“Pasian Umlo khat Adventist Suak”

February 25                                                                                                                         Norway

Nipi 8na (1st Qtr, 2017)

“Pasian Umlo khat Adventist Suak”

(Agen : Torgier (simzia : Tolgaai)

            Norway mi Torgeir (Tolgaai) in, “Pasian in mihing khat ii omzia aneih kul hi” ci hi. “Kum tampi a meigong khin ka zi Cayetana (Kazetana) in a upna a genpih ding leh tapa khat a neihpih nadingin pasal khat a ma kiangah a sawl nadingin Pasian tungah thungen hi. Ahih hangin Pasian a umlo kei hong paisak mawk hi” ci-in genbeh hi.

            Torgier (Tolgaai) in Norway nungak khat tenpih khin aa, amah tawh ta (3) nei hi. Amah in nisim in zudawn mawk ahih manin a zi tawh kikhen uh hi. Zu thawl khat a dawn khit ciangin amah tawh a kibang aa zudawn a lawmte kiangah va hawh hi. Pasian a umlo khat ahih hangin Pasian tawh ki gamla lua ta cih hong kiphawk in a nuntak nadingin bang khat teeiteei bawl ding ahihna zong phawk hi.

            Lungdambawl hun ciangin, ahih ngei bangun, lungdambawl singkung a ta thum teng tawh hong zemkhawm uh hi. Ni thapai ama’n zudawn hi. Ahi zongin a lungsim sungah thusuak khat hong om a, “Bang hihhih mawk ka hiam” ci-in amah leh amah kidong in a kikhel ding kisam a hihna hong thei ta hi.

Peru Pau Thei Nading Sunmang

            Peru mite leh angeina uh in Tolgaai lungsim la mahmah hi. Amau’ kisiat na vamuh ding leh Peru khuapi ah zin ding sunmang in aman nei hi. 2002 kum ciangin a sunmang bangin Peru ah hong zin thei takpi a, agam leh amite it hi.

            Norway gamah hong ciahkik ciangin Peru tangvalte ni khat laihilh kipan hi. Tua tangval no papen Peru khua aa teng a pu kiangah hawh nuam ahih manin Tolgaai tawh anih un Peru khua zin uh hi.

            Norway ah Tolgaai hong kilehkik ciangin Spain pau sin pah hi. 2003 kum, nikhat ni-in a hawh nopna khuate gal-et dingin lam hong siau hi. A gil hong kial a hihmanin an sai khat a lut leh Kazetana ii an sai na hi gige hi.

            A hawhnopna khua dangte ah zin nawnlo in, Peru ah om suak a, a pawlpi vuah makai a sem Seventh-day Adventist pawlpimi ahi, Kazetana innkuan tawh hong kimu hi. Tolgaai pen Peru ah 2003 kum in thum vei hawh a, a nunung bel a hawh laai in Norway ah  Kazetana hong pai aa, a kiten nadingun amaa’ aading visa siauh sak hi.

Norway Ah Ciahkik

            Kazetana Norway ah Kazetana hong tun ciangin Tolgaai in Oslo khuapi aa om Adventist pawlpi Pastor pa kiangah biakinn omna leh kikhop na hunte dong hi. Pawlpi biakinn ah a zi tawh ki hawm aa pawlpi mite tawh a ki meeltheih nadingin Tolgaai in geelna nei hi.

            Tolgaai in Adventist pawlpi ah ahoih lam tuahkhak thu nei aa, damdam in Pasian in amah tawh na seem khawm hi.

            “Nikhat biakinn ah khukdin a ka thunget lam Kazetana in na thei hi” Tolgaai in ci hi. “Pasian in a sawt loin kei tawh nasep hong kipan ahih lam ka thei hi. Kazi tawh ka kikhen khit zawh khaguk ciangin zaa ka teep nawn kei a, zu zong ka dawn nawn kei hi. Nidang in zong ka hanciam zel a, tutung in bel Pasian in zu leh za ka lunggulh na hong paihkhiat sak hi. Pasian in biakinn ah a kikhawm ding leh ka nuntakna khel ding hong kipan hi cih ka um hi.” ci-in lungdam takin gen hi.

            Tolgaai in Lai Siangtho bu nei ngei lo a, Pasian’ thu tawh kisai theih nopna lungsim nei ngei lo hi. Ahi zongin, amah in, “Tu-in nisim in Lai Siangtho simlo in ka om thei nawn kei hi. Ka tehkaak nadingin kampau nam thum, Norway lai, Manglai leh Spain lai tawh sim ing. Pasian in hong kheel hi. Tuma hun lai-in Lai Siangtho kasin nuam kei a, tu in ahih leh Topa’ kammal sim lo in ka ni ka hunte ka mawk beisak nawn kei hi,” ci hi.

Damtakin Kikheelna

            Khaguk sung bang Oslo Adventist pawlpi ah kikhop khit ciangin pawlpikeem siapa in amah tawh Lai Siangtho thu a sin khawm nuam dang hiam cih dot na nei a, Tolgaai in zong sang pah hi.

            “Kha(4) bang Lai Siangtho ka sin khop khit uh ciangin “ Na ki tuiphum nuam hiam” ci-in Pastor Olsen in hong dot ciangin, “ Kiging khin ta ing” ci-in ka dawng pah hi. 2006 kum April 1, ni-in khua laizang pawlpi ah Pastor Tito in tui hong phum hi. Tua ni mahin ka zi zong tui kiphum kik a, ko aadingin tua ni pen ni lian ni thupi ni ahi hi,” ci-in lungdam takin Tolgaai in gen hi.

            Tolgaai in thu kihilhnate ngai in Lai Siangtho sim a, Kha Siangtho huhna tawh thei in damdam in kikhel ahihna gen hi, Kuamah in Adventist pawlpi mi a suah ding haanthawn loin zong langpan lo uh hi.

                        “ Ka kikhelna pen Kha Siangtho hang hi. Ka theih loh kaalin kikheel ing. Ka kikheel zia pen paakngum damdam in palh aa, paak khia tawh kibang hi, ci-in thangah takin Tolgaai in gen hi.

***************