THUNEIHNA PIAKIK: Sabbath School Lesson Zomi 3rd Quarter Lesson 2

SINNA 2 July 2 - 8 

 

THUNEIHNA PIAKIK

Nipini (Sabbath) Nitak lam July 2

SIM DINGTE: Pian. 1:26-28, Late 8:3-8; Pian. 2:15; Rom. 8:20-22; Pai. 20:1-17; Rom. 1:25; 2 Thess. 3:10.

KAMNGAH: Tua ciangin Pasian in “Ei ma lim, ei mah hong sun in mihingte bawl ni; tuipi ngasate tung, huih lak vasate tung, ganhingte tung, leitung khempeuh tung, leitung a abokvakte khempeuh tung ah ukna nei sak ni” ci hi. (Pian. 1:26).

Puukna vai ah ihpu ihpi masa pente in a Pasian meel asutna bek sang un atam zaw hong sumh uh hi. 

"Mihingte bek hi lo in, leitangh mahmah zong mawhna’ hang in gilopa khut nuai hong suak a, tatkhiatna geelna tungtawn in angei hong bangkik ding hi. Piancil lai in leitung ukna Adam tung ah kipia hi. Khialkhemna ah hong puuk uh ciangin Satan khutnuai hong suak in Amah azopa in hong lenta hi. Tua bang in Satan pen "leitung Pasian” hong suak hi. Adam tung a kipia thu- neihna sutkhia ta hi. Ahita zongin Khazih in Ama hong kipum- piakna tawh mawhna thamanh hong piaksak a, mihingte tanhkhia bek lo in atannsa thuneihna zong ngah kik sak hi. Adam masa tawh akitannte khempeuh anihna tungtawn in kingahkik ding hi.” - E.G. White, Hun Paizia, Signs, Nov. 4, 1908.

Puukna khit ciangin mihingte’n tampi tak kisuplawh a atuung a hong kipia “thu neihna” ih tan hi. 

Tua akitann thuneihna ih cih bangh himawk hiam? Tu lai in “thuneihna” in aleh lam bek hong ngaihsun sak kha hi mah leh, Eden hunlai in bel tua bang hi lo hi. Mihingte’ tung a akipiak masak hun in bang khiatna nei hiam? Tua bang a Eden a ihpu ihpi masate’ puukna khialhna hang a kitannsa pawl khatte ngah kik nang in pawlpi in bangci panpih thei ding hiam? 

July 9 Nipini ading kiging in hih sinna sin takpi ni maw. 

NIMASANI (Sunday) July 3 THU NEI DINGIN KIPIANG SAK 

Tawl khat lai in mi khat in alawm, Pasian a um lo mi khat thu hih bangin na at ngei a, “zan kim lai in phawk-vat in dotna pawl khat ngaihsun kha in: “Hih simlei thupiang ngiau mawk khat peuh a mawkpian takpi maw? Ngim kholh gelkholh, adeihna ih pianphung ah leh vannuai ah om tuanlo takpi maw? Nuntakna khempeuh; kei, ka innkuanpih, ka tate cih bangte in khiatna hong nei lo takpi maw? Ka nuntakna in deihna khiatna anei hiam? 

Puukna nung ah supna tampi hong piang hi. Puukna tangthu’ hong lah bangin, kigalneihna hong piang a Pasian tawh bek hilo in mihingte khat leh khat zong aki galneih suak in ih kizop zia hong kikhel hi. Atung a tangthu sung a nupi nu bangin ei kua hi a, bang ding a nungta, cih vaite ban ah mihingte aki mawkpian hi cih te in hong siatsuah thei zawkan a, ngaihsut kholh leh deihna omlo pi a Pasian hong bawl hong piansak hi cih thute in hong siatsuah thei thute ahihi. 

