NA KHEMPEUH ANGEI BATSAKKIKNA - 2016-3Qtr, SINNA 01

Abucing Lungdamhna Thu 

 Thuhilh sia khat in alaisiangtho mihon lak ah lammto hi. Asung teng, vang lialuaa gawp hi. Alaisiangtho sangg kahna ah alawmte tawh kipawl in simkhawm uh a; thumanhna, tanggsapna, hauhna, leh nuainena vai teng khempeuh anuai giitmang khin uh hi. Tua khit ciangin temteh tawh tua munte atkhia uh hi. Amanh uh ciangin, a Laisiangtho pen paat nenghnangh hi. Laisiangtho sung teng ah hih thute pen thu laigil hi a akilakkhiat ciangin asam hong tam peuh mah hi. Tua avangg lialuaa Laisiangtho in Pasian hong khualna, nasia tak leh vang nei tak in hong hilh hi. SDA khat ih hihna tawh hih thu in bang hong thei sak hiam? Tampi tak mah hong theihsak kul hi. Kankhiatna pan SDA 30% te in pawlpi pua taangpite panpihna vai ah kihel uh hi cih hong kidawk hi. A om lai 70% te e leh? Zeisu in ni tawp kuan pawlpite’ “tawntung lungdamna” thu tangkona vai pawlpi bup tung ah suan hi (Mang. 14:6). Abucing lungdamna thu ih cih bang hi mawk hiam? Zeisu’ nasep masuan vai Luke 4:16-21 ah, abucing in hong lahna ah, upmuanna tungtawn a hotkhiatna pen ihsep ihbawlte’ bulpi ahih hang abucing lungdamna thu in tuate khempeuh khengval lai hi. Zeisu’ hong lahna ah lungdamna thu tangkona pen azawng, akial, anaa asaa, akhasia, alungleeng, simmawh, daipaamte, thongkiate tung ah amuibun itna leh khualna lahnate zong nakitangsamh hi. Laisiangtho tawh kituak thumanhna hi a, ei pan theih bang a dawite sepsa teng phelkikna ah nitawp ni a siatna tung a apicing Zeisu gualzawhna alamen ih hi hi. Tu quarter sung in hih abucing “tawntung lungdamna thu” ih kansut ding a, hih lungdamna thu tawh pawlpi in tangpi koici huzaap cih ih sittel ding hi. “Pawlpi’ ih cih ciangin, amau vai tawh thamang lo a, tawntung lungdamna thu Zeisu sepna bawlnate bang a tangko ding a akituamsapte cih bangin telsut hangh. Cihnopna ah kam tawh hilhna bek hi lo in midang taangpite’ kitanggsapnate khualna tak tawh nuntakna vai zongh ahihi. Ih pawlpi bup in, ih khuatual pawlpi in atasamhte koici donn hiam? Pawlpi’ masuante khempeuh ah; innkuan, khangnote, sabbath school, deconte, deaconesste leh pawlpimite khempeuh in hih nasepna ah amapangkhawm ding ihi hi. Adventist tang nasemte (ACS - Adventist Community Services Unit or Centers) in Pasiam kammal azaak nading uh lamsial in, pawlpi in lungdamna thu tawh anuntakna lahkhiat nang in mapang uh hi. Leitung mun tuamtuamte ah ACS pen; Dorcas, Adventist Men mindang khat peuh tawh sam uh hi. ADRA in zong SDAte’ panpihna nasepna’ min hi a, kumpi nasep hi lo in pawlpi tungtawn in asepkhiat lian loh hang, mi-tasamhte panpihna nasepna pikhat ahi hi. 

Khazih tungtawn a Pasian hong sepsakna thu ah na lungdamhna na koici lah hiam? 

Pawlpi mite khat in na hi ci gen a: Lamkal ah numeino khat ka mu a, 

Khuadam sa in ling in puanpa khat silh kawm in, 

Nektawm ding apicing ngah ding lamet omlo hi. 

Hehna tawh Pasian kiang ah: “Hih bang thu bang cia phal mawk na hi hiam? 

Hih vai ah, bang khat peuh hih lo na hi hiam?” 

