Sinna 4: Mite’ Thuaksiatna leh Pasian Nipini

 

Nipini (Sabbath) Nitak lam Oct. 15

Sim Dingte: Rom. 1:18-20; Job 12:7-10; Mang. 4:11; Col. 1:16, 17; Matt. 6:34; Job 10:8-12; Rom. 3:1-4.

Kamngah: “Tua ahih ciangin zingciang ading na lung hihmawh kei un. Zingciang in ama ading alung himawh ding hi. Tu ni a, om lungkhamna in tu ni ading akicing hi” (Matt. 6:34).

Laisiangtho bu dangte bang lo in Job thubu pen Israel gam leh amite tawh kisawh kha vetlo hi. Piancil pan a kipan Abraham kiang a, “nang minam lian kong suak sak ding hi” (Pian. 12:2), acihna leh “khuapi siangtho” Mangmuhna dong Jerusalem (Mang. 22:19) vai hong gen-na dong ah lam khat teitei pan thubu khempeuh in Pasian leh Israelte‟ kikal kamciam vai tawh hong ki memat toto hi.

Job thubu ahih leh tua bang vai peuh mah Paikhiatna thubu sung nangawn ah Isarel te tangthu tawh akisawh khakna omlo hi. Ahang masa pen in Job thubu leh Piancil thubu pen Midian gam ah Moses in at hi (3 SDA B.C. p. 1140 en in); Paikhiatna vai piang nailo a, akigen khak lohna ahang hi pah hi.

Ahi zongin thudang zong om tuak in zong thupi zaw lai hi. Job thubu gen athu laigil in mihingte thuaksiatna in vannuai huamkim hi. Mihon leh hun khat peuh bek tawh kisai thu hi lo hi. Jew leh Gentile hi mah leh Job‟ thuaksiatna, mawhna adim leitung a natna satnate ah Job in ei aiawh hi thei tuak veve hi.
*Oct. 22, Nipini ading kiging in tu kal sinnate hong lim sin in maw. 

Nimasani (Sunday) Oct. 16
Pianngeite leh Pasian

Rom. 1:18-20 sim in. Paul in hih mun ah bang gen hiam? ___________________________________________________________________
___________________________________________________________________
_________________________________________________
Hih munte vai thupi vive hi. Piangsak Pasian aom takpi zia “piansaksate” tungtawn in kilangh a, “amau up noploh vai ah kuaman‟ pau-lap zon‟ theih hilo hi. Piansak nate bek pan in zong Pasian aom lam leh ama pianngei vaite kimu thei a, thukhenna ah mawhlawh tawi theih cingtaak hi.

Leitung pianngei thute tungtawn in Pasian aom lam pen dot akul hi peu-hmah lo hi. Piansakna thu alamdanzia tu lai nate thute in zong hong kilangh sak in; tu ma kum 300 lai leh kum 3000 lai a aki ngaihsun kha beeklo thute pawl khat teltak in kimu theita hi. Nate thu kansiamte in hong muhkhiat semsem uh ciangin piankhiat cilna vai nidang a angaihsutziate uh ahi; apiang kha zenzen, leh apian theihna zah cih te vai khawng, ahi thei lo ahih sem-semna hong kidawk semsem hi. Gentehna in iphone bang en leng akibawl dan zui in asung apua aomzia hong kilangh a, ahi thei ding a akibawl bang a, ahithei ahihi. Atua bang pian mah in mihingte leuleu zong hong piang kha pak pong peuh in kingaihsun kha hi. Tua bang a um mi tam sawnsawn a dahhuai hi.

Job 12:7-10 sim in. Hih kammalte in Rom. 1:18-20 sung a ngaihsutziate koici len’h kik hiam? ___________________________________________________________________
_________________________________________________________________________
___________________________________________

Hih mun ah zong, pian sak leitung in Pasian aom takpizia hong gen hi. Mawhna ah apuuksa leitung in Pasian zia diktak in pholaak cian zolo hi mah leh piansaktheihna vang leh Ama dikna hoihnate zong hong pholaak hi. Pasian vangliatna leh adik ahoihna thute bang pianngei thute in hong lak hiam? Tua te hong piak thute pan thahatna leh hanthotna koici ngah thei ding nahi hiam?

Ninihni (Monday) Oct. 17
Ama Thu a Piangtawm Omlo

Pasian aom lam genna leh uphuaina tampi om hi. Piansakte‟ teci panna ban ah, “vanpi leipi vai” genna tuamtuamte om hi. Abulpi in bel, ama thu a piangtawm omlo cih thu bulpi ahihi. Aki piangsak khat pen aki piangsaksa khat hi a, tua bang ahi toto hi cih thu ahihi. Tua bang thu pai toto pen aki pi-angsak lo khat ah hong khawl in, a om den sa, a om lo ngei lo khat ah hong tawp hi. Tua kua hi mawk ding; kua dang hilo in Laisiangtho‟ hong gen Pa-sian ahihi.  

