Zo Phualva Thupuak - Vol 01, Issue 19: CHRISTMAS THU by Rev Dr Cin Sian Pau

December kha hong tun ciangin, Christiante sangin, Christian ahi lo, Pasian athei lo, suahni neipa Jesu mah-mah a um lo, zong athei kha ngei lo, Leitung mite lawpzaw tham uh hi. Nam khat pan en leng, lungdam huai tawh a kibat hangin, a langlam pan en leng, ngaihsut huai mahmah thu hi.

Jesu lah um peuhmah lo a, Ama’ suahni (Birth day) (or) Christmas lah limbawl mahmah cih pen, thu lam-dangpi khat hi. Mite’ sum zonna nam khat bel himah hi. Ahi zongin Christmas tawh kisai-in tanglimin, bangci kizat hiam, cih ih theihnading Laisiangtho tungtawnin kikum ni.

I. Lai Siangtho Sunga Suahni Pawi Bawlte

A. Lai Siangtho Lui (Thukhun Masa) Suahni pawi:

(i). Pharaoh kumpi pa’n asuahni pawi bawl hi. Pian. 40:20.

(ii). Pharaoh pen Pasian thu um lo hibek thamlohin, Pasian galpa ahi hi.

(iii). Pharaoh suahpawi in, a anhuanpa’ ngawng kitan hi.

B. Lai Siangtho Thak (Thukhun Nunung) Suahni pawi:(i). Herod kumpi pa’n asuahni pawi bawl hi. Mtt. 14:6, Mk. 6:21.

(ii). Herod zong thu um lo mah hi a, Jesu a thah nopna hangin, naupang kum2 nuaisiah athat, Jesu’ galpa mah hi.(iii). Herod suahpawi ah tuiphumpa John’ ngawng kitan hi.

Hih Lai Siangtho Lui leh Lai Siangtho Thak a, suah-pawi bawlte nih pen thu um lo, Pasian leh a Tapa’ galte’ zat pawi ahi hi.

II. Christmas (Lungdam Pawi)

Christmas ih cih pen, Jesu’ suahni, (Jesus’ Birthday) ahi hi.

A. Jesu Suah ding ki genkhollo:

Isa. 7:14. Topa mah in, note tungahlim khat hong pia ding hi. En un, nungak khat gai-in Tapa khat nei dinga, ama min Immanuel kici ding hi.

B. Genkholhna tanggtung:

(i). Matt.1:18-25. …….David suan Joseph aw, nalaw-mnu Mary na tenpih dingin, lung himawh kei in. Ama’ gaina in, Kha Siangtho gaisak hi. Amah in Tapa anei ding hi. Tua Tapa in ami pawlte mawhnate sung pan a gumkhia ding ahih ciangin amin Jesu na phuak ding hi, ci-in ahilh hi. Tua thu khempeuh in Topa in a kamsangte tunga a genkholh bangin atun nading ahi hi. Tua thu genna in: (Isa. 7:14.a bang)

(ii). Gal. 4:4. Ahun acin ciangin, eite in Tapa za ih ngah nadingin, Thukham khut huai mite tan dingin, numei gil sungah hong gai-in, Thukham khut nuai ah a hong suak a Tapa, Pasian in a hongs awl hi. Tua bangin note in tate na suak uh ahih ciangin,“Abba Pa” cisak in……

C. Jesu’ Suahni Phawkna pawi bawl ding vaikhahna om lo:

(i). Topa Jesu in, hih Leitungah kum 33 val a om sungin, a suahni (Birth day) khat vei beek bawl ngei lo hi.

(ii). Topa Jesu’ nu Mary leh Joseph ten zong a it mahmah a tacil (Kha Siangtho tawh aneih ta) adingin khat vei beek suahni pawi bawlsak ngei lo hi.

(iii). Nungzuipi ten zong Topa Jesu tawh kum 3 val bang a kithuah uh hangin, Suahni pawi khat vei beek bawlpih ngei lo uh hi.

Topa Jesu in zong, nungzuipite tungah Suahni pawi bawl ding, kam khat beek vaikhak ngei lo hi.

(iv). Christian masa ten zong Suahni pawi na bawl ngei lo uh hi.

