“Tu-in Ka Lungmuang Ta” (Agen: Fatima)

October 8, 2016                                                                                               Austria            

Mission Story - Nipi 2na (4th Qtr 2016)

“Tu-in Ka Lungmuang Ta”  (Agen: Fatima)

            Fatima’ nuntakna pen diipkuatna tawh kidim hi. Ama’ biakna pen a zi a lauthawnsak nadingin a zang a gamhtat pasal khat tawh kiteeng kha hi. Nisim in a pasal in a khuttum tawh vua tawntung hi. Amau’ gamah a kitam zat hetlo ahi, a zi Fatima pen inn sungbek ah omsak in a pualam ah vakkhiasak pha hetlo hi.

            Atawpkhakna ah, sumzat kisam ahih manin Fatima pen a pasal in numeite bek tawh kithuahna melhoih nading kizepna sai-ah a sep  ding phalta hi. Tu-in midang tawh kithuahna hong neih hangin a lungkhamna hong kibehlap toto ahih manin amah leh amah kithah ding hong hanciam hi.

            Fatima in, “Kei leh kei kithah ding ka hanciam hangin, ka sungah, ‘Kilawm lo hi. Kithat peuhmah ke’n’ hong cici om ahih manin ka kithat ngam kei hi” ci hi. Fatima aadingin ni hong suak zel in khua hong mial zel a, nite hong bei zel hangin lamet ding thu hoih bangmah om tuan peuhmah lo hi.

“Banghangin Dah Lua Nahiam?”

            Ni khat, melhoih nading kizuunna sai ah kum 40 gual a upa a naseppihte khat in, “Ka tanu aw, bangci na hiam? Banghangin dah lua na hiam?” ci-in thukhualna taktawh dong hi.

            Nupinu’ thukhualna a muh ciangin, Fatima zong a nasep kawmkawm in a thuakna leh a haksatna teng hong pulak  khia hi. Fatima’ thugente hong ngaih khit ciangin nupinu zong lametna, khualna leh ki-itna thute hong genpih hi. Fatima’ lungsim lamdangtakin hong kikhel a, hih nupinu kiangah hawh zelzel nuam hi.

            Ni khat, nupinu in a inn ah Fatima nitak an ne dingin sam a, a pasal in zong phal in paisak hi. An a neek kawm kawm un nupinu in Fatima kiangah, Topa Jesu in lungnopna leh lametna hong piak theih zia genpih hi.

Kituah Simna

            Hih nupi nihte hong kithuahkhawm zel uh a, Fatima zong damdam in tha hong ngah semsem hi.  Ni khat, a simtham aa kikhopna munah a paikhawm dingin nupinu in, “Topa Jesu’ thu leh Lai Siangtho thu sinna ah pai ning. Nang e leh! Nong zui ding hiam?” ci-in va zawn hi.

            Fatima zong lawpin a nihun mi (9) a kikhopna inn ah hong paikhawm uh hi.  A natung masateng in Lai Siangtho na simkhawm uh a, thu kikupna ah papi khat in makaih hi. Fatima in a nuntak sungah Lai Siangtho bu a muh masakpenna hi a, amah zong bu khat a kipiak ciangin lungdam mahmah hi.

            A pasal ukcipna hangin Fatima in a simtham kikhopna ah hun maantakin kihel theilo hi. Bangbang hitaleh, Fatima in a manpha mahmah a Lai Siangtho bu hoihtakin keem thei hi.

            Ahi zongin, ni khat Fatima’ diipkuat nading hong om leuleu hi.  Meelhoih kizuunna sai-pan inn hong tun ciangin a pasal in a Lai Siangtho bu a muh lam Fatima in thei hi. A pasal in hehpih hetlo in nasia takin vua gawp a, “Hong that taktak ning” ci sawnsawn lai hi.

