Zo Phualva Thupuak ~ Volume 06, Issue 13: Pawlpi Sagihte: Pawlpi 7 na. Laodicea (Mang 3:14-22)

Hih pawlpi min akhiatna in, Mite thu kikhensak ta cihna hi. Ahun pen, 1844 pan in leitung bei dong huam hi.

          "Amen, ahi mi, Adik amaan Teci pang, Pasian piansakna bulpipa thupiakna in, Na gamtatna, sa lah sa lo, vot lah vot lo, na hihna ka thei hi. Na vot leh vot vet, na sat leh sa vet ka deih hi. Lumlel pen ka kamsung pan kong siakhia ding hi, ci hi. Zawn'na lunggimna thuak in, ahehpih huai-mittaw, puanlo niklo-a guakdin' nahih lam na kithei kei hi. Sapna om lo hi, ka hau hi, na kici hi. Na hauh nadingin mei tawh halsiangsa Kham citak, na mit nuh dingin mitza leh na guakdin' zahmawk sel nadingin puantualpaak, ka kiang panin hong lei in", ci-in hong hansuah hi. Ka it mite ka taai hi. Kongkhak kiangah dingin ka kiu hi. Kong hong hon' mi kiangah sungtum in, nekhawm, dawnkhawm in, Keimah in ka zawh ciangin Ka Pa Tokhom ah ka tut theih mah bangin amaute ka tutpih ding hi, ci hi.

  Hih pawlpi hun ah, Pasian in leitung beisak nuam ta a, Amah a it taktakte tungah Ama ciamtehna koih nuamta ahih manin Mang. 14 sunga vantung mi thumte abanban in atangko sak hun ahi hi. Tua tangkona pen, eite mitmuh in vantung ah van mite hong leeng dada in hong tangko ding hilo a, hih leitungah tua thupuak luanzia na kisepna panin ih theithei ding hi.

Tu in, vantung mi masa le anihna thupuak na ki tangko khin a, tu laitakin a thumna thupuak akitangko san laitak ahi hi. Vantung mi masa thupuak in, minam khempeuh, pau nam khempeuh, mipawl khempeuhte tungah atawntung Gospel thu tangko a, 'Pasian kihta unla, Amah bek bia un. Banghang hiam cihleh, Ama thukhenna hun hong tung zo hi’ (Mang 14:6,7). Vantung mi nihna in, 'Mipawl khempeuh hehna leenggahzu akham sak Babylon apuk zo hi, apukzo hi', ci hi (Mang. 14:8).

Vantung mi thumna thupuak in, "Sapi leh a milim bia a, aciamtehna akhut tungah leh atal tang tungah angah leh, tua mi mei le kaat tawh kibawlsia ding hi." Hih thu ah, "Pasian thukhamte le Jesu upna Teci apang misiangthote thuakna a om hi," ci hi (Mang. 14:9-12). Hih amasa le anihna tangkona pen America panin, Tuiphum pawlpi mi William Miller leh Episcopalian te J.V. Himes, Methodist te Josiah Lithch, Congregationlist te Charles Fitch, leh Baptist te Joseph Bate te in, kum 1840 pawl in na tangko uh hi. Pasian thukhen na hun hong tungta hi. Topa Jesu hong pai kik baih tading hi, naci uh hi. Hih khaa nasepna Movement ah, kua pawlpi ci tuan lo-in thukhenna hun hong tungta hi ci-in kithu hual takin tangko khawm ciat uh hi.

England gam ah, Anglican pawlpi te Edward Irving, Puritans te; Robert Winter, leh leitung uk ahi M.P. Hennry Drumond te in na tangko uh hi. Germany gam ah, Lutheran pawlpi ahi, John A, Bengal in tua thu mah na tangko a, Russia gam lawhto in, pawlpi tuamtuamte in abiakinn khawng uh khakcip zaw in, konglak mun nuamte ah mihon kaikhawm in, "Pasian thukhenna hun hong tung zo hi," ci in na tangko uh hi.

