Nikhat khit nikhat khanto in. Gimna neilo in athauk zawh dong nakhanto ding hi.8

Thadahna Ie Supna.—Thadahna panin siatna tampi piang hi. Amanlah khut leh lungsimin ze-etna hun pia manlo uh hi. Ahizongin athadah khut leh lungsimte in Satan ukna sungah lutbaih uh hi. Lungsim amanlah loh ciangin ahoih nate ngaihsun uh hi. Thadahna in mawhna hi, ci in nu leh pa in tate hilh uh hen.9

Tate kiang panin anasepte uh lakkhiatsakna, thadah mandinga koihdapna, tupna aomlo in nuntaksakna, a utut un aomding phalna sanga siatna atun zaw bangmah omlo hi. Tate lungsimin tangzanga, thuhoih leh kimanna tawh manlah keileh siatna-ah kihei ding uh hi. Tawlngak hun neihding tate ading hoih ahih hangin sepding hun neisakin, laisim hun ding zong neisak ding hi. Amaute kum tawh kituakin laibu hoihte simin kimanna anei na semding uh hi.10

Siatna panin ahoihpen Kepnain ahoih Sepnaah Manlahsakna.—Siatna tawh kipelh nang lam hoihpenin nasep manlahna ahi hi. Kulhkal ding pattahna, hunte nahoih sepna tawh beisakna in thadah manin sunmang matna tawh kipelh sak hi. Tua hikei leh lawmhoihlo leh zongsat hoihlo tawh kipaaikan ding uh hi.11

Nu leh pate in nadang tampi tawh buai le uh, nahoih sepna tawh atate uh manlahsak manlo hi. Satan bekin manlah sak ding hi.12

Tatein Vangikpuak Sinding.—Tate adingin ahoihpen sinding thu in innkuan vangikte apuakpihna ahihlam nu leh pa in theihding ahi hi. Tate in bangkua nasepte amaute theihtawmna tawh semin, leitungah kimanna neih asawmding uh nu leh pa in ahilhding ahi hi. Apil nute khutnuaiah tanu tapate in nuntakna vangikte apua dingin kimakaih ding hi.13

Tate adingin ahoih leh ahoihlo pilna akipat hunin aneulai panin kipan hi. Ahong uhciangin innkuan sunga anaute huhding kipan uh hi. Nu bekin tate in zong apusaktheih tua vangikte apuakna tawh kigimsaklo ding hi.14

Vangik Kihawma Puakna in Lungkimna Pia.— Nu leh pate aw, innkuan nasepte Pasian deihna tawh kituakin maantakin asemdingin tate pantah un. Tua in amanpha thuakna ahi hi. Amau leh amau kingaihsun sakloin, agualnopna uh zong sak kei un. Bangkua sungah ahihtheih banguh asem dingin lungduai takin panpih un. Nu, pa leh sanggamte nasep huh thei uhhileh anuntakna uhah gualzawhna ngahding uh hi. Tua hileh kimanna aneihlam uh thei in, lungkimna ngahding uh hi.15

Huhna apia theidingin tate kipantah thei hi. Naupangtein manlah nuam uh hi. Hih amanlahnopna uh zangin pattahna leh lamlahna kipia thei hi. Aneulai un kihilh hileh tate khatsimin bangkua nasepte khattek semthei uh hileh picing kisa ding uh hi. Tuapanin aneu panun nasep nuam sading uha, nahoih sepna tawh lungnopna ngah ding uh hi. Nasep ah zongsang ding uha, gualnopna azon sangun kimanna anei nasepna ah lungkimna om zaw ahihlam theiding uh hi.

