Sim Dingte: John 15:7; Matt. 7:7; Late 66:18; James 1:6-8; 1 John 5:14, 15; Sawl. 2:38.
Kamngah: "Tua mah bangin Khasiangtho in ih thahat lohnate hong huh hi. Bang hang hiam na ci uh leh, eite in thu nget ding a kilawm bang in ih ngen thei kei hi. Khasiangtho mah in muk tawh aki pau theilo tauna tawh, eite ading thu hong nget sak hi. Lungsim sung azongpa in Khasiangtho’ lungsim athei hi. Bang hang hiam na ci uh leh, tua Khasiangtho in misiangthote ading Pasian’ deihna tawh kituak in thu anget sak hi." (Rom. 8:26, 27, NKJV).
Kha lam nuntakna dik leh thungetna tonkhawm hi. Nasia tak a thungetna lo tawh kha lam nuntakna taktak omlo hi. Kisiikna khit akisamhpipen thu in thunget nuntakna vai ah khanlawhna ahihi. Thungetna ah zong Khasiangtho huhna om den cih pen thu deihhuai ahihi. Thungetna in Pasian tawh hong kinaizaw sak hi; Ama kiang ah hong domto hi. Upmuanna tawh thungetna in akicing Pasian kamciamte hong sangthei sak hi. Pasian in Ama thu ah hong kamciam thuphate ih san ciangin ih nuntakna hong kipuahpha ding hi. Pasian in iki tanggsapnate khempeuh hong pia zo lua pha mahmah hi. (Philip. 4:19). Thungetna diktak leh khalam picinna lailii ah Pasian om a, anih un Laisiangtho bulphuh tuak ahihi.
Ih kha nuntakna pen ei phut khak thute leh ei ngaihsutzia te peuh bulphuh a neih ding hilo bek lo in ih thungetnate zong ei muh ei gel dan ei upmawh dan peuh bulphuh a neih ding hi lo hi.
Thungetnate ah Topa ompih nading deihna leh Khasiangtho in Amah lunggulhna nei a, khat leh khat thungetna ah ih ki phawk ding ahihi.
*Mar. 11 Nipini ading in tukal sinnate hong kiging in maw.
Pasian Deih Abang Thungetna
Thungetna tampite a etlawm puanpi tawh akikhuh hangin lungsim kuanziate ngaihsut huai hi. Mi khatpeuh tawh ih kikholh nop man in anuntak lai ding thu ngetsak in; vai khatpeuh ah ei kihel ih hih manin gualzawh na ding thu kingen thei hi. Ei nuntak nopdeuh nangin mi khat kikhel' ding thu kingen thei hi. Ih thunget pen Pasian deihna sang in ei deihna tung ah kingazaw thei zel hi. Pasian lungkim nading cih pen ngimna tuam dang ahihi.
John 15:71 sim in. Ih thungetnate ah, ei Zeisu tung kinga in; Ama thu ei sung ah hong ten ding, bang hang thupi hiam? Zeisu tung ah ih kingak kei leh ih thungetna in bang dang ngimna nei ding hiam?
____________________________________________________________________________________________________________________________
Amah zongg a, Ama kikholhpihna ah lungkimh ding pen hong piak ding dangte sangin thupizaw hi. Ih nuntakna ah Pasian ih masak leh, Ama deih bang ih semnuam ding a, Ama ngaihsutzia in ih lunggulhna hong zunn ding hi. Pasian pen ih thunget bulpi ahih leh Ama lam ngaihsutna tawh thu ingen ding hi. Ama ngaihsutzia tawh ih nuntakna teng imu ding hi. Hih bang lungsim kuanzia in ih thungetna pisuah sak hi.
Pasian in ei ading nasia takin hong ngaihsut sak hi. Ih vai teng ah mapang nuam in ih patauhnate, ih launate, ih deihnate, ih lametnate, ih lunggulhte, ih matutna, ih lungnopnate, ih guallehnate khempeuh ah mapang nuam hi. Hih vaite ah ih lawm hoihpen bangin ki kamkum thei hi. Na khempeuh Ama muh bang in ih mu thei ding hi.