            Lamdangsak  huaitakin, a pasal vuakgawp zahin gim lualo bilbel a, ahi zongin a pasal in inn sungbek ah om sak leuleu hi. Sumzat ding kisam leuleu mawk ahih manin meelhoih nading kizuunna sai-ah sum thalawhsak leuleu hi. Tu-in bel a pasal in Fatima’ gamtatna khempeuh encik in dik a sak lohnate taai giapgiap hi.

“Hong That Ning!”

            Fatima in a simtham a, Lai Siangtho a sinkhawm a lawmte lakah kihel ding lunggulh mahmah a, a pai  dingin kithawi hi. Kamsiatna tawh a pasal in mu zenzen a, “Nang hong that ning! Na pawlteng zong that khin ning! Amaute biakna mi hi kei, a vekun thah khit ding hi!” ci-in haan vuavua hi.

            Fatima zong lau lua ahih manin hong taikhia a, a pasal in a muhdong, a nute a pate kiangah om hi. Kongkhak ciang tawh sat daapdaap in, “Na tanu uh Tapidaw suak khin a, amah thah ding a kilawm ahi hi” ci-in Fatima’ nu leh pa tungah hong taangko buabua hi.

            “Amah ka thah kei leh zong no hong that ning!” ci-in lungsim maan nawnlo Fatima’ pasal awng baba hi.

            A heh mahmah anu leh apa’n zong Fatima vuak a sawm ciangin inndei dang khat ah manlang takin tai a, a vuak loh nadingun kap kawm in thuum ngaungau hi.

Anu leh Apa Inn Pan Suakta Liailiai

            Tua zan mahin Fatima daaitakin anu leh apa’ inn panin bangmah kenglo in hong pai khiasim leuleu hi. A Tapidaw pawlpi mipihte tawh manlang takin kiho a, a lawmte’n zong khuanawl lamah  a buk theih nading mun Fatima  tungah genpah uh hi.

            Tua mun ah kal nih a om khit ciangin simtham kikhopna ah a makaih pastor zong Fatima kiangah hong hawh in an leh puansilh nikten hong puak hi. Pastor in, “Tapidaw nasuahnop takpi aaleh, hong huh thei ing. Tua bang geelna na neih kei aaleh bel, na innkuanpihte kiangah na ciahkik kul ding hi’ ci-in hopih hi.

            Fatima in zong, “Tapidaw hong suak nuam takpi mah ing” ci-in hangsan takin genkik hi.

            Apianna gam ah a om dingpen Fatima aadingin lauhuai lua mahmah ahih manin a lawm Tapidaw pawlpimite in   a veng gamah a tun theih nading leh Austria gam a tun dong a lamsap ding vaihawmsak uh hi. 

            Austria gamah hong tun ciangin, Fatima tenna khuapi pan mahin a gaaltai Ahbad te nupa tawh hong kimu theita uh hi.

            Ahmad’ zi in, “Fatima aw, tu-in i lunggulh aa i zonzon pawlpi hih gamah mu taktak ta hang” ci-in lawptakin genpih hi.       

            Sabbath ni hong tun ciangin  Fatima zong Ahbad te nupa tawh Seventh-day Adventist biakinn ah hong kikhawm uh hi. Fatima in Ahbad te nupa kiangah, “Nong gen mahbangun kei zong hih laiah lungnopna, lametna leh khualna ngah ing. Kei guak ka hih lam hong thei uh a, hong hehpih in hong huh takpi mah uh hi” ci-in lungdam takin gen hi.

            “Hih pawlpi ah ki-ap in kong kikhop ciangin ka nuntakna ah nalamdang tampi mu in ngah ing. Adventist pawlpimi te’n veina taktawh thu hong ngetsak uh hi. Innkuan khat in a inn uhah hong pii in a tanu taktak bangin hong khoi hong keem uh hi. Tu-in bel lungmuang mahmah ta ing” ci-in Fatima in a lungdamna gen khia hi.

           

#######@@@@@@@@@@@@@@@@@@@#######