Anuai a munte’n mihingte’ ki piansakna vai adeihna bang hi cih hong hilh hiam? Pian. 1:26-28, Late 8:3-8; Isa. 43:6, 7? “Ka minthanna ding a ki piangsak” cih thu in bang cinuam hiam? (Isa. 43:7, NKJV). “Ka Pasian minthanna” leh thuneihna kikoici zop hiam? 

Piancil thubu pan ih muh mah bangin, athudang a om ahi zongin, leitung thuneihna nei ding a ki piangsak cih kimu thei hi (Pian. 1:26 - 28). Anih un Pasian vangliatna kilangh sak in teh theih omlo Pasian thuneihna akimuh theih nang hi a, (Mang. 1: 5, 6), piansak dangte puah in, kem in, auk ding uh ahihi. Mawh-na hong lut hi kei leh Pasian vangliatna amau tungtawn in, hih leitung ah hong ki koici muhkhiat thei ding cih gen theih hilo hi. 

Tu in ahih leh, Zeisu sung ah upmuanna, thumanna leh kipawlkhopna tungtawn in, David bangh mah a: “kei ading in Topa’n Ama deihna hong picing sak ding hi” (Late 138:8, ESV) kici thei hi. Eite adingin Pasian in eite tungtawn in Ama deihna piangsak ding a ngimna nei cih, muanna leh lungkimna pen Amah ah ih kingak takpi ciangin ih telsiam ding hi. 

Mi khat peuh in Christian khat na hihna tawh na nuntakna’ deihna bang hiam cih hong dongh leh bangci dawn kik ding na hi hiam? Bang hang hiam? 

NINIHNI (Monday) July 4 THU NEIHTHEIHNA SILPIAK 

Pian. 1:26-28 a kigenna tawh kizui in leitung a mihingte’ thuneih-theihna thu ahang bang hi mawk hiam? 

Laisiangtho sung a thuneihna cih kammal pen Hebrew kammal pan hi a, uk theih nang thuneihna leh mawhpuak aneihna lak hi. Hih thu ah, thuneihna acialcial aomna thu piansak dangte’ tung a mihingte akikoih ahihna, vangg leh thuneihna kipia ahihna lak hi. Hih kammal radah pen Laisiangtho sung a mundangte ah zong akizat hangin bangci zat ding; mite phattuam na ding maw nawngkai nading cih kigen lian lo hi a, ahi zongin apuuk nailo mawhna omlo leitung ah ahoih apha lam hi hamtang zaw ding hi. 

Tua bang dan mah in Piancil 1:28 a, gualzo un acih zong kikhia thei ding hi. Hebrew kammal a gualzo ding cih pen kavash hi a, mihingte’ thuneihna kawkk hi. Laisiangtho lui sung ah kavash pen radah sang in khauhzaw a, nuaisiahna, vazawhna lak hi (Gamlak. 32:22, 29; Jer. 34:11, 16; Esther 7:8; Nehe. 5:5). Muntampite ah thuneihna hoihzat lo a, Pasian lungkimlohna zong kigen hi. Mawh neilo piansak tung a nupate’ tung a thupiakna leh azatna uh ah tua gualzawhna pen ahoih apha; apiang sak Pasian tangg a sepnabawlna vaite genna ahihi. Deih bangh a mawkzatna agen hi lo hamtang hi. 

Thuneihna vai Piancil 2:15, sung a ih muhbeh ah Pasian in Adam pen Eden huan apuah (abad - bawl, sepsak, kho) cih leh keem (shamar - uum, kepbawl, deihsak, koihtuam) cihna zong suak hi. 

Hih bang teng tawh, thuneihna pen itna, kepna, donna, leh sepna bawlnate, agen ahihi. Pasian tawh kizopna tungtawn in ipu ipi masapente in amau thuneihna vai ah aki tanggsamh khempeuh zangh in piangsak Pasian itna diktak a kawhmuh ding ahihi.