Thungetna in Pasian khel lo in; ei hong khel hizaw a, nuntak akhel Ama ompihna angah ihihi.
“Thungetna in; Pasian kiang a lawmta bang a, lungsim sung a om bang genna ahihi. Ih vaite Pasian theihsakna hizaw lo in Amah ih san theih nang hizaw hi. Thungetna in Pasian ei kiang a tuaksuk sak hizaw lo in ei Pasian mai hong tun' hi zaw hi.” -- E.G. White, Khazih Kiang Zuatna, SC p. 93.
Thupi mahmah hi! Thungetna in eite tung leh eite ading a hong sepsakna vai teng hong telsiam sak hi. Thungetna Pasian hehpihna, vangliatna, leh ompihna hong ngah thei sak hi. Thungetna in Pasian tawh hong kinai sakzia athei kha ngeilo ih om kha hiam?
Na thungetna vai ngaihsun in. Bang hun in ngen in, bang hang in ngen na hi hiam? Tua in na kha lam dinmun leh Pasian tawh na kikholhzia bang hong gen hiam? Na khel huai thu aom hiam?
Laisiangtho a Thungetna’ Bulpi: Pasian Kiang ah Ngen
Matt. 7:72 sim in. Pasian kiang pan ih ngah ma in ih nget kul phot hi. Amahn na khempeuh thei ahih leh ih nget ding bang hang in thupi hiam?
____________________________________________________________________________________________________________________________
Ih nget ciangin ih deihna leh Pasian ih muanna hong kilangh hi. Ih belh ih muan Topa tung ah huhna panpihna angen ihi hi. Pasian ih koh ciangin midangte muhna ah ei vai a hong tat ding phalna apia ihihi. Pasian in ei ngetna deih hi. Ih lunggulhnate Ama kiang a nget ding ahihi. Ih nget kei leh hong kamciamte kingah lo ding hi. Zeisu in: “na nget uh leh na ngah ding uh a, na zon uh leh mu in, na kieuh uh leh kong hong kihon ding hi” hong ci hi. Angente'n ngah a, azong te'n mu in, akieu te kong kihon hi” (Luke 11:9, 10, NKJV).
Mark 11:24; 1 John 5:14, 15; leh Late 66:18 sim in. Bang hang in Pasian kiang ah thunget lianlua om theilo hiam? Pasian cingh a hong pianuam mahmah cih ih theih ding bang hang in hoih hiam? Ih thungetnate ih ngah nangin bang kisamh masa hiam?
_________________________________________________________________________________________________________________________________________________________________________________________
Bang peuh ahi zongin Pasian kiang ah kingen thei hi. A thuneulua leh a thupilo omlo hi. Pasian sep theihloh alianlua zong omlo hi. Amah vangliatna tawh kidim hi. Upmuanna tawh Laisiangtho sung a kamciam khempeuh Ama deihna tawh kituak in Ama khut pan ngah theih ahihi.
Ih nget ih ngah nangin akisamh thu pawlkhat om hi. Pasian iki pumaap kei a, ih ngetnate ih angsung vai teng peuh ahih mawk leh ih thungetnate Pasian in hong dawng lo ding hi (Isa. 59:1, 2 en in). Ih thungetnate atanggtun nang in Pasian deihna bang zuih nopna leh thumanhna kisamh hi. “Hong kamciam silpiakte ading thumanhna kitanggsam hi.” -- E.G. White, COL p. 145. Pasian citna thei in Ama kiang ih nai ngam ding hi. “Bang mah ki tanggsamh kisa lo ngetnate tawh Topa min kithang sak thei lo hi. Thu um mi khempeuh in lungsim takpi leh lung muang takpi a hehpihna tokhom kiang naih ding Amah'n deih hi” E.G. White, Signs of the Times, Aug. 7, 1901.