Anuai a munte in na khempeuhte piankhiatna vai bang hong gen hiam?
Mang. 4:11 _____________________________________________________________
______________________________________________________________
Col. 1:16, 17 ____________________________________________________________
______________________________________________________________
John 1:1-3 _______________________________________________________________
______________________________________________________________
Hih munte in thugui dung azuipen piansakna thu hong hilh a tua in - atawntung a omden Pasian ahihi. Thu ngaihsun pawlkhatte in Pasian cihbang vai peuhmah nial ngiatmawk in, ngaihsutna dang khat hong pia uh hi. Vang citeng anei atawntung Pasian in vannuai piangsak acih sangsik un, “bang mah lo” in piangsak hi ci uh hi. Natethu theisiam Stephen Hawking, ni dang a Isaac Newton mun alen pa in “bang mah lo” in piangsak hi ci in gen hi.
 
“Vannuai nate in amau thu in bangmahlo pan apiangsak thei leh apiang-sak ding hupna tha cih bangkhat om mawk ahih man hi ci hi.” - Stephen Hawking and Leonard Mlodinow, The Grand Design (New York: Random House, 2010), p. 180.
 
Hawking in ama ngaihsutnate alahna ding tuatna leh sehna nei mawk a, lamdang kisa kha mai kawmkal ah: ei tu‟n hiah om a, nate thu kankhiat kipatpina kum 400 tang hi ta in, leitung in asiam pen a angaihsut khat in van-nuai leh asung a om khempeuh bangmahlo pan hong piang ci mawk maw? Mipil mi siam mahmah khat in agen hi mah leh akhial pen akhial mah ahihi.
 
Hih bang thu tungtang ah, I Cor. 3:19 sim in. Christianten hih thumann ih kep den ding bang hang in thupi hiam?
______________________________________________________________

Nithumni (Tuesday) Oct. 18
Laibu Masa Pen

Pasian um lo te‟ uang gennate kawmkal ah, Pasian umte in amau upna thu ngaihsutna hoih tampi nei uh hi. Ahi zongin aom den thu nawngkai khat pen mite in a uplohna thu uh aki diksakna vai uh hi a: tua thu in mihingte thuaksiatna leh thusia ahihi. Pasian dik in hoih takpi in, itna tawh dim in, vangliatna khempeuh nei takpi hi leh, koici pian theih ding hiam? Hih thu pen mi tampite suih khak den thusia hi toto hi. Pasian aum, Pasian‟ hih tak-pina leh A itna aciam ngei khin a, atualbual khinsa khat hih dotna tawh buai kha lo in omlo ding hi lo hiam? 

Jewte gen ngei den thu om mah bangin: Job thubu pen Moses in Midian ah agelh ahihi cih E.G. White in zong hong genna ah “sehnel gam Midian a atangg omna vai hun mawkbei lo hi. Amasuan adingin Moses akigin ban ah, hih bang hun sung in Khasiangtho‟ humopna tawh piancil thubu leh Job thubu zong hong gelh hi a, leitung bei dong in lunglutna tak tawh Pasian mite‟n sin tangtangh ding uh hi” na ci hi. - E.G. White comments, 3 SDA B.C. p. 1140. 

Hih vai ah eite hong theihsak thu in Laisiangtho sung a kigelh masa-pente‟ lak ah Job thubu in khat hi a, vannuai mihingte‟ tuah thupoi ahi natna leh thuakna thute ahihi. Pasian in hih pen mihingte‟ adingin dotna lianpi khat ahihna thu hangin acil pan in thubu sung ah Job thu Moses na gelhsak hi. Eite natna leh thuaknate lak ah hong ki tangtat sak hilo in; amah om gige a, hih vaite thei in, atawpna ah vai teng siangsak takpi ding cih lametna ih nei thei hi. 

Anuai a munte in thusia aom takpi lam bang hong hilh hiam? Matt. 6:34, John 16:33, Dan. 12:1, Matt. 24:7. _____________________________________________________
_______________________________________________________________________ 

Pasian om ahihna leh thusia omna vai thu kisunggte, hihtuak mahmah phial himah leh Laisiangtho hong hilhna thu ah thu a lak ding hi peuhmah lo hi. Na khat peuh athei, vangliatna khempeuh anei, itna khempeuh anei Pasi-an in thusia leh mite thuaksiatna vai hong hilh hi. Thusia om ahih manin Pasian up loh ding hi tuanlo hi. Job thubu sim pak zal leng zong alungkiat huai thusia lasiate kawmkal ah Job in Pasian om vai lunghei nei tuan kha peuhmah lo hi. A santheih huai dotna dik pen bang hang in amanh hih teng thuak mawk cihthu hizaw hi. 