Thuneihna cih kammal in bel tulai in adiklo lam peuh akawkk hangin acil in bel tua bang hilo hi. Puukna hun malam a hih kammal kizatzia pen la in ih thuneihna munte leh mite tung ah itna tawh ih zat ding hi mawk lo hiam? 

NITHUMNI (Tuesday) July 5 GAMGI (KIGII) 

Mihingte’ “leitung bup” thuneihna (Pian. 1:26) ah kigii omlo maw. Laisiangtho paizia ah thuneihna (“akem acing hihna” vai) ah kigii aom kuul hi. 

Gentehna in, Pasian in Adam tung ah sialehpha theihna singkung pen ama thuneihna akheng ahih lam gen hi (Pian. 2:15-17 en in). Mawhna masapen in neihsa kepna vai hong suak hi. Adam leh Eve in Pasian koih thuneihna gamgi hong tuanpai suak hi. Piansakte in tua kigi paltanna vai tawh abuai lailai ahihi (Rom. 8:20-22). 

Pai. 20:1-17 sim in. Pasian thukham vai ah bangci “kigii” te kiphut hiam? Tua thukham in mihingte’ thuneihna’ gii khen vai bangh hong gen hiam? 

Mihingte thupiangte pen (gentehna in, Pai. 1-14 a Pharoah; Matt. 2 sung a Herod), hunte bei dong (Mang. 13 en in), Satan makaihna tawh mi nuainen nuam mi pawlkhatte’n amau thuneih tuak lohna vaite nelhsiah nuam in buaina piangsak uh hi. Amaute in “leitung kumpi” akineih Satan bangdan in thuneihna ala tawm uh hi (John 12:31). Thuneihna zatkhialhna pen nelhsiahna hong suak hi. 

Thu khat pan in, amau thuneihna azat nading munte uh ah anial, a asang nuamlo zong om thei hi (Matt. 25:14-30, Luke 19:12-27). 21 22 

Mawhna in piansak hun a kipia mihingte’ thuneihna cia atan hangin atung a kipiasa teng beimang siang samlo hi. Tu hun eite khut ah zong thuneihna tampi mah om lai veve sam a: gentehna in ei ma nuntakna ih zawh nang a Khazih hong panpihna vaite ah (1 Cor. 9:25-27; Gal. 5:22, 23 en in), leh leitung leh asung a piansakte ih kep ih donna vaite, leh Pasian hong piaksa khempeuh tung ah thuneihna kinei hi (Jame. 1:17; Matt. 25:14-30 en in). Christian ih hihna tawh gii khenna koi ciang cih thei a ei thuneihna sung ah muanhuai tak a, acingg akemte ihhih ding ahihi. 

Midangte’ thuneihna vai na ngaihsut sak ding thu bangte khawng hi a, innkuan vai, lawm leh gualte, ih nasep ih silbawl pihte khawng e leh? Tua vaite ah ih telsiam nang in bang thukhun in hong huh thei ding? (Gentehna in, Matt. 7:1, 12 en in). 

 

NILINI (Wednesday) July 6 LEITUNG NGIAT KEPNA DONNA 

“Tua ciangin Topa in Eden huan akem adonn ding in tua mite koih hi.” (Pian. 2:15, NKJV). Ih tenna leitung ihkep ihdonna vai ah hih mun pan a ih lak theih ding bang thuguipite om thei ding hiam?
Mawhna hong lut ma in Adam leh Eve te tung ah akem adonn hihna vai Pasian in aap khin hi. Amaute in ganhingte leh singkung lopate vai tel uh hi. Ahi zongin mawhna hong lut khit ciangin, amaute in Pasian alangdona uh tawh kizui in piansak nate in zong alangdo hong bangh ta hi. Mihingte in ganhingte, singkung lopate, leh khuahunte, tung ah thu neihna neilo cih hong kimu uh hi.

