Sinna 4 July 16 - 22
Laisiangtho Lui Sunga
Thumann leh Hehpihna: Khen 2
Nipini (Sabbath) Nitak lam July 16
Sim Dingte: Ezekiel 37:1-14; Eph. 2:10; Ezkiel 47:1-8; Matt. 5:16; Mang. 22:1, 2; Isa. 61:1-11.
Kamngah: “Hih tui aluanna mun peuh mah ah ganhing namkim leh ngasa tampi om hi. Hih tui in si tuipi tui siangsak kik in, aluanna peuhpeuh ah nuntakna om sak kik ding hi” (Ezekiel 47:9).
1950 khit a kipan 1960 khit hun masa lam sung teng a hong khangto khuapi sung mun khat pen 1960 khit 1970 madeuh pawl leh akhitdeuh pawl in galphual hong bangh hi. Nasepna phualpi pan zatui hoihlo zatna munpite hong suak uh a, akiim apaam mun nawngkai suaksak hi.
1986 kum in Christian innkuan khat amau khuapi nawl mun nuam nusia in tua mun hong tung uh hi. Khuapi dang khat pan Pastor khat in zong tua inn kangbangte hong lam pha kik uh hi. Tua innkuan nihte in lampite ah hun zangh khawm uh a, mi ahon nono in tua kim ah kimuhpih uh hi. Hih mun teng ah pawlpi khat hong kipan in kikhelna apiang sak damna leh kipuahphatna tua munsia ah hong pankhia uh hi. Tu dong in amau nasepnate uh in mongg nei toto in mi tampite’ kikhelna lianpi piangsak hi.
Hih bang a “lametna bei” munte adingin pawlpi’ masuan vai Pasian in gen ding nei hi. Tu kal sinna in Laisiangtho lui’ gen thute hong genbeh toto in Pasian hong it, hong deihsakna thute Amite tung ah kilangkhia sak dingin hong khoo hi.
July 23 ni sinna ading tu kal sungin hong kiging in maw.
Nimasani (Sunday) July 17
Khazih Sung ah Thalawp
Mawhna sung a asi mite tung ah Pasian hehpihna tungtawn a apiang thei thute omzia Ezekiel 37 ah hong kilak hi. Mangmuhna sung ah kamsang Ezekiel pen Khasiangtho in asi, akeu, akithehthang guhte tawh kidim kuampi khat ah paipih hi. Hih guhte in Israel innkuante limla ahihi. Pasian in, “Mihing Tapa aw, hih guhte anungta thei ding hiam? (Ezekiel 37:3) ci in dongh hi.
Hih thu’ dawnna in tua kamsangpa’n hih guhte tung a athupiak tungtawn in hong kilangh hi.
Ezekiel 37:1-14 sim in. Pasian in Amite ading in bang bawl ding hiam?
________________________________________________________________________________________________________________________________
Tua guh keu te tung ah thu akipiak ciangin: 1). hong nungta in atam mahmah galkap hon bangin hong dingkhia uh hi (Ezekiel 37:10, NIV). 2). Pasian in Amite amau gam ah lungmuang in tengg sak ding hi (Ezekiel 37:14). 3). Pasian panpihna ahih lam thei ding uh hi (Ezekiel 37:14).
Ahi zongin khanlawh bek pen kicing lo hi. Pasian mite masuan leh ngimna tawh akhanghlo uh ahihi. Mi namte tung ah Israel mite in khuavak ahih ding uh ahihi.
Eph. 2:10 sim in. Bang hang in eite in kha lam a thalawp leh Khazih ah bawlphatna ngahte ahi dingin hong kibawl hiam?
________________________________________________________________________________________________________________________________
“Pasian in eite hong san’theihna pen a it Atapa tungtawn hi a, ahoih apha sepna bawlnate pen ih mawhnate hong maisakna Ama hong itna pan a hong phulkhia ahihi. Eite thalawh hi lo in, eite hong kigupkhiatna vai ah ahoih apha sepna bawlnate’n hong piak theih om peuhmah lo hi. Hotkhiatna in Khazih hang bek a Pasian a um mite tung ah, Pasian hong piakkhong silpiak ahihi. Khazih upmuanna tungtawn in apatau mite in aup amuanna uh tawh kizui in lungmuanna ngah ding uh hi. Amaute akigupkhiatna ding un sepna bawlna phate paulap theih hilo hi.
“Ahih leh sepna pha in manh nei lo hiam leh? Nisim a mawhna abawl ngekngek mawhnei mi khat pen Khazih upmuanna tungtawn a kilawm akituak tak a agamta khat tawh kibang sak maw? Laisiangtho hong genna ah, “eite in Khazih Zeisu sung ah ahoih apha sem in mapang ding a hong piansakte ihihi.”
