Zo Phualva Thupuak Vol 02, Issue 05: TUIPHUMNA TAWH KISAI

TUIPHUMNA TAWH KISAI

Christian thu-um mikhempeuh in, Jesu khekhap zuih ding simloh a dang omlo hi. Christian pawlkhatte in umlua kisa-in, Jesu lahna ciangtawh lungkim zolo uh hi. Amaute ngaisut hoih tuamtuam zangin Jesu maimuh sawm uh hi. Pasian sawlloh ngeina khempeuh pen Cain biakna tau tung aa kikoih khaigah limci mahmah tawh kibang hi. Vantung panin meikuang kia suk ngeilo hi. Tuni-in Jesu hong lah tuiphumna thu ih kantel suksuk ding hi. /dxAma ngimna piallo theithei dingin i kalkhia ding hi.

"Note vak kawikawi unla, mikhempeuh Nungzui nasuah sak khit uh ciangin, Pa min, Tapa min, Khasiangtho mintawh tui naphum un. Keimah in kahong piak thukham khempeuh a zuihna dingin nahilh un, Note tawh leitungbei dongin ka hong omkhawm ding hi." Matt. 28:19-20.

Himunah thumaan tampi kimu khia thei hi. Mipum thum ahi, thumgawm Pasian in a kilang mahmah in amau nasep ciat hong seem ahihna hong kilang hi. Pa ahi Pasian in thupia a, Jesu Honpa-in hong si hi. Pa ahi Pasian in thupia a Khasiangtho Huhpa eite sungah hong omsak hi. Thumgawm Pasian umlote thuhilhna zong hipah hi.

Hotkhiatna saang mikhempeuh tungah Pasian thukham hilh kul a, tua lo-in tuiphum lohding ahi hi. Ahizongin khua-vak muh zah kikimlo ahihmanin ahun zui-in kilamdang kha ding hi. Tua pen SDA Pawlpi in kiplet mahmah hi. Upna thuguipi teng bansotin kihilh ngiatngiat hi. Pasian tanu tapa nasuakzo hi, ci-in vantung thukim pihna zong tuiphumna tungpan kikhensat ahi hi. "Jesu tui sungpan hong dintoh phetin, vantung kihong a, vakhu bangin Pasian Khasiangtho hong kumsukin, ama tungah hong tu hi. Vantung panin aw khat hong ging a, "Hihpa in Ka-it mahmah Ka Tapa ahi hi, Ama thu namang un," a ci hi. Matt 3:16-17. Pasian leh hong paisak Jesu khekhap zui khempeuh pen Pasian ta, misiang-tho, nungzui kisuak ahi hi.

Jesu sihna leh thawhkikna phawk Christian pawlkhat in, Jesu sihni pen kiniamkhiatni ding hi, ci-in sa nelo uh hi. An-tangin thungen zong tam mahmah hi. Good Friday signboard lianpi suang uh hi. Kikhopna nasiatakin zang uh hi. Tuapen mihingte muhna-ah siatna khatzong omlo hi. Topa sihna phawkna dingin a Sihni thupisak ding hilhkholhna omlo hi. A thawhkikni zong kitang hi. Tuhunin Ester Sunday zong pawilian mahmah hong suak hi. Mihing muhna ah ki-lawmin zahtak kai mahmah hi. Tua ngeinate laisiangtho lamlahna sungah kihel lo hi. Nungzuite in Khasiangtho hil-hna tungtawnin Laisiangtho sungah teltakin hong hilh khin hi.

Hibangin nagen uh hi. "Christ Jesu tawh i kipawlthei-hna dingin a kituiphum eite in, Ama sihna mahah a sikhawm ihih theilo na hi uh hiam? Pa vangliatna tawh sihna panin Christ a kithawhsak kik mah bangin, eite zong nuntakna thak i nuntak theihna dingin tui i kiphum ciangin Amah tawh kiphumkhawmin a sikhawm ihi hi." Rome 6:34. Tuiphumna in limciin tampi nei hi. Mawhna sawpsiangna lim bek hilo hi. Jesu sihna leh thawhkikna zong limciing khawm ahi hi. 

? Kimnu/nunu

KA THADAH IN KEI HONGPUAH.

1. Annek sabuai (desk) ka nul thadah ahih man in an ka nek teh anneng ka kiasak kei hi.

2. Ha ka nawt thadah ahih man in annek hunlo akikal ah naneng ka nei kei hi.

3. Na ong kisawl mun teh ka lungtom in ka thadah tektek thei ahih man in ong kisawl ma in ka sem gai pah hi.

4. Thu kahilh teh ong kidot kikkik pen ka hu sam in ka thadah ahih man in akitel siang setset ding in thu kahilh hi.

5. Sangkah a laisim pen ka thadah ahih man in lai sawtpi simloh nading in laihoih tak kasim pah hi.

6. Naham sem in sum thalawh pen ka thadah mahmah ahih man in pilna ka hoih zon hi.

7. Nasep sawtpi sep ka thadah ahih manin ka nawhsep hi.

8. Mi dang kiangah, gamdang ah nasem cih ka kingaih sut teh ka thadah ahih manin kei gam kei leitang ah nasep theih ding ka gel ciang gam itna lungsim mit ong keuh pah hi.

9. Thukham tampi khung a zuih gaih ding pen ka thadah mahmah ahih ciang in thukham kullo itna ka nei nuam pah hi.

10. Zato pai, zatang nek , hell gam pai cih te ka thadah mahmah ahih man in ka pumpi Pasian khasiangtho ten na hi ci in lei-tung pumpi deihna te kikham in Laisiangtho sung a thu om bang in anne, gamta, kam ka pau hi.

? Elder Pau Suan Khai (PaaKhai)

CIDAMNA THU (Khansau-na Ding:)

u Khansau-na ding tawh kisai 1/3 (sehthum suah sehkhat) pen gui zui hi a, adang 2/3 pen ei kidop siamna ahi hi.

u Na khan kum, Kum1 na sau zawksak nop leh naupangte tawh kimawl in or ganhing (ui) te tawh kimawl in.

u Kum2 na sau zawksak nop leh kal1 in 3vei ta bek nupa ki-itna zang khawm un.

u Kum3 na sau zawksak nop leh ni1 in nai3 ta exercise (ki loknalna) bawl in. (Tuadan na hih zom det leh kumzawn natna, TB natna, cancer, zumkhum sikhum te kingah lo hi.)

u Kum4, 5, 6 na sau zawksak nop leh na ha siangtak in nawt den in. Ha ih taih siang det kei leh ha-ni pan lungtang ah bacteria lungno te lut thei hi.

u Kum7 na sau zawksak nop leh na khempeuh ahoih lam vive in mu in.

u Kum8 na sau zawksak nop leh khamtheih guihtheih khem-peuh zang kei in.

u Kum15 na sau zawksak nop leh kumpi Hezekiah bangin Pasian muang in.

?  Sianu Aye Cing