Hollan gamah, Heinzepeter, Switzeland gam ah, Louis Gausen, America khanglam gamah, Jesuits pawlpi Lacunza in tangko a, Spain gam dong lawh hi. Scandanavia gamte akici, Sweden, Norway, Denmark gamte ah, uhaam sa in atangko leh gam ukte in thong sungah na khia a, Pasian in alamdang mahmah in nasem a, naupang neu thong Upadi cing nai lote vive tangko sak leuleu hi. Leitung mun tuamtuam. Middle East, Asia, cihte ah Joseph Wolff, Jews Rabbi te tapa khat, RCM pawlpi sung a alutpa tangko kawikawi hi. Leitung pau nam tuamtuam 56 bang siam a, "Pasian thukhenna hun hong tung zo hi," ci kawikawi hi. A gamgam-a hih thu atangko te pen, khat le khat kithuza atangko hilo hi. Amau om mun tek pana Pasian Khasiangtho in hansuah-a LST mun hilhkholhna len in atangko ciat mawk uh ahi zaw hi.

Oct 22, 1844 in America-a tangkote pawl in, Dan 8:14 sung hilhkholhna a biakinnpi siansuahna pen, Jesu hong pai dinga leitung siansuah tading hiding hi, ci-in, mihing 50,000 bangin Jesu na dawnkha uh hi. Tua lai ah, Mang. 14:8 a, Babylon apuk zo hi, apuk zo hi, acihna vantung mi nihna thupuak zong atung khinta ahi pah hi. (Ahih hangin hih Babylon pukna pen, tudong mahin akitangko lai ban ah, vantung mi thumna tangkona akizawh siang ding ciangin zong, vanglian mahmah tawh kitangkona hong om lai ding hi). Ahih hangin Jesu hih leitunga hong pai ding nahi nailo zaw in, Gupna ngah ding mi leh ngah lo ding mi va khentel, thukhen nasep va semta ahi zaw hi. Tua mun panin Ama Kumpi gam ding va saang dinga, a aana ding le ami dingte va thoh in, Dan 7:9,10. Tua khit ciangin leitunga amite la dingin hong pai ding hipan hi. Tua biakinnpi siangtho bel mun pan hong paikhiat ma-ava tham sungteng, hih leitung ah, vantung mi thumna thupuak na kitangko laitak hi a, Pasian ciamtehna le Sapi ciamtehna pen, mite mai ah adeih zawkzawk teel theih dingin kihilh tel ding hi. Hih tangkona in pawlpi, upna, gam le lei cih deidan nei lo-in, mihing khempeuh zak ding thu ahi hi (Matt. 24:14).

Vantung mi masa in, na khempeuhte piangsakpa bek bia un, ci-in hong sawl phasan hi. Eite in piangsakpa Pasian pen mah bia a kinei ih hi khin zo hi. Ahih hangin tua vantung mi masa in bia hong sa nai lo hi. Banghang hiam cihleh, ih biakpa pen na khempeuhte piangsakpa Pasian pen ahihna teci pang, ni guk sunga tuate khempeuh bawl-a ani sagih ni tawlnga pa ahihna alak, Sabbath pen kitang kha nailo hi. Pasian mah bia-a kinei in, alangpangpa' kheksak bawltawm nipi maan lo kitang lai hi. Tu in, a thukhen hun hong tungta ahih manin, piangsakpa kilangsak Sabbath maan pen tawh, "Pasian bia ta ve un," ci-a hong sawl ahi hi.

Pasian thumaan pen  ahun zui-a hong lahkhiat beh toh zel hi a, athumaan pen a omsa mah kitheih beh toto zel nahi hi. Nungzuipite nangawn in, amau hun in saang khin zolo ding uh ahih manin, thumaan a om khempeuh na lak khin nai lo hi (John 16:12). Ahun zui-a Khasiangtho in ahong lahbeh to zel hi napi, pawlpi khat akiphuh ciangin, tua apawlpi phuh lai uh a, amuhkhiat sa uh a kip sak sa uh upna ciang longal, anungsang ciangin LST thu takpi mah hi taleh, thumaan kimuh beh zelte pen san' beh nuam lo-in langbawl zaw zel ciat mawk uh hi. Thumaan sangin aphuh sa uh pawlpi kitap khak ding it zaw kha pahpah zel uh hi. A kipsak sa ciang bek mah uh ah kilungkimsak in belh tentan uh a, Dawimangpa tawh kop in thumaan kimuh beh a om teh langdo zaw zel uh hi. Hih Laodicea pawlpi tunga thu kipia pen leitung buppi Christian khempeuh te tungah kibulh thei hi. 6T.77.

Tua hi a, LST sung thumaan ahih nak leh, nidangin ih theih nai loh thu ahi zong, ih zak ciangin zuih toh pah lel ding Topa in deih hi (Luke 6:46). Tua hi lo-a, ama din'mun ngei bang lo akibehlap thumaan hong om cianga na nial zel zelte Keimah in zong ka nolh ding hi, ci hi (Matt 7:21-23).