Ih kilawm loh kawmkal a Ama hong geelsakna tungtawn in, ahoih apha omziate neihtheih nading thu hong pia hi. Khazih’ dikna hang bek in eite hong kisang hi a, hehpihna tawh gamtatna, itna tawh sepna bawlnate in upmuanna gahte ahihi.” E.G. White, Teltuam Thupuakte, 3 SM. pp. 199, 200.
Damtui Luanna Gunpi
Ezekiel 47:1-8 sim in. Ezekiel mangmuhna sung a biakinnpi ah bang thu piang hiam?
______________________________________________________________
______________________________________________________________
______________________________________________________________
Tua biakinnpi pen akehkhia tawh kibang hi. Tuizawn khat peuh hoh kitamkha ahi tam maw? cih huai hi. Hih vai ah bel thu hoih ahihi.
Tua tui luangkhiate’n “ni suahna lam” manawh hi. Jerusalem pan nisuahna lam pen ci tuipi (tuipisi) hi a, leitung a mun niampen ahihi. Jerusalem leh tuipi si kikal tai 21 tang (34 KM) hi a, sehnel gam hi in Arabah mun zong kihel a Jordan leh tuipi si kuam teng ahihi. Tua tuipi pen al lua a, asung ah anungta zo omlo hi.
Ahi zongin, biakinnpi pan a tui tawh akisuk khak ciangin tuite in “damhna” hong ngah hi. Hih biakinnpi pen Pasian pawlpi limla hi in (1 Pet. 2:4, 5), mun citeng adingin cidamhna leh mawh-na khialhna sung a asi mite adingin damhna apia hong suak hi.
Matt. 5:16 sim in. Eite in leitung ah Amah ih aiawh zia ding vai Zeisu in bangh hong gen hiam?
____________________________________________________________________________________________________________________________
Africa gam, Zambia gam a om Zambezi gun pen sing nuai khat pan lui neu khat in hong kipan in Victoria zeu lam zuan in siakmit ciang apha lui neu pan khuk ciang, kawng ciang leh tui peh theih zah dong in hong thuuk semsem hi. Tua bang mah in tua biakinn pan a hong phulkhia gun pen kuama kantan zawhloh zah dong dingin hong picing to semsem ta hi (Ezekiel 47:5, NIV).
Na pawlpi’ damhsak theihna huzaap pen atuung in neu mah ta leh taangpi teng kikhel sak zah dongin hong khangto ding hi. “Ih masuan pen atungg in aneu mahmah gunhiangno bang khat in hong kilak hi.”- E.G. White, Testimonies for the Church, vol.7, p.171.
Pasian in ei tungtawn a midangte ahuh apanpih theih zia thute lahna in khuavak leh tui tawh kigenteh hi. Mite kitangg- sapnate ah apanpih thei zawsem koici suah thei ding ihi hiam?
Nithumni (Tuesday) July 19
Pawlpi: Nuntakna Naak Khat
“Guntui aluanna mun peuh ah nuntakna nei ganhingte nungta ding uh hi. Ngasa tampi om ding a . . .; guntui aluanna peuh ah na khempeuh nungta ding hi (Ezekiel 47:9, NIV).
Ezekiel genkholhna thu in Pasian pawlpi pan a hong luang guntui ah nuntakna om hi. Ezekiel 47:10 in tua thu alamdanna behlap sawnlai hi. Anungta aom theihlohna mun pen ngabengten’ angen uh apaihna mun uh, nga tampi mat theihna mun hong suak ziau cih lamdang sak huai mahmah ding hi.
Pasian vangliatna amite sung ah aom ciangin nidang a bang mah a omlohna mun ah nuntakna hong om ding hi.
“Pasian mapanna mun ah lamet omlo cih om thei lo a, gupkhiat lah ding mi zong omlo in abeisa hehna leh thangpaihnate hang in mailam ah kuamanh hong mawhkawk theilo ding hi.”- The Interpreter’s Bible, (Nashville: Abingdon Press, 1956), vol. 6, p. 328.
Alamdang Pasian hehpihna in tua hehpihna thupha deihna tak tawh asang mite tung ah alamdang nate piangsak hi. Hih mun ah zong lungdamna thupuak kimu thei hi. Pasian in eite tungtawn in, alungkia athanem, acimawh, sih ding bek angak mite tungah pumpi le kha lam lametna pia thei hi.
Ezekiel 47:12 leh Mang. 22:1, 2 saikaak in. Apawlpi tungtawn a Zeisu’ damsakna asangte ading in akip amuanhuai alawhtak ding vai uh bang thupiak hong gen hiam?
____________________________________________________________________________________________________________________________
Apawlpi mite’ angsung khual lohna hang a damhna angah Pasian mihonpite in thangvan ah, Pasian tokhom pan a hong luang gundang khat leithak ah mu ding uh hi. Tua mun ah sehnel gam abang, akeucip leh sihna cihte omlo ding hi.