Thusia ih muh khakte vai dot khak ding pen ahi mah ding ahi hi. Thusia kawm kal ah Pasian hoihna koici theih in koici muan thei ding ihi hiam? ________________________________________________________________________

Nilini (Wednesday) Oct. 19
Thusiate Kal ah

Job thubu anuai a munte sim in. Job in bang vai buaipih hiam? Bang dotna dong lo hiam? Job 6:4-8, Job 9:1-12. __________________________________________
____________________ ___________________________________________________
___________ ____________________________________________________________
________________________________________________________________ 

Zan ni sinna sung ah akigen mah bangin, Pasian om leh omloh vai peuh mah Job thubu ah hong phulam lo hi. Hong om dotna pen bang ding a Job in hih bang teng tuak mawk hiam? Ama tung a thupiang teng ngaihsut in Pasian um ahih man keek mah a adot huai mah ahihi. 

Gentehna in, Pasian a um lo mi khat in tua bang khialkhemna tuak leh ahang pen agen nop mahmah lel ding khat ahihi. Khiatna neilo vai omlo lei-tung a nungta in kingaihsun lel hi. Thu don anei lo kiim leh paam tawh nungta in vai nawngkaite‟n hong nelhsiah theih zel mah ding hi, kici thei lel hi. Bang cia tuaci laizang ding? Nuntak ih cih ah deihna nei kei in, khiatna om kei leh ih tuah khak khialkhemnate in zong khiatna nei lo ding hi. 

Hih dawnna lungkim huai lo in lamet bei mah ta se leh Pasian omlo ci te adingin, a tuaci lel mah ding hilel hi. Ahi zongin Job abang mi khat adingin tua bang thusiate kawmkal vai pen atuampi ahihi. 

Job 10:8-12 sim in. Hih mun in Job phutkhak dotna nawngkai mahmah vai hong koici telsiam sak thei hiam?
  _______________________________________________________________________ ______________________________________________________________ ______________________________________________________________ 

Job phutkhak thu nawngkai pen Pasian aum mi a tamzawte‟ tuah khak leh abuaipih uh thu hi a: itna tawh adim adik Pasian om takpi ahih leh mite in bang hang in hih bang teng thuak mawk uh hiam? Kimanna nei mello haksatnate leh buainate bang ding a Job bang a, “midik” te‟n thuak mawk hi ding? Vannuai ah Pasian acih omlo hi leh bel hi ci bang leitung ah nuntak a hici mah ding hi pong lel lo ding hiam, mihingte mahmah zong atom leh molecule te hang a a mawkpian kha zenzen hi lel hi ven, cih ding hi pong lel hi. 

Job in tua sangin adik zaw thei hi. En zong thei ih hih man keek mah a, a buailawh ihi hi.

Ningani (Thursday) Oct. 20
Pasian Thupitna

Rom. 3:1-4 sim in. Hih munlian pen Pasian mite’ muanhuai loh man a thupiang ahi ta zongin, Paul gengen thu lianpite vai abang ci hi a? Paul in Pasian tawh kisai in bangci thu agen hi mawk hiam? ______________________________________________________________ ______________________________________________________________ ______________________________________________________________ 

Late 51:4 man in Paul in, “nang thu hong kikhen ciang na kammal tawh diktang ding cih thu gen hi (Rom. 3:4, NET)”. Hih thu omzia pen Laisi-angtho mun tampi a kigen thu huampi khat ahihi. Hih pen Pasian thupitna kici a, siatna kawmkal ah Pasian hoihna omzia telsiamna kici hi. Hih thu pen ni dang pek pan a aom den dotna hi a, Nipi kal tawntung ih ngaihsut thu ahihi. Kikingkalhna thu mahmah in zong siatna kawmkal a Pasian hoihzia hong lak ahihi. Mihingte, vantung mite leh vannuai mun citeng, siath-uainate‟ kawmkal mah ah Pasian‟ hoihna hong kilangh toto ahi hi. 
Kikingkalhna thu ah adik leh adik lo thute vai tu‟n kitel mahmah ta hi. Langpanna pan a thupiang, vantung‟ deihna donlohna‟ gahte, pian sakte‟ thu athei thei khempeuh in tel muh ta hi. Satan ukzia leh Pasian thuneihna vai vannuai in amu thei in om kim khin ta hi. Satan pen ama sepzia bawlziate in mawhlawh tawisak hi. Pasian ciimna, Ama thumanna, leh Ama hoihnate kilangh siang hi. Kikingkalhna‟ vai a asep abawlziate khempeuh in apiansak amite leh leitungte‟ phattuamna ding vive ahihi.” - E.G. White, Kikingkalhna Lian, G.C., pp. 670, 671. 

