Sinna 2: A SIA THEILO GAMH LUAHNA

SINNA 2                                             APRIL 1 - 7

A SIA THEILO GAMH LUAH NA

__________________________________________________

NIPINI (SABBATH) NITAK LAM April 1

SIM DINGTE: 1 Pet. 1:1, 2; Johan 3:16; Ezek. 33:11; 1 Pet. 1:3-21; Siampi. 11:44, 45; 1 Pet. 1:22- 25.

KAMNGAH: "Tu-in lungdamna thuman na zuihna hangun note kisian’suah khinin, na thu uppih mite uh lungsim tak tawh itthei khinta na hih manun na lungsim khempeuh uh tawh limtakin na ki-it un." (1 Peter 1:22)

Laisiangtho thubu ih sin, ih kihilhcian nop ciangin, Bu khat tungtawn a hi a, khenno khat tungtawn cih danin ih etkaak ziau ciangin dotna a om te ih dawn na ah, ih phawk ding thu in: A masa pen in, Hih laisiangtho mun in, Kua te bulphuh in aki-aat hiam cih, ih tel masak phot ding hoih hi. A nihna a thupi zaw ah, Banghangin ki-aat cih kician takin, ih tel ding hong thupi kik ding hi. Lai-at pa in, bang hangin, bang deihna tawh aat hiam cih ih kantel ding a hi hi. Paul laikhak sung panin, Galati bu pen, Gupkhiatna leh Thukham luanzia a telkhial Galati mite tungah laikhak a hi hi. Ih theihsa om mah bangin Thuciam Thak bu pen, a  mimal in a hi zongin, a mun amual bulphuh in, Lai-at te  in, a phamawh mahmah thu te, a sau leh a tom in, theih dinga kilawm a theihsak nop te bek uh a aat a hi hi.

Tua mah bangin Peter laikhak te zong, a hang’, a thu piankhiatna bulpi cihte ahi zongin, Peter in bang a gen nuam hi-a, bang hangin gelh cih te, kua tungah gen, bang ci bangin ei te in ei a dingin koi ci lak ding koi ci telkheh ding cih te, I theih masak kul hi.

Tua hi a, I muh tohtoh ding thu pen, Peter laikhak te in, khangthak ei te a dingin a hun zui a, a kisam mahmah thuman, thugui pi te hong lak ding hi.

NIMASANI (SUNDAY) April 2

GAMPUA LAMA OM TE A DING

Laikhak khat na ngah ciangin, “Dear Sir,” cih bek khawng tawh a hong kipat leh, tua lai in, na ki theihpih kholloh, na kinai pih khol loh khat kiang pan-in a ngah na hi ding hi.

Tu khang hun mah bangin tang lai in zong, Laikhak te standard nei thei mahmah hi. Peter masa laikhak zong ih sim ciangin, a patna ah, a khakpa leh kua te tungah khak cih, kimu khia thei hi.

1 Pet. 1:1 simin: Hih a neu khatna sungah, a thupian na bulpi, a nung a ma thu hong koi ci tel sak hiam?  

_____________________________________________________________________________________________________________________________________________________________________________________________________________________

Peter in a laigual masa pen ah, a ma min leh a ma hihna taktak hong pulaak hi. Paul in a zat zel mah bangin (Gal. 1:1; Rom. 1:1; Eph. 1:1), a mah leh a mah “Zeisu Chris Sawltak” ki ci pah hi. Pasian sapna a ngah “zaa” min tawh Zeisu Chris sawltak a hihna, Khasiangtho sawlna a ngah a hih zia hong ki pulaak hi.

A laikhak ngah ding te zong hong zom to paha, Asia Minor huam sunga om gam a hi, Pontus, Galati, Cappadocia, Asia, Bithynia sunga om mite a ding a hi hi. Tu hun ciangin, Bosphorus nisuah na Turkey gamhuam sung om gamte a hi hi.

Kinialna a om thei khat in, Peter Laikhak te pen, Jew thu-um mite ahih kei leh Gentile thu-um mite koizaw a ding hi zaw ding hiam, cih thu a hi hi.