Laisiangtho a Thungetna’ Bulpi: Um (Upna)
Mark 11:24 sim in. Thungetna vai ah ngetna ban ah bang kisamh lai, Zeisu’n ci hiam?
____________________________________________________________________________________________________________________________
Nget bek tawh kicing lo hi. Ih thungetna ah athupi nihna in upmuanna ahihi. Hebrew thubu in, “upmuanna lo tawh Pasian ki lungdam sak theilo na ci hi. (Heb. 11:6, NASB). Laisiangtho sung a 3000 val kamciamte naupang bang a lungsim siangtho tak tawh ei vai ah hong picinh sak ding inget ciangin, eite ading a ahoih aphapen bangin ahunhun in hong sem ding cih ih up kul hi.
James 1:6-8 sim in. Upmuanna cingtaak lote na koici gen hiam? Aki kamciam silpiak ngah nangin bangh hang in upmuanna kul masa hiam?
____________________________________________________________________________________________________________________________
Pasian ih zuat ciangin Ama om takpi, Amah azongte thamanh pia cih ih up kul hi. A lawhcing thungetna pen Pasian in dawng thei cih bek hilo in; Ama deihna tawh kituak in hong sem ding cih ih up kisamh hi.
Laisiangtho sung ah upna leh muanna kizomh hi. Midang khat amuanhuai lam itheih ciang bek in ih muang hi. Pasian kamciam vai lunghei ineih khak leh ki hoi in ih lamet bang ngah ding lamet omlo hi. Um icih ciangin Ama kammal bang a um a, ih muan zawhloh nangawn ciangin Amah leh akamciamte tung ah ih kingak ding ahihi. Bang hang hiam ci leh, “upmuanna in muan'takpina hi a, muh nailohte up takpina ahihi” (Heb. 11:1, NASB). Upmuanna in Pasian kamciamte tung ah kingakna hi a, acih bang a muanna ahihi. (Heb. 11:11). Upmuanna in “Pasian zuau cih om theilo cih thei hi (Heb. 6:18, NASB). Pasian pen zanni, tuni, atawntung in kibangh den hi (Heb. 13:8). Upmuanna in Pasian adingin apiang theilo om kei cih um hi (Luke 1:37).
Upmuanna in Pasian saal kongpi hong hi. Khasiangtho tungtawn in Pasian in mihingte lungtang Pasian kammal bang in lawng a, upmuanna tungtawn in ih thungetnate in vangliatna tawh adim Topa khut zann hi.
Upmuanna ah a khauhzaw ding in bangh in hong huh hiam? Zeisu zia, bangpen in na kitanggsapnate ah hong huhnopna leh hong huhzawhna ah bangci thu in hong lungmuang sak hiam?
Laisiangtho a Thungetna’ Bulpi: Pasian Kamciamte Va Ngahnget (Claim)
Ih thungetna bang ih ngahnget kei leh ih upmuanna amawkna hi.
1 John 5:14, 15 sim in. Ih nget bang Pasian in hong pia in ngah takpi cih lungmuanna bang ci neih thei ding ihi hiam?
____________________________________________________________________________________________________________________________
Laisiangtho a thungetna' bulpi thumna in san'na ahihi. Pasian kiang ah ngen a akamciam ih up leh ih va ngahnget ding ahi hi. Lungdamkohna tawh ih ngah lam theisak a, Pasian kamciam va ngahnget (laak) ding ahihi. Tua bang in ih lungsim ah Ama kamciamte hong tengg hi. E.G. White, gennah, “hong kamciamte khempeuh, nget theih hi a; ih ngah lam zong ih up ding hi in lungdamh kohna tawh ih ngah lam theih sak ding ahihi.” -- E.G.White, Pilsinna, Ed. p. 258.
Luke 8:113 sung ah Zeisu in Pasian kammal leh khaici genteh hi. Tua bang mah in singkung pen atangg ah om a, Pasian silpiakte in kamciamte sung ah om hi. Kamciamte va laa in, Pasian tung ah lungdamh ikoh ciangin tua kamciam silpiak angah khin ihihi. Imuh ilawn theih ma limh in hong kikamciam silpiak upmuanna tawh asaang ihihi.