Mawhna leh thuaksiatna sung ah kidiahcip ihih man in (en haksa sa ihih leh Job in bang zah in haksa sa ding cih ngaihsun leng), hih vai teng hong veng leh ama hoihna, thumanna, itna leh diknate pen mihingte, Satan, leh mawhna vaite tawh akinawkna vaite pan imu thei ding hi. Hih bang ih cih ciangin leitung a piang khempeuh hoih hi ih cihna hi hetlo hi. Pasian in ahoih theipen dingin mapang hi aci ihi a, mawhna vai tawh buaina teng hong ven‟ ciangin, ama tung ah awng in: “Na sepnate nasia in lamdang hi. A vanglian Topa Pasian aw! Na sep na bawlnate dik in mann hi, mi siangthote kumpipa aw!” ici theita ding hi. (Mang. 15:3, NKJV). 

Tu mahmah, athuak hak mahmah khialkhemnate kawm kal ah Pasian ih phat den ding bang hangin thupi hiam?

Kiginni (Friday) Oct. 21

 Ngaihsutbeh Ding: “Christian lai at sia leh athumatau siam Lewis in azi sih vai agenna laibu agelhna ah tua sihna asan theih nang ahanciamna hong genna sung ah: “Pasian a um nawnlo lah hi keng, a lauhuai bang khat a ka up khak ding alau hi zaw ing. Pasian om kei ei ka cih khak ding alau hi lo in, Pasian ih cih hih bang hi mawk maw, ka cih khak ding alau hi zaw ing. Nang leh nang kikhem nawn ken.” - A Grief Oberved, pp. 6, 7. Hih bang pen Job thuak khak dan mah na hihi. Ih muh bangin, Pasian om kei ci kha ngei lo a; Pasian zialeh tongg vai ahihi. Job bel Pasian tung ah muanhuai takpi hi. Amah mi “pha” ahihi. Atung a piangte ama thuak ding hilo cih thei hi. Tua hi a, haksatna kawm kal a Pasian a um mi tampite dot theih dotna mah adong hi a; Pasian pen akoici takpi hi mawk hiam? cih ahihi. Hih keek mah kiking-kalhna ih cihcih na hi gige hi. Pasian om maw om lo cih thu hi lo in Ama zialeh tongg vai ahihi. Kikingkalhna vai telkhehna ah thu tampi om mah tase leh vannuai a eite hong piangsakpa‟ zialeh tongg vai dangte khempeuh sangin akilangh siang sakzaw pen Zeisu‟ singlamteh ah eite mawhna tang ding a, paak namtui (Eph. 5:2, NKJV), bang a hong kipiakna thu zah a Pasian zia alak thei dang omlo hi. Singlamteh in Pasian pen mi khempeuh‟ muan theih ding ahihna hong lak hi.
 
Kikup Dingte:
1. Pasian a umlote’ thuaksiatna vai ngaihsun leng, amaute in buaina atuah uh ciang Pasian a umte bangin abuai uh kul lo hi. Thu khat lam panin, amaute in koi pan dawnna leh tellahna ngah mawk ding uh hiam? Ei thuak bang teng mah thuak in hanmual ah tawp pong ding, bang mah om lo ding hi ngeu mawk. Thu umlote’ nuntak vai ah lungkia in nuntak i deihna amuh zawh loh uh pen lamdang sak ding hi lo hi. Leitung vai laibute ah leitung nuntak in khiatna nei kei ci a, athum ataunate uh tawh kidim hi. Tua hi leh hehna dahnate kawmkal ah, ih upmuanna tungtawn in bang ci bang lametna ngah thei ding ihi hiam?
 
2. Pasian’ hong itna hong kilatkhiatna pipen leh Ama omzia ih theihna ahi singlamteh ah tu mahmah in koici kingakh thei ding? Haksatna, hehna dahnate leh thusia lasiate in hong nelhsiah ciangin sin-glamteh in Pasian zia leh tong bang hong gen hiam? Singlamteh ih masuat takpi ciangin tu a ih tuah vai haksate khempeuh pan bang lametna ngah thei ding ihi hiam?