PAWLPI SUNGAH IHMUTNA (Mission Story)

Mission Story (4th Sabbath of 3rd Quarter, 2016)

July 23, 2016                                                                                     Sudan Khanglam

                                                                                                                      

PAWLPI SUNGAH IHMUTNA

(A gen:  Mr. David Akena)

A pa in, “Tua biakinn ah na kikhop nop leh inn pan na paikhiat kul ding hi! Ka thu hong mang nuam lo in tua biak inn ah pai teitei na hih manin manlang tak in hih inn pan pai khia in” ci-in a tapa David haan gawp hi. Kum 16 a pha David pen Catholic pawlpi ah a kizangthei mahmah tangvalno khat hi a, a lawm hoih Otto in a maan Sabbath thu kuppih tawntung hi.

Otto in, “Ka biakinn vuah hong kikhawm lo ding na hiam? Hong en peuhmah dih in” ci-in David zawn hi. David in zong a innkuanpihte gen se lo in Otto tawh Sabbath ni khat  Seventh-day Adventist biakinn ah kikhawm uhhi. David in kikhop nuamsa a hih manin a mai Sabbath ciangin kikhop sawm hi.

          Bangbang ih ci ta zongin David pen a pa’n tua Sabbath ni-in huan kho sak nuam a hih manin pata kikal ah buaina hong kipan ta hi.  David in tua ni in na seem man lo in biakinn ah kikhawm zawk ding a sawmna a pa kiangah gen hi.  A pa in, “Na kikhop hamtang aa leh tu ni aa kipan ka tapa hi nawn lo ding hi teh” ci-in a lauthawn sak hangin David kikhawm dingin biakinn ah pai veve hi. A nidang khat ciangin  heh sa in David tungah a pa in, “Kei sabengpa hi’ng. Ka sa mat te nang zong hong ne sak nuam ing. Seventh-day Adventists pawlpimi te’n tua bang sa ne lo uh hi. Tua bang thukhun tuamtuam a nei pawlpi hua ing” ci-in hong gen ta hi.    Otto in zong David a kikhop loh lamdang a sakna leh a phawkna hong gen hi. David in zong a pa kampau lauhuai sa a hih manin a kikhop ngam lohna thu a lawm Otto kiangah gen hi.  Bangbang a hizongin, a Sabbath ni kik ciangin David biakinn ah hong kikhawm hi.

Biakinn ah Lumh

Tua Sabbath ni biakinn pan inn a ciah ciangin a pa’n inn pan hawl khia ta hi. David in om nading nei nawn lo ahih manin om na ding aa a hoih pen ding a, a ngaihsut biakinn ah hong pai in zan thum hong lum ta hi. Biakinn pan mah in zingsang in sang kah in nitaak lam in a lawmte tawh lai sim khawm uh hi.  Tua pawlpi ah upa pa in David’ gentheihna a theih ciangin  khawk pawlpi a kem Pastor tawh kikum in David’ pa tawh a kiho dingin pawlpi upate nih pai sak ding geel uh hi. David pen Adventist hong suak hen la, pilna sin to leh a muan huai khangno suak thei ding a hihna leh a ma’ aa dingin zong tapa hoih neih ding a hihna thu upa nih te’n David’ pa gen pih uhhi. 

David’ pa Mr. Akena in upate gen sang zo lo ahih manin dah huai simsim hi. Ahizongin, hih bang lung-khamna kawmkal ah laivuan hun tawh kituak himah tase leh David in hoihtak in laivuan thei hi.

Pawlpimi te’n a inn vuah David khoi in keem uh a, a pa’ hehna tawmbang kiam tuam hi mah taleh a tapa don nuam tuan nai lo hi.  

David pen Adventist pawlpi in buai sak hi ci-in a innkuanpihte’n ngaihsun ahih manin kuamah in ama’ upna thukim pih lo uh hi. A nu Mrs. Akena in a tapa David pen inn tawh a kinai, mi hon tan 10 bawda sangah kah sak dingin khensat hi. A pa Mr. Akena in a tapa’ sang saap piak sak nuam lo a, a hizongin  David’ nu in sang sap pen summuhna dang khat tawh a pa theih loh in na piak sak thei hi.

Lai Siangtho Kamciamnate Tungtawnin Lametna

Hih gentheih hun sung mahin a lawmpa Otto in Lai Siangtho sung aa kamciamna tawh kisai mun tampi David tungah a gensawn na hangin David in tha hong ngah kik hi. David in Matthew 10:28-31 sung a sim ciangin lungnopna ngah in Pasian in kawlgit te a kepna phawk in amah keem zaw kan lai ding ahihna hong tel ta hi. David in Lai Siangtho tungtawn in Pasian in lutung aa samzang om zah nangawn hong theih sak tazen veh ci-in khamuang tuam mahmah hi. Matthew 10:34-39 sung a simna pan in zong Topa Zeisu Gumpa aa saanna hangin innkuan sungah kikhenkhapna om hi cih tel in ama’ dinmun tawh kituak sa mahmah in tha ngah tuam mahmah hi.

A bawda sang panin  sangkhak neu sungin David a inn ah ciah hi. Ama’ sin biakna thute a sanggam numeite kiangah gen pih a, amau zong na ngai nuam uh hi. David’ deihsakna tawh a sanggam numei nihte zong ki tuiphum pah uhhi.  Innkuan sung buaina hong kipan leuleu a, a pa un a tanu nihte zong inn pan hawlkhia ta hi.  Amau zong pawlpimi te kiang hong zuan uh hi.

David tungah banghangin Seventh-day Adventist pawlpi mi a suah ding thupi hiam cih dotna kidong hi. A upna hangin banghangin bawlsiatna leh gentheihna thuak hiam cih dotna zong kidong hi. Amah in Matthew 10:39: “Hih leitung nuntakna a hon nuamte in a nuntakna taktak taanlawh ding a, keima hangin a nuntakna a taanlawhte in a nuntakna taktak a ngah ding uh hi”bulphuh in dawng kik hi.

         David in, “Hih pawlpi in Gospel Thumaan hilh hi cih ka mu hi” ci hi. “Pasian in Ama’ Sabbath ih sian tho sak dingin hong pia hi. Ama’ nungzuite zong leitung mun khempeuh ah Gupkhiatna thu tangko kawikawi a, tuiphum dingin sawl hi. Tuamah bangin kei zong ka theih Gupkhiatna thu pai kawikawiin ka tangko nuam a, thuhilhsia suah ding ka khensat hi” ci hi.