Naupangte adingin nasep ding hoih hi. Ahun uh atamzaw ah nasepnain amaute kimanna pia zaw hi. Nasep azawh uhciangin mawhna abaanglo kipaakna nei uh hi. Nasepna in pumpi sagolh leh lungsim tha hat sak hi. Nute in tanote innkuan huhna apiate ahidingin bawl thei hi. Tuabangin ahilhna uh tawh nute in mihing pianzia tampi theihbeh dinga, naupangte tawh kizopdan ding zong siamzaw ding uh hi. Tate in muanna leh itna tawh nute tawh ahong kizop theihbangun, makaihna leh huhna ngah nadingin Jesu hong musiam ding uh hi. Tate phatakin kipantah uh hileh, akum uh tawh kituakin alawm agualte vanpuak zong hong dawn theiding uh hi.16

Lungsim Khaikim.—Amaute dinmun panin asep theih khattek asep uhciangin phawkna leh lungsim kikhaikimna hong ngahdinga, na zia leh tong zong kho ding hi. Tavuan neuneute sepna tawh nikhat hun zatnain ngaihsutna, mansehna, leh ngimna hong ngen hi. Tate ahong gol uh tawh kituakin, ngaihsut khinkhai ding kisam toto hi. Agimhuai lua zong hilo, amaute nasepin zong lungkiat nading hilo, pumpi khantohnading khualin, lungsim leh khalam khantoh nading zong akim ding kisam hi.17

Vantung Nasemte tawh Kizopin.—Nisim inn sung silbawlnate Topa piak nasep hi, ci in tate nahilhleh, thumaan leh citak takin nasepnain amaute adingin laisinna sangbangin azang nahihleh, amaute nasepin nuammahmah ding hi. Sep khempeuh Topa tunga asembangin akingaihsutna un aniampen nasep nangawn nopsakna hia, Pasian’ deihna asem vantung asiangtho nasemte tawh akizom uh ahi hi.18

Vantung tatsatlo in na kisem hi. Athadah khat zong omlo hi. “Ka Pa in sem a, Kei zong kasem hi” Jesu in ci hi. Atawpna gualzawhna ahong paiciangin, ei adingin innpi bawlsa in om dinga, eite dinmun pen thadahna hun hiding, bangmah semlo in ihtawlnga ding hi, ci-in ngaihsut ding hilo hi.19

Innkuan Kikhihna Khauhsakin.—Innkuan sung khangnote pattahna ah kikopna thukhun thupi hi. Akhangham zawte in nu leh pa huhte suakding uha, amaute tawh nasep hawmin, ngimna sawmna ah kikum khawm ding uh hi. Tate pattahna ah nu leh pa in hun tam zang uh hen. Amaute huhna pahtawi in, amaute muanna zong manpha sak hen. Amau tawh kithuahna zong nuam sa uh hen. Tua hileh tate in nu leh pa lungsim ze-uailo takin thukkik ding uh hi. Nu leh pa vangikte zangtuam bekthamlo-in, tate in zong aman ciangtan theihloh kipattahna ngahding uh hi. Innkuan kithuahna hong khauhpai dinga, zia leh tong lamtohna ah hong thuklut zaw ding hi.20

Lungsim leh Kha Khantohnaah Hoihsakin.— Nu leh pa vanpuakte azangzaw dingin hanciamna in khangnote adingin nopsakna hisak in. Innkuan sungah angsung khuatna omsak kei in. Amaute khatciatin apuak nasepte hangin muanna leh kimanna athalawh uh ahi hi. Kumsialin mantakin ma sawtto ding uh hia, siamna akicinglo khangno hunte damdamin nusia ding uh hi. Hibang nasepte thumaan takin asepna uhtawh lungsim, kha, leh sia leh pha theihnaah akhancin ding uh ahi hi.21

Pumpi Damsakin, Lungsim Tawldamsak.— Kipaktakin Nu leh pa nasep huhna ah itna ngaihmuanna leh Pasian pahtakna kingah hi. Taksa damna leh lung nopna tawh Topa in thaman piading hi. Akithadawn nu leh pa in tate tawh gualnuam takin dam nading leh khat leh khat kithuahpih hunding ngah uh hi. Tua in nuntakna sau sak hi. Nisim inn nasepte asemdingin akipantah tate in inn panin pusuakin milakah kimanna neitakin kihel ding uh hi. Neulai in sangkhan sungah kikhumcipin, lungsim pumpi in haksatna athuakzo dingin akhauhlo pilna sangin hoih zaw pek ding hi.22