“A tualniamzaw piansakte tung ah Adam pen kumpi bangh hi a Pasian tung ah a muanhuai laiteng, piansakte’n ama ukna mang uh a; hong mawh uh ciangin, hih thuneihna tann lawh uh hi. Amah mah in alutsak langdona lungsim, ganhingte’ tung ah zong hong kizell ta hi. Tua hi a, mihingte nuntakna bek hi lo, ganhingte pianzia, singkung lopate, leh ganmang tuulakte, adiik uh huih mahmah in zongh adahhuai siatna vai hong mu hong theisak toto ta hi.” - E.G. White, Pilsinna, Ed., pp. 26, 27.
Tu in leitung pianzia haksatnate leh khua hun omziate in mun pawlkhatte hong nawk zel lai hi. Tua hi a, tuate pan ih kidal nang in pilna siamnate zat ding ih hanciam hi. Tuate in hong huh theihna aom phial zong in, tua nazat tuamtuamte mah in hong susia thei hi. Kiim leh paam ih cih pen, ih ngaihsut ih gamtat leh ibiak iup imuan vaite zong hong hi a, hih simlei ah zatkhialhna in midangte’ adingin haksatna hong tun thei hi. “SDA te in a ol a cidamhhuai nuntakzia limh ngaihsut uh a, angsung vai leh asiahuai nate tawh buai nuamlo hi. Piansak nate limh ngaihsut in, leitung a piang nate zatzia ah kidawm in, iduh ideih vai leh piansakte pi ngaihsutna tawh ih nungta hi.” - In “Official Statement of the Seventh-day Adventist Church on Environment,” 1995.
Hih leitung vai kikhaikim tak a ngaihsut theih nang in: hong kipiak ih inn ih lote hoihtak in kem in; ih kiim ih paam na tuamtuamte peuh abia ih suak kha kei na diam? Hih bang vaite ah Rom. 1:25 in hong vauhilh ding bang thute om thei ding hiam?

NINGANI (Thursday) July 7 THUNEIHNA “PIA KIK” 

Puukna hangin supna nasia tak in ih thuak a Eden a piansak hun a thuneihna pawl khatte zong kitann hi. Tua ih tannsate apia kik dingin Khazih hong pai ahihi.

Khazih hong sepsaksa thute hangin eite in zong midangte tung a tangko sawn ding in leh Khazih tungtawn a ngah kik dingin hong kikhoo ahihi. Nih vei hong pai ma dong hih vai picing kim thei pak lo ding a, tun bel akitanggsamh amangthang leitung thute nelhsiah mite ading a, isep theih tampi om hi. Tua te ah panpih thei dingin akitangsamhte huhna tawh tu mahmah in ih piak theih pawl om thei hi. Mawhna hang a kitannsate ih ngah kik theih nang a midangte ihuh ipanpih theihna vai anuai a munte in bangh hong gen hiam? 

Thuhilhk. 15:7-12 ____________________________________ 

Luke 14:12-14 ________________________________________ 

1 Pet. 3:15 ___________________________________________ 

James 1:27 ____________________________________________ 

Isa. 58:7 _____________________________________________ 

2 Thess 3:10 _________________________________________ 

Pawlpi bup in akitangsamhte ih panpih nang a ih sep ding leh, ih sep theih sem ding a hong kisapna thu tampi om hi.  Khat veivei abaih lam mahmah puansilh nikten piakna leh inn leh lo kitangsamhte panpihna zong hi thei hi.  Piakkhiatna zong kisamh mah a, tua sang a akisamh-laizaw thuneihna piak kik ding vai om hi.  

          Ih lametna thu ahangg ih gen ding hi mah a, ih hih theihnate ah apumpi tangsapnate uh ah panpih a nuntak hoihzaw lam ih kawhmuh ding zong ahihi.

