“A mawhna a imcipte adau uh apai kei ding a, thum aa a nusiate in hehpihna ngah ding uh hi” (Paunak 28:13).
Pasian’ hehpihna ih ngah theihna ding lampi pen baihin, ahi ding mah zong ahi hi. Mawhmaina ih ngahna dingin a haksa nate ahih dingin Topa in hong sawl lo hi. Vantung Pasian’ kiangah ih ki-apna ding le, ih mawhna hong maisakna dingin, agim huai khual gamlapi zin kul lo hi, ei-le-ei kigawt bawl zong kul lo hi; a mawhna thuum a, a nusia-te in hehpihna a ngah ding hi. James in, “Khat-le-khat na khialhna uh kithuum un la, na cidamna dingun khat-le-khat thu kingetsak un,” ci hi (James 5:16). Pasian bek mah in mawhnate maisak thei hi, tua ahih ciangin na mawhnate uh Pasian’ kiang thuum un la, na khialhnate uh khat-le-khat kithuum un. Na lawm na gualte’ tungah na khialh leh na khialhna pulak in; hong maisak ding pen amau’ tavuan ahi hi. Tua khit ciangin Pasian’ kiangah mawhmaina ngen in; banghang hiam cihleh na hih khak na lawm zong Pasian’ neihsa hi-a, amah na hih khakna hangin amah a Piangsakpa le a Tanpa’ tungah zong amawh nahi hi. A thu pen Palai khat kia ahi, ih Siampi lian bel pa’ kiang tut ding ahi hi. Amah zong “eite mah bangin na khempeuh ah kize-et hi napi mawhna bawl lo hi,” “ih thanemnate ahong hehpih Pa” zong hi-a, mawhna neng baang khempeuh hong silsiang thei hi (Hebrews 4:15).
Lungsim kiniam khiat a, a mawhna uh Pasian’ maiah a pulak nai lote in, ahih masak bel ding uh ahih nai lo ahi hi. Eite in kisikna taktak nei nai lo-a ih mawhnate kih a, lungsim kitam kham zah a kiniam khiatna taktak tawh ih mawhnate ih thuum nai kei leh mawhmaina a zong taktak nai lo ih hihi; tua banga ih zon ngei nai kei leh Pasian’ sungah khamuanna ih ngah ngei kei ding hi. Hun bei sa-a ih mawhnate maisakna ih ngah nai kei-a leh, kiniam khiatna ih neih nop loh man le thuman thutak ih zuih nop loh man hiding hi. Hih thu tawh kisai kician taka hilhna om zo hi. Mipi lak ahi-a, ei kia in ahi zongin, mawhna pulakna pen lungsim taktak tawh gen khiat ding ahi hi. Sawl zawh thu-a hih hi lo ding hi. Ciamnuihna banga hih ding hi lo hi. Mawhna akih taktak khol lo te’ hih ding zong hi lo hi. Lungsim tawng pana pulak khia-a thuumna pen hehpihna tawh a kidim Pasian’ kiang tung takpi hi. La phuak siampa in, “Lungsim kitam khamte’ kiang nai-ah Topa om a, kisikkikna lungsim a neite honkhia hi,” ci hi (Late 34:18).
Thuumna aman taktak in mawhnate a malmal a ahi bang lian a pulakna ahi hi. Pasian’ tung bek a pulak ding pawl zong om kha ding hi; ih khialhna hanga athuak mite’ tung bek a ih thuum ding khialhna pawl zong om ding hi; mipi tawh a kisai, mipi’ tunga thuum ding pawl zong om ding hi. Bangbang hi taleh thuumna khempeuh pen ahi bang lian hidinga, na mawhna tektek mah na pulak ding ahi hi.
Samuel a khan lai-in Isreal mite Pasian’ kiang pan lam pial uh hi. A mawhna uh hangin gimna thuak pah uh hi; Pasian upna zong nei nawn lo-in, agam uh a uk Pasian’ vangliatna le ciimna zong thei nawn lo-in, Pasian’ vaihawm zawhna leh kep zawhnate zong muang nawn lo uh hi. Khua vannuai a uk-Pa nungngat in, akim apam uha minamte bangin ki-uk nuam uh hi. Lungnopna zong ngah man nai lo-in, “Ka mawhna khempeuh uh banah kumpi dang deihna mawhna ka behlap kha uh hi,” ci-in thuum uh hi (1 Samuel 12:19). A phawk khiat uh mawhna teek mah a pulak uh kul hi. Hehpihna atheih lohna un amau mah gawt a, Pasian tawh kikhensak hi.