Khatveivei, tate in sangah nakpi takin nasem kei zawin innah kipattahna nei zaw leh hoih zaw hi. Tuabanah thukhualin ahuh theih dingin hilhding ahi hi. Laibu panin thu tampi kisin a, ahizongin nisim nuntakna adingin kipattahna leh kikhalna in kisam zaw hi.23

Tawldam takin Ihmutding.—Nute in tanute anbuk ah paipihin lungduaitakin pilna piading hi. Tua hileh pumpi khanna hoihdinga, sagolhte zong thamalh ding hi. Ni atum ciangin alungngaihna zong cidam huaiding hi. Gim khading uh hi, ahihangin tua bangin nasep khit ciangin bangzahin ihmut khum ding hiam? Ihmutna in pianpih thadimna hia, agim atawk tha leh ngalte in nikhat nasep kik nadingin tha thak tawm kik sak hi. Tate nasem maw semlo, cih tawh vaihawm kei inla, amaute huhna innah kisam hi, amaute hun zong manpha hi, amaute nasepna nakisap lam lak in.24

Thadahin tate khantoh sakna in mawhna hi. Aguh atangte uh kitang sak inla, gim sak zaw in. Uang sep keipeuh le-uh, amaute gimnain nang’ gimna hong nawng kai saklo hi. Gimna leh thabeina kibanglo hi. Tate in nasep khel zelzel ding hoih hi. Khanghamte bangin tawlngak zelding kisam hi. Aneu laipek panun, na septheihding sin kisam a, kimanna aneih lamuh theihna in lungnopna piang sak hi. Cidam huai takin nasepna in ihmu nuam sak a, azingcianga nasep nadingin thathak ngahsak hi.25

Tate in hong Nawngkaisak, ciken.—Nu pawlkhatin, “tate in ahong huh uhciangin hong nawng kaisak hi” ci thei uh hi. Kei zong kaci hi. Ahihhangin ka theisak kei hi. Na tate phatin. Thu gual khat panin gual khat, thukhun khat pan thukhun khatah hilh in. Hihin tangthu maimai simsangin hoih zaw a, phone sap sangin phazaw hi. Leitung kizep kipuahna zuihna sangin hoih zaw pek hi.26

Ettehding Lim.—Hunkhat sung Vantung Mangpa, Minthanna Kumpipa in Bethlehem bawng-an kuang sungah naungekom-in, anu angsungah kitawi hi. Aneulai in athumang naupang bangin nasem a, nu leh pa deihna tangcing sak hi. Tuabangin asepna tawh naupang khatin asiamna tawh kituakin nasem hi. Tuabang mahin naupangte in zong Christ ie limlahna enin kipantahding hi. Innkuan thupha apia dingin Christ nungta hi. Nu leh pa thumangin a innah mission nasep sem hi. “Naupangin khangto a, kha ah thahatin, pilna tawh kidim hi: Pasian’ hehpihna in Ama tungah aom hi” naci hi. “Jesu in apumpi leh pilna-ah khangin mite mai l eh Pasian’ mai-ah maipha angah hi” ci lai hi.27

Hihin siate leh nu leh pate hunhoih hamphatna ahi hi. Amaute kikopin tate thuhilhin, Christ ie nuntaknah kipaakin nuntakna tuidawnin Ama’ zia leh tong ciing uh hi. Honpa neulai kumte in kimanna nei takin nungta hi. Innah anu huh hi. Inn nasep asepna leh apa’ lettama bukah anasepnate in mihon lakah vaikuanin a Pa’ sawlna asepna tangtung sak hi.28

Leitungah Ama’ nuntakna in eite adingin ettehding lim a hi hi. Innah thumangin huhna pia hi. Lettama nasep zong sinin, Nazareth a nasepna bukah akhut mahmah tawh nasem hi. Aneulai panin leh akhangno hun a anasepna tawh alungsim, apumpi khangto sak hi. Athagumte za’ang zatlo hi. Acidam dingin apumpi kema, bangbang nasep hileh ahoihpenin sem hi.29 

(Zop Lai Ding)