Ka cih leh tawl khat sung bang mah hong dawng kei hi. 

Zan ciangin hong dawng kik lian a: “Bang khat peuh bel hih peuh mah hi vengh;  Nang hong bawl kai veh!” hong ci hi. - In Dwight Nelson, Pursuing the Passion of Jesus (Nampa, Idaho: Pacific Press Publishing Association, 2005), p. 78.

 Sinna 1                                                                                    June 25 - July 1

 “NA KHEMPEUH ANGEI BATSAKKIKNA” 

 Nipini (Sabbath) Nitak lam                                      June 25 

 Sim Dingte: Pian. 1:26, 27; Thuhilhk. 6:5; Pian. 3:8-19; James 4:4; Gal. 4:19; Mark 2:1-12; John 10:10.

 Kamngah: “Tua ahih ciangin Pasian in Ama lim bang in mihing piangsak in amaute thupha pia a Pasian lim bang in piangsak hi. Amah in pasal leh numei piangsak hi” (Piancilna 1:27).

 Mikim in thudik ih theih nang in, ih kiim ih paam leitung teng en in, ih veeng ih paam leh ei mahmah ih kiet ding ahi hi. Ahang pen adik lo mahmah thu khat om ngiau mawk hi. Tua pen puukna kici in, mawhna zong kici a, langdona zong kici in, kikingkalhna lian zong kici hi. Hi mah leh, thu hoih khat ah atawntung ding hi lo hi. Kizomh paisuak lo ding hi. Zeisu hong pai in lei mite mawhna tang ding in hong si a, hong paikik’ ding thu kamciam hong pia hi. Tua hun hong tun ciang in hih leitung vaite bei mang ding hi. Tua mun ah kumpi thak, tawntung gam, hong kipan ding hi. “Hih kumpite hun sung in van Pasian in akisia ngei nawnlo ding kumpi gam hong phut ding a; tua kumpi gam midangte’ khut sung tung lo ding a; gamlui teng kitamzan sak in kumpi gam khempeuh kizo mang ding a, kip tawntung ding hi (Dan. 2:44, NKJV). Angei bang kik takpi ta! Akipatna dingin bel kumkikna ngak kul lo hi. Khazih sung a om mite in mi thak suak uh hi (2 Cor. 5:17); Zeisu bang ding in hong kamciam zo hi (Rom. 8:29). Amah in midangte zong apuah pha ding in apawlpi hong samm hi. *July 2, Nipini adingin, tu kal sinna hong lim-sin in maw.