1 Pet. 1:1 sungah, “exile”, “diaspora” cih kammal te a kizat na tungtawn in en le hang, Century khatna hun peka, Jerusalem gam panin, “aki thehthang, a lal khia khin te” a cih nopna hi ding hi. “Teelkhiat mite” (IPet. 1:2) cih kammal pan in, Jew te hi ta leh, Christian te hi ta leh a ci khawm tuak nuam zong hi thei hi.( IPet. 2:12, 4:3)sung ih sim ciangin, “Gentile” te bangin a ki thehthang Jew te mah a kawk nuam a hi hi.

1 Pet. 1:18; 4:3 sungah zong Christian a suak Gentile te sangin Jew’ te mah a ci nuam zaw hi ci in, Laisiangtho siam te in um uh hi. 

Bang bang ahi zongin, Kua tungah kigen hi cih buaina sangin a thupuak in, bang a gen nuam hiam cih pen a thupi zaw a hi hi.

NINIH NI (MONDAY) April 3

A TEELKHIAT MITE

1 Pet. 1:2 sim in: Peter in kua te tungah a laikhak hi ding hiam? Koi ci bangin lo se hiam?

_______________________________________________________________________________________________________________________________________________

Jew te a hi zongin Gentile te tungah ahi zongin a tuam in a gelh phial zongin a kician mahmah khat Peter in gen nei a; “Pa Pasian theihkholh na bangin a teelkhiat mite” na ci hi. ( 1 Pet. 1:2) 

Hih lai munah kidawp huai thu khat om kik hi. Tua thu in, Pasian in Gupna a ngah ding te leh a ngahlo dingte, a tung pek pan in, geelsa in koihkhin zo hi, cih thu hi a, Peter in zong tua Gupna ngah dingte leh a ngahlo dingte a tel khit man in a lo thei ahi hi, ci uh hi. Hih Laisiangtho mun in bel tua bangin a gennuam hi zenzen lo hi.

1 Tim. 2:4; 2 Pet. 3:9; Johan 3:16; Ezek. 33:11 sim in: Hih mun te tungtawn pan in, Peter in, “teelkhiat mite” a cih nopna thu hong koi ci telsak ding hiam?

________________________________________________________________________________________________________________________________________________

Laisiangtho in kician takin hong gen na ah, mi khempeuh hotkhiatna ngah ding cih pen, Leitung pian mapek in Pasian geelna a hi hi. (Eph. 1:4). Mi khempeuh te in siatna tuak lo in, nuntak tawntung na ngah dingin a hong teelsa te I hi hi. Gan sisan tawh a hi zongin, Zeisu sisan tawh Tatkhiat geelna a sang mi khempeuh a dingin Gupna ah muanna kicing om hi. 

Pasian theihkholhna (OmniScience) in kua te in, hotkhiat ngah ding, kua te in ngah lo ding cih a theih hangin, mihingte in, amau thu tawh a deihteel na uh, Pasian in thupi seh sak zaw hi. Pasian in, Itna tawh kho thei beka, aana (force) zang ngei lo hi.

Pasian in agamh luah dingin, hong teel zo hi ci in, ki theihcianna na neih zia, koi ci bangin laktel khia ding na hi hiam?

_______________________________________________________________________

NINIHNI (TUESDAY) April 4

THU BULPHUH: Tawhtang 

1 Pet. 1:3-12 sim in: Hih mun sung panin Peter in bang thupuak bulphuh pen hiam?

_________________________________________________________________________________________________________________________________________________________________________________________________________________________ 

Peter in, a laikhat te tungah, muakna kammal a zatna ah Thum gawm Pasian a hi, Pa, Tapa, Khasiangtho na bulphuh hi.( 1 Pet. 1:1,2), A neu 3-12 sungah, Pa leh Tapa, thu na bulphuh a, a neu 10-12 sungah Khasiangtho thu ultung sak mahmah hi.

Suahkikna a ngah, mi piangthak Christian te, Chris thawhkik na hang bekin a hong piak vantung gam aluah dingin ngak a ih awmna ih hihzia bulphuh hi. Christian te lamet na tawhtang in Zeisu thawhkik na tungtawn bek in kinga a hi hi, ci hi.