John 11 sung a Lazarus thawhkikna vai ah Zeisu in hih bang dan thu angen ahihi. Hih vai ah Pasian deihna Zeisu in thei lianlian hi. John 11:11 ah Amah in Pasian deih bang bawl nuam in thumang hi. John 11:39-41 sung ah, Lazarus, han sung ah aom lai hangin, tho kik sak ding ahih manin lungdamh ko hi. Pasian tung ah lungdam akoh khit ciangin angetna bang in ngah hi. Pasian tate ihih manin Ama kamciamte tungtawn a, nungta ding ihi a, hong telgenna tungtawn hilo hi. Ih telcian loh hangin Akamciamte ih muang thei hi.
“Topa in, na haksat hun ciangin hong ko in ci hi. Late 50:15. Ih tangsapnate leh ih lungbuainate Amah koo ding in hong khoo hi. Thu ngen tawntung dingin hong sawl hi. Haksatna hong phulamm lian ciangin ih lungdeih thute ih sunn ding ahihi. Thu nget pahlianna tungtawn in Pasian ih muan takpina akilangh sak ihihi. Ih kitanggsapna thu in, thu ngen tangtang ding in hong lampii a, ih vantung Pa in ih thumnate na zaa takpi hi.” -E. G. White, Christ Object's Lesson, p. 172.
Vai khempeuh thungetna tawh Pasian kiang itut ding bangh hangin thupi mahmah hiam?
Khasiangtho Ngah Nang a Thungetna
Eph. 3:16 leh Sawl. 2:38 sim in. Ih nuntakna ah Khasiangtho ngah nang vai hih munten bangh hong gen hiam?
____________________________________________________________________________________________________________________________
Ih nget ding tampi om sung pan tulai haksat hun a akisamh phadiak thu khat om a; tua in Khasiangtho silpiak ahihi. Hih in anasia-pen Zeisu' hong piak theih silpiak ahihi. Khasiangtho piakkhiatna ah, Pasian in Amite tua sang a thupizaw apiak ding dang omlo hi. Hih silpiak ah bang mah behlap theih hilo a, (Pasian ban ah piak ding dang om thei ding maw?). Ih nuntakna ah Amah leh Ama nasepna tungtawn in ih kitanggsap khempeuh kim hi. Khasiangtho thupha tawh thupha dang teng hong kizomh ding hi.
Ahi zongin tua teng adal thu poi mahmah khat om a, ei mah hi in, Khasiangtho ih kiging khakei den hi.
Laisiangtho thak hun lai mah bangin, kisiik a, ih nuntakna Zeisu ih kipumpiak ding akul masapen ahih lam ih phawk ding ahihi. Tua mah zong Khasiangtho' hong phawksakna bek mah tawh apiang thei hilai hi.
Ama hong phawksakna bang ih man ciangin mawhnate kisikna pen ih nuntakna ah Khasiangtho gah masapen ahihi. Kiniamkhiatna leh upmuanna tawh ih diklohnate pan hong ki hahsiang nading in mawhnate ih pulakk ding ahihi. Eite bang zah dong in niam lua, bang zah dong in Pasian leh Ama hehpihna ih nuntakna ah kisamh ihi hiam cih ih tel kul hi. Amah lo in, amangthang, ih mawhnate sung ah si a, tawntung maimanna alawhtaak ihihi.
Nasia tak a thungetna tungtawn in, Pasian hong kamciam Khasiangtho piak theih nang a kisam vai teng ih tanggtun ding hi. Tua ciangin Pasian ki-ang ah nget ding bek hong kisamh ta a, Amah in Akhasiangtho lungdam tak-in hong pia ding hi. Vantung Pa in, leitung pate'n tate silpiak hoih apiak nop uh sangin Khasiangtho hong pianuam zawlai hi --E.G. White, Ye Shall Receive Power, p.284.