LUMLEL te: Pasian maan mah lah bia vanglak, Ama deih banga lah bia nuam lo zel laklawhte pen lumlelte hi a, Ka kam pan ka siakhia ding hi, ci hi (Mang. 3:15,16). Tua manin Christian akicite hi a, a Puansilh uh- A doctrine (upna) uh, din'mun melmel zong nei nawn lo-in, kibang nawn lo a,  Niklo, Puanlo a guakdinte, hong ci hi. Mittaw. LST thei mahmah kisa kha uh a, Pasian thumaan LST deihna thei nai lo lua ahih maninmittaw te hong ci hi. Hauh nading, Kham ci leuleu hi. Kham pen gamtat hoih, ki-itna hi a, Christian te mah hi napi uh in, ki-it lo lua uh a, kimuhdahna leh kitapkhapna tampi om hi. Tua bang nahih laiteng uh zawng mahmah in, Christian zong hi nai kei uh teh, ahong ci ahi hi.

Hansuahna. Kongkhak kiangah dingin ka kiu hi. Kong hong hon' inla, na zahmawh sel nading Puantualpaak-Thu upna maan Doctrine cihna, na mittaw nuh ding mitza, mit muhna pen LST thumaan muhna, a zatui in Spirit of Prophecy bute, na hauh nading Khamtak, ki-itna maan, Pasian aa bang ahite neihna, ka kiang pan hong lei in, ci’n hong sawl hi.

Khapna. Tua banga kong hong hon' mi kiangah sungtum in, nekhawm, dawnkhawm, nungta khawm in tua akisapnate kong pia ding hi, ci hi. Ka zawh ciangin, Dawpkholh thukhenna azawh ciangin, a zo mite a Pa Tokhom ah tutpih ding hi. Mawhneite daan thuak dingzah khentelna Tokhom ah tutpih ding hi, ci hi. Mang. 20:4-7; 1Kor 6:1-3. Ih gensa bangin ahunhun letsong kibang lo-a, hih hun-a a zo mite, thukhen to-khom tu ding ci ahih teh, thukhen mang sem ding hihtuak hi.

Ciamtehna. (Mang 8:1). Tuuno in ciamtehna 7na ahon' ciangin vantung tawmvei sung gamdaii hi, ci hi. Banghanghiam cih leh, Van laidal zial bangin kizial a, Topa leh avantung mite hih leitung ah hong paisuk uh a, vantung hong nusia pak phot uh ahih manin, vantung gamdaii hi. Vantung-a omlaite in, hih leitunga thupiangte ensuk in, vai dang sem lo tadih uh ahih manin, gam daii hi. EW.15,16; DA.693

Vantung nangawn tawmvei sung gamdaii sak zo zah-a thupi in Topa in ama mite la dingin ahong paisuk ciangin, tua alaak ding amisiangthote lakah nang zong na kihel thei ding hiam? (1Jn 3:2,3). Amah tawh kibang-a asiangthote bek la ding hi, ci hi. Vantunga om Ka Pa deihna banga agamtate bek ka la ding hi, ci leuleu hi (Matt 7:21-23). A Pa deihna bang hiam? Adeih leh adeih loh khentelna atomkaih penpen  Pasian thukham 10te ahi hi. Thukham apalsatte mawhnei kici hi (1 Jn3:4). Tua thukham sungah Sabbath tang ding zong kihel hi. Tua thukham leh Jesu a lenkop te bek misiangtho te kici hi. (Mang 14:12). Satan in zong tua thu nih lenkop te bek mah mudah hi (Mang 12:17). Tua thu nih lenkop khol lo Khristiante bel, Dawi in it mahmah-a puah zaw hi. Ama nasepna picing sak thei zaw uh hi, ci lai mawk hi. GC khawk 27 & 31.

Nang zong vantunga laaktoh te lakah na kihel nop leh, hih tangkona nunung thu a awlmawh lote lak panin hong paikhia in (2 Kor 6:17,18). Babylon te laka na kidiahdiah leh, amaute thuak ding gimna daante a kibuak suk ciangin na thuakpih khawm kha ding hi. A manlangin hong paikhia in. (Mang 18:4).                     

 Pr. Ngul Khua Pau

Zo Phualva Thupuak - Volume 06, Issue 13 on Scribd