 Nimasani (Sunday)                              June 26
Pasian Limm leh Meel 

 Laisiangtho in mihingte Pasian’ “limm leh meel” sunn in kipiang sak hong ci hi (Pian. 1:27). Limm pen limlang bang a mun 2 kilengg ahihkeh mun 3 kilengg milim bang zong hi thei hi. Lawn theih loh lungsim ngaihsutna, ih lungsim a ngaihsutna zong hi thei hi. Laisiangtho cihnop bang ahi tam? Pian. 1:26, 27 sim in. Pasian “limm leh meel” sun a kipiang sak cih Laisiangtho in hong bang ci gen hiam? Pian. 1:31; Thuhilhk. 6:5, leh 1 Thess. 5:23 zong en in. Tua ciangin Pasian in, “Ei lim ei tawh a kibangin mihing bawl ni, in, tuipi sunga ngasate, leitunga om huihlak vasate, innsate le a bokvak ganhingte khempeuh amau uksak ni,” a ci hi. Tua bangin Pasian in ama lim sunin mihing piangsak a, Pasian lim sunin amah piangsakin numei le pasalin amaute a piangsak hi (Piancil 1:26, 27). Pasian in a bawlsa na khempeuh mu a, a hoih mahmah hi. Nitak omin zingsang om a – ni gukna ahi hi (Pian 1:31). TOPA note Pasian na lungsim khempeuh, na hinna khempeuh na hatna khempeuh un it un (Thuhilhk. 6:5). Pasian mahmah, lemna Pasian in note hong siangthosak sinsen ta hen. Eite Topa Jesu Christ hong pai cianga kawkbaanna a om lo dingin na kha, na lungsim le na pumpite uh a bupin hong kepsak ta hen (1 Thess 5:23). Ih pu leh ih pi masa hong piansak a kipan Topa in leitung ah nuntakzia hong dinthak a: nu leh pa ahi uh hi. Pasian’ mel a kibawl amau gel bek hi phot lai uh hi. Amaute zawng pan a hong khangkhia hi lo uh hi. Mihing ahi amau leh eite in piansak nuntakna nei dangte tawh ih kilamdang a tua bangh lodeuh a ngaihsutna khat peuh in mihingte neusehna suak hi. Pasian in “amin uh Adam phuah hi.” (Pian. 5:2). Tua pen, nu leh pa, anih un, kibang lo in atuampian uh hang in khat ahi uh hi. Anih un, amau omzia teng ah Pasiann limm la uh hi. Pasian zia pen picing hi. “Piangsakpa’ khut pan Adam hong piankhiat hun in; cilehsa, lungsim, leh nuntakna thu ah apiang sakpa sunn hi” -- E.G.White, Pilsianna, Ed., p. 15. Hebrew laimal limm “cihna tselem hi a” “sunn” cih pen demuth ahihi. Hih kammalte in ciilehsaa lam, (tselem) leh sunglam (demuth) ahi nuntakna leh lungsim lam zong kihel hi. E.G. White muhna ah Pasian lim leh mel sun acih ciangin, “puatham kisutna leh zialehtongte agen ahi hi.” - Tulpite leh Kamsangte, PP p. 45. Thuhilhk. 6:5 in mihingte omzia nam tampi kihel a: khaa (nuntakna), lungsim (ngaihsutna), leh thatang (pumpi) te ahihi. 1 Thess. 5:23 sung ah zong akibang pian in hong gen hi. Pasian lim leh mel sun cih teh hih bang teng kihel kim hi. Hih teng leh adang tampi “Pasian lim leh mel” ah kihel a, Laisiangtho in hong gen cianna ah: mihingte tuampian in tumh dang hi. Piansak dangte tawh kilamdang mahmah hi. Hih kilamdanna ih ngaihsut den ding bang hang in thupi hiam?

 Ninihni (Monday)                                        June 27
Puukna leh Azomh 

 Laisiangtho in piansakna leh mawhna hong lut ma kikal bang tan sawt cih hong genlo hi. Ni, Nipi, kum, bang zah cih thei kei hang. Ih theih om sunh pen, puukna hun hong tung a, anungzui thupiangte’n hong nungzuih pahlian hi. Adam leh Eve te’n sialeh pha theihna singkung gah hong neek uh ciangin guaktang a om ahih lam uh hong kiphawk uh hi (Pian. 3:7). Pasian kiang pan kiliah sawm uh hi. Akhuavak puan uh tun beimang ta hi. (E.G. White, Tulpite leh Kamsangte, PP p. 57 en in). Pasian tawh akizopna uh pen a angsung khualna thusia uh in hong subuai hi. Mawhna’ piansak thusiate pan nupa masate pilsianna pia ding in Pasian hong kipan hi. Anuai a munte sim in la Adam leh Evete’ mawhna’ thusiate kawkkhia in. Tua bang ziate tu in zong kikoici muh thei hiam? Pian. 3:8-10 Tua ciangin mipa le a zi in, tua ni khuadaih hunin huan sunga TOPA Pasian paina huging za uh a, TOPA Pasian muhna pan huan sunga sing lakah a bu uh hi. Ahi hangin TOPA Pasian in mipa sam a, “Nang koi-ah om na hiam?” a ci hi. Amah in, “Huan sungah na gin ka za-a, guaktang a om ka hi manin lau-in ka bu hi,” ci-in a dawng hi. Pian. 3:12 Mipa in, “Kei tawh om dinga na koih numei – amah in singkung pana singgah tawm hong pia-a ka ne hi,’ a ci hi. Pian. 3:13 Tua ciangin TOPA Pasian in numei kiangah, “Na hihsa hih bang ahi hiam?” a ci hi. Numei in, “Gulpi in hong khema ka ne hi,” a ci hi. Pian. 3:16 Amah in numei kiangah, “Nau na suah ciangin a natnate ka khangsak mahmah ding hi; na sa mahmah in nau na suak ding hi. Na lunggulhna na pasal aa hi dinga, amah in nang hong uk ding hi,” a ci hi. Pian. 3:17-19 Amah in Adam tungah, “Na zi thu mangin, ‘Singkung pan ne peuhmah kei in,’ ci-a kong thupiak ne na hi manin, “Nang hangin leitung kihamsiat hi; na nuntak sung khempeuh gimpi-in na semin na kivak ding hi. Nang adingin leitung in lingkungte le kiakte posak dinga lo sunga kungte na ne ding hi. Leivui pana nang hong kila ahi nungsang lei-a na ciah kik mateng na tala khua-ul suahna tawh an na ne ding hi; leivui na hi manin leivui-ah na ciah kik ding hi,” a ci hi. Puukna pen atakpi hi a, haksa in, mihingte ading in khawk peuh mah hi. Leitung a asau vei, adah huai thupiangte in mawhna’ suksiatzia hong kilangh sak hi. Hih mawhna thusia pen hun khat ciang beimang in kipan kik nawn lo ding cih kamciam vai pen lunggulh huai mahmah hi. Nisim in ih mawhna thamanh athuak toto ih hih zia bangh ci bangh teng hiam?