Kha lam vai dangte mah bangin Khasiangtho silpiak tawh akicing-aman' pah hi lo hi. Zeisu tawisang a Khazih zialehtongg ih nuntakna ah kilangh sak in, Khazih pumpi ahi pawlpi lamhbeh in, midangte panpih thei ding a, zuun-na angah ihihi. Tua hi a, biakpiakna khat peuh ah Zeisu Khazih sangg in Khasiangtho aki tawisan zawk leh adiklo hi pah hi. Zeisu Khazih tungtawn in Pa kiang lung kituak a azuan thei ihihi.” (Eph. 2:18, NASB).
Bang hang in Khasiangtho pen Zeisu hong piak theih silpiakte lak ah alianpen hi thei hiam? Na nuntakna ah Khasiangtho tawh na kisawh khakna koici ciang hiam? Tua silpiak lo tawh na nuntak hong kikoici lamdan’ ding hiam? ___________________________________________
Kiginni (Friday) Mar. 10
Ngaihsut Beh Ding: E.G. White, “Asking to Give,” COL pp. 139-149 sim in. E.G. White, gelh thangah huai kamciamte “God has Prom-ised” (Washington , D.C.: Review andn Herald, 1982) pan sim in.
Thungetna lo tawh, ih nuntakna ah vangg omlo ding a, thungetna in tua vangliatna tawh hong zomh ahihi. Thungetna lo in Pasian tawh kizopna kinei theilo hi. Tua vang leh aki kamciam silpiakte neilo pi in ahawmmpi “akineih pong” bek kisuak hi. Tu kal sung a ih muh mah bangin Pasian in thungetna adawng, alamdang kamciamte hong pia hi. Ih hih theih zah tawh hanciam a, Ama deihna tawh kituak banga, ihih hi napi ingah loh ciangin eleh? Na thungetna angah paklo na bat ciangin lungkia pah kha kei in. Thungetnate leitung vaite tawh akisawh gawp lam Topa in thei hi. Mihingte in amau lunggulhna ngen uh a, Topa in amau lametna bangin tangtung sak lo hi. Sinna leh ze etna tuamtuamte paltan sak phot a, kiniamkhiatna tawh amau kitanggsapna diktak muthei sak hi. Amau lunggulhna diklote pic-in‟sakna tawh nawngkaipih uha, Pasian min a daisak khak loh nang uh ahihi. Amau tup tung a, aki hihsak khakloh nang un angette uh pialo hi. Pasian ih zuat ciangin kisiikna leh kipumpiakna tawh Ama deihna siangtho sangtawip-en ding ahihi.” -- E.G. White, In Heavenly Places, p. 89.
Kikup Dingte:
1. Thungetna in ih kha nuntak buppi hong koici huzaap hiam? Thu na nget teh hong koici sukkhak hiam? Na thunget ma leh na thunget khit hong kikoici lamdan’ hiam?
2. Thu ngenngen na pi nget bang leh lamet bang a, ahong piang lo mi khat tung ah, ata’ natna adamhlohna vai cih bang ahi zongin, bangci gen ding nahi hiam? Hih bang hun ah Pasian koici sin thei ding ihi hiam?
3. Nang tuahkhak thungetna vai tawh kisai thu leh tua bangh thute vai na ngaihsutzia ki en in. Pasian’ deihna theih ding ahanciam midangte, thungetna tawh kisai na gen theih ding, bang thu sin kha ngei na hi hiam?
4. Vaite akoici bang cih ih telloh kawmpi mah in thu nget veve ding bang hang in thupi hiam?
1 Kei sungah na om uh a, ka thute no sungah a om leh na ut peuhpeuh uh na ngen un; hong kipia ding hi.↩
2 "Ngen un hong kipia ding hi; zong un na mu ding uh hi; kiu un kongkhak hong kihon ding hi.↩
3 "Hih gentehna a khiatna: Khaici pen Pasian thu ahi hi.↩
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.