Zo Phualva Thupuak Vol 02, Issue 06: CH R I S T IAN T E ’ PA S IAN IN PA S IAN MA AN TAK TAK HI

Ni dang lai-in, khua khat ah mihingte leh Tawmite kihel in tengkhawm uh hi, cih tangthu khat om hi. Mihingte in Tawmi nungakte ngai in, Tawmi tangvalte in zong mihing nungakte ngai thei zel hi, ci uh hi. Khatvei Tawmi tangval hoih mahmah khat in, mihing nungak hoih mahmah khat ngai a, nungaknu in, Tawmi ahihlam thei lo iin, kiteeng kha uh hi. A lupkhawm cilnii zan un, Tawmi pa in, azi kiangah, “Lawm aw, nong kawi ciangiin ka kawng nuaisiah hong kawi ken maw” cingiau hi. Nungak nu zong bil pilpah gige aa, alawmpa ihmut khit ciangiin, damtakiin akawng nuaisiah ava zawt khialkhial leh, mei nei zelzal mawk aa, amah zong kangtakiin thokhia iin, zuntha ding bangiin kibawl in, a inn lam uah ciahpah vingveng hi, ci hi. Tua numei pil ahih maniin suakta hi, cih tangthu tomno khat om hi.

Tua mah bangiin Pasian bia mah hi veve napi iin, dawi deihna zui ahipawl om aa, tuate pen, Pasian’ deihna bangbang azui nuam takpi pawlte tawh kihel zau iin kiteng hi. Tu a kong thugen ding pen, Pasian’ deihna bang ahi hiam? ci-a zonkhiat nopna takpi tawh kigen ding ahih ciangiin, hibang thu kigen zelnate ah, Pasian’ deihna bang taktak, azongkhia nuam se khol lo, a pawlpi omsa maan in maan takei leh akip nading ahanciam veuvau pongmawk mi pawlkhat om zel aa, tua bang mite in, "Hi thu kigente vangai sedah un," ci-in alawmte khamm thei hi. Tua bang a khamm a om leh, LST thu pen thuthuk aa theihhak ahih man iin, vangai kei leng bangci theihtheih mawk ding ihhi hiam? ci-in kisittel huai hi. Banghang hiam cih leh, tua amikhamm pawlte in, a mei akilawn khak ding alau nahi hamtang ding hi.

Minam khempeuh in, Pasian na neitek lel uh hi. Amau theihna sunga alian penpen ciat Pasian ci-iin na minvawh tek uh hi. Tua bangaa Pasian ci-aa aminvawh tek tei uh hangiin, amau Pasian mah pen, azia atong bangmah thei se lo uh hi. Amau Pasian mah pen bangcia-aa lian aa, bangzahaa vanglian aa, bangteng bawl-a, bang zah iin hau-aa, koi gam teng ukaa, cihte thei se lo uh hi. Phoneciate bangin Adonai na ci aa, tua pen tanglai-a pau om masate Persiate in, Kuros, Muslimte in, Allah, Hindute in, Khuda, Kawlte in, Phaza, Mangte in, God cih bangiin Pasian cihna nanei tek uh hi. Ahih hangiin Khristiante’ Pasian pen bel, Piangsakpa Pasian hi aa, 1Kor 8:5 in, Pasian a kici tam aa, Topa a kici tampi om ahih hangiin, amaan Pasian taktak pen khatbek om hi. Rom1:25-ah Mihingte in, amau piangsakpa Pasian thei lo uh ahih maniin, apiangsakpa nusia iin, aki piangsakte biazaw uh hi. Rom1:22 ah, Amaute kipilsak mahmah laidepp uh aa, akip Pasian ai-awh iin, milimte peuh biamawk uh hi. Rom 3:29 ah, Pasian in, Jewste’ Pasian bek hi lo-aa, mipawl khempeuhte leh muhtheih muhmawhte’ khempeuh Pasian hi zaw hi. Tua hi aa, ei theih baih nadingiin, amaan Pasian pen, piangsakpa Pasian hi. Ama deihnate LST sungah hong kigen aa, tua Pasian pen, Pasian maan hi, cih ih theih phot kul ding hi.

Hi mah hi. Khristiante in, Pasian in, nakhempeuhte piangsak hi, ci-iin um uh hi. Akipatcil iin, Pasian in khuavannuai khempeuh bawl hi. Gen 1:1. Vs 3-5 ah, Amasa iin khuavak bawl hi. Vs.6-8 ah, Khua-kawhawm bawl hi. Vs.11-13 ah, Khaicite bawl hi. Vs.16-19ah, niite, khate, aksite bawl hi. Vs.20:23ah, Huihlak ganhing leh tuisung ganhingte piangsak hi. Vs.2:2,3. A ni 7 nii pen tawlnga iin, thupha pia iin, siangthosak hi. A bawlsate khempeuh enkik aa, tua nii pen thupha piakna nii in zang hi. A bawlsate uh'n zong, Amah a biak nii ding uh, amaute piangsakpa aphawkna nii dingun, atuam vilvel in sehkhia hi. 

Ex20:8-11 ah, Ni 6 sungin nasep ding khempeuh sem inla, ahih hangiin ani 7 nii pen, na Topa Pasian’ Sabbath nii hi aa, siangtho takiin natang ding hi. Banghang hiam cih leh Topa na Pasian in, ni 6 sungin van le lei leh tuipi leh asunga om khempeuh bawl khin aa, ani 7 nii pen tawlnga-iin, siangtho sakiin, thupha pia hi. Tua ni in, nang akipan, na tate, na nasemte, na zinte, leh na ganhingte dongiin bangmah na sem sak kei ding hi, ci-iin Upadi sawmte sungah aliina in na guang hi. Hi lai sim mimal khempeuh Topa kilam thakna hong suaksak tahen. 

 Kimnu/nunu 

Zo Phualva Thupuak - Volume 02, Issue 06 by DavidLian on Scribd