Tua thupha adim hunpha ih ngak kawm in tu in Pasian in Ama pawlpite tua bang damhna leh mihonte’ tung a apicing nuntakna apiakhia munte suaksak nuam hi. Eite tungtawn in munsiate, lungkiat huai thute, leh ikiim ipaam a si tuipi abangh munte Zeisu sung ah apicing nuntak pia nuam (John 10:10) a, hih thu in Adventistte’ thupuak tomkaih thu ngumngeek ahihi.
Kamsangpa Amos in zong Ezekiel 47 ah tua bang pian khat hong pulaak hi. Amos 5:24 sim in. Hih thu omziate na pawlpi omzia tawh na koici saikaak hiam? Na pawlpi ah koici bangin damhna guntui aluang takpi hiam?
Nilini (Wednesday) July 20
Jubilee Kamciamte
Laisiangtho lui sung ah thupha asangte’n asanglote a panpih zia vaite uh tawh kidim hi.
Isa. 61:1-11 sim in. Hih mun ah Pasian in Amite tung ah bang gen a, hih mun a kigen thute eite adingin koici laak in Topa hong sapna vaite tawh koici pengpeh ding ihi hiam? (Luke 4:18 zongh en in).
__________________________________________________________________________________________________________________________________________________________________________________________
Isa. 61 pen Pasian Khasiangtho in teeltuampa tungtawn in mizawngte tung a lungdamna thu hilh ding, alungkiate lunglawp sak ding, galmat te ading suahtakna tangko ding, leh lungkhamna khualmial sung pan thongkiate honkhia ding cih thute hong tangko hi (Isa. 61:1). Hih kamciam tawh kipawl thute ahi “hunpha hong tangtung sak ahihi. “Topa deihsakna hunpha” cih kammal in Jubilee kum gen nuam hi a, tua pen mizawng daipamte’ kitangsapna vaite panpihna vai hong genna ahihi.
Tua hi a, alungkimlo khasiatna neite, Zion a adah akapte kipia khin a, “vut leh vaite tangin etlawmna” leh “dahna kahnate tangin lungdamna sathau” leh “lungkiatna tangg a phatna piakna silh puan asilhte (Isa. 61:3, NIV) in tanglai munsiate apuahphate ahi uh hi. Messiah’ jubilee ah thupha sangte in amipite uh akikhel sak uh leh khuapi siacip lammkikte (Isa. 61:4) ahi uh hi. Pasian nasemte pen siampite leh mi huh mi panpihte kici uh a, akiim a-paam a minamte’ neihlehlamhte tawh kivaak uh hi (Isa. 61:5, 6).
Isa. 61 sung Pasian sathau nilhpa in Pasian thuciamna anei mite nopsakna tungtawn in Isa. 61:8, 9 akiim vua om mite akikhel sakte ahihna limte hi a, tu hun leitung bup mite ading a siampite leh biakna nasemte gen nuam ahihi. Topa tung ah ih lungkimh ih lungdamh ciangin hih bang kikhelnate eite sung ah zong hong piang in, imi isate lak ah hotkhiatna leh dikna puan silh in omlo ding ihi hiam (Isa. 61:10, 11)?
Isa. 61:9 sim in. Pasian in mite ading aseptheihzia vangliatna teci ahihi. Tu lai eite zong tua bang hong kici thei ding hiam? Bang hang in kici thei ahih keh kici theilo ding hiam?
________________________________________________________________________________________________________________________________________________________________________________
Ningani (Thursday) July 21
Pawlpi-Kikhelna Apiang Sak
Micah 6 sim in. Hih mun ah Topa in bang vai diklote gen hiam?
_________________________________________________________________________________________
_________________________________________________________________________________________
Micah in zong Laisiangtho lui kamsang dangte mah bangin puatham biakna vai bek tawh alungkim; kiniamkhiatna, hehpihna, leh thumann omlo in adik Pasian’ san theih om theilo hi.
Micah 6:8 a athupi thupuak bangh hi mawk hiam?
____________________________________________________________________________________________________________________________
“Biakna diktak pen zattakcing hi. Pawlpi paizia leh zatziate zong kihel a, ahi zongin . . . ann ngawl vai hizaw lo in gilkial dangtakte tawh hawm’khawm diamdiam a, nuntakna vai ahihi. Akilanghkhia picinna keek mah Pasian thukhenna a kizangh thei biakna’ omzia ahihi (Matt. 25:34-46).” - E.G. White, 4 SDA BC, p. 306.