Nithumni (Tuesday)                                                           June 28
Kihuatna leh Thukhat a Luanna 

 Pian. 3:14, 15 sim in. Pasian in Satan kiang ah, “nang leh numei kikal leh nasuante leh ama suante kikal ah kihuatna ka koih ding hi acih bang ci nuam hiam? (Pian. 3:15, NIV). Hih mun ah ei ading bang lametna mu thei ding ihi hiam?. Tua ciangin TOPA Pasian in gulpi kiangah, “Nang hih na sem khin na hi manin, “Innsate khempeuh le gamsate khempeuh sangin nang hong kihamsiat zaw hi!” Na gilpi-in na tal dinga na nuntak laiteng leivui na ne ding hi. Nang le numei kikal le nang suan le khak le ama suan-le-khakte kikalah kihuatna ka omsak ding hi; amah in na lutang suzan dinga, nang ama khetul na tu ding hi,” a ci hi (Piancil 3:14, 15). Hebrew laimal ah kigal-neihna pen muhdahna leh gal cih kammal tawh alaimal bul kibang hi. Tua sialeh pha theihna singkung gah anek uh ciangin, nupate in amau leh asuan akhakte uh Pasian tawh kigal-neihna lam hong tun’ uh hi (Rom. 5:10, Col. 1:21, James 4:4 en in). Hih mun ah Pasian in Amite Ama kiang hong tunpih kik nang lampi bawl in tua kigalneihna Ama kiang pan Satan tung tuk sak ding akamcian hi a tua bang in Ama ukzawhna thuguipi anokkhak sak hetlo dingin mihingte hotkhiat nang lampi asiall ahihi. Hih bang thu pen athu piankhiatna bul tawh en leng “thu khat ah luanna cih hi a mihingte puukna vai ah aki khahsuah khempeuh ditkikna hong bawlsa leh hong bawl laidingte agenna ahihi. Anuai a munte in thu khat ah luanna leh dikna vai ah bang hong kilanghsak hiam? Siam. 1:3, 4; 1 Cor. 5:7; 1 John 1:9. Tua biakna pen bawnghon pana meihal biakna ahileh a sitbaang lo a pa-in a bia ding hi. Tua pen TOPA santheih a suah nadingin Kikhopna Puanbuk lutna ah a pia ding hi. Amah in tua meihal biakna ganhing lutungah a khut nga dinga tua pen ama aitangin thoihdamna bawlna-in kisang ding hi (Siam. 1:3,4). Silngo sawh loh buhnel mekman thak na hi takpi bangun tua mah na suah nadingun silngo lui paimang un. Ahang in, Christ eite Paisan Tuuno in biakna i pia zo hi (1 Cor. 5:7). Eite in i mawhnate i pulak leh i mawhnate hong maisakin i thumaanlohna khempeuh hong siangsak dingin amah muanhuai-in a thutang hi (1 John 1:9). Pasian thungaihsut siamte in hih thukhat-aluanna vai ah bawlphatkikna cih kammal na zangh uh hi. Latin kammal bul expiare in “thoihkik” cihna hi a, tatkhialhna bawlphatkikna ahihi. Mi khat in ahoih lo bawl kha in thukham palsat a thudik thumann in dantat ding phamawh sak hi. Mangte’n, mitatsiate in asep abawlnate uh pan “mihon tung ah leiba” nei na ci uh hi. Ei vai ah mawhna ih nei a ahi zongin hotkhiatna geelna vai ah thukhat a luanna ahi eite tang a Khazih hong sihna in tua tatkhialhna gau pan hong thawvengg sak hi. Khazih ngiat in eite mawhna’ gauu hong ditkik sak ahihi. Pasian ukna thu vai ah eite tuah ding gauu pen Zeisu in hong thuak laizang hi. Tua bang in thumann in angetna teng ei tungtawn hi lo in, Khazih tungtawn in hong cingtaak ta hi. Mawh neite ih hi a, ih khialhna hang in hong kimawh sak in Ama mai ah dik ih tangg hi. Hih thu in “van nuai teng ditkikna thu” ah thu tawphahpi ahi hi (Sawl. 3:21, NKJV). \