Peter masa sungah, haksatna a thuak Christian te thu kimu thei hi. A mau a dingin thawhkik na in om ding cih kammal in lametna guan hi. Tua banga a haksat thuakna un, a upna uh mei tawh sittel na bang hi a, kham banga a manpha a suak sak ding a hi hi. Peter’ laikhak a simkha, angah kha te pen, Topa Zeisu Leitunga a nasep nate a mukha a om kei uh hi. A hi zongin "a sia ngeilo, a nin ngeilo, a mual ngeilo tawntung vantungah note-a’ dingin a hong ki koihsak khin zo hi” (1 Pet. 1:4) cih kamciam te in, Upna leh Lametna guan a, Gupna khamuanna a nei thei sak hi.

Peter hanthotna kammal te sungah, Tanglai Kamsangte in hih hotkhiatna thu mah kanin ngaihsut belin neih zia uh leh gen belin a neihna uh tawh (IPet. 1:10) tha pia hi. A sia leh pha kido na sungah haksatna a thuakte a dingin upna pulak khiatna ahih zia a tawp dong thumaanna ah a cihtak huai zia tha pia tawntung hi.

1 Pet. 1:4 simin: Vantung ah” ama mite-a’ dingin a koih thuphate om hi” ci hi. Tu ni in, tua kammal, leh tua kamciam na, nangma tungah hong kici hi leh, na koici dawn kik ding hiam?

_______________________________________________________________________

NITHUM NI (WEDNESDAY) April 5

GUPNGAH TE NUNTAK ZIA

1 Pet. 1:13-21 sim in la, Christian te om zia ding koi ci bangin, bangin hong gamtang sak hiam?

_______________________________________________________________________

“Tua ahih ciangin” (1 Pet. 1:13) cih kammal, Peter in a zatna denna hang pen, tua nungah zoptoh ding kalsuan na om cihna a hi hi. Zanni a ih thusin na sungah Pasian hehpihna leh Zeisu sungah lamet na cih thu a hi hi. (1 Pet. 1:3-12).

Tua Hehpihna leh Lametna siksan in, Peter in, “na lungsim uh kawnggak gak un la”(1 Pet. 1:13), Zeisu sunga om Gupkhiatna a dingin citak takin, ding tang un ci hi. Na Christian hihna, na dinmun ding bulphuh na ah, ih om zia ding namthum kimu khia thei hi: a khatna ah Pasian zia leh tong neihna (1 Pet. 1:15,16) anih na ah, I gamtatna tawh kizui a thukhen thuak ding cih theihna 1 Pet. 1:17) leh a tawpna ah, Hotkhiatna thaman telcian taka ki theihna ( 1 Pet. 1:17-21) cih te a hi hi. 

Ih nuntakna hong gamtang sak dingin a masa pen gamtatna in, Pasian Zia’ theihna ih cih mah bangin, Pasian siantho na banga siantho ding ngetna a hi hi. A hong sampa siangtho a hih manin I siangtho ding kutna kammal ahi hi. (Siam. 11:44, 45). Tua ahih manin Zeisu nungzuih na ah Siangtho pelmawh ding a hi hi.

A nihna, Lawpna sungah i gamtat theih na dingin, Pasian pianzia I theih kul a, A siangtho Pasian in, ih gamtatna tawh kizui-in a kibang kimin thu hong khen ding a hih lam ih phawk ding a hi hi.

A thumna ih gamtat zia ding in, Christian ih cih te pen, ginkholh loh pi tuahsiat na hi lo zaw in, Leituhg pian mapek a duan kholh sa, leh man tanh theih loh Zeisu sisan tawh hong leisa, tatsa I hih na tawh kizui in,(1 Pet. 1:19,20) ih nuntak na manphat zia theih ding ahi hi.

Tuni in mi khatin, bang hang in Christian suak? Bang lunggulhna tawh, kua sawlna tawh Christian suak hong ki ci leh na koi ci dawn ding hiam?