(v). Topa Jesu in, Vantung a kahtoh ma in, “Kei nong phawk nadingun, ka suahni (Birthn day) pawi na bawlsak un; tua pen Christmas kici ding hi” ci-in vaikhak ngei lo hi.

(vi). Paisan pawi anek ni-un, “Kei nong phawk nadin-gun, hih bangin na bawl un,” ci a, tua pen “Nekkhawm” bawlna hipah hi. Vaikhahna ahih manin tu dongin kibawl hi. Luk. 22:19.

III. Suahni Samsia:

A. Job in suahni pawi bawl ding cihthadah, samsia zawsop hi. Job 3:1-11.

B. Jerimiah in zong a suahni samsia hi. Jer. 20:14,15.

Thukhupna:

(i). Tua hi a, Christmas pen, Jesu a um lo teng, han-ciamna pawi hi a, Jesu tawh kisai lo hi.

(ii). Sunday ni pen, Jesu a um lo, Leitung a biakna tuam-tuam te’n atan mah abang ahi hi.

(iii). Suahni neipa Jesu mahmah in, khat vei beek suahni pawi bawl ngei lo banah, bawl dingin zong vaikhak ngei lo hi. Suahni nei pa’n zong bawl ngei lo ahih leh kisam sa lo hi ding hi. Kisam sa leh bawl zo ngel ding hi. Tua ahih manin, Topa Jesu’ thupiak bang Lai Siangtho hong gen banga anungta nuam, azui nuamte adingin Christmas pen kisam lua kei leh kilawm hi. Lai Siangtho sunga hongs awl khempeuh, hih zawh loh, zuih zawh loh kawmkal ah, hongs awl lohpi ih va hihkhak pen Pasian langdona hithei hi. Kidop siamin, pilvang tak a gamtat ding thupi hi.

(iv). Ani leh a hun ki thei lo hi. December 25th ni zong amaan hi lo hi. Mihingte phbuahtawm hi. A taktak in, “NI” biate pawi ahih man, Leitung mi khempeuh phialin diksa uh hi. (Jesu phawkna in December kha zong “Sweet December” cih ngam huai hetlo hi).

(v). Sawl lohpi ih sep sang, hong sawl nate, limtakin mangzaw leng, Pasian’ maipha ih ngahzaw kei tam! Christ-mas abawl nuam teiteite’n hih thute phawkkawmin, bawl ni.

Ngaihsut ding: Jesu adingin, a suahni pen:

(a). Pasian’ Tapa pan Mihing’ tapa (Son of man)

(b). Gamhluah zaa pan Pemta (Alience)

(c). Topa pan Sila/Sal (Slave)

(d). Kumpi pan Nasem (Servant) a suahna hi a, Ama’ adin-gin, lungdam huai hetlo ahih man, dahna khitui tawh adim ni ahih man, Birth day bawl ding, a vaikhak lo hikha ding hi.

Gupkhiatna thu ahi, Lungdamna thu (Gospel) sungah-Jesu’ suahna kihel lo hi. Asihna, Akivuina, Athawhki-kna bek om hi. I Cor. 15:3,4.

Rom. 6:3,4. Khris Jesu sungah a kibaptaiz eite khem-peuh in, ama’ sihna sungah kibaptaizna ih ngah hi, ci-in thei lo nahi uh hiam? Tua ahih ciangin sihna ah baptaizna in, Jesu tawh ih kivuikhawm hi. Khris in Pa’ vangliatna tawh sihna pan hong thawhkikmah bangin, eite in zong hinna thak ih zuih theih nading ahi hi, naci a, Gupkhiatna sungah Jesu’ suahna kihel loin, a sihna, akivuina, a thawhkikna bek kihel hi. Hih gupkhiatna a kihel, a sihna, a kivuina leh a thawhkikna nangawn, sihni pawi, kivuini pawi, thawhkikni pawi bawl dingin, na vaikhak lo lai hi. Tua manin zong Suahni pawi bawl ding, ahah gen lo hikhathei ding hi.

Bangbang hileh, nidang lai, Christian masa te’n zong abawl loh uh, “Ni pasian” biate huzapna ahih man, pilvang takin ngaihsuthuai mahmah ding hi. Christmas bawl huai leh bawl huai lo cih ei tekin khen ciat ni. A telsiam dingin To-pa’n thupha hong pia ta hen. Amen! By, Rev. Dr. Cin Sian Pau.