          Aomzia leh akitanggsapzia, kibang lo in eite in ih omna munmun ah khuavak, damhna, leh lametna ih suah ding ahihi.  Hih thu in eite hong it, hong honkhia a Ama na ih sep Pasian teci te ih suah nang a kisamh thute ahihi.  Isep theih zah sem in Topa tha  tawh ih kiim ih paam a akitanggsamh mite adingin khuavak leh lametna ih suah ding ahihi.  Christian diktak in tua bang sep ding ahihi.  Hih sepna ih tangtun ciangin Pasian zia athei sak ih suak thei hi.  A pumpi kitangsapnate uh ah ih panpihna tawh, alungtang uh Khasiangtho lut theih nang a apuahsak ihsuak hi.  Hih bang nasep pen Zeisu nasepzia hi a, tua bang sem ding a hong kikhoo ahihi.

Kiginni (Friday)          July 8

Ngaihsut beh Ding:  E.G. White, “Temperance and Dietetics,”  pp. 202-206; “Discipline,” pp. 287-290, Pilsinna, Ed., sung ah; “Need for Self-Mastery,” pp. 73, 74, Nek leh Dawn Vai, Counsels on Diet and Foods sung ah; The Principles of Stewardship,” pp. 111-113  “Sharing in the Joys of the Redeemed,” pp. 348-350, Counsels on Stewardship sung ah.

Apuukcip leitung ah om ihihna tawh, mawhna tungtawn a ih sepnate ngaihsut ding nangawn haksa mahmah hi.  Pasian kammal in hong gen lo hi leh ih piankhiatna, mawhna hong piankhiatna, leh thusia leh sihnate pen leitung a om ngeina suak in, angeina bang in kingaihsun lelmawk hi.  Puukna thu in tua bang mawk ding ahih lohna hong lak hi.  Piancil thubu in Adam leh Eve leitung ah thuneihna anei ding hi na pi, mawhna hong lut a kipan leitung tawh a kizopna uh pen, amau kikhel ahih man un hong kikhel a, hih leitang mahmah zong hong kikhel hi.  Thakhat thu in athu neihna uh zong tannta uh a, avai uh hong siasuak mahmah ta hi.  “Lingleh sote hong po in (Pian. 3:17, 18), tuiciim tun khit ciangin (Pian. 7:12), sehnel gam leh gammang tuulakte, hotkhiat ut a athum atau leitung (Rom. 8:19-22) cih thute in Laisiangtho hong hilh zia, leitung a, mawhna hang a thupiangte ahi uh hi.”  Handbook of Seventhday-day Adventist Theology, (Hagerstown, Md.: Review and Herald Pub. Assn. vol. 12, p. 254. Hotkhiatna thu, amangthangsate khempeuh ditkikna thu hang in lungdam huai mahmah a, hun beisa leh tulai hunte sang ahoih zawtham mailam thu hong kamciam khinzota hi.

Kikup Dingte:  

1.  Hih thute in hih vaite agen lian ahih loh hangin (Pai. 23:10-12; Thuhilhk. 11:11, 12; 20:19, ,20) hih thute tawh kizawitawn, ikiim ipaam hoih tak a icin ikep ding vai hong telsiam sak bang thuguipite ki lathei ding hiam?  Akem acing hihna leh abia apai hihna kikal koi mun ah bang hun in bang ci bang in koici kan’tan kha cih koici telsiam thei ding ihi hiam?

2.  Tu lai leitung om dan ih muh zia ngaihsun in.  Ei pawl hi zaw maw ei gal suak?  Na koici khentel thei ding hiam?

3.  Nimasa ni sinna tawpna ah kidongh thu ahi mihingte’ nuntakna khiatna leh deihna vai kikum ni.  Tua bang dotna hong donghte bangci dawn ding na hi hiam?  Pasian leh hotkhiatna thu a umlo mite tawh ih dawnna kikoici lamdan’ ding hiam?

4.  Thuneihna cih kammal atuung apat a akhiatna bang anei kik dingin koici ngah kik sak thei ding ihi hiam? Tu mahmah in zong koici leng, tua ci thei ding hiam?