_____________________________________________________________________

NINGA NI (THURSDAY) April 6

KHAT LEH KHAT KI-IT NA

Christian nuntakna ah siangthona leh cihtakna koi ci lah khiat ding cih, Peter in hong koi ci hilh hiam? 

1 Pet. 1:22-25 sim in, Hih laisiangtho mun pan in, a ngaihsut phatmawh huai mahmah Christian hihna koici bang hiam?

_______________________________________________________________________________________________________________________________________________

Peter in bel, Christian I cih te pen, sianthona a nei te, thumaan thutak tawh a nungta te(1 Pet. 1:22)ci hi. “Siangtho sak” cih kammal pen mangpau in, (purify, or cleanse cih kammal leh holy leh holiness)cih hi a, Zeisu sungah kiciam na leh Tuiphum na tungtawnin a hong piang nuntakna thak a hi hi. (1 Pet. 3:21, 22). Tua Siantho na pen, Pasian a dingin ki tuamkoih khiatna leh, thumaan lampi zuihna pan bek in kingah thei hi.

Tua sianthona lampi sungah a kalsuan mi-in, a nuntakna uh kikheek dinga, midangte tawh innkuan khat banga ki lawmtat theihna hong piang sak hi. 1 Pet. 1;22 sunga “ki-it un” cih kammal pen, “Philadelphia”hi a, “unau banga ki-it na, innkuan sunga ki-it dan tawh a kibang kammal a hi hi.

“Itna” cih kammal Greek pau in, a khenkhen in om hi. Lawmta ki-it na pen “Philia” ci uh a, anu leh apa lawmngaih ki-it na pen “eros” cih leh, midang te phattuam na dingin i piakkhiat it-na siangtho pen “agape” ci uh hi. Peter hong sawl “na lungsim khempeuh uh tawh limtakin na ki-it un”cih kammal in Agape itna zong a kawk nuam hi a, “lungsim khempeuh tawh” it dingin hong sawl a hi hi. Tua banga lungsim neih theih na dingin, pianthakna (nihvei suahkikna) nei te bek tung panin a piang thei bek ding a hi hi. (1 Pet. 1:23, 1:3).

Tua a hih man in, “lungdam na thumaan zuihna” in Pasian kiang bek panin hong piang thei thu hi a, thumaan ih cih zong upziau theih thu hi lo in, nuntak pihna a hi hi.

Koici bangin ki-itna sin thei ding I hi hiam? “lungsim siangtho” tawh ki-itna I neih theihna dingin koi ci bangin lakkhia thei ding I hi hiam?

KIGINNI (FRIDAY) April 7

SINBEH DING: Peter in a laikhak masa sungah, To thum Pasian ahi, Pa, Tapa, leh Khasiangtho te thu bultak in hong tellak khiat banah, Pa Pasian in a tapa tungtawn panin, Gumpa ding hong vaihawm saka, khasiangtho sungah, thumangin siantho na a ngah dingin a hong teelte ih hi hi. Zeisu ih it man-in, hong sihna leh thawhkikna hangin tawisanna angah “a mualthei lo gamh” ahi Vantung gam a luah dingte ih hi hi. Gimna leh haksatna te sungah lungmuang sinnuam taka om theihna a hi zongin, Upna sungah thumaan na leh itna tawh mite phattuam na a piang sak thei nuntakna ih neih theih na dingin, Peter hun lai mah bangin tuhun a dingin Peter laikhak in hong hanthawn hi. 

KIKUP DINGTE:

1. Peter masa, a lian khat sung bekbek ah nihvei a kilang , Zeisu thawhkikna thu hi a,( 1 Pet. 1:3, 21) Upna sungah , ih kalsuan na dingte ah, tua thawhkikna athupit na-in koi ci bangin hong huzap hiam?

2. Hih leitung na te khempeuh a sia thei, a maimang ding, munkip om lo hi na pi, “Asia thei lo gamh luahna” cih Peter kammal tungtawn pan in bang lam-et na nei thei ding ih hi hiam? (Dan. 7:8 sim in).