GAL GAM KHAT AH UPNA – Khen 2 na (Mission Story)

Mission Story - (3rd Sabbath of 3rd Quarter, 2016)

July 16, 2016                                                                                     Sudan Khanglam

GAL GAM KHAT AH UPNA – Khen 2 na.

(A gen:  Pastor Mark Igga Mona)

U.N. huang ka tun uh ciangin  galte te lakah Adventist pawlpi mite a tam zaw ana om uh hi. Amaute’n hong muak in om nading mun neu khat hong pia uh a, ciangkang li phut in tua dawnte ah delhphah tuam khih in tua nuai ah ka lum uh hi.

            Camp ah ka min uh ka pia uh a, an ngah theihna letmat ka ngah uh hi. An hawmte hong pai ciangin ka letmat uh ka lak uh a, puksih loh nadingin antang, sathau leh ci ka ngah uh hi. U.N. in zong an hong pia napi in kicing zo lo hi. Tui tawm mahmah a, Nile gun pan bek in tui kingah a hih manin in ni khat in innkuan khat aa dingindawn ding, an huan nading leh kisil nadingin tui liter 20 a taa phelkhai 1 a hih keh 2 ta bek ka ngah uh hi.

            Camp ah kha 2 bang ka om khit uh ciangin Sudan khanglam Attached field zumpi tawh ka kizom thei uh a, President  Pastor Clement in UN tungtawn in omna hong vaihawm sak thei hi. Tua ciangin ko zong UN vanleng tawh Juba khuapi ah ka leeng uh hi.

Tu laitakin Juba ah ka teeng uh a, ka Greater Upper Nile Field (GUNF) zum uh zong hong kik in nasep ka kipan kik ta uh hi.

            Hih gal kidona ah pawlpimite pawlkhat Malakal ah, a dangte Juba ah a kithahna hangin pawlpi mi phazah ka kiam tham uh hi. A om lai pawlpimite zong pawlkhat Ethiopia, Kenya, Ghana, Sudan leh galtai te belhna giahphual te ah kikhenthaang mang uhhi. Ethiopia, Sudan leh galtaite belhna giahphual te ah a om pawlpimite bek tawh kizopna ka nei thei uhhi.

            NGOs (non-governmental agencies) ah na a sem pawlpimi tawmkhatte in sawm aa khat sumpi hong khak uhhi. Tawm himah taleh, hong khak uh sumpi sawm aa khat tawh Topa min tawh nasepnate ka zom thei uhhi. Greater Upper Nile Field (GUNF) pen Leitungbup SDA zumpi (General Conference) pan Nisuahna-Alaizang Africa Division tungtawn in hong huhna uh sumpum leh pawlpimite’ sawm aa khat sumpi tawh a kizom toto thei a hihi.  2014 kum bei ciangin, Greater Upper Nile Field (GUNF) in pawlpimi vekpi 7,369 nei ta hi.

            Gal kidona veng baih a, Malakal khuapi ka ciah kik baih theih nading uh thu ka ngen uhhi. Pawlpi saang thum ka neihte uh zong kisiacip hi. Hih pawlpi sangte zong gamsung hong nuam leh lam kik pah ding a hihi. Tu laitak in pawlpimite in singkung liim beel in biakpiakna bawl uhhi. Banghanghiam cihleh Pasian biak theih nading mundang om kilkel lo hi. Khanglam Sudan kumpi leh Kumpi langpangte in gal kido nawn loh ding thukimna letmat thuh uhhi.  Gal kidona a ven baih nadingin thu ka ngen uhhi.  Topa Pasian tawh a piang thei lo na khat beek om lo hi cih zong ka um uhhi.  Kum kik peuhmah ciangin  Topa Pasian’ hong panpihna tawh gal kidona veng dingin ka lamen uhhi.

            Juba khuapi sungah Topa Pasian biak theih nadingin biakinn khat ka nei uh hi, a hizongin khangnote aa dingin Sabbath School, AY, Pathfinders leh a dang biakpiakna mun ding bel singkung liim bek mah a hihi.  Na Sabbath 13na sumpi tawh Juba khuapi sungah khangnoten biakpiakna a bawl theih nading in “tuuno buuk” kilam ding hi. Phalna taktawh nong piak uh sumpi hangin lungdam mahmah ung. Sawtveipi tak thauging leh hehna aw vive a za thapaai ka naupangte uh nuntakna ah liinlawn huai zah dong in a lamdang kilamdanna hong piang taktak ding hi.

Ciapteh ding thute

1. Sudan khanglam in 644,329 sq. km. (248,777 sq. tai) a zai huang khat nei hi.

2. Sudan khanglam ah  July 2015 ciangciang  mi a teeng  12,042,910 om hi.