Nilini (Wednesday)                            June 29
Zeisu Sung ah Ditkikna 

 “Na sung vuah Khazih hong pian takpi dong “nau suah natna ka thuakpih ngiat ka tanote aw” (Gal. 4:19, NKJV). Pauban’ omlo a piansakte ih hihi. Kamsiathuai tak in mawhna tungtawn in pukma Paradise pen kitaan ta a; sihna, thuakna, launa, khakngalna, leh awlmawhlohnate tawh hong dim hi. Hih leitung in paubang lo, angei abat kik nang in hotkhiat geelna hong piang hi. Puukna ah akitaan khempeuh ngahkik nang in Khazih hong pai hi. “Akipatcil in Pasian in Amah sunn in mihing piangsak hi. Adeihhuai teng pia hi. Alungsim kikhaikim a apumpi bup in et-lawm in kituak kim hi. Ahi zongin puukna in hih silpiakte siasuak sak hi. Mawhna in, mihingte’n Pasian asutna teng, zuutsiang mang dek mai hi. Hih thute ditkikna dingin hotkhiatna vai hong kipankhia a, mihingte suahtak nang lampi hong kisiall hi. Paubang lo a, aki piansak cil lai abat kik ding pen nuntak’ mungtup hi a - mungtup dangte khempeuhte’ bulpi ahihi.” -- E.G. White, Tuulpite leh Kamsangte, PP p. 595. Tua ditkikna pen leitthak leh van thak mateng apicing kim nailo ding ahita zongin, tu mahmah in eite sung ah kipan khin ta hi! Gal. 4:19 sim in. Acih lian thu bang bang hi mah leh hih mun ah Paul in kha lam vai bang vai thupi agen hi mawk hiam? Note sungah Christ lim a kilat matenga nausuahnat thuak banga kong thuak kik kong it tate aw (Gal. 4:19). Heb. 1:3 sung ah Khazih ngiat pen Pasian limmleh mell bang in hong ki gen a - “Amah ngiat mah hong musak” NKJV ahihi (John 14:9, 2 Cor. 4:4; Col. 1:15 tawh saikaak in). Eite sung ah Pasian limm leh meel hong guan kik nuam hi. Ih thukim leh, Pasian limm leh meel ahi Khazih “note sung ah aom, avang lian lametna” ih sung ah hong om thei hi (Col. 1:27, NKJV). Apicing taktak ditkikna pen Zeisu anih veina hong pai ciang in ih ngah ding hi (1 Cor. 15:49, 1 John 3:2 en in). Ahi zongin Khazih ih sung ah hong om a eite Khazih sung ah ih om ciangin, tua ditkikna hih simlei ah hong kipan khinta hi. Tua bang hong pian takpi ciangin ih mipihte adin kik thei Pa kiang ah ih zuatpih nuam mahmah ding hi. Tua ditkikna eite sung ah tu mahmah in akipat khit hangin Zeisu hong kumkik ciang, picing takpi pan ding cih ih phawk bang hang in kul den hiam?