Kisikkikna taktak le kipuah phat nopna a om kei leh thuumna pen Pasian in sang zo lo hi. Nuntakna ah kikhelna a om kul hi; Pasian’ deihloh na khempeuh paih khiat kul hi. Mawhna hanga dahna taktak panin hih bang hong piang ding hi. Ei’ sep ding pen ih mai-ah cian takin hong kilak hi: “Ki sil un la, a siangtho-in om un; Ka muhna panin na gamtat siate uh paai khia un la, asia bawl nawn kei un; ahoih gamtat ding kisin un; thuman kan khia un la, bawlsiat thuakte panpih un; pa nei lote hu un la, meigongte gum un,” (Isaiah 1:16, 17). “Mi gilo in kamkhapna pan a laak na pia kik a, a guksa na aloh kik leh; nuntakna thukhamte zui-a, mawhna abawl kei leh; amah nungta takpi dinga, a si kei ding hi.” (Ezekel 33:15). Kisikkikna thu a genna ah Paul in zong, “Pasian’ deihna tawh kituak dahna in no’ a dingin, a bangci cihtakna, a bangci siantho nopna, a bangci ki-awi lohna, a bangci patauhna, a bangci lunggulhna, a bangci thukhualna, a bangci thuman thukhenna hong piangsak hiam, na en un. Hih thu ah asiang na hihna uh na kilang khia sak zo uh hi,” ci hi (2 Corinthians 7:11).
Mawhna in lungsim ngaihsut theihnate asih sak ciangin, a mawh mi in a gamtat asiat lam zong hong thei nawn lo-in, a mawhna aliat lam zong hong phawk nawn lo hi; mawhna aphawk sak Kha Siangtho’ vangliatna a san nop kei leh a mawhna mu lo-in om pai suak ding hi. Mawhna pulak mah leh zong acih takpi hi lo hi. Mawhna a pulakna khempeuh ah, tua bangteng hang hikei leh tua ci gamtat kei ning, cih ahi zongin, hong kitai ahih manin, cih ahi zongin, ama mawhna pen paulap zong tawntung hi.
Adam le Eve in a kikham singgah anek khak uh ciangin, maizumna le launa tawh hong kidim uh hi. Paulap bangci zon dinga, alau huai sihna tawh koici kipelh ding cih bekbek ngaihsut masak in nei uh hi. Topa in a mawhna thu uh adot ciangin Adam in, “Kei tawh a om dinga Nong piak numei in a singgah hong pia-a ka ne hi,” ci-in a kim khat Pasian ngawhin, a kim khat a lawmnu ngawh hi. Numei in zong gul mawhsakin, “Gulpi in hong khem a ka ne hi,” ci hi (Piancilna 3:12,13), Bang dia gulpi bawl na hiam? Eden huan sungah bang dia hong paisak na hiam? Hih bang dotnate tawh paulap zong uh a, a pukna uh Pasian ngawh mikmek uh hi. Keimah atang zaw hi’ng cih lungsim pen zuau theite’ pa panin hong kipan a, tua pen Adam’ tu le ta khempeuh in hong nei pah uh hi. Hih bang dan a thuumnate Kha Siangtho’ nasepna hi lo-a, Pasian in zong sang thei lo hi. A man kisikkikna in, a mawh mi ama mawhna mah pua nuam sak dinga, zuauna le khemna om lo-in, pulak nuam sak ding hi. Siahdongpa mah bangin van lam nangawn dak to ngawh ngam lo-in, “Pasian aw, mawh nei keimah hong hehpih in,” ci dinga, tua banga a mawhna a pulakte in mawhmaina ngah ding uh hi; banghang hiam cihleh a kisik mi’a dingin Christ in Ama sisan paulam ding hi.
Kiniam khiatna le kisikkikna taktak tawh kisai-a Lai Siangtho in a hong gen thute ah zong, paulap zonna ahi a, keimah tang zaw ing cihna lungsim ahi zongin kimu lo hi. Paul in amah-le-amah kihu lo hi; kisuantakna neusek ding hanciam lo in anit penna bang tektek in amawhna pholak hi. “Siampi liante’ kiang pana thu ka ngahna tawh mi siangtho tampi tak thong sungah ka khum hi; amaute a kithah uh ciangin ka thukimpih lai hi. Pasian a gensiatna dingun ka hih gawpgawp a, kikhopna khempeuh ah amaute ka bawlsia zelzel hi; amaute’ tungah thangpai mahmah ka hih manin, khua dangdangte ah zong ka va bawlsia hi,” ci hi (Sawltak 26:10, 11). “Mawh neite ahon khia dingin leitung ah Jesu Christ hong pai hi; amaute’ lakah kei a mawhbel ka hi hi,” ci-in gen thuah lai hi (1 Timothy 1:15).
Kisikkikna taktak tawh kiniamkhiat a lungsim kitam khamte in, Pasian’ hong itna le Calvary manphatna hong pakta ding uh a; itna anei apa’ kiangah atapa a thuum mah bangin, a kisik taktak mi in a mawhna khempeuh Pasian’ mai hong tun ding hi. Eite in ih mawhnate ih thuum leh, ih mawhnate hong maisak ding leh ih diklohna khempeuh pan a ahong silsiang dingin, Topa muan huai-in thutang hi,” ci-in Lai Siangtho sung ah kigelh hi (1 John 1:9).
xxXxx
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.