Cinate A Damsak Saang (May 6, 2017)

Sim Ding Hi Lo, Geen Ding!

May 6                                                               Gabon Gam

Cinate A Damsak Saang (Agen: Jean leh Andre)

           Jean Sangwa Samale pen Gabon gam, Libreville khuapi ah a kiphut taan (12) Adventist saangpi ah siapi a sep laaitak ahi hi.
           Ka saangpi uhpen zatopi tawh a kibat naciang khat om hi. Mi khatpeuh a ci a nat ciangin thukin takin cina kibawlna inndei sungah paipih uh hi.
           Khangnote gamtat hoihlo a om ciangin anu leh apa te-un ko hilh dingin hong paipih uh hi. Tua ciangin saang pan a sin uh a hoih mahmah Adventist pilna haang leh Siavuante Maangpa Topa Jesu tungtawnin damna ngah uh hi.

“A Kikheel Nop Keileh Amah Kisia Taktak Ding”
          Zuu leh guihtheih khamtheih a naak zat mahmah Mapikoud a kici khangno saang-naupang khat ka pantah thei uh hi. Amah pen kum (18) phata in taan (7) ah pilna sin pan hi, a haangin laivuanna ah kia zeelzeel hi. Ni khat, saangpi ah anu leh apa hong pai in a tapa vaitawh kisai hong hopih hi. “Ka tapa uh a hoih nadingin ka hihtheih tawpun ka hilh uh hangin kikheel tuan lo hi. Ka cih nading uh ka thei nawnkei uh hi. Kikheelna a neih kei leh kisia paisuak taktak ding hi. Ka veengte un na saangpi uah na hilh uh pilnate a hoihna leh siate zong deihsakna na neihna uh hong geen hi. Kumpi saangah saangsaap piak kullo hi, ahi zongin ka tapa uh nong pattahsak zawh ding uhleh sum tam a bei zongin ka pia nuam uh hi,” ci-in hong kun uh hi.
           Ko zong Mapikoud ka saang uh a, pattah ding nasep ka kipan pah uh hi. “Mapikoud aw, na nuntaakna a hoih in kheel thei lua hi teh. Nang  lam panin haksatna om thei khamah ding hi, ahi zongin na kikheel nopnaak leh na masuan ah hong panpih ding hi ung. Zuu leh guihtheih khamtheih a zangte na muh mahbang ahi hi. Nang tungah tua bang siatna piang lo ding hi. A hoih a cidam mailam nuntakna pen na teel thei hi,” ci-in thaa ka pia uh hi.
           Saangpi Pastor tawh kop in nisim in Mapikoud tawh Lai Siangtho thu ka sinkhawm uha, thu ka ngetsak uh hi. Amaa’ aadingin bel a na zat ngei hetloh hi a, saangpi ah hong kah tuungin Topa Jesu’ thu mal khat zong a thei kha naailo ahi hi.
          Cidamna tawh kituakin a nuntaak ding ka hanthawn uh a, laisinna ah makaai dingin masuan ka pia uh hi. Amah zong, damdam in khaalam, cidamnalam leh lungsim ngaihsutnalam ah hong khangto hi. A zuudawn leh guihtheih khamtheih a zongsatnate tawp in Topa Jesu’ khut sungah a nuntaakna kipum-aap hi. Mapikoud kikheelna haangin anuu leh apaa zong lungdam lua uh ahih manin, a naau pasal nihte zong saang hong kah sak uh hi.

Hihmunah Ki-itna Khang
Kum (19) a phaa Moukala zong Mapikoud tawh kibang hi. Amah zong laivuanna ah kia zeelzeel ahih manin taan (9) kah pan hi. Anuu leh apaa in a tapa uh a zateep leh a zuudawn a tawp theih nadingin huhna hong ngen uh hi.
Ko zong itna tawh Moukala ka angkawi uh a, Topa Jesu’ kiangah ka tonpih uh hi. A tapa uh kipuahphatna a muhuh ciangin anuu leh apaa zong lungdam lua uha, a naunuu zong saang hong kahsak uh hi. Hih saangnaupang thak nih in zong tu-in Topa Jesu it uh a, biakinn ah hong kikhawm den uh hi. Siapi luui Andre Kabwe zong tu-in thuthang pawlkhat hong gen ding hi.

Kuama Phawkkhak Loh Numei
Gabon gam panin kong hopih hi. Ka saang nasepna uh tungtawnin Topa Jesu in nalamdang a bawlna thu kong gen theih pen ka lungdam mahmah hi.
A tuamdiak in a nuntaakna a kikheel saangnaupang numei min peen Dorcas ahi hi.
Anuu leh apaate thu ka thei kha keiaa, ahi zongin Dorcas pen saang hong kah ciil laai-in a pii tawh omkhawm uh hi. Ama’n zaa teep in zuu dawn aa, a cidamhuai lo zongsatnate nuntaakpih in Pasian thu theikha vetlo hi.
Tu-in Dorcas tawh kiho thei le uhcin hoih lua ding! Ama’n Topa Jesu amaa’ Gumpa in saang baanah, tui kiphum zen hi veh aw! Ama’n nisim in Lai Siangtho sim den a, Pasian thute leh Ellen White laibute a phone sungah koih hi. Ama’n a saang kahpihte leh a veengte Topa Jesu’ kiang paipih hi.
Ka saangnaupangte khat un, “Dorcas meel haih ta ung. Amah kikheel khin ta. Amah a kikheel khit ciangin amah ahi dingin up ding haksa hi,” ci-in lamdangsa takin hong gen hi.
Dorcas pen Gabon gam ah a kiphut ih saangpi panin Topa Jesu kiang a zuatna hangin mi gamtatsia (100) lak ah a nuntakna a kibawl thakkik amah khat bek ahi hi.

Saang Aneeu Haangin A Nasep Lian
Ka taan (12) saangpi uhpen hih khuapi sungah a muibun mahmah Lungdamnathu taangkona phualpi ahi hi. Banghanghiam cihleh ka saangnaupangte uh a tamzawtham pen Adventist a suak naailote ahih baan uah, pawlkhatte bang Tapidaw nangawn suak naailo uh hi. Nisim in thungetna leh biakpiakna tawh lai hilhna ka pan uh hi. Saangnaupangte Lai Siangtho thu a nuntaakpih nadingun ka hilh uh hi. Topa Pasian tawh a kizopna uh a khauhpai nadingin a kisam mite huhna nasepna ah ka kihelsak uh hi. Topa Pasian’ hehpihna tawh saangnaupang tampitak mahin Topa Jesu kiangah a nuntaakna bup uh aap in, tui hong kiphuum uh hi. Saangnaupang pawlkhat in zong saang panin a sin uh Pasian’ thute anuu apaate tawh kop in Topa Jesu kiangah midangte tonpih uh hi.
Ka kiim ka paam uh ah nat leh sat a thuakte, lungsim kitamzaante in damna a ngah nadingin ka saangpi panun hih theih bangbang ka seem uh hi. Taan (12) saangpi thak khat a nei beh khin hi lee ung, a taangzai zawthamin ka seem zozaw laai ding uh hi.
Tu kuata Sabbath sawm leh thumna sumpi pawlkhat tawh taan (12) saangpi thak kilam dingaa, Topa Jesu kiangah mi a tamzaw tham ka tonpih thei ding uh hi.
Topa Jesu Khrist sungah sanggam u leh naute aw, nong huh zo ding uh hiam?

@@@@@@@++++++++++@@@@@@@