 Ningani (Thursday)                                             June 30
Ditkikna Vai Pawlpi’ Masuan 

 Paubang lo a kipiang sak ih leitung hong puuk in thubuai in hong kualvial hi. Ahi zongin nate thu - kante cih bangin tawntung siatna sung ah Pasian in hong mawk nusiat lo hi. Simlei pian ma limh in hotkhiatna vai sehsa hi a (1 Pet. 1:2 en in). Amah mah hong kipia in hih leitung ah Zeisu hong pai in, singlamteh ah hong thuak a, hong paikik ding in hong kamciam hi. Vai khempeuh siang a, mawhna akisuksiat ciangin, apuksa hih leitung angeii hong bangh kik ding hi. Alamdang thu in bel Pasian in eite, apawlpi tu mahmah in tua ditkikna nasep masuan ah mapang ding in hong khoo hi. Mark 2:1-12 sung ah lawmta pawl khatte in pumzaw mi Zeisu kiang hong zuatpih uh hi. Hih thu in mihingte damhsakna leh angei batsak kikna vai hong bang ci lah hiam? Ni tawmvei khit Capernaum ah Jesu a lut kik ciangin inn tung kik hi, cih thu mite in a za uh hi. Inn pua nangawnah om nading om lo zah dongin mi tampi va kikhawm uh a, amah in amaute kiangah thu a hilh hi. Mi pawlkhat va pai uh a, mi li in a zawn pumzaw khat a kiangah a paipih uh hi. Mihonpite hangin Jesu kiang a tut theih loh manun Jesu tung santak innkhum phelkhia in vangsak uh a, tua ciangin a zawna phekin pumzawpa a khaisuk uh hi. Jesu in amaute upna a muh ciangin pumzawpa kiangah, “Tapa aw, na mawhnate kimaisak zo hi,” a ci hi. Tua lai-a tu thukham siate pawlkhat in,” Bang hangin hih pa tua bangin pau ahi hiam? Amah in Pasian a gendai hi! Pasian longal kua in mawhna maisak thei ahi hiam!” ci-in a ngaihsun uh hi. Amaute lungsim sunga a ngaihsutna uh Jesu in a kha-in theipah ahi manin amaute kiangah, “Hih thute bang hangin ngaihsun na hi uh hiam? Pumzawpa kiangah, ‘Na mawhnate kimaisak zo hi,’ cih ding le, ‘Tho in, na phek la-in pai in,’ cih ding koi baihzaw ahi hiam? Ahi hangin Mihing Tapa in hih leitungah mawh maisak theih nading thu nei hi, cih na theih nadingun...,” a cih khit ciangin pumzawpa kiangah, "Tho in, na phek la inla innah ciah in, kong ci hi,” a ci hi. Amah tho a, a phek la-in amaute khempeuh muhin a paikhia hi. Mi khempeuh in lamdang mahmah sa uh a, “Hih bang peuhmah mu ngei nai kei hang maw!” kici-in Pasian a phat uh hi (Mark 2:1-12). Zeisu tua inn ah om ahih man in mi dimlet hi. Mihingte a it a deihsakna in mihonte huup hi. Tua mi 4 te in lungsim, pumpi, leh kha lam a anawngkai adamlo mi Zeisu kiang hong zuatpih uh hi. Zeisu in amawhnate Amaisakna tungtawn in, lungnopna guan in kalsuan ding in thupia hi. Apum atangg a ditkikna angahlote adam kik taktak ahih theih ngeilohna thu lak hi. John in Zeisu hih leitung a hong paina thu bangh hi ci in hong telgen hiam? Hih kamciamte pan bangh lametna ih ngah thei ding hiam? John 10:10, 1 John 3:8 sim in. Gutate ahileh, a gu ding, a that ding le a siasak ding beka pai ahi hi. Kei ka hileh amaute in nuntakna a neih nading, adim a neih nadingun hong pai ka hi hi (John 10:10). A kipatcil-a kipan dawimangpa a mawhden ahi manin mawhna a bawl mi peuhmah dawimangpa pana piang ahi hi. Pasian Tapa hong kilatna ahang pen dawimangpa nasepna a susia ding ahi hi (1 John 3:8). John 10:10 in SDAte thupuak tomkaih ahihi kici ngei hi. Hih thu in Khazih’ nasep masuan agen ahihi. Khazih pumpi ahi, Pawlp in Ama khekhap zui a dawi nasepna ahi sihna pen apicing nuntakna tawh laih a; bawlphat ding ahihi (Sawl. 10:38; 1 John 2:6 en in). Mihingte pumpi, lungsim, leh kha lam vaite khempeuh Pasian limleh meel asun kik ding a ditkikna nasepna ah Khazih tawh mapang ding in pawlpi hong kikhoo ahihi. Akitangsamh mite na piaktheih ding a naneih nakep silpiakte akitanggsamh kuate khawng hiam? Kiginni

