Zo Phualva Thupuak Vol 07, Issue 01

2017: Haksatna Kantan Kum

Kum thak thupha! “Pasian in note-a' ding lampi hong hon'sakin hong paikhiatpih ding hi. Salsuahna khuapi kulh panin paikhia-in na suakta ding uh hi. Kumpi ahi Topa mahmah in note hong makaih ding hi.” (Micah 2:13)

17 tawh Kisai Limlahnate: Lai Siangtho sungah 17 cih pen “Galte tungah gualzawhna” aihkeh “Gualzawhna kicing ngah” cihna in kizang hi. Pasian in mawhna khempeuh asawpsiangna ahi tuiciin beisak in, Hebiate kha 7na ahi Tishrei KHA, a ni 17 ni in Ararat mual ah tembaw khawklsak hi.(Pian 8:4).   Kilem ni (Day of Atonement) ih cih Pasian in mawhna teng a maisak ni zong a Kha7 kha, ni 10 ni in na bawl a, suahtaak ni leh gualzawh ni ahi hi.

Tu hun in haksatna te ih kantan ding hun ahi hi. A genkholhna ah “Tua ni ciangin na liangko panun ama vangikpi kinkhia ding a, ama hakkol pen na ngawng panun bei ding hi," a ci hi(Isa 10:24). Topa in a gen in ah, “Ka mite in haksatna kantan in gualzawhna kongpi ah lut uh hi. Galte in tuihual bangin hat mah taleh, Keimah Topa in, gualzawhna ka ngah sak ding hi. Amaute leitang tungah daihna om in, khanlawhna lian hong tung ding hi”.

Tu kum pen Pasian sawlna ih man nakleh Ama thupha te ong buak ding hi. Pasian’ kumpi gam tawh kisai nate ah ih khutte ih zalkhiat leh, ih daupai ding hi. "Note in Topa na Pasian uh thu mangin, tuni-a kong gen ama thupiakna khempeuh limtakin na zuih uh leh Topa na Pasian un leitung minam dangte khempeuh sangin a lianzaw-in note hong bawl ding hi. Topa na Pasian uh thu na man' uh leh hih thuphate khempeuh note tungah hong tung ding hi.”( Deut 28:1,2)

“Amaute in Pasian thupiakte a zuihna uh leh leitung maitang ah mi nuamsa in daupai ding hi. Thu mang le uh, gamdang mite kiang a tung natna te tawh kipelh ding uh a, lungsim thahat in pil ding uh hi. Topa’ vangliatna, minthanna leh hoihnate in amaute hauhna tungtawn in kilang zawsem ding hi.” COL p. 288

Tua banah Hebia niciaptehna ah tu a ih zat Romans niciaptehna ahi 2017 pen 5777 tawh kituak a, a gualzo namsau(crowned sword) cih lim la ahi hi. Namsau in a luite satmai a, a thak piangsak hi.

Ekklesia Kipankhia Hen: Pasian thu tangkona ah Lametna Aw tangko dingin uukna leh lawpna takpi tawh ong diang khia uh hi. Mi tampite in mipi kikhopna te ah Pulpit panin Eklesia tangko ding a, Pasian’ mite hong humop in, sapkhiatna hong nei ding uh hi. Galpa ie kulhpite leh a zungpite longkhia dingin Eklesia pen sathau kinilh ding hi. Pasian in hong lahna ah Eklesia in Langpangpa kulhpi te longkhia ding cih bek hilo in a thak lam beh ding hun hong ci hi. A zungte longkhia napi hangin, a thak ih lambeh kei leh a masa sangin kisia zaw ding hi.

An Laak Hun: Leitung ah kha mangthangte kaihkhop hun pen hong tung ta hi. Tul tampite kihonkhia ding hi. Middle East ah khanlawhna om ding a, tua in Arab leh Arab lo Muslimte kiang lungdamna thu tangkona masawn sak ding hi. Hih Khanlawhna ah Egypt hong makai ding hi. Tualsuak(Indigenous) mite in Pasian’ lawnna ngah ding uh hi. Saltaang banga ukcipna a thuakna mun panun amaute in a vanglian damsaknate ngah ding uh a, amaute tunga kibawl ngongtatnate maisak zawh nading hehpihna nei ding uh hi. A tawpna ah, amaute in vanglian Pasian’ hotkhiatna tha tawh minamte lok mang ding uh hi.

A lian leh a lamdang lungdamna thupuak nasep in tuma a om ngei nailo zah in manlang mahmah hi. Leitung in Pasian thuman te a san theihna ding in ih laigelhte leh laihawmte ahi hi. Lungdamna thupuak pen tu a ciang bek ding hilo a, leitung mongkiu dong a ban ding ahi hi. Kha Siangtho in Ama mi siangthote muk le kamte hong lawnsak ding a, tawntung lungdamna thu tangko ding in hangsanna hong pia ding hi.

Puahphate Sulnung: 2017 pen Puahphate hun kum 500 cin kum ahi hi. Mi tampite in minamte sungah puahphatna kisam hi ci uh hi. Khangnote kilomkhawm in diangkhia ding uh hi. Germany leh France ah Topa in nasia takin na hong sem ding hi. Calvin leh Luther te hong awngkhia ding hi. Social media te zong Gutenberg lakhetna innpi hong suak ding hi. Kha Siangtho in nasia takin na hong sem ding hi.

Terrorism leh IS: US galkap zong hong kilam pha kik ding hi. Biakna lam suahtaakna ong suakta kik ding a, makaite in zong suakta takin tawntung lungdamna thu hong tangko ding uh hi. Galkap sungah puahphate hong om ding hi. Leitungbup galkap zum tuamtuam ah Pasian’ Kha Siangtho in na hong sem ding hi.

Tawm bek ih mu thei a, tawm bekmah ih thei hi. Thu hoihte sinin ih letkip ding hun ta hi. Pawlkhatte hong tung pah lian ding hi a, pawlkhatte zong sawt nawn lo ding hi. Tu kum in Puahphatna a om kum hong suak kik ding hi. Tu kum in Haktsatna Kantan Kum ahi hi. Kum Thak Thupha!

? David Lian

Zo Phualva Thupuak- Vol 07, Issue 01 on Scribd