Tu hun in zong Pasian in puatham etlawmna tawh lampial a nuntak asiangtho adapkoihte Pasian in nial hi (Micah 6:8). Ih biakpiakna paiziate pen amau leh amau kimanna anei hi tuan lo in; deihna thu khat ading a kizangh hi a, tua in eite tungtawn a hong kilangh ding Khazih’ omzia ahihi. Tu kal sinna thupatna ah “lamet bei” veng khat ah amau kitangsapnate apanpih ding a hong pai innkuan nih te ih mu hi. Amau inn dei khat ah aveng apaamte uh tawh mihonno khat in hong kikhawm uh hi. Hih mite in aveng uh khanglo sak ding in deihna tak tawh thu hong ngen uh hi. Christian huhna pia pawlkhat tawh kikop in akiim apaam uh a atualniam mite leh innlehlote abawl pha dingin mi hong kaikhawm uh hi.
Tua veeng tu in pai leng nidang sang a hoih zaw tham, ahanciam mihonte kimu thei ding hi. Hih bang hong pianna pen Zeisu’ itna atak a alakkhia nuam pawlpi no khat in tua veng puahpha nuam ahih man uh ahihi. Hih thu in akilatkhiat sak thu in; Khazih in Ama mite tungtawn a midangte akisapna uh tawh kituak in nasia tak a ahuh apanpih nuamte hang ahihi.
Pasiann in mihonte agen ahita zongin aneu 8 ah “nangg” acih kammal pen khat bek genna ahihi. Pasian in ahoih acih bang na koici lah hiam?
Ngaihsutbeh Ding: Jerem. 22:1-16; Ezekiel 16:49; Zech. 7:9, 10 sim in. E.G. White genbehna, 4 SDA BC pp. 1165, 1166, “Ih zatote ading Pasian deihdan, 6 T 227-228.
“Leimi aw, amah in ahoih apha hong lak zo hi. Topa’n abangci ding in hong deih hiam? Thudik tak in gamta in hehpihna deih in kiniamkhiat tak in Pasian tawh tonkhawm in” (Micah 6:8, NIV). Pasian in Ama deihzia hong genna ah tua sang in kicing-zaw theilai ding hiam? Pasian in “ahoih apha” hong lak a, hih kammal pen Piancil 1 a azat kikkik kammal mah hi a, mawh lut ma piansakna hun hong lak kik ahihi. Tua hi a, deihna bulpi hong kilak kik in, atuung apat a Pasian hong deihsakna, leh Zeisu hong paikik ciang a hong bawl phat dan ding hong lak zong ahihi. Hih kammal “nang’ kitanggsap” cih pen (amann zaw dingin) “nang’ tung pan a kilamen” cihna suak hi. Cihnopna ah eite’ kiang pan a, “kideih thu in” ama hong tatkhiat te Khazih hehpihna tawh ih kituam hiam? Adawnna pen mite leh Pasian tawh kikoicih zop ding cih thu ah hong kilak hi.
Amasa pen ah, thumann a gamtat ding ahihi. Hih pen tu quater thulu tawh kituak mahmah a, thumann lo sung ah athuaksiate koicih panpih ding cih vai ahihi. Anihna ah, hehpihna thu deih ding cih thu hi. Kihehpih-lohna tawh akidim hih leitung ah ih nungta hi. Eite in hehpihna deihtakpi in tua hehpihna midangte tawh ih kizopna ih nuntakna sung ah, kilangh sak dingin hong deih hi. Athumna ah, Pasian mai ah kiniamkhiat tak a kalsuan’ ding ahihi. Hih Micah 6:4 ah Pasian in Egypt gam pan a ahotkhiatna pen kiniamkhiat a muanhuai tak a aom nang uh ahangg leh athu hi leh, eite cihhuai zawkan lai ding hi hangh; Zeisu’ sisan tawh hong kitankhia ngiat hi mawk lo ihi hiam? Singlamteh a hong kitatkhiatna leh tua hong kitatkhiatna i manphatna thu in ih Pasian mai ah hong kiniamkhiat sak den ding thu ahihi.
Kikup Dingte:
1. Akitangsamh mite tung ah Laisiangtho lui’ hong gen ih mawh puakte koi munte ah mu thei ding ihi hiam?
2. Amos 5 sung, aneu 21-24 sung diak ah, Amos hun lai biakna mite tung ah Ama patkhiat biakpiakna tuamtuamte sangin midangte abawlzia uh vai ah lung-himawh zaw hi. Hih thu in bang vaite limh-gaihsut ding cih hong theisak hiam?
3. Mite pumpi vai kitangsapnate ngaihsutna tawh akha lam vai uh leh ih phawkkhak loh vanzat tuamtuamte vai ah koici kigin ding ihi hiam? Ahamsia deuhte leh akitangsamhte ih panpihna ah koici kimkhai in koici laivat ding ihi hiam?
Post a Comment
Lametna Aw hong ging lai hi. Hun bei ta ding hi. Lametna a om lai in na bil ngat inla, Topa hong sapna ngai in.