(Friday)                                                                              July 1
 Ngaihsut beh Ding: 

Pasian limleh mel neih-theihsak nang thute: Rom. 8:29, Col. 1:15, 3:9-11, 2 Cor. 3:18, 5:17. E.G. White, “Piansakna,” “Ze-etna leh puukna,” leh “Tatkhiat ding gelna” vaite, Tuulpite leh Kamsangte, P.P. pp. 44-70 ah sim in. Midangte hoih nading a Zeisu sung ah hong kipia angei batkik nang thu ahawmsawn ding in hong kikhoo hi. Midangte ading a lametna kamciamte asem ding in eite hong kikhoo hi. Topa in lam tampi zangh in eite tungtawn in na sem thei hi. Pawlpi pawlkhatte in aveng apaamte uh tawh cidamna lam sepna tungtawn in mite panpih thei uh hi. Ih pawlpi zato leh cina donna nasep tuamtuamte zong ngimna kibangh mah ahihi. Lungsim puahphatna leh phungvuhnate tungtawn in nuntakna’ kisapnate mihonte ki hawmsawn thei hi. Pawlpite in sang te phut in puah in, khut siamna, lai theih siamnate, hilhsawn siamna, midangte pattah theihna,leh lungsim ngaihsut-zia lampi’na cihte ahihi. Angei batkikna leh nuntak picing vaite asin akannate uh tungtawn in lungsim leh kha lam aki-tangsapnate angaihsut khak ngeihlohte uh hong phawk ding uh hi. Hih bang thute in Pasian limm leh meel sutkik theih nang tawhtang bang ahihi (Eph. 4:22-24 en in).
 Pawlpi pen cidamna leh thudangdangte ahawmkhia kipawlna dangte sang in hawmkhiat siam thei ding a tuampian tak a om khalam kitanggsapnate amakaih, apanpih thei ding a ngaihsut leh lamet ahihi.
 Kikup Dingte: 1. Na veng na paam uh ah pawlpi in pumpi, lungsim, leh khalam vai ah bang teng semkhia thei cihte ngaihsun in. Na pawlpi in bang teng khawng sepsan hiam? Na pawlpi sep theih puah phat kikna leh angei batkik nang nasepte kikumkhawm ni.
 2. Pumpi lam angei batkik nang a kipuahphatna vai na koici telsiam’ hiam? Bang zah in mite cidam ding in ih hanciam pih mah zongin, Topa hong paipak nai kei leh natna ngah in teek veve ding hi hangh. Hih bang thute in angei batkikna vai pen, Zeisu hong kumkik khit ciang picing taktak pan ding ahihzia hong koici tellah suak hiam?
 3. Tu tawm a Pasian lim leh mel sut ding vai na ngaihsutzia kikup bawl ni. Hong koici pian theih ding hiam? Ih khantohzia koici theih thei ding? Hong pian theih takpi nang in Pasian zia ih telsiang bang hang kul se hiam? Ei ngaihsut bang a ih khantoh mel kei leh lungkiat ngaihsut in khawlbawl kha mawk lo ding in koici om thei ding ih hi hiam? ​

Sabbath School Lesson Zomi 3rd Quarter 2016